Efesios 3:21 - Triqui de San Juan Copala

²¹ Cheꞌé dan cata̱j xꞌneꞌ níꞌ si̱j noco̱ꞌ man Cristó se vaa niꞌndaj ya̱ sa̱ꞌ veꞌé vaa Yaꞌanj, ne̱ ꞌo̱ da̱nj caꞌmi̱i̱ níꞌ ga̱ taꞌníí níꞌ nu̱ꞌ cavii nu̱ꞌ caꞌanj cheꞌé Cristó Jesús a. Veé da̱nj ga̱a̱ ya̱ ado̱nj.

Efesios 3:21 ပူးပေါင်းရင်းမြစ်များ

San Mateo 6:13

Ca̱ráán raꞌá so̱ꞌ xráá núj rihaan chrej chiꞌi̱i̱, ne̱ ti̱nanii so̱ꞌ man núj se̱ quiꞌyaj núj cacunꞌ, quiꞌya̱j Síí Chre̱e maꞌ. Ina̱nj da̱nj caꞌmi̱i̱ soj cachi̱nj niꞌya̱j soj rihaan Yaꞌanj ado̱nj.

San Lucas 2:14

Niꞌndaj ya̱ sa̱ꞌ veꞌé vaa Yaꞌanj, cata̱j nij síí ma̱n xta̱ꞌ, ne̱ ga̱a̱ xe̱j nimán nij yuvii̱ si̱j sa̱ꞌ nimán ma̱n rihaan chumii̱ a, taj nij se‑mo̱zó Yaꞌanj rihaan nij síí tumé matzinj a.

Romanos 11:36

Dan me se maꞌa̱n Yaꞌanj quiꞌyaj cunuda̱nj rasu̱u̱n, ne̱ cheꞌé maꞌa̱n Yaꞌanj mán rasu̱u̱n rihaan chumii̱, ne̱ se rásuun Yaꞌanj me cunuda̱nj rasu̱u̱n a. Veꞌé uxrá caꞌmi̱i̱ cunuda̱nj yuvii̱ cheꞌé Yaꞌanj nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj.

Romanos 16:27

Ne̱ Yaꞌanj me se o̱rúnꞌ Yaꞌanj, ne̱ raa̱ o̱rúnꞌ soꞌ avii cunuda̱nj nana̱ cu̱u sa̱ꞌ a. Sa̱ꞌ uxrá quiꞌyaj Jesucristó cheꞌé níꞌ, ne̱ cheꞌé dan niꞌndaj ya̱ sa̱ꞌ veꞌé vaa Yaꞌanj cata̱j níꞌ nu̱ꞌ cavii nu̱ꞌ caꞌanj a. Veé da̱nj ga̱a̱ ya̱ ado̱nj.

Gálatas 1:5

Sa̱ꞌ uxrá vaa ꞌyaj Rej níꞌ Yaꞌanj, cata̱j níꞌ nu̱ꞌ cavii nu̱ꞌ caꞌanj á. Veé da̱nj ga̱a̱ ya̱ ado̱nj.

Efesios 1:6

Da̱nj quiꞌyaj soꞌ cheꞌé yan veꞌé caꞌmi̱i̱ níꞌ ni̱ꞌyaj níꞌ man Yaꞌanj, ne̱ cata̱j níꞌ se vaa veꞌé ndoꞌo quiꞌyaj soꞌ se lu̱j cheꞌé níꞌ, cheꞌé se noco̱ꞌ níꞌ man Cristó síí ꞌe̱e̱ rá soꞌ niꞌya̱j soꞌ man na̱nj ado̱nj.

Efesios 2:7

Nda̱a síj, ga̱a ne̱ nu̱ꞌ cavii nu̱ꞌ caꞌanj ti̱haa̱n Yaꞌanj man nij yuvii̱ se vaa quiꞌyaj ndoꞌo Yaꞌanj se lu̱j cheꞌé níꞌ, ne̱ dan me se queneꞌe̱n nij yuvii̱ se vaa cunuu ꞌe̱e̱ ndoꞌo rá Yaꞌanj man níꞌ cheꞌé se síí noco̱ꞌ man Cristó Jesús me níꞌ na̱nj ado̱nj.

Efesios 4:1

Síí ꞌni̱j tagaꞌ cheꞌé se nocóꞌ ꞌu̱nj man Síí ꞌNi̱j Raꞌa man níꞌ mé ꞌu̱nj, ne̱ cheꞌé dan rqueé ꞌu̱nj man nij soj se vaa veꞌé canoco̱ꞌ soj man Yaꞌanj ga̱a chéé soj rihaan chumii̱ nihánj á. ꞌO̱ se Yaꞌanj me síí canacúún man soj canoco̱ꞌ soj man soꞌ a.

Filipenses 1:11

Dan me se ya̱ gu̱un soj yuvii̱ cunuu sa̱ꞌ nimán quiꞌya̱j Jesucristó, cheꞌé rej xca̱j nii cuentá se vaa niꞌndaj ya̱ veꞌé vaa Yaꞌanj ne̱ cata̱j nii se vaa sa̱ꞌ uxrá vaa soꞌ ado̱nj.

Filipenses 2:11

ne̱ cata̱j ya̱ cunuda̱nj nij soꞌ se vaa maꞌa̱n Jesucristó me Síí ꞌNi̱j Raꞌa man níꞌ, ga̱a ne̱ queneꞌe̱n ya̱ nij soꞌ se vaa sa̱ꞌ uxrá quiꞌyaj Rej níꞌ Yaꞌanj ado̱nj.

Filipenses 4:20

Cata̱j níꞌ se vaa niꞌndaj ya̱ sa̱ꞌ veꞌé vaa Rej níꞌ Yaꞌanj nu̱ꞌ cavii nu̱ꞌ caꞌanj á. Veé da̱nj ga̱a̱ ya̱ ado̱nj.

2 Timoteo 4:18

Ne̱ Síí ꞌNi̱j Raꞌa man níꞌ me síí ti̱nanii manj rihaan da̱j a̱ se nij me rá nii quiꞌya̱j nii manj, ne̱ soꞌ me síí quiꞌya̱j cavi̱i̱ sa̱ꞌ ꞌu̱nj ca̱yáán ꞌu̱nj ga̱ soꞌ rej xta̱ꞌ rej uun chij soꞌ a. Cata̱j níꞌ se vaa niꞌndaj ya̱ sa̱ꞌ veꞌé vaa soꞌ nu̱ꞌ cavii nu̱ꞌ caꞌanj á. Veé da̱nj ga̱a̱ ya̱ ado̱nj.

Hebreos 13:21

gu̱un nucua̱j soj quiꞌya̱j soj nu̱ꞌ suun sa̱ꞌ, ne̱ quiꞌya̱j soj nu̱ꞌ se vaa me rá Yaꞌanj quiꞌya̱j soj, quiꞌya̱j maꞌa̱n Yaꞌanj chugua̱nj. Ne̱ dan me se gu̱un níꞌ se niha̱ꞌ rihaan Yaꞌanj, quiꞌya̱j maꞌa̱n Yaꞌanj cheꞌé Jesucristó ado̱nj. Ne̱ nu̱ꞌ cavii nu̱ꞌ caꞌanj cata̱j níꞌ se vaa niꞌndaj ya̱ sa̱ꞌ veꞌé vaa soꞌ ado̱nj. Veé da̱nj ga̱a̱ ya̱ ado̱nj.

1 Pedro 2:5

Ne̱ ase vaa nij yuvej leꞌe̱j nii nataꞌ xráá yuvej xi̱j roꞌ, da̱nj vaa ta̱ranꞌ soj, sese canoco̱ꞌ xraan soj man Jesucristó, ne̱ veꞌé cuma̱n rcuaꞌa̱a̱n soj, quiꞌya̱j Jesucristó a. Ga̱a ne̱ cunu̱u sa̱ꞌ nimán soj, ga̱a ne̱ ase vaa xrej narii Yaꞌanj cu̱nuû rihaan soꞌ roꞌ, da̱nj ga̱a̱ soj rihaan Yaꞌanj a. Ne̱ ase vaa se sa̱ꞌ rqué nij xrej rihaan Yaꞌanj roꞌ, da̱nj ga̱a̱ se sa̱ꞌ quiꞌya̱j soj cheꞌé Jesucristó, ga̱a ne̱ cara̱nꞌ rá Yaꞌanj se vaa ꞌyaj soj ado̱nj.

1 Pedro 5:11

Ne̱ gu̱un chij ndoꞌo Yaꞌanj nu̱ꞌ cavii nu̱ꞌ caꞌanj, ne̱ niꞌndaj ya̱ sa̱ꞌ veꞌé ga̱a̱ soꞌ na̱nj ado̱nj. Veé da̱nj ga̱a̱ ya̱ ado̱nj.

2 Pedro 3:18

Cheꞌé dan ꞌo̱ gu̱un rá soj ni̱ꞌyaj soj se lu̱j quiꞌyaj Yaꞌanj ga̱ soj, ne̱ ꞌo̱ gu̱un rá soj xca̱j soj cuentá sa̱ꞌ doj cheꞌé Jesucristó Si̱j ꞌNi̱j Raꞌa man níꞌ, Si̱j Tinanii man níꞌ rihaan Sayuun ado̱nj. Cata̱j níꞌ se vaa niꞌndaj ya̱ sa̱ꞌ veꞌé vaa soꞌ cuano̱ do̱ꞌ, nu̱ꞌ cavii nu̱ꞌ caꞌanj do̱ꞌ á. Veé da̱nj ga̱a̱ ya̱ ado̱nj.

Judas 1:25

Dan me se o̱rúnꞌ Yaꞌanj Si̱j Tinanii man níꞌ rihaan Sayuun me soꞌ chugua̱nj. Cheꞌé Jesucristó Si̱j ꞌNi̱j Raꞌa man níꞌ roꞌ, cata̱j níꞌ se vaa niꞌndaj ya̱ sa̱ꞌ veꞌé ga̱a̱ Yaꞌanj do̱ꞌ, se vaa gu̱un chij soꞌ do̱ꞌ, se vaa ni̱caj soꞌ se nucua̱j do̱ꞌ, se vaa ni̱caj soꞌ suun noco̱o do̱ꞌ á. Nu̱ꞌ nihánj me se nó xcúún soꞌ ni̱caj soꞌ nu̱ꞌ cavii nu̱ꞌ caꞌnaꞌ do̱ꞌ, yoꞌ ya̱j do̱ꞌ, nu̱ꞌ cavii nu̱ꞌ caꞌanj do̱ꞌ á. Veé da̱nj ga̱a̱ ya̱ ado̱nj.