Colosenses 2:10 - Triqui de San Juan Copala

¹⁰ Ne̱ Cristó me síí uun chij rihaan nu̱ꞌ nij nana̱ chre̱e ma̱n rihaan chumii̱ nihánj, ne̱ ya̱nj Cristó ga̱ soj, ne̱ cheꞌé dan taj se achiin man soj cuano̱ maꞌ.

Colosenses 2:10 ပူးပေါင်းရင်းမြစ်များ

San Mateo 28:18

Ga̱a ne̱ cuchiꞌ Jesús rihaan nij soꞌ, ne̱ cataj soꞌ rihaan nij soꞌ a: ―Ya̱j me se ꞌu̱nj me síí uun chij xta̱ꞌ do̱ꞌ, nu̱ꞌ rihaan yoꞌóó do̱ꞌ, quiꞌyaj Yaꞌanj ado̱nj.

San Juan 1:16

Da̱nj caꞌmii Juan cheꞌé se Jesús me síí nica̱j nu̱ꞌ se lu̱j, ne̱ soꞌ me síí rqué se lu̱j man ta̱ranꞌ níꞌ, ne̱ né do̱j se lu̱j ꞌyaj soꞌ cheꞌé níꞌ maꞌ. Tana̱nj queꞌe̱e̱ uxrá se lu̱j ꞌyaj soꞌ cheꞌé níꞌ ado̱nj.

1 Corintios 15:24

Síj ga̱a ne̱ navi̱j nu̱ꞌ rasu̱u̱n a. ꞌO̱ se caꞌne̱e̱ Cristó suun ata̱ nu̱ꞌ nij síí rii taꞌngaꞌ do̱ꞌ, nu̱ꞌ nij síí nica̱j suun do̱ꞌ, nu̱ꞌ nij síí nucua̱j do̱ꞌ, ne̱ nago̱ꞌ soꞌ nu̱ꞌ suun rihaan Rej níꞌ Yaꞌanj a.

Efesios 3:10

Tza̱j ne̱ da̱j a̱ nij síí uun chij rej xta̱ꞌ do̱ꞌ, da̱j a̱ nij síí nica̱j suun rej xta̱ꞌ do̱ꞌ roꞌ, me rá Yaꞌanj xca̱j nij soꞌ cuentá cuano̱ se vaa ina̱nj nana̱ cu̱u sa̱ꞌ ndoꞌo avii raa̱ Yaꞌanj, ne̱ queneꞌe̱n nij soꞌ man xꞌneꞌ ta̱ranꞌ níꞌ si̱j noco̱ꞌ man Cristó, ne̱ xca̱j nij soꞌ cuentá se vaa avii ndoꞌo raa̱ Yaꞌanj ado̱nj.

Colosenses 2:15

Dan me se cheꞌé se caviꞌ Cristó rihaan rcutze̱ roꞌ, cheꞌé dan quiꞌyaj canaán Yaꞌanj man da̱j a̱ nij nana̱ chre̱e uun chij do̱ꞌ, da̱j a̱ nij nana̱ chre̱e nica̱j suun do̱ꞌ, ne̱ caxríj naꞌa̱j ranga̱ꞌ Yaꞌanj man nij soꞌ a.

Colosenses 3:11

Ya̱j me se taj se ꞌyaj sese na̱j guun yuvii̱ me soj maꞌ. Caꞌve̱e se si̱j israelitá do̱ꞌ, caꞌve̱e se si̱j yaníj do̱ꞌ, caꞌve̱e se si̱j ta̱j taꞌngaꞌ man do̱ꞌ, caꞌve̱e se né si̱j ta̱j taꞌngaꞌ man do̱ꞌ, caꞌve̱e se si̱j ma̱n ꞌó chumanꞌ do̱ꞌ, caꞌve̱e se mozó siꞌyaj ꞌó yuvii̱ do̱ꞌ, caꞌve̱e se si̱j chéé maꞌa̱n do̱ꞌ, taj se ꞌyaj maꞌ. O̱rúnꞌ Cristó me se achiin man ꞌo̱ ꞌo̱ xꞌneꞌ yuvii̱, ne̱ ꞌo̱ cuya̱a̱n yáán soꞌ nimán ꞌo̱ ꞌo̱ nij soꞌ ado̱nj.

Hebreos 5:9

Dan me se guun soꞌ síí uno nu̱ꞌ snana̱ rej, ne̱ cheꞌé dan guun soꞌ síí tinanii man ta̱ranꞌ níꞌ si̱j uno rihaan soꞌ rihaan sayuun, ne̱ dan me se cavi̱i̱ sa̱ꞌ níꞌ nu̱ꞌ cavii nu̱ꞌ caꞌanj, quiꞌya̱j soꞌ ado̱nj.

1 Pedro 3:22

Dan me se quisíj cunuu iꞌna̱ꞌ uún Jesucristó, ga̱a ne̱ quinanꞌ soꞌ rej xta̱ꞌ, ne̱ xꞌnúú Yaꞌanj rej nuva̱ꞌ Yaꞌanj yáán soꞌ cuano̱, ne̱ uun chij soꞌ rihaan cunuda̱nj nij se‑mo̱zó Yaꞌanj do̱ꞌ, rihaan nu̱ꞌ nij síí me nana̱ uun chij do̱ꞌ, nana̱ nucua̱j do̱ꞌ ado̱nj.