Colosenses 1:16 - Triqui de San Juan Copala

¹⁶ Dan me se nicu̱nꞌ Cristó ga̱ Yaꞌanj ga̱a quiꞌyaj Yaꞌanj se ma̱n xta̱ꞌ do̱ꞌ, se ma̱n rihaan chumii̱ do̱ꞌ, rasu̱u̱n ruviꞌ niꞌya̱j yuvii̱ do̱ꞌ, rasu̱u̱n ne ruviꞌ niꞌya̱j yuvii̱ do̱ꞌ, da̱j a̱ nij se‑mo̱zó Yaꞌanj uun chij rihaan chumii̱ nihánj do̱ꞌ, cunuda̱nj rasu̱u̱n yoꞌ me se quiꞌyaj Yaꞌanj á. Dan me se caꞌneꞌ Yaꞌanj suun rihaan Cristó quiꞌya̱j Cristó cunuda̱nj rasu̱u̱n, ne̱ ina̱nj cheꞌé Cristó vaa cunuda̱nj rasu̱u̱n yoꞌ, ne̱ dan me se me rá Yaꞌanj ni̱caj yuꞌunj Cristó man cunuda̱nj rasu̱u̱n yoꞌ na̱nj ado̱nj.

Colosenses 1:16 ပူးပေါင်းရင်းမြစ်များ

San Juan 1:10

ne̱ cayáán soꞌ rihaan chumii̱ nihánj, ne̱ maꞌa̱n soꞌ me síí quiꞌyaj chumii̱ nihánj, quiꞌyaj Yaꞌanj, tza̱j ne̱ ne xca̱j nij síí ma̱n rihaan chumii̱ nihánj cuentá me síí me soꞌ a̱ maꞌ.

San Juan 1:3

ne̱ quiꞌyaj soꞌ nu̱ꞌ rasu̱u̱n, quiꞌyaj Yaꞌanj a. Taj va̱j a̱ ꞌó rasu̱u̱n guun sese nuviꞌ Snana̱ Yaꞌanj; tana̱nj o̱rúnꞌ maꞌa̱n soꞌ quiꞌyaj cunuda̱nj na̱nj ado̱nj.

Romanos 11:36

Dan me se maꞌa̱n Yaꞌanj quiꞌyaj cunuda̱nj rasu̱u̱n, ne̱ cheꞌé maꞌa̱n Yaꞌanj mán rasu̱u̱n rihaan chumii̱, ne̱ se rásuun Yaꞌanj me cunuda̱nj rasu̱u̱n a. Veꞌé uxrá caꞌmi̱i̱ cunuda̱nj yuvii̱ cheꞌé Yaꞌanj nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj.

Romanos 8:38

Cheꞌé dan uun ya̱ rá ꞌu̱nj se vaa a̱ ꞌó rasu̱u̱n se̱ caꞌvee naquiꞌya̱j yaníj man níꞌ ga̱ Yaꞌanj maꞌ. Sese aviꞌ níꞌ do̱ꞌ, sese vaa iꞌna̱ꞌ níꞌ do̱ꞌ, nij se‑mo̱zó Yaꞌanj do̱ꞌ, nij nana̱ chre̱e uun chij do̱ꞌ, nij nana̱ chre̱e nucua̱j do̱ꞌ, sayuun ranꞌ níꞌ cuano̱ do̱ꞌ, sayuun quira̱nꞌ níꞌ rej riha̱a̱n do̱ꞌ,

Romanos 9:5

Xi̱i nij yuvii̱ israelitá me nij síí ma̱n ga̱a naá síí cuꞌna̱j Abraham do̱ꞌ, Isaac do̱ꞌ, Jacob do̱ꞌ a. ꞌO̱ tuviꞌ nij soꞌ me Cristó Síí Caꞌnéé Yaꞌanj Ti̱nanii man Yuvii̱ rihaan Sayuun, ne̱ Cristó me se Yaꞌanj me soꞌ, ne̱ uun chij soꞌ rihaan cunuda̱nj a. Veꞌé uxrá caꞌmi̱i̱ níꞌ cheꞌé soꞌ nu̱ꞌ cavii nu̱ꞌ caꞌanj na̱nj á. Veé da̱nj ga̱a̱ ya̱ ado̱nj.

1 Corintios 8:6

Ne̱ xa̱ꞌ níꞌ, tza̱j ne̱ neꞌen níꞌ se vaa o̱rúnꞌ ya̱ Yaꞌanj á. Rej níꞌ Yaꞌanj me soꞌ, ne̱ o̱rúnꞌ soꞌ me síí quiꞌyaj cunuda̱nj rasu̱u̱n ma̱n rihaan chumii̱ nihánj, ne̱ ina̱nj cheꞌé maꞌa̱n soꞌ vaa iꞌna̱ꞌ níꞌ a. Ne̱ vaa o̱rúnꞌ Síí ꞌNi̱j Raꞌa man níꞌ, ne̱ Jesucristó cuꞌna̱j soꞌ, ne̱ cheꞌé soꞌ curuviꞌ nu̱ꞌ rasu̱u̱n ma̱n rihaan chumii̱ nihánj, ne̱ cheꞌé soꞌ ya̱ vaa iꞌna̱ꞌ níꞌ ado̱nj.

Efesios 1:10

asa̱ꞌ quisíj güii caꞌna̱ꞌ uún Cristó rihaan chumii̱ nihánj a. Dan me se güii yoꞌ me se gu̱un chij Cristó rihaan cunuda̱nj rasu̱u̱n, quiꞌya̱j Yaꞌanj, ne̱ gu̱un chij Cristó rihaan cunuda̱nj nij rasu̱u̱n ma̱n rej xta̱ꞌ do̱ꞌ, rihaan cunuda̱nj nij rasu̱u̱n ma̱n rihaan chumii̱ nihánj do̱ꞌ a.

Efesios 6:12

Da̱nj quiꞌya̱j níꞌ cheꞌé se nij síí unuꞌ ga̱ níꞌ me nij nana̱ chre̱e uun chij rihaan chumii̱ nihánj do̱ꞌ, nij nana̱ chre̱e nica̱j suun do̱ꞌ, nij nana̱ chre̱e rii taꞌngaꞌ rihaan rej rmi̱ꞌ ma̱n rihaan chumii̱ nihánj do̱ꞌ, nij xꞌneꞌ ri̱i̱ nana̱ chre̱e chéé rej xta̱ꞌ do̱ꞌ ado̱nj.

Filipenses 2:10

Cheꞌé dan vaa güii, ne̱ caꞌa̱nj ca̱yáán ru̱j cunuda̱nj nij síí ma̱n xta̱ꞌ do̱ꞌ, nij síí ma̱n rihaan chumii̱ do̱ꞌ, nij síí ma̱n rej rque yoꞌóó do̱ꞌ, cheꞌé se‑chuvi̱i Jesús,

Colosenses 1:15

Ne ruviꞌ Yaꞌanj niꞌya̱j yuvii̱ maꞌ. Ma̱an se queneꞌen níꞌ man Cristó, ne̱ xcaj níꞌ cuentá da̱j vaa maꞌa̱n Yaꞌanj ado̱nj. Asi̱j ataa quiꞌya̱j Yaꞌanj chumii̱, ne̱ a̱j nicu̱nꞌ Cristó ga̱ soꞌ ado̱nj.

Colosenses 1:20

Asino quiriꞌ nu̱ꞌ chumii̱ rihaan Yaꞌanj cheꞌé cacunꞌ quiꞌyaj yuvii̱, tza̱j ne̱ caviꞌ Cristó rihaan rcutze̱ cheꞌé yuvii̱, quiꞌyaj Yaꞌanj a. Ne̱ caꞌve̱e cunu̱u sa̱ꞌ yuvii̱ do̱ꞌ, nu̱ꞌ chumii̱ do̱ꞌ, rihaan Yaꞌanj, ne̱ gu̱un niha̱ꞌ rá Yaꞌanj ni̱ꞌyaj Yaꞌanj nu̱ꞌ se ma̱n rihaan chumii̱ do̱ꞌ, nu̱ꞌ se ma̱n xta̱ꞌ do̱ꞌ na̱nj ado̱nj. Yoꞌ me se vaa quiꞌyaj Yaꞌanj ga̱a caꞌnéé Yaꞌanj man Cristó rihaan chumii̱ nihánj ne̱ cayanj ton man Cristó ga̱a caviꞌ soꞌ rihaan rcutze̱ na̱nj ado̱nj.

Colosenses 2:10

Ne̱ Cristó me síí uun chij rihaan nu̱ꞌ nij nana̱ chre̱e ma̱n rihaan chumii̱ nihánj, ne̱ ya̱nj Cristó ga̱ soj, ne̱ cheꞌé dan taj se achiin man soj cuano̱ maꞌ.

Colosenses 2:15

Dan me se cheꞌé se caviꞌ Cristó rihaan rcutze̱ roꞌ, cheꞌé dan quiꞌyaj canaán Yaꞌanj man da̱j a̱ nij nana̱ chre̱e uun chij do̱ꞌ, da̱j a̱ nij nana̱ chre̱e nica̱j suun do̱ꞌ, ne̱ caxríj naꞌa̱j ranga̱ꞌ Yaꞌanj man nij soꞌ a.

Hebreos 1:2

Tza̱j ne̱ ya̱j ga̱a nichrunꞌ caꞌa̱nj niꞌya̱ chumii̱ nihánj me se cataj xnaꞌanj maꞌa̱n ya̱ Taꞌníí Yaꞌanj snana̱ Yaꞌanj rihaan níꞌ, quiꞌyaj Yaꞌanj, ne̱ Taꞌníí Yaꞌanj me síí cuneꞌ Yaꞌanj man se vaa gu̱un siꞌya̱j soꞌ man cunuda̱nj rasu̱u̱n vaa güii, ne̱ soꞌ me síí quiꞌyaj nu̱ꞌ chumii̱ ga̱ xta̱ꞌ, quiꞌyaj Yaꞌanj ado̱nj.

Hebreos 2:10

Dan me se Yaꞌanj me síí quiꞌyaj nu̱ꞌ rasu̱u̱n cheꞌé maꞌa̱n ina̱nj soꞌ chugua̱nj. Dan me se vaa güii, ne̱ nucui̱ꞌ ndoꞌo nij taꞌníí Yaꞌanj rihaan Yaꞌanj rej xta̱ꞌ, quiꞌya̱j Yaꞌanj, ne̱ Jesús me síí narqué chrej sa̱ꞌ canoco̱ꞌ nij taꞌníí Yaꞌanj, ne̱ nani̱i̱ nij soꞌ rihaan sayuun, ne̱ cavi̱i̱ sa̱ꞌ nij soꞌ quiꞌya̱j soꞌ chugua̱nj. Cheꞌé dan caꞌvej Yaꞌanj quira̱nꞌ Jesús sayuun ado̱nj. Ne̱ ma̱an cheꞌé sayuun quiranꞌ soꞌ roꞌ, cheꞌé dan me uun chij ndoꞌo soꞌ ado̱nj.

1 Pedro 3:22

Dan me se quisíj cunuu iꞌna̱ꞌ uún Jesucristó, ga̱a ne̱ quinanꞌ soꞌ rej xta̱ꞌ, ne̱ xꞌnúú Yaꞌanj rej nuva̱ꞌ Yaꞌanj yáán soꞌ cuano̱, ne̱ uun chij soꞌ rihaan cunuda̱nj nij se‑mo̱zó Yaꞌanj do̱ꞌ, rihaan nu̱ꞌ nij síí me nana̱ uun chij do̱ꞌ, nana̱ nucua̱j do̱ꞌ ado̱nj.