Efesios 6:20 - Triqui de San Juan Copala

²⁰ ne̱ nda̱ꞌ se nu̱mií ꞌu̱nj agaꞌ ne̱ꞌ, tza̱j ne̱ ꞌu̱nj me síí quiriꞌ suun nata̱ꞌ nana̱ sa̱ꞌ yoꞌ rihaan yuvii̱, ne̱ cachi̱nj niꞌya̱j soj rihaan Yaꞌanj se vaa se̱ cuchuꞌvíꞌ ꞌu̱nj caꞌmi̱i̱ ꞌu̱nj nana̱ sa̱ꞌ yoꞌ rihaan yuvii̱, cheꞌé se no̱ xcúún yá ꞌu̱nj caꞌmi̱i̱ sca̱ꞌ yá ꞌu̱nj nana̱ sa̱ꞌ yoꞌ rihaan yuvii̱ ado̱nj.

Efesios 6:20 ပူးပေါင်းရင်းမြစ်များ

Hechos 21:33

Ga̱a ne̱ cuchiꞌ tanuu uun chij doj yoꞌ rihaan Pabló, ne̱ taꞌaa soꞌ man Pabló, ne̱ caꞌneꞌ soꞌ suun se vaa nu̱míj nij tanuu vi̱j agaꞌ ne̱ꞌ man Pabló, ne̱ xnáꞌanj soꞌ man nij yuvii̱ me síí me Pabló ne̱ da̱j quiꞌyaj soꞌ a.

Hechos 26:29

Ga̱a ne̱ cataj Pabló rihaan soꞌ a: ―Achíín ni̱ꞌyáá ꞌu̱nj rihaan Yaꞌanj se vaa, caꞌve̱e se do̱j nana̱ caꞌmi̱j, caꞌve̱e se noco̱o ndoꞌo caꞌmi̱j, tza̱j ne̱ né o̱ruún so̱ꞌ cuchuma̱n rá snana̱j maꞌ. Tana̱nj me rá ꞌu̱nj cuchuma̱n rá cunuda̱nj soj si̱j uno nana̱ aꞌmij cuano̱, ne̱ ase vaa ꞌu̱nj roꞌ, da̱nj ga̱a̱ soj uún na̱nj ado̱nj. Tza̱j ne̱ se̱ cunumi̱i soj ga̱ agaꞌ ne̱ꞌ nihánj, rá ꞌu̱nj maꞌ ―taj Pabló rihaan nij soꞌ a.

Hechos 28:20

Cheꞌé dan canacúún ꞌu̱nj man nij soj caꞌna̱ꞌ soj, cheꞌé se guun rá ꞌu̱nj que̱neꞌén ꞌu̱nj man soj do̱ꞌ, caꞌmi̱i̱ ꞌu̱nj ga̱ soj do̱ꞌ a. ꞌO̱ se cheꞌé síí naꞌvi̱j níꞌ síí caꞌve̱e quiꞌya̱j cavi̱i̱ sa̱ꞌ níꞌ si̱j israelitá roꞌ, me nu̱mií ꞌu̱nj agaꞌ ne̱ꞌ nihánj ado̱nj ―taj Pabló rihaan ꞌó nij síí israelitá yoꞌ a.

Hechos 28:31

Caꞌmii natáj soꞌ cheꞌé da̱j vaa uun chij Yaꞌanj, ne̱ tucuꞌyón soꞌ cheꞌé Jesucristó Si̱j ꞌNi̱j Raꞌa man níꞌ, ne̱ caꞌmii ranga̱ꞌ soꞌ, ne̱ a̱ doj ne ca̱ráán nii chrej rihaan soꞌ quiꞌya̱j soꞌ da̱nj a̱ maꞌ.

Hechos 5:29

Ga̱a ne̱ cataj Pedró do̱ꞌ, ꞌó nij síí cuneꞌ Jesús do̱ꞌ a: ―Tza̱j ne̱ ꞌo̱ se no̱ xcúún níꞌ cuno̱ níꞌ asino ya̱a̱n nana̱ aꞌmii Yaꞌanj rihaan nana̱ aꞌmii yuvii̱ a.

2 Corintios 3:12

Cheꞌé se uun ya̱ rá núj se vaa ga̱a̱ iꞌna̱ꞌ núj nu̱ꞌ cavii nu̱ꞌ caꞌanj, cheꞌé dan niha̱ꞌ rá núj, ne̱ ne naꞌa̱j núj a̱ maꞌ.

2 Corintios 5:20

Dan me se aꞌmii núj snana̱ Cristó rihaan yuvii̱, ne̱ maꞌa̱n Yaꞌanj rqué snana̱ Yaꞌanj rihaan núj caꞌmi̱i̱ núj cheꞌé maꞌa̱n Yaꞌanj, ne̱ cheꞌé dan rquee̱ ndoꞌo núj rihaan nij yuvii̱, ne̱ taj núj a: “Naꞌmi̱i̱ sa̱ꞌ nij soj ga̱ Yaꞌanj á.”

Efesios 3:1

Neꞌen nij soj se vaa ꞌni̱j ꞌu̱nj tagaꞌ cheꞌé se nocóꞌ ꞌu̱nj man Cristó Jesús, ne̱ aꞌmii natáj ꞌu̱nj rihaan nij soj si̱j yaníj cheꞌé soꞌ,

Efesios 4:1

Síí ꞌni̱j tagaꞌ cheꞌé se nocóꞌ ꞌu̱nj man Síí ꞌNi̱j Raꞌa man níꞌ mé ꞌu̱nj, ne̱ cheꞌé dan rqueé ꞌu̱nj man nij soj se vaa veꞌé canoco̱ꞌ soj man Yaꞌanj ga̱a chéé soj rihaan chumii̱ nihánj á. ꞌO̱ se Yaꞌanj me síí canacúún man soj canoco̱ꞌ soj man soꞌ a.

Efesios 6:19

Ne̱ cachi̱nj niꞌya̱j soj cheꞌé ma̱ꞌán ꞌu̱nj se vaa rque̱ Yaꞌanj nana̱ cu̱u caꞌmi̱i̱ ꞌu̱nj rihaan yuvii̱, ne̱ sca̱ꞌ ti̱haán ꞌu̱nj nu̱ꞌ nana̱ sa̱ꞌ cheꞌé Cristó rihaan nij yuvii̱ á. Dan me se nana̱ sa̱ꞌ yuve̱ tihaa̱n naca̱ Yaꞌanj man níꞌ me nana̱ sa̱ꞌ yoꞌ,

Filipenses 1:20

Dan me se uun ya̱ raj se vaa se̱ guun naꞌa̱j ꞌu̱nj maꞌ. Dan me se asi̱j rque̱ roꞌ, xcaj ndoꞌo yuvii̱ cuentá se vaa niꞌndaj ya̱ sa̱ꞌ vaa Cristó, quiꞌyáj, ne̱ caꞌve̱e se ga̱a̱ iꞌna̱ꞌ ꞌu̱nj do̱ꞌ, caꞌve̱e se cavi̱ꞌ ꞌu̱nj do̱ꞌ, tza̱j ne̱ da̱nj ina̱nj qui̱ꞌyáj cuano̱ nihánj, rá ꞌu̱nj ado̱nj.

Filipenses 1:7

Ne̱ ya̱ ya̱ vaa cheꞌé caꞌmij da̱nj cheꞌé ta̱ranꞌ nij soj chugua̱nj. Dan me se ya̱ caráyaꞌa̱nj uxrá soj manj, ne̱ ga̱a ꞌni̱j ꞌu̱nj tagaꞌ do̱ꞌ, ga̱a caꞌmii ꞌu̱nj rihaan nij síí naꞌvej rá cuno̱ nana̱ sa̱ꞌ cheꞌé Cristó cheꞌé rej xca̱j nij soꞌ cuentá do̱ꞌ, ga̱a tucuꞌyón ꞌu̱nj nana̱ sa̱ꞌ yoꞌ man yuvii̱ do̱ꞌ, ne̱ racuíj ndoꞌo cunuda̱nj nij soj manj, ne̱ cheꞌé dan me se soj si̱j ꞌyaj se‑su̱u̱n Yaꞌanj ga̱j roꞌ, me ndoꞌo ya̱ raj que̱neꞌenj man soj ado̱nj.

Colosenses 4:3

Dan me se cachi̱nj niꞌya̱j uún soj rihaan Yaꞌanj cheꞌé núj se vaa ga̱a̱ yaꞌnúj rihaan núj caꞌmi̱i̱ núj snana̱ Cristó nana̱ sa̱ꞌ yuve̱ tihaa̱n naca̱ Yaꞌanj rihaan níꞌ á. Cheꞌé nana̱ yoꞌ me ꞌnij ꞌu̱nj tagaꞌ nihánj cuano̱ ado̱nj.

Colosenses 4:4

Vaa suun rihaan ꞌu̱nj ti̱haán ꞌu̱nj snana̱ Cristó rihaan yuvii̱, ne̱ cheꞌé dan cachi̱nj niꞌya̱j soj rihaan Yaꞌanj se vaa caꞌve̱e caꞌmi̱i̱ natáj sca̱ꞌ ꞌu̱nj rihaan nij soꞌ á.

1 Tesalonicenses 2:2

Neꞌen soj se vaa asino ya̱a̱n quiranꞌ núj sayuun chumanꞌ Filipos, ne̱ qui̱j ndoꞌo caꞌmii nij síí ma̱n chumanꞌ yoꞌ niꞌya̱j nij soꞌ man núj a. Ne̱ nda̱ꞌ se sayu̱u̱n ndoꞌo vaa nataꞌ núj snana̱ Yaꞌanj nana̱ sa̱ꞌ rihaan soj quiꞌyaj nij síí ma̱n chiháán soj, tza̱j ne̱ ne cuchuꞌvi̱ꞌ núj maꞌ. Tana̱nj caꞌnéé nimán núj doj a̱ nata̱ꞌ núj nana̱ sa̱ꞌ rihaan soj, quiꞌyaj Taꞌanj núj a.

2 Timoteo 1:16

Me rá ꞌu̱nj ga̱a̱ ꞌe̱e̱ rá Yaꞌanj man nij tucua̱ síí cuꞌna̱j Onesíforo a. ꞌO̱ se a̱j guun queꞌe̱e̱ ndoꞌo racuíj soꞌ manj, ne̱ nda̱a nuu cui̱j nimán ꞌu̱nj quiꞌyaj soꞌ, ne̱ ne gu̱un naꞌa̱j soꞌ se vaa ꞌni̱j ꞌu̱nj tagaꞌ maꞌ.

2 Timoteo 2:9

Cheꞌé nana̱ nihánj ránꞌ ꞌu̱nj sayuun, ne̱ nda̱a ꞌni̱j ꞌu̱nj tagaꞌ, nda̱ꞌ rá se vaa ranꞌ síí tumé cacunꞌ chugua̱nj. ꞌO̱ se taj se ꞌyaj maꞌ. Xa̱ꞌ snana̱ Yaꞌanj, tza̱j ne̱ se̱ caꞌvee nu̱míj nii man yoꞌ do̱ꞌ, se̱ caꞌvee caxri̱i̱ nii tagaꞌ man nana̱ yoꞌ do̱ꞌ maꞌ.

Filemón 1:10

ne̱ cheꞌé dan cachi̱nj ni̱ꞌyáá ꞌu̱nj do̱j rihaan so̱ꞌ cheꞌé síí cuꞌna̱j Onésimo a. Dan me se ase vaa ꞌo̱ taꞌníj roꞌ, da̱nj vaa soꞌ rihanj cuano̱, cheꞌé se ga̱a ꞌni̱j ꞌu̱nj tagaꞌ, ne̱ cataj xnaꞌanj ꞌu̱nj rihaan soꞌ cheꞌé Cristó, ne̱ guun cheꞌe̱ soꞌ canocoꞌ soꞌ man Cristó na̱nj ado̱nj.

Filemón 1:9

Ma̱an se veꞌé rqueé ꞌu̱nj mán so̱ꞌ qui̱ꞌyáá so̱ꞌ nda̱a vaa no̱ xcúún so̱ꞌ qui̱ꞌyáá so̱ꞌ na̱nj á. ꞌU̱nj si̱j cuꞌna̱j Pabló nihánj me se a̱j chii nga̱ mej ne̱ ꞌni̱j ꞌu̱nj tagaꞌ cuano̱ cheꞌé se nocóꞌ ꞌu̱nj man Cristó Jesús ado̱nj. ꞌO̱ se neꞌén ꞌu̱nj se vaa ꞌo̱ ꞌe̱e̱ rá so̱ꞌ tinúú so̱ꞌ,

1 Juan 3:16

Ne̱ Cristó roꞌ, me síí caꞌvej rá cavi̱ꞌ cheꞌé níꞌ, ne̱ cheꞌé dan neꞌen níꞌ se vaa ꞌe̱e̱ rá soꞌ man níꞌ ado̱nj. Ne̱ cheꞌé dan no̱ xcúún níꞌ caꞌne̱j nimán níꞌ cavi̱ꞌ níꞌ cheꞌé tinúú níꞌ chugua̱nj.

Judas 1:3

Tinu̱j, nocoj, guun ndoꞌo raj cachro̱nj nana̱ rihaan yanj caꞌne̱j ꞌu̱nj rihaan soj cheꞌé da̱j vaa nanii ta̱ranꞌ níꞌ rihaan chrej chiꞌi̱i̱ do̱ꞌ, rihaan sayuun do̱ꞌ, ꞌyaj Yaꞌanj ado̱nj. Tza̱j ne̱ ya̱j me se no̱ xcúnj cachro̱nj ꞌó nana̱ rihaan yanj, ne̱ cata̱j xnaꞌanj ꞌu̱nj rihaan soj se vaa te̱rquee̱ ndoꞌo soj canoco̱ꞌ xraan soj stucua̱nj Yaꞌanj tucuáán tacuachén nij síí caꞌmii natáj nana̱ sa̱ꞌ cheꞌé Cristó rihaan soj si̱j noco̱ꞌ man Yaꞌanj a.