Filipenses 3:10 - Triqui de San Juan Copala

¹⁰ Ina̱nj me rá ꞌu̱nj doj a̱ doj a̱ sa̱ꞌ doj que̱neꞌén ꞌu̱nj man Cristó á. Dan me se nucua̱j Yaꞌanj, ne̱ cunuu iꞌna̱ꞌ uún Cristó ga̱a caviꞌ soꞌ, quiꞌyaj Yaꞌanj, ne̱ cheꞌé dan me ndoꞌo raj que̱neꞌenj da̱j quiꞌya̱j Yaꞌanj nimán ꞌu̱nj a. Ne̱ ase vaa quiranꞌ Cristó sayuun roꞌ, da̱nj ga̱a̱ quira̱nꞌ ma̱ꞌán ꞌu̱nj sayuun ga̱ soꞌ, raj, ne̱ ase vaa caꞌvej rá Cristó cavi̱ꞌ soꞌ cheꞌé níꞌ roꞌ, da̱nj ga̱a̱ ꞌu̱nj, raj ado̱nj.

Filipenses 3:10 ပူးပေါင်းရင်းမြစ်များ

San Mateo 20:23

Ga̱a ne̱ cataj Jesús a: ―Ya̱ ya̱ quira̱nꞌ ro̱j so̱j sayuun ga̱j na̱nj ado̱nj. Tza̱j ne̱ né ꞌu̱nj me síí nari̱i̱ me síí ca̱yáán xꞌnúú ꞌu̱nj rej nuva̱ꞌ ꞌu̱nj do̱ꞌ, rej ni̱chruún ꞌu̱nj do̱ꞌ maꞌ. O̱rúnꞌ Réj síí nicu̱nꞌ xta̱ꞌ cata̱j xnaꞌanj me síí quiri̱i̱ taꞌngaꞌ ga̱j na̱nj ado̱nj ―taj Jesús a.

San Juan 10:18

Taj va̱j síí rquee̱ manj cavi̱j maꞌ. ꞌO̱ se ma̱ꞌanj aꞌnéé nimanj cavi̱j na̱nj á. Dan me se ꞌu̱nj me síí no̱ xcúún caꞌne̱j nimanj cavi̱j, ne̱ ꞌu̱nj me síí no̱ xcúún cunu̱u iꞌna̱ꞌ uún ado̱nj. Nihánj me suun caꞌneꞌ Réj Yaꞌanj rihanj na̱nj ado̱nj ―taj Jesús rihaan nij soꞌ a.

San Juan 17:3

Ne̱ síí ga̱a̱ iꞌna̱ꞌ nu̱ꞌ cavii nu̱ꞌ caꞌanj me se soꞌ me síí neꞌen mán so̱ꞌ do̱ꞌ, mán ꞌu̱nj do̱ꞌ a. Dan me se o̱rúnꞌ so̱ꞌ me Yaꞌanj ya̱, ne̱ ꞌu̱nj Jesús Si̱j Ti̱nanii man Yuvii̱ rihaan Sayuun me síí caꞌnéé so̱ꞌ ado̱nj.

Romanos 8:17

Cheꞌé dan vaa güii rque̱ ndoꞌo Yaꞌanj se sa̱ꞌ rihaan níꞌ ga̱ Cristó, ne̱ ꞌo̱ cuya̱a̱n ga̱a̱ se sa̱ꞌ rihaan Cristó ga̱ níꞌ a. Veé dan me cheꞌé se ranꞌ níꞌ sayuun nda̱a vaa quiranꞌ Cristó roꞌ, cheꞌé dan cavi̱i̱ sa̱ꞌ níꞌ ga̱ soꞌ, ne̱ niꞌndaj ya̱ veꞌé ga̱a̱ níꞌ ga̱ soꞌ vaa güii ado̱nj.

Romanos 8:29

Ga̱a naá me se queneꞌen Yaꞌanj se vaa canoco̱ꞌ níꞌ man soꞌ vaa güii, ga̱a ne̱ ꞌo̱ guun rá Yaꞌanj se vaa naquiꞌya̱j sa̱ꞌ Yaꞌanj nimán níꞌ a. Ne̱ ase vaa Taꞌníí Yaꞌanj síí cuꞌna̱j Jesucristó roꞌ, da̱nj ga̱a̱ níꞌ uún, ne̱ vaa güii cuma̱n ndoꞌo tinúú Jesucristó do̱ꞌ, raꞌvij Jesucristó do̱ꞌ, ne̱ soꞌ gu̱un síí chava̱ꞌ rihaan cunuda̱nj níꞌ a.

Romanos 8:36

No̱ nana̱ rihaan Danj Yaꞌanj taj se vaa cheꞌé se noco̱ꞌ níꞌ man Yaꞌanj, cheꞌé dan me rá yuvii̱ ticavi̱ꞌ yuvii̱ man níꞌ da̱j a̱ orá, ne̱ ase vaa ticaviꞌ nii man matzinj roꞌ, da̱nj me rá nii ticavi̱ꞌ nii man níꞌ, taj Danj Yaꞌanj a.

2 Corintios 1:10

Dan me se da̱j doj se caviꞌ núj, tza̱j ne̱ Yaꞌanj me síí tinanii man núj rihaan sayuun yoꞌ, ne̱ soꞌ me síí ti̱nanii man núj rihaan sayuun quira̱nꞌ núj rej riha̱a̱n, ne̱ nucua̱j rá núj man soꞌ, ne̱ ya̱ ya̱ ti̱nanii soꞌ man núj rihaan sayuun na̱nj ado̱nj.

2 Corintios 1:5

Dan me se nda̱ꞌ rá se vaa quiranꞌ uxrá Cristó sayuun roꞌ, da̱nj vaa ꞌnaꞌ uxrá sayuun xráá núj, ne̱ cheꞌé dan cunuu ꞌe̱e̱ uxrá rá Cristó man núj cheꞌé sayuun ranꞌ núj ado̱nj. Cheꞌé dan nariꞌ nucuaj rá núj cheꞌé Cristó, ꞌyaj Yaꞌanj a.

2 Corintios 13:4

Dan me se caꞌvej rá Cristó gu̱un nucua̱j doj yuvii̱ rihaan soꞌ, ne̱ cachrón nii man soꞌ rihaan rcutze̱, tza̱j ne̱ guun nucua̱j soꞌ cunuu iꞌna̱ꞌ uún soꞌ, quiꞌyaj Yaꞌanj, ne̱ cheꞌé se noco̱ꞌ núj man Cristó roꞌ, cheꞌé dan ase vaa síí ninaj vaa maꞌa̱n núj rihaan chumii̱ nihánj, tza̱j ne̱ Yaꞌanj roꞌ, me síí rque̱ se nucua̱j man núj, ga̱a ne̱ gu̱un nucua̱j núj ga̱ Cristó quiꞌya̱j núj se‑su̱u̱n Yaꞌanj cheꞌé nij soj na̱nj ado̱nj.

Gálatas 2:20

Canó rcuaꞌa̱a̱n ꞌu̱nj rihaan rcutze̱ ga̱ Cristó vaa ga̱a na̱nj ado̱nj. Ya̱j me se né ꞌu̱nj me síí ya̱nj cuano̱ maꞌ. ꞌO̱ se Cristó me síí ya̱nj nimanj, ne̱ cheꞌé dan vaa iꞌna̱ꞌ ꞌu̱nj cuano̱ ado̱nj. Cheꞌé se amán rá ꞌu̱nj niꞌya̱j ꞌu̱nj man Taꞌníí Yaꞌanj roꞌ, cheꞌé dan ina̱nj nocóꞌ ꞌu̱nj man soꞌ ga̱a chéé ꞌu̱nj rihaan chumii̱ nihánj ado̱nj. Ne̱ dan me se ma̱an cheꞌé se cunuu ꞌe̱e̱ uxrá rá soꞌ mán ꞌu̱nj roꞌ, cheꞌé dan caꞌneꞌ gue̱e̱ rá soꞌ caviꞌ soꞌ rihaan rcutze̱ cheꞌé ꞌu̱nj na̱nj ado̱nj.

Gálatas 6:17

Dan me se a̱j ta̱j ndoꞌo yaa̱n mán ꞌu̱nj cheꞌé se quiranꞌ ndoꞌo ꞌu̱nj sayuun cheꞌé se natáꞌ ꞌu̱nj rihaan yuvii̱ cheꞌé Jesús, ne̱ cheꞌé dan naꞌvej rá ꞌu̱nj quiꞌya̱j soj doj sayuun mán ꞌu̱nj a̱ maꞌ.

Efesios 4:13

Ne̱ sa̱ꞌ doj cuchuma̱n rá níꞌ ni̱ꞌyaj níꞌ Taꞌníí Yaꞌanj, ne̱ sa̱ꞌ doj queneꞌe̱n níꞌ da̱j vaa soꞌ, ne̱ veꞌé cunu̱u rcuaꞌa̱a̱n ta̱ranꞌ níꞌ ado̱nj. Chij ina̱nj ga̱a̱ rá níꞌ, ga̱a ne̱ da̱j se sa̱ꞌ ndoꞌo vaa Cristó roꞌ, da̱nj ga̱a̱ sa̱ꞌ ta̱ranꞌ níꞌ na̱nj ado̱nj.

Filipenses 3:8

Dan me se cheꞌé se me ndoꞌo raj xca̱j sa̱ꞌ ꞌu̱nj cuentá cheꞌé Cristó Jesús Si̱j ꞌNi̱j Raꞌa manj roꞌ, cheꞌé dan nu̱ꞌ se vaa quiꞌyáj ga̱a rque̱ roꞌ, da̱j se me raj neꞌenj siguiꞌ riꞌyuj roꞌ, da̱nj me raj neꞌenj man yoꞌ cuano̱, ne̱ cheꞌé se niꞌya u̱u̱n me yoꞌ rihanj cuano̱ roꞌ, cheꞌé dan caꞌve̱e ca̱nocóꞌ ꞌu̱nj man Cristó ado̱nj.

Colosenses 1:24

A̱j quiránꞌ ꞌu̱nj sayuun cheꞌé nij soj, ne̱ nihánj me guun niha̱ꞌ raj cheꞌé sayuun ránꞌ ꞌu̱nj á. Dan me se ase vaa sayuun quiranꞌ Cristó cheꞌé nij síí noco̱ꞌ man soꞌ roꞌ, da̱nj vaa sayuun ranꞌ ma̱ꞌán ꞌu̱nj cheꞌé xꞌneꞌ yuvii̱ noco̱ꞌ man soꞌ a.

Colosenses 2:13

Ga̱a naá ga̱a ataa queneꞌe̱n soj si̱j yaníj man Cristó, ne̱ quiꞌyaj ndoꞌo soj cacunꞌ, ne̱ taj taꞌngaꞌ cutaꞌ nii man nee̱ man soj maꞌ. Tza̱j ne̱ tinavij u̱u̱n Yaꞌanj nu̱ꞌ cacunꞌ ta̱j xráá soj, ne̱ ase vaa cunuu iꞌna̱ꞌ uún Cristó ga̱a caviꞌ soꞌ roꞌ, da̱nj vaa soj, ne̱ ꞌo̱ cunuu sa̱ꞌ nimán soj, quiꞌyaj Yaꞌanj na̱nj á.

Colosenses 3:1

Dan me se ase vaa cunuu iꞌna̱ꞌ uún Cristó roꞌ, da̱nj vaa cunuu sa̱ꞌ nimán soj, ne̱ canocoꞌ soj chrej sa̱ꞌ, quiꞌyaj Cristó a. Cheꞌé dan cheꞌé ina̱nj rasu̱u̱n ma̱n rej xta̱ꞌ nano̱ rá soj, ne̱ cuano̱ nihánj me se xꞌnúú Yaꞌanj rej nuva̱ꞌ Yaꞌanj yáán Cristó cuano̱ ado̱nj.

1 Pedro 1:3

Cata̱j níꞌ se vaa ina̱nj sa̱ꞌ uxrá vaa Yaꞌanj Rej Jesucristó Si̱j ꞌNi̱j Raꞌa man níꞌ á. Cheꞌé se ꞌe̱e̱ uxrá rá Yaꞌanj niꞌya̱j soꞌ man níꞌ, ne̱ naquiꞌyaj iꞌna̱ꞌ soꞌ man Jesucristó, yan caꞌnga̱a̱ naca̱ nimán níꞌ ne̱ uun ya̱ rá níꞌ se vaa ca̱yáán níꞌ rihaan soꞌ nu̱ꞌ cavii nu̱ꞌ caꞌanj ado̱nj.

2 Pedro 1:13

Vaa cheꞌé ndoꞌo nano̱j nana̱ nihánj rihaan soj ya̱j ga̱a vaa iꞌna̱ꞌ ꞌu̱nj rihaan chumii̱ nihánj, raj chugua̱nj.

1 Juan 2:3

Dan me se nihánj me rej neꞌen níꞌ se vaa si̱j noco̱ꞌ man Cristó me níꞌ a. Dan me se sese uno níꞌ suun caꞌneꞌ Jesucristó rihaan níꞌ, ne̱ si̱j noco̱ꞌ ya̱ man soꞌ me níꞌ ado̱nj.

1 Juan 2:5

Tza̱j ne̱ síí uno snana̱ Cristó roꞌ, soꞌ me síí ya̱ ya̱ aráj cochro̱j rihaan Yaꞌanj chugua̱nj. Cheꞌé dan, sese quiꞌya̱j níꞌ da̱nj, ne̱ caꞌve̱e gu̱un ya̱ rá níꞌ se vaa si̱j noco̱ꞌ man Cristó me níꞌ ado̱nj.

Apocalipsis 1:18

Ne̱ síí vaa iꞌna̱ꞌ mej a. Dan me se cavíꞌ ꞌu̱nj, tza̱j ne̱ cuano̱ nihánj me se vaa iꞌna̱ꞌ uún ꞌu̱nj, ne̱ dan me se ꞌo̱ ga̱a̱ iꞌna̱ꞌ ꞌu̱nj nu̱ꞌ cavii nu̱ꞌ caꞌanj ado̱nj. Ne̱ ꞌu̱nj roꞌ, me síí ata̱ suun cata̱j me síí cavi̱ꞌ ne̱ me síí caꞌa̱nj rej ma̱n nimán nij síí caviꞌ ado̱nj.