Hebreos 12:5 - Triqui de San Juan Copala

⁵ Ne̱ a̱j niꞌyón soj chrej nucua̱j no̱ rihaan Danj Yaꞌanj, raj a. Dan me se ase vaa taꞌníí Yaꞌanj vaa soj, taj nana̱ yoꞌ chugua̱nj. Ne̱ nihánj me taj nana̱ yoꞌ a: Taꞌníj neꞌej, cu̱nó so̱ꞌ caꞌmi̱j á. Se̱ guun nachri̱ꞌ so̱ꞌ chrej nucua̱j tucuꞌyón Yaꞌanj Si̱j ꞌNi̱j Raꞌa man níꞌ mán so̱ꞌ maꞌ. Ne̱ se̱ quiriꞌ rá so̱ꞌ asa̱ꞌ caxríj yuva̱a̱ soꞌ mán so̱ꞌ maꞌ.

Hebreos 12:5 ပူးပေါင်းရင်းမြစ်များ

Apocalipsis 3:19

Dan me se ꞌu̱nj roꞌ, narqué ꞌu̱nj chrej nucua̱j man nu̱ꞌ nij síí ꞌe̱e̱ raj man, ne̱ qui̱ꞌyáj sayuun man nij soꞌ sese se̱ cuno nij soꞌ rihanj chugua̱nj. Cheꞌé dan gu̱un niha̱ꞌ rá soj cuno̱ soj rihanj, ne̱ ca̱nica̱j nimán soj canoco̱ꞌ soj chrej sa̱ꞌ á.

1 Corintios 11:32

Tza̱j ne̱ ma̱an cheꞌé se nij ꞌyaj níꞌ, rá Síí ꞌNi̱j Raꞌa man níꞌ, ne̱ cheꞌé dan ꞌyaj soꞌ sayuun man níꞌ, cheꞌé rej nari̱ꞌ níꞌ da̱j quiꞌya̱j níꞌ cavi̱i̱ sa̱ꞌ níꞌ ado̱nj. Sese nari̱ꞌ sa̱ꞌ níꞌ chrej sa̱ꞌ, ga̱a ne̱ se̱ quiranꞌ níꞌ sayuun quiꞌya̱j Yaꞌanj, asa̱ꞌ quiꞌyaj soꞌ sayuun man cunuda̱nj yuvii̱ ma̱n rihaan chumii̱ nihánj maꞌ.

Santiago 1:12

Síí nucua̱j nimán rihaan sayuun roꞌ, soꞌ me síí cavi̱i̱ sa̱ꞌ, ne̱ asa̱ꞌ quiꞌyaj canáán soꞌ rihaan sayuun, ne̱ rque̱ Yaꞌanj se sa̱ꞌ man soꞌ ase vaa rqué nii ꞌo̱ cachriin coroná sa̱ꞌ cu̱nuû raa̱ ꞌo̱ síí quiꞌyaj canaán a. Ne̱ se sa̱ꞌ yoꞌ me rej caꞌve̱e ca̱yáán so̱ꞌ ga̱ Yaꞌanj nu̱ꞌ cavii nu̱ꞌ caꞌanj, nda̱a vaa cataꞌ tuꞌva Yaꞌanj se vaa ya̱ quiꞌya̱j Yaꞌanj cheꞌé nij síí aráj cochro̱j rihaan soꞌ a.

Hebreos 12:7

Dan me se sese gu̱un nucua̱j soj ga̱a axríj yuva̱a̱ Yaꞌanj man soj, ne̱ cuna̱j ndoꞌo vaa yoꞌ na̱nj á. Dan me se ase ꞌyaj nij síí ma̱n chumii̱ nihánj ga̱ taꞌníí soꞌ roꞌ, da̱nj ꞌyaj Yaꞌanj ga̱ soj chugua̱nj. Ne̱ me xnii me ꞌo̱ soꞌ sese ne tucuꞌyón rej soꞌ chrej nucua̱j man soꞌ ga̱.

San Lucas 24:6

ꞌO̱ se nuviꞌ soꞌ naj nihánj a̱ maꞌ. ꞌO̱ se cunuu iꞌna̱ꞌ uún soꞌ na̱nj á. Dan me se nanu̱j rá soj se vaa cataj soꞌ ga̱a va̱j nij soj estadó Galilea a. ꞌO̱ se cataj xnaꞌanj soꞌ rihaan soj se vaa

San Lucas 24:8

Dan me se nanuj rá nij chana̱ nana̱ caꞌmii Jesús a.

Gálatas 6:9

Se̱ guun rmi̱i̱ níꞌ quiꞌya̱j sa̱ꞌ níꞌ maꞌ. Sese se̱ quiriꞌ rá níꞌ, ne̱ quisi̱j güii cachrón Yaꞌanj, ne̱ sa̱ꞌ uxrá doj cavi̱i̱ níꞌ, quiꞌya̱j Yaꞌanj ado̱nj.

1 Timoteo 1:20

Dan me se vi̱j nij soꞌ me ro̱j síí cuꞌna̱j Himeneo ga̱ Alejandró síí caꞌmii qui̱j cheꞌé Yaꞌanj a. Dan me se nagoꞌ yá ꞌu̱nj man ro̱j soꞌ raꞌa Síí Chre̱e, ga̱a ne̱ xca̱j ro̱j soꞌ cuentá, ne̱ se̱ caꞌmii qui̱j ro̱j soꞌ cheꞌé Yaꞌanj maꞌ.

Hebreos 13:22

Cuano̱ nihánj me se rqueé ꞌu̱nj man soj se vaa veꞌé cuno̱ soj nana̱ nihánj, tinu̱j, nocoj. ꞌO̱ se chrej nucua̱j narqué ꞌu̱nj man soj me nana̱ nihánj, ne̱ do̱j vaa nana̱ nihánj nana̱ cachrón ꞌu̱nj rihaan yanj cartá nihánj naya̱a̱ soj á.