Apocalipsis 2:9 - Triqui de San Juan Copala

⁹ Neꞌén ꞌu̱nj da̱j vaa sayuun ranꞌ nij soj si̱j ma̱n chumanꞌ Esmirna, ne̱ neꞌén ꞌu̱nj se vaa nique̱ ndoꞌo soj ado̱nj. Tza̱j ne̱ rihaan Yaꞌanj me se síí ruꞌvee me ya̱ soj ado̱nj. Ne̱ vaa nij síí tuꞌva rmaꞌa̱n taj se vaa yuvii̱ israelitá me nij soꞌ, tza̱j ne̱ né si̱j israelitá me ya̱ nij soꞌ maꞌ. Ma̱an xꞌneꞌ síí tucuꞌyón snana̱ Síí Chre̱e me nij soꞌ na̱nj á. Ne̱ neꞌén ꞌu̱nj se vaa aꞌmii nij soꞌ nana̱ nij cheꞌé soj ado̱nj.

Apocalipsis 2:9 ပူးပေါင်းရင်းမြစ်များ

San Mateo 4:10

Ga̱a ne̱ cataj xnaꞌanj Jesús rihaan Síí Chre̱e a: ―Naxu̱u̱n yaníj so̱ꞌ mán so̱ꞌ, Síí Chre̱e. ꞌO̱ se Danj Yaꞌanj taj a: “Rihaan Yaꞌanj Si̱j ꞌNi̱j Raꞌa man níꞌ cara̱a̱ gue̱e̱ so̱ꞌ, ne̱ rihaan o̱rúnꞌ soꞌ cu̱nuû so̱ꞌ na̱nj á.” Da̱nj taj Danj Yaꞌanj ado̱nj ―taj Jesús rihaan Síí Chre̱e a.

San Lucas 12:21

Da̱nj quira̱nꞌ síí araa sa̱ꞌ rasu̱u̱n cheꞌé maꞌa̱n, ne̱ taj va̱j a̱ doj rasu̱u̱n sa̱ꞌ nica̱j soꞌ, niꞌya̱j Yaꞌanj a̱ maꞌ ―taj Jesús rihaan nij yuvii̱ a.

San Lucas 22:65

Ne̱ queꞌe̱e̱ doj nana̱ nij aꞌmii uún nij soꞌ rihaan Jesús a.

San Lucas 4:18

Ya̱nj Nimán Yaꞌanj nimán ꞌu̱nj, ne̱ cheꞌé dan narii Yaꞌanj manj caꞌa̱nj caꞌmi̱i̱ natáj ꞌu̱nj nana̱ sa̱ꞌ rihaan nij síí nique̱ a. Caꞌnéé Yaꞌanj manj caꞌmi̱i̱ natáj ꞌu̱nj rihaan nij síí ꞌni̱j tagaꞌ cata̱j ꞌu̱nj se vaa cu̱riha̱nj nij soꞌ cache̱e̱ u̱u̱n nij soꞌ a. Ne̱ caꞌnéé Yaꞌanj manj ra̱cuíj ꞌu̱nj man nij síí tuchri̱i naxra̱ꞌ rihaan nij soꞌ, ne̱ caꞌnéé Yaꞌanj manj ra̱cuíj ꞌu̱nj man nij síí ranꞌ sayuun uún na̱nj á.

San Lucas 6:20

Ga̱a ne̱ naxca̱j Jesús rihaan soꞌ niꞌya̱j soꞌ man nij síí tucuꞌyón snana̱ soꞌ, ga̱a ne̱ cataj soꞌ a: ―Cavi̱i̱ sa̱ꞌ ta̱ranꞌ soj si̱j nique̱ cheꞌé se a̱j uun chij Yaꞌanj nimán nij soꞌ ado̱nj.

San Juan 16:33

Nu̱ꞌ nana̱ nihánj caꞌmij rihaan soj, cheꞌé se me raj ga̱a̱ xe̱j nimán soj cheꞌé se noco̱ꞌ soj manj a. Quira̱nꞌ soj sayuun rihaan chumii̱ nihánj, tza̱j ne̱ vaa cheꞌé gu̱un niha̱ꞌ rá soj, ne̱ gu̱un ya̱ ya̱ rá soj se vaa ꞌu̱nj nihánj quiꞌyaj canaán ya̱ rihaan chumii̱ nihánj na̱nj ado̱nj ―taj Jesús rihaan nij síí tucuꞌyón snana̱ soꞌ a.

Hechos 14:22

Ne̱ nariꞌ nucuaj nimán cunuda̱nj nij síí tucuꞌyón snana̱ Jesucristó, quiꞌyaj ro̱j soꞌ a. Ne̱ narqué ro̱j soꞌ chrej nucua̱j man nij síí tucuꞌyón snana̱ Jesucristó se vaa daj chiha̱a̱ míj se̱ caꞌneꞌ rá nij soꞌ ga̱ suun noco̱ꞌ stucua̱nj Jesucristó a. Ne̱ cataj ro̱j soꞌ se vaa asino quira̱nꞌ ndoꞌo níꞌ sayuun, ga̱a ne̱ caꞌve̱e catu̱u̱ níꞌ ca̱yáán níꞌ ga̱ Yaꞌanj asa̱ꞌ guun chij Yaꞌanj, taj ro̱j soꞌ a.

Hechos 26:11

Ne̱ guun queꞌe̱e̱ ndoꞌo caꞌanj ꞌu̱nj cunuda̱nj nij veꞌ tucuꞌyón níꞌ si̱j israelitá stucua̱nj Moisés, ne̱ quiꞌyáá ꞌu̱nj sayuun man nij síí noco̱ꞌ man Jesucristó, ne̱ nda̱a rqueé ꞌu̱nj man nij soꞌ caꞌmi̱i̱ qui̱j nij soꞌ cheꞌé Jesucristó a. Ne̱ cheꞌé se cuyanj ndoꞌo rá ꞌu̱nj niꞌya̱j ꞌu̱nj man nij soꞌ, ne̱ nda̱a canocóꞌ ꞌu̱nj man nij soꞌ nda̱a ꞌó chumanꞌ na̱j ga̱nꞌ cheꞌé rej qui̱ꞌyáá ꞌu̱nj doj sayuun man nij soꞌ ado̱nj.

Romanos 12:12

Cheꞌé se uun ya̱ rá soj se vaa vaa güii cavi̱i̱ sa̱ꞌ ndoꞌo soj, quiꞌya̱j Yaꞌanj, ne̱ cheꞌé dan ga̱a̱ niha̱ꞌ uxrá rá nimán soj á. Caꞌne̱j nucuaj soj nimán soj ga̱a ranꞌ soj sayuun, ne̱ se̱ caꞌneꞌ rá soj ga̱ suun achíín niꞌya̱j rihaan Yaꞌanj maꞌ.

Romanos 2:17

Tza̱j ne̱ so̱ꞌ roꞌ, ya̱ yuvii̱ israelitá mé so̱ꞌ, rá so̱ꞌ á. Nucua̱j rá so̱ꞌ se vaa cavi̱i̱ sa̱ꞌ so̱ꞌ, quiꞌya̱j stucua̱nj Moisés, ne̱ neꞌén so̱ꞌ Yaꞌanj, rá so̱ꞌ á.

Romanos 5:3

Ne̱ vaa cheꞌé gu̱un niha̱ꞌ rá níꞌ cheꞌé sayuun ranꞌ níꞌ, ne̱ neꞌen níꞌ se vaa cheꞌé sayuun ranꞌ níꞌ me se nariꞌ nucuaj doj nimán níꞌ,

Romanos 8:35

A̱ ꞌó güii se̱ guun yaníj Cristó rihaan níꞌ, quiꞌya̱j nij yuvii̱ maꞌ. ꞌO̱ ꞌe̱e̱ rá Cristó man níꞌ na̱nj ado̱nj. Caꞌve̱e se quira̱nꞌ níꞌ sayuun do̱ꞌ, caꞌve̱e se nano̱ ndoꞌo rá níꞌ do̱ꞌ, caꞌve̱e se quita̱j riꞌyunj yuvii̱ man níꞌ do̱ꞌ, caꞌve̱e se quinaꞌa̱an rque níꞌ do̱ꞌ, caꞌve̱e se taj yatzéj cu̱nuû níꞌ do̱ꞌ, caꞌve̱e se vaa yuvii̱ ticavi̱ꞌ man níꞌ do̱ꞌ, tza̱j ne̱ daj chiha̱a̱ míj se̱ guun yaníj Cristó rihaan níꞌ maꞌ.

Romanos 9:6

Dan me se ga̱a naá cataj Yaꞌanj se vaa ya̱ canoco̱ꞌ nij yuvii̱ israelitá man soꞌ nu̱ꞌ cavii nu̱ꞌ caꞌanj, ne̱ me cheꞌé ne nocoꞌ nij yuvii̱ israelitá man Yaꞌanj cuano̱, rá soj ga̱. ꞌO̱ se quisi̱j ya̱ nda̱a vaa caꞌmii Yaꞌanj, tza̱j ne̱ ne nari̱i̱ ya̱ Yaꞌanj man cunuda̱nj nij yuvii̱ israelitá maꞌ. Né ya̱ ya̱ yuvii̱ israelitá me cunuda̱nj nij soꞌ rihaan Yaꞌanj maꞌ.

2 Corintios 6:10

Ne̱ nanó rá núj cheꞌé sayuun, tza̱j ne̱ niha̱ꞌ rá núj rihaan Yaꞌanj uún a. Ne̱ síí nique̱ me núj, tza̱j ne̱ avii sa̱ꞌ doj queꞌe̱e̱ ndoꞌo yuvii̱, ꞌyaj núj a. Ne̱ taj siꞌyaj núj, tza̱j ne̱ cunuda̱nj chumii̱ nihánj me siꞌyaj núj a.

2 Corintios 8:2

Dan me se quiranꞌ uxrá nij soꞌ sayuun, tza̱j ne̱ guun niha̱ꞌ uxrá rá nimán nij soꞌ, ne̱ nda̱ꞌ se síí nique̱ ndoꞌo me nij soꞌ, tza̱j ne̱ guun niha̱ꞌ rá nij soꞌ rque̱ nij soꞌ saꞌanj rihaan tinúú nij soꞌ síí nique̱ a. Nda̱ꞌ rá se ꞌyaj síí ruꞌvee ꞌyaj nij soꞌ na̱nj ado̱nj.

2 Corintios 8:9

ꞌO̱ se a̱j neꞌen soj se vaa quiꞌyaj ndoꞌo Jesucristó Si̱j ꞌNi̱j Raꞌa man níꞌ se lu̱j ga̱ níꞌ á. Dan me se ruꞌve̱e̱ ndoꞌo soꞌ ga̱a cayáán soꞌ rej xta̱ꞌ, tza̱j ne̱ naquiꞌyaj nique̱ soꞌ man soꞌ ne̱ caꞌnaꞌ soꞌ rihaan chumii̱ nihánj cheꞌé níꞌ, ga̱a ne̱ cheꞌé se da̱nj quiꞌyaj soꞌ roꞌ, cheꞌé dan cavi̱i̱ sa̱ꞌ níꞌ doj na̱nj ado̱nj.

1 Tesalonicenses 3:4

Ne̱ ga̱a cayáán núj ga̱ soj, ne̱ cataj ya̱ núj rihaan soj se vaa xraj, ne̱ quira̱nꞌ níꞌ sayuun, ne̱ neꞌen soj se vaa ya̱ quiranꞌ níꞌ sayuun niha̱nꞌ.

1 Timoteo 1:13

Asino ya̱a̱n me se qui̱j uxrá caꞌmii ꞌu̱nj cheꞌé Cristó, ne̱ quiꞌyaj ndoꞌo ꞌu̱nj sayuun man nij síí noco̱ꞌ man soꞌ, ne̱ caꞌmii xta̱ꞌ ꞌu̱nj niꞌya̱j ꞌu̱nj man soꞌ, tza̱j ne̱ queneꞌen Cristó se vaa cheꞌé se ne queneꞌe̱n yá ꞌu̱nj da̱j vaa soꞌ roꞌ, cheꞌé dan ne cuchuma̱n rá ꞌu̱nj ni̱ꞌyaj ꞌu̱nj man soꞌ a. Tza̱j ne̱ cunuu ꞌe̱e̱ rá Cristó manj, ne̱ ne quiꞌya̱j soꞌ sayuun manj maꞌ.

1 Timoteo 6:18

Ma̱an se cata̱j xnaꞌanj so̱ꞌ rihaan nij síí ruꞌvee se vaa quiꞌya̱j nij soꞌ suun sa̱ꞌ, cheꞌé rej gu̱un ruꞌvee nij soꞌ rihaan Yaꞌanj, ne̱ veꞌé rque̱ nij soꞌ rasu̱u̱n achiin man tinúú nij soꞌ síí nique̱ á.

Apocalipsis 1:9

ꞌU̱nj si̱j cuꞌna̱j Juan roꞌ, tinúú soj mé ꞌu̱nj, ne̱ cheꞌé se nuu rcuꞌa̱a̱n níꞌ ga̱ Jesús roꞌ, síí ranꞌ sayuun ga̱ soj mé ꞌu̱nj, ne̱ síí uun chij Yaꞌanj rihaan mej ga̱ soj, ne̱ síí nucua̱j nimán rihaan sayuun mej ga̱ soj ado̱nj. Dan me se yáán ꞌu̱nj yoꞌóó ta̱j rihaan na yaꞌa̱nj yoꞌóó cuꞌna̱j Patmos, ne̱ yoꞌ me rej caꞌnéé nii manj cheꞌé se si̱j nataꞌ snana̱ Yaꞌanj mej ne̱ si̱j taj xnaꞌanj nana̱ cheꞌé Jesús mej a.

Apocalipsis 2:13

Neꞌén ꞌu̱nj rej ya̱nj nij soj, se vaa uun chij ndoꞌo Síí Chre̱e rej yoꞌ na̱nj á. Tza̱j ne̱ ꞌo̱ nocoꞌ soj manj, ne̱ ne ta̱náj xco̱ soj stucua̱nj ꞌu̱nj maꞌ. Dan me se vaa síí cuꞌna̱j Antipas síí ꞌo̱ nataꞌ rihaan yuvii̱ cheꞌé ꞌu̱nj, ne̱ nda̱ꞌ se ticaviꞌ nii man soꞌ rej ya̱nj soj rej ya̱nj maꞌa̱n Síí Chre̱e, tza̱j ne̱ ne caꞌne̱ꞌ rá soj ga̱ snana̱j maꞌ.

Apocalipsis 2:2

A̱j neꞌén ꞌu̱nj da̱j ꞌyaj soj se vaa ꞌyaj uxrá soj se‑su̱u̱n ꞌu̱nj ne̱ nucua̱j ndoꞌo vaa nimán soj rihaan sayuun ado̱nj. Ne̱ a̱j neꞌenj se vaa naꞌvej uxrá rá soj ni̱ꞌyaj soj man nij síí chiꞌi̱i̱ maꞌ. Ne̱ xa̱ꞌ nij síí tihaꞌ yuꞌunj tuꞌva rmaꞌa̱n se vaa si̱j ata̱ suun caꞌa̱nj nata̱ꞌ snana̱ Jesucristó me nij soꞌ, tza̱j ne̱ a̱j nuchruj ra̱a̱ soj cheꞌé nij soꞌ, ne̱ a̱j xcaj soj cuentá se vaa né si̱j aꞌmii ya̱ me nij soꞌ a̱ maan ado̱nj.

Apocalipsis 2:24

’Ne̱ nihánj me se caꞌmi̱i̱ ꞌu̱nj rihaan ꞌó nij soj si̱j ma̱n chumanꞌ Tiatira si̱j ne nocoꞌ tucuáán chiꞌi̱i̱ yoꞌ a. ꞌO̱ se tucuáán sca̱ꞌ yuve̱ ndoꞌo me tucuáán chiꞌi̱i̱ yoꞌ, rá maꞌa̱n nij soꞌ, tza̱j ne̱ stucua̱nj Síí Chre̱e me yoꞌ rihaan soj, ne̱ ne nari̱ꞌ soj tucuáán yoꞌ a̱ maꞌ. Dan me se taj cheꞌé cuta̱ꞌ ꞌu̱nj doj suun xráá soj a̱ maꞌ.

Apocalipsis 3:9

Ne̱ vaa nij síí tuꞌva rmaꞌa̱n se vaa si̱j israelitá me nij soꞌ, tza̱j ne̱ né si̱j israelitá ya̱ me nij soꞌ maꞌ. Ma̱an se síí ne̱ me nij soꞌ, ne̱ síí tucuꞌyón snana̱ Síí Chre̱e me uún nij soꞌ ado̱nj. Dan me se nago̱j man nij soꞌ rihaan soj, ne̱ cuchi̱ꞌ nij soꞌ rihaan soj, ne̱ ca̱yáán ru̱j nij soꞌ rihaan soj, ne̱ queneꞌe̱n nij soꞌ se vaa si̱j cunuu ꞌe̱e̱ raj man me soj ado̱nj.

Apocalipsis 7:14

Ga̱a ne̱ cataj ꞌu̱nj rihaan soꞌ a: ―Ne neꞌén ꞌu̱nj me síí me nij soꞌ, maan señor. Tza̱j ne̱ so̱ꞌ me síí neꞌen, raj a ―taj ꞌu̱nj rihaan soꞌ a. Ga̱a ne̱ cataj soꞌ rihanj a: ―Nij síí nihánj roꞌ, me nij síí cachén rihaan queꞌe̱e̱ ndoꞌo sayuun, ga̱a guun sayuun noco̱o rihaan chumii̱ ado̱nj. Ne̱ quináán nij soꞌ saga̱nꞌ nij soꞌ, ne̱ cunuu catzi̱i̱ saga̱nꞌ nij soꞌ, quiꞌyaj ton cayanj man Matzinj Leꞌe̱j ga̱a caviꞌ soꞌ cheꞌé nij soꞌ ado̱nj.