2 Corintios 8:7 - Triqui de San Juan Copala

⁷ Dan me se ꞌyaj ndoꞌo nij soj nu̱ꞌ suun sa̱ꞌ ado̱nj. ꞌO̱ se veé da̱nj síí nucua̱j ndoꞌo rá man Cristó do̱ꞌ, síí aꞌmii sa̱ꞌ do̱ꞌ, síí avii raa̱ do̱ꞌ, síí niha̱ꞌ rá quiꞌya̱j suun do̱ꞌ, síí ꞌe̱e̱ rá man núj do̱ꞌ, me soj ado̱nj. Ne̱ ase vaa ꞌyaj ndoꞌo nij soj nu̱ꞌ suun sa̱ꞌ yoꞌ roꞌ, taꞌngaꞌ da̱nj quiꞌya̱j soj ga̱ suun rque̱ ndoꞌo saꞌanj rihaan tinúú á.

2 Corintios 8:7 ပူးပေါင်းရင်းမြစ်များ

San Mateo 25:22

’Ga̱a ne̱ cuchiꞌ síí quiriꞌ vi̱j nanj saꞌanj uún, ne̱ cataj soꞌ a: “Rqué so̱ꞌ vi̱j nanj saꞌanj rihanj, señor. Ne̱ ya̱j, ne̱ nuu yoꞌ caꞌa̱nj nanj saꞌanj, quiꞌyáj na̱nj á”, taj soꞌ a.

Romanos 15:14

Veé dan me se uun ya̱ raj se vaa síí sa̱ꞌ me maꞌa̱n soj, tinu̱j, nocoj. Xcaj ndoꞌo soj cuentá, ne̱ neꞌen soj nago̱ꞌ soj chrej sa̱ꞌ man tinúú soj ado̱nj.

1 Corintios 1:5

ꞌO̱ se cheꞌé Cristó Jesús roꞌ, cavii sa̱ꞌ uxrá soj, quiꞌyaj Yaꞌanj á. Dan me se uxrá xcaj soj cuentá, ne̱ uxrá nariꞌ soj nana̱ sa̱ꞌ caꞌmi̱i̱ soj, quiꞌyaj Yaꞌanj,

1 Corintios 12:13

Dan me se ga̱a cataꞌ ne níꞌ, ne̱ cunuu rcuaꞌa̱a̱n ta̱ranꞌ níꞌ, quiꞌyaj Nimán Yaꞌanj, ne̱ cheꞌé dan ase vaa nee̱ man o̱rúnꞌ yuvii̱ roꞌ, vaa ta̱ranꞌ níꞌ cuano̱ na̱nj chugua̱nj. Ino̱ vaa taꞌa̱j ꞌo̱ ꞌo̱ níꞌ, ne̱ veé dan me se taꞌa̱j níꞌ me yuvii̱ israelitá do̱ꞌ, taꞌa̱j níꞌ me yuvii̱ yaníj do̱ꞌ, taꞌa̱j níꞌ me mozó do̱ꞌ, taꞌa̱j níꞌ ne uun mozó do̱ꞌ, tza̱j ne̱ ase vaa nee̱ man o̱rúnꞌ yuvii̱ roꞌ, vaa ta̱ranꞌ níꞌ cuano̱, ne̱ ya̱nj ndoꞌo Nimán Yaꞌanj ga̱ cunuda̱nj níꞌ cuano̱ ado̱nj.

1 Corintios 12:8

Dan me se ꞌo̱ tinúú níꞌ aꞌmii nana̱ cu̱u, ꞌyaj Nimán Yaꞌanj, ne̱ avii ndoꞌo raa̱ ꞌó tinúú níꞌ, ꞌyaj uún maꞌa̱n Nimán Yaꞌanj,

1 Corintios 13:2

Caꞌve̱e se veꞌé ndoꞌo natáꞌ ꞌu̱nj nana̱ rqué Yaꞌanj manj do̱ꞌ, caꞌve̱e se neꞌenj nu̱ꞌ nana̱ sa̱ꞌ yuve̱ tihaa̱n Yaꞌanj rihaan yuvii̱ do̱ꞌ, caꞌve̱e se sa̱ꞌ uxrá avii raj do̱ꞌ, caꞌve̱e se amán uxrá raj niꞌya̱j ꞌu̱nj man Yaꞌanj do̱ꞌ, caꞌve̱e se gu̱un nu̱cuáj natuna̱ ꞌu̱nj rej nicu̱nꞌ ꞌo̱ quij xca̱a̱n cheꞌé se amán uxrá raj niꞌya̱j ꞌu̱nj man Yaꞌanj do̱ꞌ, tza̱j ne̱ sese ne ꞌe̱e̱ raj tuvij, ne̱ taj se gúnꞌ mán ꞌu̱nj ga̱a a̱ maꞌ.

1 Corintios 13:8

Xa̱ꞌ suun ꞌe̱e̱ rá tuviꞌ, tza̱j ne̱ ꞌo̱ ga̱a̱ yoꞌ nu̱ꞌ cavii nu̱ꞌ caꞌanj na̱nj á. Cuano̱ nihánj me se ma̱n síí nataꞌ nana̱ rqué Yaꞌanj rihaan nij soꞌ, tza̱j ne̱ vaa güii navi̱j suun yoꞌ na̱nj ado̱nj. Ne̱ cuano̱ nihánj me se ma̱n yuvii̱ aꞌmii xnaꞌánj naca̱ xnaꞌánj ne neꞌen maꞌa̱n yuvii̱, tza̱j ne̱ vaa güii navi̱j suun yoꞌ na̱nj ado̱nj. Ne̱ cuano̱ nihánj me se ma̱n síí avii ndoꞌo raa̱, ꞌyaj Nimán Yaꞌanj, tza̱j ne̱ vaa güii navi̱j suun yoꞌ na̱nj ado̱nj.

1 Corintios 14:12

Cheꞌé dan me xca̱j soj cuentá da̱j quiꞌya̱j maꞌa̱n soj uún, ne̱ dan me se gu̱un rá soj ni̱caj soj suun sa̱ꞌ, quiꞌya̱j Nimán Yaꞌanj, tza̱j ne̱ nano̱ꞌ soj da̱j quiꞌya̱j soj, ne̱ caꞌve̱e ni̱caj soj suun sa̱ꞌ doj suun ra̱cuíj man nu̱ꞌ xꞌneꞌ nij síí noco̱ꞌ man Cristó cavi̱i̱ sa̱ꞌ nij soꞌ doj, quiꞌya̱j Nimán Yaꞌanj a.

1 Corintios 4:7

Sa̱ꞌ doj vaa so̱ꞌ rihaan ꞌó yuvii̱, rá so̱ꞌ naꞌ. Me síí cataj rihaan so̱ꞌ se vaa sa̱ꞌ doj vaa so̱ꞌ ga̱. Sese vaa ꞌo̱ suun aꞌvee sa̱ꞌ ꞌyáá so̱ꞌ, ne̱ me síí racuíj mán so̱ꞌ ꞌyáá so̱ꞌ, rá so̱ꞌ ga̱. Ma̱ꞌán so̱ꞌ ꞌyaj naꞌ. Ase Yaꞌanj racuíj mán so̱ꞌ xa̱ꞌ. Sese Yaꞌanj me síí racuíj mán so̱ꞌ sa̱ꞌ ꞌyáá so̱ꞌ ꞌo̱ suun, ne̱ taj cheꞌé gu̱un xta̱ꞌ nimán so̱ꞌ cata̱j so̱ꞌ se vaa ma̱ꞌán so̱ꞌ ꞌyaj sa̱ꞌ suun yoꞌ maꞌ.

2 Corintios 7:7

Ne̱ veé uún soꞌ me síí cataj xnaꞌanj rihaan núj se vaa guun niha̱ꞌ rá soꞌ queneꞌen soꞌ man soj, ne̱ cataj xnaꞌanj soꞌ se vaa me ndoꞌo rá soj queneꞌe̱n soj man núj do̱ꞌ, se vaa nanó rá soj cheꞌé síí quiꞌyaj cacunꞌ ꞌni̱j scaꞌnúj soj do̱ꞌ, se vaa niha̱ꞌ rá soj caꞌmi̱i̱ sa̱ꞌ soj cheꞌé núj do̱ꞌ, ne̱ cheꞌé dan doj a̱ guun niha̱ꞌ raj ado̱nj.

2 Corintios 8:6

Cheꞌé dan rquee̱ núj rihaan síí cuꞌna̱j Titó se vaa cuchi̱ꞌ soꞌ rihaan soj si̱j ya̱nj chumanꞌ Corinto, ne̱ cata̱j soꞌ se vaa ase vaa quiꞌyaj nij síí ma̱n estadó Macedonia roꞌ, da̱nj ga̱a̱ caꞌve̱e quiꞌya̱j maꞌa̱n nij soj uún, ga̱a ne̱ quisi̱j rqué ta̱ranꞌ soj saꞌanj rihaan nij síí nique̱ yoꞌ á.

2 Corintios 9:14

Ne̱ cunu̱u ꞌe̱e̱ rá maꞌa̱n nij tinúú níꞌ ma̱n chumanꞌ Jerusalén man soj, ne̱ cachi̱nj niꞌya̱j nij soꞌ rihaan Yaꞌanj cheꞌé soj, cheꞌé se uxrá racuíj Yaꞌanj man soj ra̱cuíj soj man nij soꞌ na̱nj á.

2 Corintios 9:8

Ne̱ gu̱un nucua̱j Yaꞌanj quiꞌya̱j ndoꞌo Yaꞌanj nu̱ꞌ se lu̱j ga̱ soj, ne̱ niga̱nj ga̱a̱ nu̱ꞌ se cachi̱in man soj, cheꞌé yan gu̱un nucua̱j soj quiꞌya̱j soj nu̱ꞌ suun sa̱ꞌ caꞌne̱ꞌ Yaꞌanj rihaan soj chugua̱nj.

Efesios 4:29

Se̱ caꞌvej soj caꞌmi̱i̱ soj nana̱ qui̱j maꞌ. Tana̱nj gu̱un rá soj veꞌé caꞌmi̱i̱ soj, ne̱ nana̱ sa̱ꞌ nana̱ achiin man tinúú soj roꞌ, yoꞌ me nago̱ꞌ soj rihaan tinúú soj á. Ne̱ cavi̱i̱ sa̱ꞌ doj ta̱ranꞌ nij síí cuno̱ nana̱ caꞌmi̱i̱ soj, sese sa̱ꞌ caꞌmi̱i̱ soj ado̱nj.

Filipenses 1:11

Dan me se ya̱ gu̱un soj yuvii̱ cunuu sa̱ꞌ nimán quiꞌya̱j Jesucristó, cheꞌé rej xca̱j nii cuentá se vaa niꞌndaj ya̱ veꞌé vaa Yaꞌanj ne̱ cata̱j nii se vaa sa̱ꞌ uxrá vaa soꞌ ado̱nj.

Filipenses 1:9

Ne̱ achíín ni̱ꞌyáj rihaan Yaꞌanj se vaa cunu̱u ꞌe̱e̱ doj rá soj tuviꞌ soj ꞌo̱ ꞌo̱ güii, ne̱ sa̱ꞌ doj xca̱j soj cuentá da̱j vaa ꞌo̱ ꞌo̱ rasu̱u̱n,

2 Tesalonicenses 1:3

Doj a̱ doj a̱ amán rá soj niꞌya̱j soj man Yaꞌanj, ne̱ nuu ꞌe̱e̱ doj rá ꞌo̱ ꞌo̱ soj tinúú soj da̱j a̱ güii, ne̱ cheꞌé dan no̱ xcúún núj ꞌo̱ cata̱j núj guun niꞌya̱j níꞌ rihaan Yaꞌanj cheꞌé soj, tinu̱j, nocoj.

2 Timoteo 2:1

Ase vaa ꞌo̱ taꞌníj, da̱nj vaa so̱ꞌ rihanj, tinu̱j. Ne̱ me rá ꞌu̱nj caꞌve̱j rá so̱ꞌ nari̱ꞌ nucuaj nimán so̱ꞌ, quiꞌya̱j Cristó Jesús síí ꞌyaj ndoꞌo se lu̱j cheꞌé níꞌ a.

Hebreos 12:28

Dan me se gu̱un níꞌ si̱j chiha̱nj rej sa̱ꞌ ndoꞌo rej gu̱un chij níꞌ ga̱ Yaꞌanj, ne̱ daj chiha̱a̱ míj se̱ quinaa̱n chumanꞌ yoꞌ a̱ maꞌ. Cheꞌé dan guun niꞌya̱j uxrá níꞌ rihaan Yaꞌanj, ne̱ cheꞌé dan ꞌo̱ quiꞌya̱j níꞌ se‑su̱u̱n Yaꞌanj, ne̱ cara̱nꞌ rá Yaꞌanj, quiꞌya̱j níꞌ á. Ne̱ cara̱a̱ gue̱e̱ uxrá níꞌ rihaan Yaꞌanj na̱nj á.

1 Pedro 1:22

Dan me se uno soj snana̱ Yaꞌanj nana̱ ya̱, ne̱ cheꞌé dan cunuu sa̱ꞌ nimán soj, ne̱ cheꞌé dan no̱ xcúún soj ga̱a̱ ꞌe̱e̱ rá soj man tuviꞌ soj ado̱nj. Se̱ cataj rmaꞌa̱n soj se vaa ꞌe̱e̱ rá soj man tuviꞌ soj maꞌ. Ya̱ ga̱a̱ ꞌe̱e̱ ndoꞌo rá soj man tuviꞌ soj á.

2 Pedro 3:18

Cheꞌé dan ꞌo̱ gu̱un rá soj ni̱ꞌyaj soj se lu̱j quiꞌyaj Yaꞌanj ga̱ soj, ne̱ ꞌo̱ gu̱un rá soj xca̱j soj cuentá sa̱ꞌ doj cheꞌé Jesucristó Si̱j ꞌNi̱j Raꞌa man níꞌ, Si̱j Tinanii man níꞌ rihaan Sayuun ado̱nj. Cata̱j níꞌ se vaa niꞌndaj ya̱ sa̱ꞌ veꞌé vaa soꞌ cuano̱ do̱ꞌ, nu̱ꞌ cavii nu̱ꞌ caꞌanj do̱ꞌ á. Veé da̱nj ga̱a̱ ya̱ ado̱nj.

Apocalipsis 3:17

Dan me se taj soj se vaa ruꞌve̱e̱ ina̱nj soj, ne̱ taj va̱j a̱ doj rasu̱u̱n ne achiin rihaan soj, rá soj a. Tza̱j ne̱ ne acaj soj cuentá se vaa ase vaa síí nique̱ do̱ꞌ, síí achiin ndoꞌo rasu̱u̱n man do̱ꞌ, síí riꞌ rá do̱ꞌ, síí tuchri̱i do̱ꞌ, síí ca̱nj nuviꞌ saga̱nꞌ do̱ꞌ, vaa soj na̱nj ado̱nj.