Gálatas 6:1 - Triqui de San Juan Copala

¹ Sese ya̱ xcaj nij soj cuentá se vaa quiꞌyaj ꞌo̱ tinúú soj cacunꞌ, ne̱ soj si̱j veꞌé noco̱ꞌ Nimán Yaꞌanj roꞌ, nago̱ꞌ soj chrej man síí tumé cacunꞌ da̱j quiꞌya̱j soꞌ rej rihaan soꞌ, tinu̱j, nocoj. Tza̱j ne̱ nica̱ꞌ ga̱a̱ nimán soj, ne̱ veꞌé caꞌmi̱i̱ soj nana̱ sa̱ꞌ ga̱ síí tumé cacunꞌ á. Dan me se ta̱dó soj ga̱ maꞌa̱n soj ga̱a nagoꞌ soj chrej na̱nj á. Se taj, ne̱ maꞌa̱n soj do̱ꞌ caꞌa̱nj chrej chiꞌi̱i̱ na̱nj chugua̱nj.

Gálatas 6:1 ပူးပေါင်းရင်းမြစ်များ

San Mateo 11:29

Dan me se canoco̱ꞌ soj manj, ne̱ quiꞌya̱j soj tucuáán tu̱cuꞌyón ꞌu̱nj man soj á. ꞌO̱ se síí vaa nica̱ꞌ nimán mej, ne̱ nari̱ꞌ soj chrej nara̱a̱n rá nimán soj ado̱nj.

San Mateo 26:69

Veé dan, ne̱ ya̱nj Jesús ga̱ ꞌó nij soꞌ rá veꞌ, ne̱ ya̱nj síí cuꞌna̱j Pedró xeꞌ rá chingá a. Ne̱ cuchiꞌ ꞌo̱ mozó cha̱na̱ rihaan soꞌ, ne̱ cataj noꞌ a: ―So̱ꞌ me ꞌo̱ síí cachéé ga̱ Jesús síí cavii estadó Galilea ado̱nj ―taj mozó cha̱na̱ yoꞌ rihaan Pedró a.

San Mateo 26:75

Ga̱a ne̱ ninuj rá Pedró nda̱a vaa cataj Jesús rihaan soꞌ quii se vaa ga̱a ataa cagua̱j taꞌloo, ne̱ vaꞌnu̱j cata̱j Pedró se vaa né si̱j noco̱ꞌ man Jesús me maꞌa̱n Pedró maꞌ. Ga̱a ne̱ curiha̱nj Pedró xeꞌ, ne̱ uxrá taꞌvee Pedró a.

San Mateo 9:13

ꞌO̱ se vaa cheꞌé caꞌa̱nj soj tu̱cuꞌyón soj me se me raj cata̱a nana̱ nihánj nana̱ no̱ rihaan Danj Yaꞌanj ado̱nj: “Ne uun niha̱ꞌ rá ꞌu̱nj niꞌya̱j ꞌu̱nj yuvii̱ rqué xcuu rihaan ꞌu̱nj maꞌ. Tana̱nj uun niha̱ꞌ rá ꞌu̱nj niꞌya̱j ꞌu̱nj yuvii̱ ꞌe̱e̱ rá man tuviꞌ ado̱nj.” Dan me se xca̱j soj cuentá se vaa ne caꞌna̱ꞌ ꞌu̱nj canacu̱nj ꞌu̱nj man síí sa̱ꞌ maꞌ. Cheꞌé nij síí tumé cacunꞌ caꞌnaj se vaa nuchra̱nꞌ nimán nij soꞌ ne̱ canoco̱ꞌ nij soꞌ snana̱j ado̱nj ―taj Jesús rihaan nij soꞌ a.

Romanos 14:1

Taꞌa̱j yuvii̱ guun ya̱ rá se vaa aꞌvej rá Yaꞌanj cha̱ yuvii̱ na̱j guun rasu̱u̱n, tza̱j ne̱ ꞌó taꞌa̱j yuvii̱ roꞌ, chuꞌviꞌ nij soꞌ cha̱ nij soꞌ nee̱ a. Naꞌvej rá Yaꞌanj cha̱ nij soꞌ nee̱, rá nij soꞌ, ne̱ cheꞌé dan ina̱nj cuêj chá nij soꞌ a. Dan me se veꞌé quiꞌya̱j nij soj ga̱ nij yuvii̱ naꞌvej rá cha̱ na̱j guun rasu̱u̱n á. Sese da̱nj vaa rá nij soꞌ, ne̱ se̱ canó tuviꞌ nij soj ga̱ nij soꞌ maꞌ.

Romanos 15:1

Xa̱ꞌ níꞌ si̱j amán rá se vaa aꞌvej rá Yaꞌanj cha̱ níꞌ na̱j guun rasu̱u̱n, tza̱j ne̱ no̱ xcúún níꞌ ra̱cuíj níꞌ man nij yuvii̱ naꞌvee cuchuma̱n rá da̱nj na̱nj á. Se̱ quiꞌyaj níꞌ se ina̱nj me rá níꞌ quiꞌya̱j níꞌ maꞌ.

Romanos 8:6

Sese gu̱un rá yuvii̱ quiꞌya̱j yuvii̱ se me rá nee̱ man yuvii̱, ne̱ cavi̱ꞌ nu̱ꞌ nimán yuvii̱ a. Tza̱j ne̱ sese gu̱un rá yuvii̱ quiꞌya̱j yuvii̱ se me rá Nimán Yaꞌanj, ne̱ caꞌve̱e ca̱yáán yuvii̱ ga̱ Yaꞌanj nu̱ꞌ cavii nu̱ꞌ caꞌanj, ne̱ ga̱a̱ xe̱j nimán yuvii̱, quiꞌya̱j Nimán Yaꞌanj ado̱nj.

1 Corintios 10:12

Sese sa̱ꞌ uxrá nocoꞌ ꞌo̱ soꞌ man Cristó rá soꞌ, ne̱ tu̱mé uxrá soꞌ man soꞌ se̱ gaa na̱nj caꞌa̱nj yaníj soꞌ ne̱ quiri̱ꞌ soꞌ a.

1 Corintios 14:37

Sese guun rá ꞌo̱ soꞌ se vaa neꞌen soꞌ nata̱ꞌ soꞌ nana̱ rqué Yaꞌanj rihaan soꞌ do̱ꞌ, sese guun rá soꞌ se vaa ya̱nj Nimán Yaꞌanj ga̱ maꞌa̱n soꞌ do̱ꞌ, ne̱ xca̱j soꞌ cuentá se vaa nana̱ nihánj nana̱ cachrón ꞌu̱nj cheꞌé soj roꞌ, suun caꞌneꞌ maꞌa̱n Síí ꞌNi̱j Raꞌa man níꞌ rihaan níꞌ me nana̱ nihánj a.

1 Corintios 2:15

Xa̱ꞌ síí racuíj Nimán Yaꞌanj man, tza̱j ne̱ neꞌen soꞌ naquiꞌya̱j cu̱u soꞌ cunuda̱nj rasu̱u̱n, tza̱j ne̱ se̱ caꞌvee naquiꞌya̱j cu̱u ꞌó yuvii̱ man soꞌ maꞌ.

1 Corintios 3:1

Dan me se ase vaa yuvii̱ tiha̱j guun cheꞌe̱ canocoꞌ man Cristó roꞌ, da̱nj vaa nij soj ga̱a cuchíꞌ ꞌu̱nj rihaan nij soj, tinu̱j, nocoj. ꞌO̱ se vaa niꞌyo̱n doj rá soj, ne̱ ataa doj nari̱ꞌ soj cuno̱ soj rihaan Nimán Yaꞌanj, ne̱ quiꞌyaj ndoꞌo soj se vaa me rá nee̱ man soj quiꞌya̱j soj, ne̱ cheꞌé dan ne caꞌve̱e caꞌmi̱j nana̱ nuchranꞌ doj rihaan soj a̱ maꞌ.

1 Corintios 4:21

Me se me rá soj qui̱ꞌyáj ga̱ soj asa̱ꞌ cuchíꞌ ꞌu̱nj rihaan soj ga̱. Me rá soj cayu̱u̱n soj qui̱ꞌyáj naꞌ. Ase me rá soj ga̱a̱ ꞌe̱e̱ rá ꞌu̱nj man soj ne̱ veꞌé caꞌmi̱j ga̱ soj xa̱ꞌ.

1 Corintios 7:5

Se̱ guun cata̱j ꞌo̱ soꞌ se vaa naꞌvej rá soꞌ coto̱j soꞌ ga̱ nica̱ soꞌ maꞌ. Tza̱j ne̱ sese ꞌo̱ cuya̱a̱n gu̱un rá ro̱j ni̱ca̱ ro̱j soꞌ se vaa me rá ro̱j soꞌ gu̱un yaníj ro̱j soꞌ rihaan tuviꞌ ro̱j soꞌ cheꞌé yan ꞌo̱ cachi̱nj niꞌya̱j ro̱j soꞌ rihaan Yaꞌanj do̱j güii, ne̱ caꞌve̱e quiꞌya̱j ro̱j soꞌ da̱nj ado̱nj. Dan me se nda̱a quisíj cachíín niꞌya̱j ro̱j soꞌ rihaan Yaꞌanj, ga̱a ne̱ cunu̱u rcuaꞌa̱a̱n uún ro̱j ni̱ca̱ ro̱j soꞌ, coto̱j rcuaꞌa̱a̱n uún ro̱j soꞌ na̱nj ado̱nj. Sese se̱ cuno soj nana̱ nihánj, ne̱ caxri̱i̱ Síí Chre̱e chrej chiꞌi̱i̱ rque soj, cheꞌé se se̱ guun nucua̱j soj gu̱un yaníj soj rihaan nica̱ soj queꞌe̱e̱ güii maꞌ.

2 Corintios 10:1

Xa̱ꞌ ꞌu̱nj si̱j cuꞌna̱j Pabló, tza̱j ne̱ me rá ꞌu̱nj ga̱a̱ ꞌu̱nj nda̱a rá se vaa maꞌa̱n Cristó ado̱nj. Dan me se naꞌvej rá ꞌu̱nj caxri̱i̱ yuva̱a̱ ꞌu̱nj man soj maꞌ. Ma̱an se veꞌé ina̱nj caꞌmi̱j ga̱ soj, raj a. Neꞌen soj se vaa vaa yuvii̱ ꞌni̱j scaꞌnúj soj taj se vaa veꞌé uxrá aꞌmii ꞌu̱nj rihaan soj ga̱a nicúnꞌ ꞌu̱nj rihaan soj, tza̱j ne̱ axríj yuva̱a̱ ꞌu̱nj man soj ga̱a nicunꞌ yaníj ꞌu̱nj a. Da̱nj tuꞌva nij yuvii̱ yoꞌ, tza̱j ne̱ cuano̱ nihánj me rqueé ꞌu̱nj man soj

2 Corintios 2:7

Ma̱an se cara̱a̱ xꞌnaa soj rihaan soꞌ, ne̱ veé dan quisíj quiꞌyaj soj sayuun man soꞌ na̱nj á. Ta̱dó soj se̱ nanó ndoꞌo rá soꞌ, quiꞌya̱j soj, ne̱ quiri̱ꞌ nimán soꞌ, quiꞌya̱j soj ado̱nj.

2 Corintios 2:8

Cheꞌé dan cata̱j xnaꞌanj ꞌu̱nj rihaan soj se vaa me raj veꞌé quiꞌya̱j soj, ga̱a ne̱ gu̱un ya̱ rá soꞌ se vaa ya̱ ya̱ ꞌe̱e̱ rá soj man soꞌ na̱nj ado̱nj.

Gálatas 5:23

síí niꞌya̱nj aꞌmii gu̱un níꞌ do̱ꞌ, síí nica̱j raa̱ gu̱un níꞌ do̱ꞌ, quiꞌya̱j Nimán Yaꞌanj á. Ina̱nj da̱nj ga̱a̱ níꞌ sese veꞌé cuno̱ níꞌ rihaan Nimán Yaꞌanj na̱nj ado̱nj. Ne̱ taj cacunꞌ quita̱j xráá níꞌ quiꞌya̱j nana̱ nihánj a̱ maꞌ.

Gálatas 6:18

Me rá ꞌu̱nj quiꞌya̱j ndoꞌo Jesucristó Si̱j ꞌNi̱j Raꞌa man níꞌ se lu̱j nimán nij soj, tinu̱j, nocoj. Veé da̱nj ga̱a̱ ya̱ ado̱nj.

1 Tesalonicenses 4:1

Ya̱j me se cheꞌé se si̱j a̱j noco̱ꞌ man Jesús Si̱j ꞌNi̱j Raꞌa man níꞌ me nu̱ꞌ níꞌ roꞌ, cheꞌé dan cuano̱ nihánj me cata̱j xnaꞌanj núj rihaan soj se vaa doj a̱ doj a̱ canoco̱ꞌ soj nu̱ꞌ tucuáán cuchruj núj rihaan soj ga̱a cataj núj da̱j quiꞌya̱j soj ga̱a mán soj rihaan chumii̱ nihánj ga̱a ne̱ cara̱nꞌ rá Yaꞌanj ni̱ꞌyaj Yaꞌanj man soj, tinu̱j, nocoj.

2 Tesalonicenses 3:15

Tza̱j ne̱ se̱ nachriꞌ soj ni̱ꞌyaj soj man síí rmi̱i̱ yoꞌ maꞌ. Tana̱nj veꞌé quiꞌya̱j soj, nago̱ꞌ soj chrej nucua̱j man soꞌ á. ꞌO̱ se tinúú soj me soꞌ ado̱nj.

2 Timoteo 2:25

ne̱ veꞌé ti̱haa̱n soꞌ chrej sa̱ꞌ man nij síí me rá cano̱ tuviꞌ ga̱ soꞌ uún a. ꞌO̱ se xcaj soꞌ cuentá se vaa xraj ne̱ caꞌve̱e ra̱cuíj Yaꞌanj man nij soꞌ, ne̱ nuchra̱nꞌ nimán nij soꞌ cheꞌé cacunꞌ tumé nij soꞌ, ne̱ nari̱ꞌ nij soꞌ nana̱ ya̱ a.

Hebreos 12:13

Ne̱ ase ꞌyaj síí naquiꞌyaj sa̱ꞌ chrej cache̱e̱ yuvii̱ roꞌ, da̱nj quiꞌya̱j soj, nuchru̱j ra̱a̱ soj da̱j quiꞌya̱j nimán soj na̱nj á. Asa̱ꞌ quisíj quiꞌyaj soj da̱nj, ga̱a ne̱ caꞌve̱e se né si̱j noco̱ꞌ sa̱ꞌ chrej sa̱ꞌ me soj, tza̱j ne̱ se̱ tanáj nu̱ꞌ soj chrej sa̱ꞌ maꞌ. Tana̱nj cunu̱u sa̱ꞌ soj ado̱nj.

Hebreos 13:3

Se̱ niꞌyón soj tinúú soj síí ꞌni̱j tagaꞌ maꞌ. Dan me se gu̱un rá soj nda̱a adi̱ꞌ se maꞌa̱n soj ꞌnij tagaꞌ ga̱ tinúú soj a. Ne̱ se̱ niꞌyón soj tinúú soj síí ranꞌ sayuun ꞌyaj yuvii̱ maꞌ. Dan me se gu̱un rá soj nda̱a adi̱ꞌ se maꞌa̱n soj ꞌyaj yuvii̱ sayuun man a.

Santiago 3:13

Sese vaa taꞌa̱j soj síí acaj cuentá ne̱ avii ndoꞌo raa̱ soj, rá soj, ne̱ veꞌé ina̱nj quiꞌya̱j soj si̱j vaa da̱nj rá rihaan tuviꞌ soj, ne̱ xca̱j tuviꞌ soj cuentá se vaa cheꞌé se avii raa̱ soj roꞌ, cheꞌé dan síí na̱j nimán me soj, ne̱ cheꞌé dan me veꞌé ina̱nj ꞌyaj soj a.

Santiago 3:2

Dan me se ta̱ranꞌ níꞌ me se ꞌyaj ndoꞌo níꞌ se chiꞌi̱i̱ na̱nj ado̱nj. Tza̱j ne̱ sese vaa ꞌo̱ síí ne aꞌmii a̱ ꞌó nana̱ chiꞌi̱i̱, ne̱ soꞌ me síí caꞌve̱e gu̱un nucua̱j gu̱un chij rihaan nu̱ꞌ nee̱ man soꞌ chugua̱nj.

1 Pedro 3:15

Cara̱a̱ cochro̱j soj ni̱ꞌyaj soj man Cristó Si̱j ꞌNi̱j Raꞌa man níꞌ á. Xca̱j soj cuentá da̱j ga̱a̱ caꞌmi̱i̱ soj ga̱ me maꞌa̱n síí xnáꞌanj man soj me cheꞌé me uun ya̱ rá soj se vaa cavi̱i̱ sa̱ꞌ soj quiꞌya̱j Yaꞌanj vaa güii a. Veꞌé nata̱ꞌ soj rihaan nij síí xnáꞌanj man soj, ne̱ se̱ naquiꞌyaj xta̱ꞌ soj nimán soj asa̱ꞌ nataꞌ soj snana̱ Yaꞌanj maꞌ.

1 Juan 5:16

Dan me se sese neꞌen níꞌ man tinúú níꞌ ꞌyaj soꞌ me maꞌa̱n cacunꞌ, ne̱ cachi̱nj niꞌya̱j níꞌ cheꞌé soꞌ rihaan Yaꞌanj, ne̱ Yaꞌanj me síí cara̱a̱ xꞌnaa cheꞌé cacunꞌ quiꞌyaj soꞌ ado̱nj. Tza̱j ne̱ sese neꞌen níꞌ man tinúú níꞌ ꞌyaj soꞌ cacunꞌ noco̱o ndoꞌo cacunꞌ quiꞌya̱j cavi̱ꞌ nu̱ꞌ soꞌ rihaan Yaꞌanj, ne̱ taj cheꞌé cachi̱nj niꞌya̱j níꞌ rihaan Yaꞌanj cheꞌé soꞌ a̱ maꞌ. Dan me se vaa cacunꞌ u̱u̱n, ne̱ vaa cacunꞌ noco̱o ndoꞌo quiꞌya̱j cavi̱ꞌ nu̱ꞌ níꞌ rihaan Yaꞌanj ado̱nj. Cheꞌé cacunꞌ noco̱o yoꞌ me se se̱ cachíín niꞌya̱j soj maꞌ.