Apocalipsis 21:22 - Triqui de San Juan Copala

²² Ne̱ nuviꞌ nuvií noco̱o queneꞌén ꞌu̱nj rque chumanꞌ yoꞌ maꞌ. ꞌO̱ se maꞌa̱n Yaꞌanj Si̱j ꞌNi̱j Raꞌa man níꞌ Si̱j Uun Nucua̱j ꞌYaj Cunuda̱nj ga̱ maꞌa̱n Matzinj Leꞌe̱j me ro̱j síí guun nuvií rque chumanꞌ yoꞌ na̱nj ado̱nj.

Apocalipsis 21:22 ပူးပေါင်းရင်းမြစ်များ

San Mateo 24:2

Ga̱a ne̱ cataj Jesús rihaan nij soꞌ a: ―Dan me se neꞌen soj nu̱ꞌ veꞌ ma̱n rej ya̱nj nuvií noco̱o nihánj naꞌ. Ya̱ ya̱ cata̱j xnaꞌanj ꞌu̱nj rihaan soj cuano̱ se vaa vaa güii, ne̱ cane̱e̱ nu̱ꞌ yoꞌ, ne̱ a̱ ꞌó yuvej se̱ quitáá xráá tuviꞌ yuvej nihánj a̱ maꞌ ―taj Jesús a.

San Juan 10:30

ꞌO̱ se ase vaa o̱rúnꞌ yuvii̱ vaa ꞌu̱nj ga̱ Réj ado̱nj ―taj Jesús rihaan nij soꞌ a.

San Juan 13:32

Ne̱ cheꞌé dan queneꞌe̱n níꞌ se vaa niꞌndaj ya̱ sa̱ꞌ veꞌé vaa ma̱ꞌanj, quiꞌya̱j Yaꞌanj, ne̱ nichrunꞌ quiꞌya̱j soꞌ da̱nj na̱nj ado̱nj.

San Juan 4:21

Ga̱a ne̱ cataj Jesús rihaan chana̱ a: ―Cuchuma̱n rá so̱ꞌ nana̱ nihánj nana̱ cata̱j xnaꞌanj ꞌu̱nj rihaan so̱ꞌ, nocoj. Vaa güii, ne̱ se̱ cavii nij soj raa̱ quij nihánj do̱ꞌ, se̱ caꞌanj nij soj chumanꞌ Jerusalén do̱ꞌ, cara̱a̱ gue̱e̱ soj rihaan Rej níꞌ Yaꞌanj maꞌ.

San Juan 4:23

Tza̱j ne̱ vaa güii, ne̱ nij síí ya̱ aráj gue̱e̱ rihaan Rej níꞌ Yaꞌanj roꞌ, gu̱un ina̱nj rá nimán nij soꞌ ya̱ cara̱a̱ gue̱e̱ nij soꞌ rihaan Yaꞌanj na̱nj ado̱nj. Ne̱ cuano̱ nihánj me a̱j guun cheꞌe̱ yuvii̱ quiꞌyaj yuvii̱ da̱nj ado̱nj. ꞌO̱ se me ndoꞌo rá Rej níꞌ Yaꞌanj cara̱a̱ gue̱e̱ ya̱ yuvii̱ rihaan soꞌ chugua̱nj.

Colosenses 1:19

Ase vaa maꞌa̱n Yaꞌanj roꞌ, da̱nj vaa Cristó, quiꞌyaj Yaꞌanj, ne̱ soꞌ me síí nica̱j cunuda̱nj snucua̱j Yaꞌanj ado̱nj.

Colosenses 2:9

ꞌO̱ se ase vaa maꞌa̱n Yaꞌanj roꞌ, da̱nj vaa Cristó, tza̱j ne̱ vaa nee̱ man Cristó, ne̱ cheꞌé dan ruviꞌ Cristó rihaan níꞌ, ne̱ xcaj níꞌ cuentá da̱j vaa maꞌa̱n Yaꞌanj uún chugua̱nj.

Apocalipsis 1:8

Ne̱ Yaꞌanj Si̱j ꞌNi̱j Raꞌa man níꞌ taj a: “ꞌU̱nj me se ase vaa letrá A ga̱ letrá Z vaa ꞌu̱nj a. Dan me se veé ꞌu̱nj nicunꞌ asi̱j rque̱, ne̱ veé ꞌu̱nj canicu̱nꞌ nu̱ꞌ cavii nu̱ꞌ caꞌanj ado̱nj. Dan me se veé ꞌu̱nj me síí nicunꞌ ya̱j do̱ꞌ, síí nicunꞌ asi̱j naá do̱ꞌ, síí cuchi̱ꞌ do̱ꞌ ado̱nj. Ne̱ ꞌu̱nj me Síí Uun Nucua̱j ꞌYaj Cunuda̱nj a”, taj Yaꞌanj Si̱j ꞌNi̱j Raꞌa man níꞌ a.

Apocalipsis 11:17

Dan me se cataj nij soꞌ a: Guun niꞌya̱j níꞌ rihaan so̱ꞌ, Yaꞌa̱nj Si̱j ꞌNi̱j Raꞌa man núj, Si̱j Uun Nucua̱j ꞌYaj Cunuda̱nj a. Síí nicu̱nꞌ ya̱j mé so̱ꞌ, ne̱ síí nicu̱nꞌ asi̱j naá me uún so̱ꞌ á. Dan me se guun niꞌya̱j níꞌ se vaa ya̱j me se guun nucua̱j ndoꞌo so̱ꞌ, quiꞌyáá so̱ꞌ, ne̱ guun cheꞌe̱ so̱ꞌ uun chij so̱ꞌ rihaan chumii̱ a.

Apocalipsis 14:4

Ne̱ ne quiꞌya̱j nij soꞌ cacunꞌ ga̱ chana̱ rihaan Yaꞌanj maꞌ. ꞌO̱ se síí vaa sa̱ꞌ ina̱nj me ta̱ranꞌ nij soꞌ na̱nj ado̱nj. Ne̱ síí canocoꞌ xcó Matzinj Leꞌe̱j me rej maꞌa̱n va̱j soꞌ me uún nij soꞌ a. Ne̱ nij soꞌ me nij síí táá ya̱a̱n rihaan ta̱ranꞌ ꞌó nij síí ma̱n rihaan chumii̱ síí cunuu sa̱ꞌ rihaan Yaꞌanj do̱ꞌ, rihaan Matzinj Leꞌe̱j do̱ꞌ, ga̱a caviꞌ Matzinj Leꞌe̱j yoꞌ a.

Apocalipsis 15:3

Ne̱ achráá nij soꞌ chraꞌ quiꞌyaj síí cuꞌna̱j Moisés síí nu̱u̱ rihaan Yaꞌanj ga̱a naá, ne̱ se‑chra̱ꞌ Matzinj Leꞌe̱j me chraꞌ yoꞌ a. Ne̱ nihánj me nana̱ cachráá nij soꞌ a: Xi̱j ndoꞌo ne̱ yaꞌa̱nj ndoꞌo vaa nu̱ꞌ suun quiꞌyáá so̱ꞌ, Yaꞌanj Si̱j ꞌNi̱j Raꞌa man núj, Síí Uun Nucua̱j ꞌYaj Cunuda̱nj a. Tucuáán nica̱ ne̱ tucuáán ya̱ me nu̱ꞌ tucuáán cuchruj so̱ꞌ, ne̱ síí nica̱j suun rey uun chij rihaan cunuda̱nj yuvii̱ mé so̱ꞌ ado̱nj.

Apocalipsis 16:14

ꞌO̱ se nana̱ chre̱e me nij soꞌ, ne̱ va̱j nij soꞌ ꞌyaj nij soꞌ suun noco̱o neꞌen nij yuvii̱, ne̱ dan me se cavii nij soꞌ caꞌanj nij soꞌ rej ya̱nj nij síí nica̱j suun rey uun chij rihaan nu̱ꞌ nij yuvii̱ ma̱n rihaan chumii̱ a. Ga̱a ne̱ cunu̱u chre̱ꞌ cunuda̱nj nij síí nica̱j suun rey, quiꞌya̱j nij nana̱ chre̱e, cheꞌé rej cunu̱ꞌ nij síí nica̱j suun rey yoꞌ ga̱ Yaꞌanj asa̱ꞌ quisíj güii noco̱o güii quira̱nꞌ nij síí ta̱j riꞌyunj man Yaꞌanj sayuun quiꞌya̱j Yaꞌanj Si̱j Uun Nucua̱j ꞌYaj Cunuda̱nj a.

Apocalipsis 16:7

Ga̱a ne̱ cunó ꞌu̱nj se vaa caꞌmii ꞌo̱ síí nicu̱nꞌ nichru̱nꞌ rihaan mesá altar, ne̱ cataj soꞌ a: ―Veé da̱nj vaa ya̱, Yaꞌanj Si̱j ꞌNi̱j Raꞌa man núj, Síí Uun Nucua̱j ꞌYaj Cunuda̱nj a. Nana̱ ya̱ ne̱ nana̱ nica̱ me nu̱ꞌ nana̱ taj xnaꞌanj so̱ꞌ ga̱a aꞌnéꞌ so̱ꞌ cacunꞌ cheꞌé nij yuvii̱ yoꞌ ado̱nj ―taj soꞌ uún a.

Apocalipsis 19:15

Ne̱ ꞌni̱j tuꞌva soꞌ neê espadá siha̱a̱, ne̱ yoꞌ me se go̱ꞌ soꞌ xráá nij yuvii̱ ma̱n rihaan chumii̱, ne̱ nica̱j soꞌ vará aga̱ꞌ, ne̱ gu̱un chij soꞌ rihaan nij yuvii̱ a. Ne̱ maꞌa̱n soꞌ me síí caꞌne̱ꞌ cacunꞌ cheꞌé yuvii̱, ne̱ quiri̱i̱ soꞌ nu̱ꞌ cacunꞌ ata̱ yuvii̱, ne̱ nda̱ꞌ rá se vaa ruꞌmaan cheꞌé nii chruj uvá ne̱ rii nii nu̱ꞌ na uvá roꞌ, veé da̱nj ga̱a̱ gue̱e̱ quiꞌya̱j soꞌ, ne̱ cavi̱i̱ nu̱ꞌ cacunꞌ ata̱ yuvii̱, quiꞌya̱j soꞌ a. Dan me se racuíj soꞌ man Yaꞌanj Si̱j Uun Nucua̱j ꞌYaj Cunuda̱nj cheꞌé yan quiꞌya̱j Yaꞌanj sayuun man nij síí tumé cacunꞌ a.

Apocalipsis 4:8

Ne̱ vaa vata̱nꞌ scache̱e ꞌo̱ ꞌo̱ nij xoꞌ ta̱j xráá nij xoꞌ, ne̱ ase vaa scache̱e xtâj vaa scache̱e nij xoꞌ a. Ne̱ nu̱ꞌ xráá xoꞌ nu̱ꞌ rque xoꞌ nu̱ꞌ mán rlij rihaan xoꞌ ado̱nj. Ne̱ nuvi̱i niga̱nꞌ ne aꞌneꞌ rá nij xoꞌ ga̱ suun taj nana̱ nihánj a: Síí sa̱ꞌ ina̱nj uxrá me Yaꞌanj Si̱j ꞌNi̱j Raꞌa man níꞌ Síí Uun Nucua̱j ꞌYaj Cunuda̱nj a. Ne̱ soꞌ me síí nicu̱nꞌ ya̱j do̱ꞌ, síí nicu̱nꞌ asi̱j naá do̱ꞌ, síí cuchi̱ꞌ do̱ꞌ ado̱nj, taj caꞌa̱nj nij xcuu yoꞌ a.

Apocalipsis 5:6

Ga̱a ne̱ queneꞌén ꞌu̱nj se vaa tanu̱u̱ nij chruun xlá sa̱ꞌ do̱ꞌ, tanu̱u̱ caꞌa̱nj nij xcuu do̱ꞌ, tanu̱u̱ nij síí uun chij do̱ꞌ, nicunꞌ ꞌo̱ soꞌ, ne̱ Matzinj Leꞌe̱j me soꞌ, ne̱ ruviꞌ soꞌ ase vaa matzinj a̱j ticaviꞌ nii man asi̱j rque̱ a. Ne̱ chi̱j cúú ta̱j raa̱ soꞌ, ne̱ chi̱j nij rlij rihaan soꞌ, ne̱ nij rlij rihaan soꞌ roꞌ, nij yoꞌ me Nimán Yaꞌanj síí nica̱j chi̱j ya̱ se nucua̱j síí a̱j caꞌnéé Yaꞌanj rihaan nu̱ꞌ chumii̱ a.

Apocalipsis 7:15

Cheꞌé dan me nicu̱nꞌ nij soꞌ rihaan xrúún Yaꞌanj chruun xlá sa̱ꞌ, ne̱ nuvi̱i niga̱nꞌ nicunꞌ nij soꞌ rá nuvií noco̱o ya̱nj rej xta̱ꞌ nu̱u̱ nij soꞌ rihaan Yaꞌanj, ne̱ Yaꞌanj si̱j ta̱j rihaan chruun xlá sa̱ꞌ yoꞌ roꞌ, ca̱ráán soꞌ rihaan sayuun cheꞌé nij soꞌ a.

Apocalipsis 7:17

ꞌO̱ se maꞌa̱n Matzinj Leꞌe̱j nicu̱nꞌ maꞌa̱n rej rihaan chruun xlá sa̱ꞌ yoꞌ roꞌ, tu̱mé man nij soꞌ, ne̱ caꞌa̱nj ni̱caj soꞌ man nij soꞌ rej xraꞌ na sa̱ꞌ, ne̱ coꞌo̱ nij soꞌ, ga̱a ne̱ ꞌo̱ ga̱a̱ iꞌna̱ꞌ nimán nij soꞌ, quiꞌya̱j na yoꞌ a. Ne̱ maꞌa̱n Yaꞌanj roꞌ, me síí ti̱nacoo̱ na ayanj rihaan nij soꞌ ado̱nj ―taj síí uun chij yoꞌ rihanj a.