Gálatas 3:28 - Triqui de San Juan Copala

²⁸ Ne̱ se̱ cataj soj se vaa taꞌa̱j soj me yuvii̱ israelitá ne̱ ꞌó taꞌa̱j soj me yuvii̱ yaníj maꞌ. Ne̱ se̱ cataj soj se vaa taꞌa̱j soj me mozó ne̱ ꞌó taꞌa̱j soj, né si̱j uun mozó me ꞌó taꞌa̱j soj, cata̱j soj maꞌ. Ne̱ se̱ cataj soj se vaa taꞌa̱j soj me snóꞌo ne̱ ꞌó taꞌa̱j soj me chana̱ maꞌ. ꞌO̱ se tana̱nj ase vaa o̱rúnꞌ yuvii̱ vaa ta̱ranꞌ soj, ne̱ ꞌo̱ cuya̱a̱n vaa ta̱ranꞌ soj cheꞌé se noco̱ꞌ soj man Cristó Jesús na̱nj á.

Gálatas 3:28 ပူးပေါင်းရင်းမြစ်များ

San Juan 10:16

Ne̱ vaa doj daán ꞌu̱nj matzinj uún, tza̱j ne̱ nuviꞌ nij xoꞌ rej nu̱u̱ nij matzinj nihánj maꞌ. Ne̱ vaa cheꞌé caꞌna̱ꞌ ꞌó matzinj yoꞌ uún, qui̱ꞌyáj, ne̱ cuno̱ nij xoꞌ snana̱ ꞌu̱nj a. Ga̱a ne̱ cunu̱u chre̱ꞌ nij xoꞌ ga̱ matzinj nihánj, ga̱a ne̱ tu̱mé ꞌu̱nj man cunuda̱nj nij xoꞌ ado̱nj.

San Juan 11:52

Ne̱ né ina̱nj cheꞌé nij yuvii̱ israelitá me cavi̱ꞌ Jesús maꞌ. ꞌO̱ se cavi̱ꞌ soꞌ cheꞌé rej naquiꞌya̱j chre̱ꞌ soꞌ man cunuda̱nj nij taꞌníí Yaꞌanj nij síí ma̱n nu̱ꞌ rihaan chumii̱ nihánj, ga̱a ne̱ gu̱un nij soꞌ o̱rúnꞌ xꞌneꞌ yuvii̱ ado̱nj.

San Juan 17:11

’Ne̱ nihánj me se nuvíꞌ ꞌu̱nj yáán rihaan chumii̱ nihánj a̱ maꞌ. Tza̱j ne̱ nij síí nihánj yáán rihaan chumii̱ nihánj ado̱nj. ꞌU̱nj me se quina̱nꞌ ꞌu̱nj rej ya̱nj so̱ꞌ na̱nj ado̱nj. Dan me se nij síí rqué so̱ꞌ manj me se qui̱ꞌyáá so̱ꞌ se ndoꞌo, ne̱ tu̱mé so̱ꞌ man nij soꞌ cheꞌé se‑chu̱vií so̱ꞌ, cheꞌé rej ꞌo̱ cuno̱ nij soꞌ rihaan so̱ꞌ, Ata̱j Chij Síí Sa̱ꞌ Ina̱nj. Ne̱ cuya̱a̱n ga̱a̱ rá nimán nij soꞌ nda̱a vaa cuya̱a̱n vaa rá nimán ro̱ꞌ á.

Romanos 1:16

Taj a̱ doj chrej naꞌa̱j nó rihanj caꞌmi̱j nana̱ sa̱ꞌ cheꞌé Cristó maꞌ. ꞌO̱ se nana̱ nucua̱j uxrá me snana̱ Yaꞌanj, ne̱ dan me se caꞌmii Yaꞌanj snana̱ Yaꞌanj cuno̱ yuvii̱, ne̱ cuchuma̱n rá nij yuvii̱ cuno̱ nij yuvii̱ nana̱, ne̱ nani̱i̱ nij yuvii̱ rihaan sayuun ne̱ cavi̱i̱ sa̱ꞌ nij soꞌ a. Ne̱ dan me se asino ya̱a̱n me rá Yaꞌanj ti̱nanii Yaꞌanj man nij yuvii̱ israelitá, ne̱ me rá uún Yaꞌanj ti̱nanii Yaꞌanj man nij yuvii̱ yaníj ado̱nj.

Romanos 3:22

cuchuma̱n rá yuvii̱ ni̱ꞌyaj yuvii̱ Jesucristó, ga̱a ne̱ tinavi̱j Yaꞌanj cacunꞌ tumé nij yuvii̱, ne̱ cunu̱u sa̱ꞌ nimán nij yuvii̱ rihaan Yaꞌanj a. Taj a̱ ꞌó yuvii̱ ino̱ vaa rihaan Yaꞌanj maꞌ.

Romanos 8:1

Ya̱j me se daj chiha̱a̱ míj se̱ cutaꞌ Yaꞌanj cacunꞌ xráá níꞌ si̱j uun rcuaꞌa̱a̱n ga̱ Cristó Jesús maꞌ.

Romanos 9:24

Maꞌa̱n níꞌ me nij yuvii̱ gu̱un chij ga̱ Yaꞌanj, ne̱ dan me se taꞌa̱j níꞌ me yuvii̱ israelitá, ne̱ ꞌó taꞌa̱j níꞌ me yuvii̱ yaníj, tza̱j ne̱ canacúún Yaꞌanj man ꞌo̱ ꞌo̱ níꞌ gu̱un chij níꞌ ga̱ soꞌ ado̱nj.

1 Corintios 7:14

Yaꞌanj me se niꞌya̱j soꞌ man nica̱ chana̱ noco̱ꞌ man Cristó, snóꞌo ne nocoꞌ man Cristó, da̱j se vaa nica̱ ya̱ noꞌ me soꞌ a. Ne̱ niꞌya̱j Yaꞌanj man nica̱ snóꞌo noco̱ꞌ man Cristó, chana̱ ne nocoꞌ man Cristó, da̱j se vaa nica̱ ya̱ soꞌ me noꞌ a. Se taj, ne̱ xnii scu̱ꞌ me taꞌníí ro̱j soꞌ, tza̱j ne̱ né da̱nj vaa maꞌ. Xnii sa̱ꞌ me taꞌníí ro̱j soꞌ ado̱nj.

1 Corintios 7:19

Dan me se caꞌve̱e se ta̱j taꞌngaꞌ man níꞌ, caꞌve̱e se nuviꞌ taꞌngaꞌ táá man níꞌ, caꞌve̱e, tza̱j ne̱ taj se ꞌyaj maꞌ. Tana̱nj no̱ xcúún níꞌ cuno̱ níꞌ nij suun caꞌneꞌ Yaꞌanj rihaan níꞌ na̱nj ado̱nj.

Gálatas 3:14

Nda̱a síj, ga̱a ne̱ se lu̱j cataꞌ tuꞌva Yaꞌanj rihaan Abraham roꞌ, caꞌnaꞌ se lu̱j yoꞌ nda̱a rihaan nij yuvii̱ yaníj, cheꞌé se vaa quiꞌyaj Cristó Jesús a. Dan me se ga̱a naá, ne̱ cataꞌ tuꞌva Yaꞌanj se vaa catu̱u̱ Nimán Yaꞌanj nimán níꞌ, ne̱ cuchumán rá níꞌ niꞌya̱j níꞌ man Yaꞌanj, ne̱ cheꞌé dan ya̱ da̱nj guun ado̱nj.

Gálatas 3:26

Cheꞌé se amán rá nij soj niꞌya̱j soj man Cristó Jesús roꞌ, cheꞌé dan taꞌníí Yaꞌanj me ta̱ranꞌ soj cuano̱ na̱nj ado̱nj.

Gálatas 4:14

Ne̱ ga̱a quiránꞌ ꞌu̱nj rihaan soj me se ne nachri̱ꞌ soj ni̱ꞌyaj soj manj maꞌ. Tana̱nj a̱ caráyaꞌa̱nj ndoꞌo soj niꞌya̱j soj manj, ne̱ nda̱a adi̱ꞌ veꞌé ꞌyaj nii ga̱ ꞌo̱ se‑mo̱zó Yaꞌanj roꞌ, da̱nj quiꞌyaj soj, ga̱a ne̱ veꞌé ndoꞌo caꞌmii soj ga̱j ado̱nj. Ne̱ ase vaa maꞌa̱n ya̱ Cristó Jesús roꞌ, taꞌngaꞌ da̱nj vaa ꞌu̱nj, rá soj,

Gálatas 5:24

Dan me se níꞌ si̱j a̱j noco̱ꞌ man Cristó Jesús roꞌ, me se a̱j ticaviꞌ Cristó man nu̱ꞌ se chiꞌi̱i̱ ma̱n nimán níꞌ, ga̱a caviꞌ soꞌ rihaan rcutze̱, ne̱ dan me se quisíj quiꞌyaj nee̱ man níꞌ cacunꞌ, ne̱ daj chiha̱a̱ míj se̱ guun quiꞌya̱j uún níꞌ se chiꞌi̱i̱ me rá nee̱ man níꞌ quiꞌya̱j yoꞌ a̱ maꞌ.

Gálatas 5:6

Xa̱ꞌ níꞌ si̱j noco̱ꞌ man Cristó Jesús me se taj se ꞌyaj sese quita̱j taꞌngaꞌ man níꞌ, taj se ꞌyaj sese se̱ quitáá taꞌngaꞌ man níꞌ, rá Yaꞌanj maꞌ. Tana̱nj me rá Yaꞌanj cuchuma̱n rá níꞌ ni̱ꞌyaj níꞌ man Cristó, ne̱ cheꞌé dan ga̱a̱ ꞌe̱e̱ rá níꞌ ni̱ꞌyaj níꞌ man tinúú níꞌ ado̱nj.

Efesios 1:1

Síí cuꞌna̱j Pabló mej, ne̱ cuneꞌ Cristó Jesús mán ꞌu̱nj caꞌa̱nj nata̱ꞌ ꞌu̱nj snana̱ soꞌ rihaan nij yuvii̱, cheꞌé se da̱nj me rá Yaꞌanj qui̱ꞌyáj a. ꞌYáá ꞌu̱nj yanj cartá nihánj caꞌne̱j ꞌu̱nj rihaan nij soj xꞌneꞌ yuvii̱ noco̱ꞌ man Yaꞌanj ya̱nj chumanꞌ Éfeso si̱j ꞌo̱ amán rá niꞌya̱j man Cristó Jesús a.

Efesios 4:4

Dan me se o̱rúnꞌ ya̱ yuvii̱ me níꞌ vaa, ne̱ o̱rúnꞌ ya̱ nimán níꞌ vaa, ne̱ dan me se o̱rúnꞌ ya̱ Nimán Yaꞌanj me nuû nimán ya̱ níꞌ ado̱nj. Ne̱ uun ya̱ rá ta̱ranꞌ níꞌ se vaa canacúún Yaꞌanj man ta̱ranꞌ níꞌ, ne̱ ꞌo̱ cuya̱a̱n cavi̱i̱ sa̱ꞌ ta̱ranꞌ níꞌ, quiꞌya̱j Yaꞌanj ado̱nj.

Filipenses 1:1

Síí cuꞌna̱j Pabló ga̱ síí cuꞌna̱j Timoteo me rój, ne̱ síí nu̱u̱ rihaan Cristó Jesús me rój, ne̱ nihánj me se ꞌyaj rój yanj cartá nihánj caꞌne̱j rój rihaan cunuda̱nj nij soj xꞌneꞌ yuvii̱ noco̱ꞌ man Cristó Jesús soj si̱j ya̱nj chumanꞌ Filipos a. Me rá rój naya̱a̱ nij soj do̱ꞌ, nij síí tumé sa̱ꞌ rihaan Yaꞌanj man soj do̱ꞌ, nij síí nica̱j suun rihaan Yaꞌanj ra̱cuíj man soj do̱ꞌ, yanj cartá nihánj a.

Colosenses 1:4

cheꞌé se caꞌnaꞌ nana̱ rihaan rój se vaa amán rá soj niꞌya̱j soj man Cristó Jesús ne̱ ꞌe̱e̱ rá soj niꞌya̱j soj cunuda̱nj ꞌó nij síí noco̱ꞌ man Cristó a.

Colosenses 3:11

Ya̱j me se taj se ꞌyaj sese na̱j guun yuvii̱ me soj maꞌ. Caꞌve̱e se si̱j israelitá do̱ꞌ, caꞌve̱e se si̱j yaníj do̱ꞌ, caꞌve̱e se si̱j ta̱j taꞌngaꞌ man do̱ꞌ, caꞌve̱e se né si̱j ta̱j taꞌngaꞌ man do̱ꞌ, caꞌve̱e se si̱j ma̱n ꞌó chumanꞌ do̱ꞌ, caꞌve̱e se mozó siꞌyaj ꞌó yuvii̱ do̱ꞌ, caꞌve̱e se si̱j chéé maꞌa̱n do̱ꞌ, taj se ꞌyaj maꞌ. O̱rúnꞌ Cristó me se achiin man ꞌo̱ ꞌo̱ xꞌneꞌ yuvii̱, ne̱ ꞌo̱ cuya̱a̱n yáán soꞌ nimán ꞌo̱ ꞌo̱ nij soꞌ ado̱nj.

1 Timoteo 1:12

Taj ꞌu̱nj guun niꞌya̱j níꞌ rihaan Cristó Jesús Si̱j ꞌNi̱j Raꞌa man níꞌ cheꞌé se nariꞌ nucuáá ꞌu̱nj, quiꞌyaj soꞌ a. Dan me se uxrá ya̱ cataj Yaꞌanj se vaa xraan canocóꞌ ꞌu̱nj man soꞌ, ne̱ cuneꞌ soꞌ mán ꞌu̱nj qui̱ꞌyáá ꞌu̱nj se‑su̱u̱n soꞌ ado̱nj.

2 Timoteo 1:1

ꞌU̱nj nihánj me síí cuꞌna̱j Pabló, ne̱ cuneꞌ Cristó Jesús mán ꞌu̱nj caꞌa̱nj nata̱ꞌ ꞌu̱nj rihaan yuvii̱ se vaa ga̱a̱ iꞌna̱ꞌ níꞌ nu̱ꞌ cavii nu̱ꞌ caꞌanj quiꞌya̱j Cristó Jesús, nda̱a vaa cataꞌ tuꞌva Yaꞌanj, ne̱ yoꞌ me suun me rá Yaꞌanj qui̱ꞌyáj ado̱nj.