Gálatas 3:9 - Triqui de San Juan Copala

⁹ Dan me se cuchumán rá Abraham niꞌya̱j soꞌ Yaꞌanj, ne̱ quiꞌyaj Yaꞌanj se lu̱j cheꞌé soꞌ, ne̱ ase vaa quiꞌyaj Yaꞌanj cheꞌé Abraham roꞌ, da̱nj quiꞌya̱j uún Yaꞌanj cheꞌé ta̱ranꞌ nij síí cuchuma̱n rá ni̱ꞌyaj man soꞌ, ne̱ quiꞌya̱j Yaꞌanj se lu̱j cheꞌé nij soꞌ uún ado̱nj.

Gálatas 3:9 ပူးပေါင်းရင်းမြစ်များ

Romanos 4:11

Cachén queꞌe̱e̱ yoꞌ caꞌmii Yaꞌanj da̱nj cheꞌé soꞌ, ga̱a ne̱ cutaꞌ maꞌa̱n soꞌ taꞌngaꞌ man soꞌ, ne̱ tihaa̱n soꞌ rihaan nij yuvii̱ ma̱n rihaan chumii̱ se vaa a̱j tinavij ya̱ Yaꞌanj cacunꞌ xráá soꞌ a. Dan me se guun soꞌ xi̱i cunuda̱nj nij yuvii̱ nuu sa̱ꞌ nimán rihaan Yaꞌanj yuvii̱ ne ataꞌ taꞌngaꞌ man, ne̱ ase vaa quiꞌyaj Abraham roꞌ, da̱nj ꞌyaj uún nij soꞌ a. Dan me se cuchumán rá Abraham niꞌya̱j soꞌ Yaꞌanj ga̱a ataa cata̱ꞌ taꞌngaꞌ man soꞌ, ne̱ da̱nj ꞌyaj nij síí yaníj uún a.

Romanos 4:16

Cheꞌé dan cunuda̱nj níꞌ si̱j amán rá niꞌya̱j man Yaꞌanj roꞌ, me nij síí ni̱caj yuꞌunj man chumii̱, ne̱ veé dan me se lu̱j quiꞌya̱j Yaꞌanj cheꞌé níꞌ me yoꞌ, ga̱a ne̱ caꞌve̱e quisi̱j ya̱ nu̱ꞌ nana̱ cataꞌ tuꞌva Yaꞌanj cheꞌé ta̱ranꞌ níꞌ a. Dan me se né ina̱nj nij síí gu̱un nucua̱j quiꞌya̱j nu̱ꞌ stucua̱nj Moisés me nij síí cavi̱i̱ sa̱ꞌ da̱nj maꞌ. Tana̱nj cavi̱i̱ sa̱ꞌ ta̱ranꞌ níꞌ si̱j amán rá niꞌya̱j man Yaꞌanj, nda̱a vaa quiꞌyaj Abraham ado̱nj. ꞌO̱ se xi̱i ta̱ranꞌ níꞌ me soꞌ ado̱nj.

Romanos 4:24

ꞌO̱ se cheꞌé maꞌa̱n níꞌ no̱ nana̱ yoꞌ rihaan Danj Yaꞌanj uún, cheꞌé se si̱j amán rá niꞌya̱j man Yaꞌanj me níꞌ uún, ne̱ dan me se a̱j cataj Yaꞌanj se vaa si̱j sa̱ꞌ nimán me maꞌa̱n níꞌ uún ado̱nj. Ne̱ amán rá níꞌ se vaa cunuu iꞌna̱ꞌ uún Jesús Si̱j ꞌNi̱j Raꞌa man níꞌ quiꞌyaj Yaꞌanj á.

Gálatas 3:14

Nda̱a síj, ga̱a ne̱ se lu̱j cataꞌ tuꞌva Yaꞌanj rihaan Abraham roꞌ, caꞌnaꞌ se lu̱j yoꞌ nda̱a rihaan nij yuvii̱ yaníj, cheꞌé se vaa quiꞌyaj Cristó Jesús a. Dan me se ga̱a naá, ne̱ cataꞌ tuꞌva Yaꞌanj se vaa catu̱u̱ Nimán Yaꞌanj nimán níꞌ, ne̱ cuchumán rá níꞌ niꞌya̱j níꞌ man Yaꞌanj, ne̱ cheꞌé dan ya̱ da̱nj guun ado̱nj.

Gálatas 3:29

Cheꞌé se si̱j noco̱ꞌ man Cristó me soj roꞌ, cheꞌé dan maꞌa̱n ya̱ taꞌníí taꞌnij siꞌno̱ síí cuꞌna̱j Abraham me soj rihaan Yaꞌanj, nda̱a vaa cataj Yaꞌanj rihaan Abraham se vaa quiꞌya̱j soꞌ se lu̱j rihaan ta̱ranꞌ nij taꞌníí taꞌnij siꞌno̱ Abraham ado̱nj.

Gálatas 4:28

Ne̱ ase vaa taꞌníí noꞌ síí cuꞌna̱j Isaac roꞌ, taꞌngaꞌ da̱nj vaa nij soj, tinu̱j, nocoj. Soj me neꞌej se vaa cataj ya̱ Yaꞌanj caꞌnga̱a̱ ya̱ ado̱nj. Ne̱ ase vaa cavii sa̱ꞌ Isaac roꞌ, da̱nj cavi̱i̱ sa̱ꞌ soj uún na̱nj á.