Filipenses 2:6 - Triqui de San Juan Copala

⁶ Nda̱ꞌ se Yaꞌanj ya̱ me Cristó, ne̱ soꞌ me síí no̱ xcúún gu̱un chij ndoꞌo, tza̱j ne̱ ne gu̱un na̱nj rá soꞌ gu̱un chij soꞌ maꞌ.

Filipenses 2:6 ပူးပေါင်းရင်းမြစ်များ

San Mateo 1:23

Ni̱ꞌyaj soj á. Nari̱ꞌ ꞌo̱ chana̱ ya̱a̱n neꞌej, ne̱ cuchru̱j noꞌ neꞌej sno̱ꞌo, ne̱ Emanuel cuꞌna̱j neꞌej ado̱nj, da̱nj caꞌmii Yaꞌanj Si̱j ꞌNi̱j Raꞌa man níꞌ ga̱a naá rihaan síí nataꞌ snana̱ Yaꞌanj, ne̱ nana̱ Emanuel me raj cata̱a se vaa ca̱yáán maꞌa̱n Yaꞌanj ga̱ níꞌ ado̱nj.

San Juan 1:18

Ne̱ xa̱ꞌ Yaꞌanj, tza̱j ne̱ taj va̱j a̱ doj síí neꞌen rihaan man Yaꞌanj maꞌ. Tza̱j ne̱ o̱rúnꞌ Taꞌníí Yaꞌanj si̱j ya̱nj xꞌnúú Yaꞌanj, me síí tihaa̱n rihaan níꞌ da̱j vaa Yaꞌanj ado̱nj.

San Juan 10:30

ꞌO̱ se ase vaa o̱rúnꞌ yuvii̱ vaa ꞌu̱nj ga̱ Réj ado̱nj ―taj Jesús rihaan nij soꞌ a.

San Juan 10:33

Ga̱a ne̱ cataj nij síí uun chij rihaan nij yuvii̱ israelitá a: ―Se̱ goꞌ núj yahij mán so̱ꞌ cheꞌé suun sa̱ꞌ noco̱o quiꞌyáá so̱ꞌ a̱ maꞌ. ꞌO̱ se go̱ꞌ núj yahij mán so̱ꞌ cheꞌé se caꞌmii so̱ꞌ nana̱ qui̱j cheꞌé Yaꞌanj ado̱nj. Dan me se na̱nj yuvii̱ u̱u̱n mé so̱ꞌ, ne̱ me cheꞌé cataj so̱ꞌ se vaa Yaꞌanj mé so̱ꞌ ga̱ ―taj nij soꞌ rihaan Jesús a.

San Juan 10:38

Tza̱j ne̱ sese ya̱ ꞌyáá ꞌu̱nj se‑su̱u̱n Réj Yaꞌanj, ne̱ caꞌve̱e se ne amán rá soj niꞌya̱j soj man ma̱ꞌanj, tza̱j ne̱ vaa cheꞌé cuchuma̱n rá soj ni̱ꞌyaj soj man nij suun sa̱ꞌ noco̱o quiꞌyáj á. Nda̱a síj, ga̱a ne̱ xca̱j soj cuentá, ga̱a ne̱ ꞌo̱ queneꞌe̱n soj se vaa ya̱nj Réj Yaꞌanj ga̱j, ne̱ ya̱nj ꞌu̱nj ga̱ Réj Yaꞌanj uún ado̱nj ―taj Jesús a.

San Juan 14:28

A̱j cuno soj nana̱ caꞌmij, se vaa cavi̱i̱ ꞌu̱nj quina̱nꞌ ꞌu̱nj, tza̱j ne̱ caꞌna̱ꞌ uún ꞌu̱nj rihaan soj ado̱nj. Sese si̱j aráj cochro̱j rihanj me soj, ne̱ guun niha̱ꞌ rá soj cuno soj nana̱ se vaa cavi̱i̱ ꞌu̱nj quina̱nꞌ ꞌu̱nj yan ya̱nj Réj Yaꞌanj asuun tza̱j á. ꞌO̱ se síí noco̱o doj mej Réj rihanj na̱nj ado̱nj.

San Juan 14:9

Ga̱a ne̱ cataj Jesús rihaan Felipé a: ―Felipe, síj queꞌe̱e̱ ndoꞌo güii cachéé ꞌu̱nj ga̱ nij soj, ne̱ me cheꞌé ne que̱neꞌén so̱ꞌ manj ga̱. Xa̱ꞌ síí neꞌen manj, tza̱j ne̱ soꞌ me síí neꞌen Réj Yaꞌanj ado̱nj. Asa̱ꞌ caꞌvee cataj so̱ꞌ se vaa me rá so̱ꞌ ti̱haán ꞌu̱nj man Réj Yaꞌanj rihaan so̱ꞌ ga̱.

San Juan 17:5

Ne̱ cuano̱ nihánj me se qui̱ꞌyáá so̱ꞌ se vaa niꞌndaj ya̱ sa̱ꞌ veꞌé nucui̱ꞌ ꞌu̱nj rihaan so̱ꞌ, Ata̱j Chij, nda̱a vaa niꞌndaj ya̱ sa̱ꞌ veꞌé nicúnꞌ ꞌu̱nj rihaan so̱ꞌ asi̱j ataa gu̱un chumii̱ nihánj a.

San Juan 20:28

Ga̱a ne̱ cataj Tomás rihaan soꞌ a: ―So̱ꞌ me Síí ꞌNi̱j Raꞌa manj, ne̱ so̱ꞌ me Taꞌanj ꞌu̱nj ado̱nj ―taj soꞌ rihaan Jesús a.

San Juan 5:18

Cheꞌé dan doj a̱ nanoꞌ nij soꞌ da̱j quiꞌya̱j nij soꞌ, ga̱a ne̱ caꞌve̱e cavi̱ꞌ Jesús a. ꞌO̱ se né cheꞌe̱ ina̱nj se ne ꞌyaj Jesús tucuáán noco̱ꞌ nij soꞌ cheꞌé güii naránj rá nij soꞌ me guun rá nij soꞌ cavi̱ꞌ Jesús maꞌ. ꞌO̱ se cheꞌé se cataj soꞌ se vaa Rej maꞌa̱n soꞌ me Yaꞌanj, cheꞌé dan guun doj rá nij soꞌ cavi̱ꞌ Jesús na̱nj ado̱nj. Dan me se ase vaa Yaꞌanj vaa maꞌa̱n soꞌ, taj soꞌ a.

San Juan 5:23

ne̱ ase vaa aráj cochro̱j yuvii̱ rihaan soꞌ roꞌ, da̱nj ga̱a̱ cara̱a̱ cochro̱j yuvii̱ rihanj ado̱nj. Dan me se síí ne aráj cochro̱j rihanj Si̱j Taꞌni̱j Yaꞌanj me se soꞌ me síí ne aráj cochro̱j rihaan Réj Yaꞌanj síí caꞌnéé manj a̱ maꞌ.

Romanos 9:5

Xi̱i nij yuvii̱ israelitá me nij síí ma̱n ga̱a naá síí cuꞌna̱j Abraham do̱ꞌ, Isaac do̱ꞌ, Jacob do̱ꞌ a. ꞌO̱ tuviꞌ nij soꞌ me Cristó Síí Caꞌnéé Yaꞌanj Ti̱nanii man Yuvii̱ rihaan Sayuun, ne̱ Cristó me se Yaꞌanj me soꞌ, ne̱ uun chij soꞌ rihaan cunuda̱nj a. Veꞌé uxrá caꞌmi̱i̱ níꞌ cheꞌé soꞌ nu̱ꞌ cavii nu̱ꞌ caꞌanj na̱nj á. Veé da̱nj ga̱a̱ ya̱ ado̱nj.

2 Corintios 4:4

Ne̱ xa̱ꞌ nij soꞌ, tza̱j ne̱ ne nocoꞌ nij soꞌ man Cristó maꞌ. ꞌO̱ se caráán xréé nij soꞌ, quiꞌyaj Síí Chre̱e síí noco̱ꞌ nij soꞌ man, ne̱ ne gu̱un nucua̱j nij soꞌ xca̱j nij soꞌ cuentá cheꞌé nana̱ sa̱ꞌ cheꞌé Cristó maꞌ. Ne neꞌen nij soꞌ se vaa niꞌndaj ya̱ veꞌé vaa Cristó maꞌ. Ne̱ xa̱ꞌ Cristó, tza̱j ne̱ ase vaa maꞌa̱n Yaꞌanj vaa soꞌ niꞌya̱j níꞌ man soꞌ ado̱nj.

2 Corintios 8:9

ꞌO̱ se a̱j neꞌen soj se vaa quiꞌyaj ndoꞌo Jesucristó Si̱j ꞌNi̱j Raꞌa man níꞌ se lu̱j ga̱ níꞌ á. Dan me se ruꞌve̱e̱ ndoꞌo soꞌ ga̱a cayáán soꞌ rej xta̱ꞌ, tza̱j ne̱ naquiꞌyaj nique̱ soꞌ man soꞌ ne̱ caꞌnaꞌ soꞌ rihaan chumii̱ nihánj cheꞌé níꞌ, ga̱a ne̱ cheꞌé se da̱nj quiꞌyaj soꞌ roꞌ, cheꞌé dan cavi̱i̱ sa̱ꞌ níꞌ doj na̱nj ado̱nj.

1 Timoteo 1:17

Nu̱ꞌ cavii nu̱ꞌ caꞌanj cata̱j níꞌ se vaa niꞌndaj ya̱ sa̱ꞌ vaa Yaꞌanj, ne̱ soꞌ me Rey gu̱un chij nu̱ꞌ cavii nu̱ꞌ caꞌanj, ne̱ daj chiha̱a̱ míj se̱ caviꞌ soꞌ maꞌ. Ne ruviꞌ soꞌ niꞌya̱j yuvii̱ maꞌ. Taj va̱j ꞌó Yaꞌanj maꞌ. O̱rúnꞌ soꞌ me Yaꞌanj ya̱ ado̱nj. Veé da̱nj ga̱a̱ ya̱ ado̱nj.

1 Timoteo 3:16

Neꞌen cunuda̱nj níꞌ se vaa noco̱o uxrá vaa nana̱ sa̱ꞌ yuve̱ tihaa̱n naca̱ Yaꞌanj man níꞌ nana̱ canocoꞌ níꞌ, ne̱ nihánj me nana̱ yoꞌ a: Curiha̱nj Yaꞌanj rihaan chumii̱, ne̱ guun soꞌ yuvii̱ a. Veꞌé ndoꞌo quiꞌyaj soꞌ, cataj Nimán Yaꞌanj a. Queneꞌen nij se‑mo̱zó Yaꞌanj man soꞌ a. Nataꞌ nii cheꞌé soꞌ rihaan nij yuvii̱ yaníj a. Cuchumán rá taꞌa̱j nij síí ma̱n rihaan chumii̱ nihánj niꞌya̱j nij soꞌ man soꞌ a. Quinanꞌ soꞌ xta̱ꞌ, ne̱ niꞌndaj ya̱ veꞌé nacaj nij síí ma̱n xta̱ꞌ man soꞌ a. Yoꞌ me nana̱ noco̱ꞌ níꞌ a.

Tito 2:13

Ne̱ na̱ꞌvi̱j ndoꞌo níꞌ caꞌna̱ꞌ uún Taꞌanj níꞌ síí uun chij ndoꞌo Síí Tinanii man níꞌ rihaan Sayuun, Jesucristó Si̱j Caꞌnéé Yaꞌanj, ne̱ dan me se uun niha̱ꞌ uxrá rá níꞌ cheꞌé se uun ya̱ rá níꞌ se vaa caꞌna̱ꞌ uún soꞌ a. Ne̱ xa̱ꞌ soꞌ, tza̱j ne̱ queneꞌe̱n níꞌ se vaa niꞌndaj ya̱ sa̱ꞌ veꞌé vaa soꞌ ado̱nj.

Hebreos 1:3

Ne̱ ase vaa maꞌa̱n Yaꞌanj roꞌ, da̱nj vaa soꞌ chugua̱nj. Dan me se ga̱a niꞌya̱j níꞌ man soꞌ, ne̱ xcaj níꞌ cuentá se vaa niꞌndaj ya̱ sa̱ꞌ veꞌé vaa Yaꞌanj, ne̱ xcaj ya̱ níꞌ cuentá da̱j vaa maꞌa̱n Yaꞌanj ado̱nj. Ne̱ cheꞌé se si̱j nucua̱j ndoꞌo me soꞌ roꞌ, cheꞌé dan ma̱an nana̱ avii u̱u̱n tuꞌva soꞌ, ne̱ ꞌo̱ mán chre̱ꞌ nu̱ꞌ rasu̱u̱n ꞌyaj soꞌ a. Ga̱a quisíj tinavij soꞌ cacunꞌ tumé níꞌ, ga̱a ne̱ caꞌanj ca̱yáán soꞌ rej xta̱ꞌ ndoꞌo rej xꞌnu̱j Yaꞌanj, ne̱ rej nuva̱ꞌ Yaꞌanj rej sa̱ꞌ doj yáán soꞌ cuano̱ ado̱nj.

Hebreos 1:6

Ne̱ ꞌó nana̱ taj se vaa, ga̱a nica̱j Yaꞌanj man Taꞌníí soꞌ síí chava̱ꞌ caꞌnaꞌ soꞌ rihaan chumii̱, taj soꞌ a: Cara̱a̱ gue̱e̱ cunuda̱nj nij se‑mo̱zó Yaꞌanj rihaan soꞌ á.

Hebreos 1:8

Tza̱j ne̱ vaa doj nana̱ nó rihaan Danj Yaꞌanj nana̱ aꞌmii rihaan maꞌa̱n Taꞌníí Yaꞌanj, ne̱ nana̱ yoꞌ taj a: Yaꞌanj mé so̱ꞌ, ne̱ gu̱un chij so̱ꞌ nu̱ꞌ cavii nu̱ꞌ caꞌanj, ne̱ nica̱ ga̱a̱ rá so̱ꞌ ni̱caj yuꞌunj so̱ꞌ man yuvii̱ nu̱ꞌ cavii nu̱ꞌ caꞌanj a.

Hebreos 13:8

Veé Jesucristó asi̱j rque̱ do̱ꞌ, veé Jesucristó cuano̱ do̱ꞌ, veé Jesucristó nu̱ꞌ cavii nu̱ꞌ caꞌanj ado̱nj.

Apocalipsis 21:6

Ga̱a ne̱ cataj uún soꞌ rihanj a: ―A̱j quisíj quiꞌyáá ꞌu̱nj nu̱ꞌ rasu̱u̱n na̱nj á. Ne̱ ase vaa letrá ruviꞌ rej uun cheꞌe̱ alfabetó me letrá A, ne̱ ase vaa letrá ruviꞌ rej navij alfabetó me letrá Z, da̱nj vaa ꞌu̱nj, ne̱ dan me se si̱j nicu̱nꞌ asi̱j rque̱ mej, ne̱ veé ꞌu̱nj canicu̱nꞌ nu̱ꞌ cavii nu̱ꞌ caꞌanj na̱nj ado̱nj. Ne̱ rihaan síí nacoo̱ na me se rque̱ u̱u̱n ꞌu̱nj na coꞌo̱ soꞌ, ne̱ ga̱a̱ iꞌna̱ꞌ soꞌ nu̱ꞌ cavii nu̱ꞌ caꞌanj, quiꞌya̱j na yoꞌ ado̱nj.