2 Corintios 13:5 - Triqui de San Juan Copala

⁵ Xca̱j maꞌa̱n soj cuentá sese ya̱ ya̱ amán rá soj niꞌya̱j soj man Cristó á. Neꞌen soj se vaa ya̱nj Cristó ga̱ soj naꞌ. Ase ne neꞌen soj xa̱ꞌ. Ya̱ ne Cristó ga̱ soj, sese né si̱j tihaꞌ yuꞌunj me soj chugua̱nj.

2 Corintios 13:5 ပူးပေါင်းရင်းမြစ်များ

San Juan 14:23

Ga̱a ne̱ cataj Jesús rihaan soꞌ a: ―Síí aráj cochro̱j rihanj me se cuno̱ soꞌ snana̱j, ne̱ cunu̱u ꞌe̱e̱ rá Réj Yaꞌanj man soꞌ, ga̱a ne̱ cuchi̱ꞌ rój rihaan soꞌ, ne̱ ꞌo̱ ca̱yáán rój ga̱ soꞌ ado̱nj.

San Juan 15:4

ꞌO̱ cu̱nuû rá nimán soj manj, ne̱ ꞌo̱ cu̱nuû ꞌu̱nj nimán soj a. Dan me se xa̱ꞌ raꞌa chruun uvá, tza̱j ne̱ se̱ caꞌvee cuma̱n chruj raa̱ maꞌa̱n ina̱nj yoꞌ a̱ maꞌ. Ne̱ ase vaa raꞌa chruun chruj uvá roꞌ, da̱nj vaa soj, ne̱ sese se̱ cuno sa̱ꞌ soj rihanj, ne̱ sese caꞌa̱nj yaníj soj rihanj, ne̱ se̱ caꞌvee quiꞌya̱j soj nda̱a vaa me rá Réj Yaꞌanj quiꞌya̱j soj maꞌ.

San Juan 17:23

Dan me se ca̱yáán ꞌu̱nj ga̱ nij soꞌ nda̱a vaa yáán so̱ꞌ ga̱ ꞌu̱nj, cheꞌé rej ga̱a̱ cuya̱a̱n nu̱ꞌ nimán ta̱ranꞌ nij soꞌ á. Nda̱a síj, ga̱a ne̱ queneꞌe̱n nij síí noco̱ꞌ se‑chre̱j chumii̱ nihánj se vaa ma̱ꞌán so̱ꞌ caꞌnéé mán ꞌu̱nj, ne̱ queneꞌe̱n nij soꞌ se vaa ꞌe̱e̱ rá so̱ꞌ man nij síí rqué so̱ꞌ mán ꞌu̱nj da̱j se vaa ꞌe̱e̱ rá so̱ꞌ mán ꞌu̱nj ado̱nj.

San Juan 17:26

Ne̱ cataj xnaꞌanj ꞌu̱nj rihaan nij soꞌ da̱j si̱j mé so̱ꞌ, ne̱ cata̱j ꞌu̱nj doj rihaan nij soꞌ, cheꞌé rej ga̱a̱ chrej ga̱a̱ ꞌe̱e̱ rá man tuviꞌ nimán nij soꞌ nda̱a vaa ꞌe̱e̱ rá so̱ꞌ manj, ne̱ ca̱yáán ꞌu̱nj ga̱ nij soꞌ a ―taj Jesús, cachíín niꞌya̱j soꞌ rihaan Yaꞌanj a.

San Juan 6:56

Ne̱ síí chá nee̱ manj ne̱ coꞌo ton manj me se ꞌo̱ ca̱yáán soꞌ ga̱ ꞌu̱nj, ne̱ ꞌo̱ ca̱yáán ꞌu̱nj ga̱ soꞌ chugua̱nj.

San Juan 6:6

Da̱nj caꞌmii soꞌ rihaan Felipé, cheꞌé se me rá soꞌ queneꞌe̱n soꞌ da̱j cata̱j Felipé a. Tza̱j ne̱ a̱j neꞌen soꞌ da̱j quiꞌya̱j maꞌa̱n soꞌ na̱nj ado̱nj.

Romanos 1:28

Ne caꞌve̱j rá nij yuvii̱ queneꞌe̱n nij yuvii̱ da̱j vaa Yaꞌanj a̱ maꞌ. Cheꞌé dan caꞌneꞌ rá Yaꞌanj ga̱ nij yuvii̱, ne̱ navij raa̱ nij yuvii̱ quiriꞌ na̱nj á. Nda̱a síj, ga̱a ne̱ ina̱nj se nij ꞌyaj nij yuvii̱, ne̱ dan me se ꞌyaj nij soꞌ ina̱nj se naꞌvej rá Yaꞌanj quiꞌya̱j nij soꞌ na̱nj ado̱nj.

Romanos 8:10

Neꞌen soj se vaa cavi̱ꞌ nee̱ man níꞌ cheꞌé cacunꞌ quiꞌyaj nee̱ man níꞌ, tza̱j ne̱ sese ya̱nj Cristó nimán níꞌ, ne̱ ꞌo̱ vaa sa̱ꞌ nimán níꞌ rihaan Yaꞌanj, ne̱ cheꞌé dan ꞌo̱ vaa iꞌna̱ꞌ nimán níꞌ ado̱nj.

1 Corintios 11:28

Cheꞌé dan xca̱j ꞌo̱ ꞌo̱ nij soj cuentá da̱j quiꞌya̱j ꞌo̱ ꞌo̱ soj, ga̱a ne̱ veꞌé cha̱ soj rachrúún do̱ꞌ, veꞌé coꞌo̱ soj na vinó do̱ꞌ á.

1 Corintios 11:31

Sese naquiꞌya̱j cu̱u níꞌ cheꞌé maꞌa̱n níꞌ da̱j vaa níꞌ, ga̱a ne̱ se̱ quiꞌyaj Síí ꞌNi̱j Raꞌa man níꞌ sayuun man níꞌ maꞌ.

1 Corintios 3:16

Ne neꞌen soj se vaa snuvií maꞌa̱n Yaꞌanj me soj do̱ꞌ, se vaa ya̱nj Nimán Yaꞌanj nimán soj do̱ꞌ naꞌ.

1 Corintios 6:15

Ne̱ ne neꞌen soj se vaa nee̱ man nij soj me se ase vaa nee̱ man Cristó roꞌ, vaa nee̱ man soj naꞌ. Dan me se caꞌve̱e ni̱caj níꞌ nee̱ man Cristó, ne̱ cunu̱u rcuaꞌa̱a̱n yoꞌ ga̱ chana̱ niha̱ꞌ rá ga̱ chii, quiꞌya̱j níꞌ naꞌ. Se̱ caꞌvee quiꞌya̱j níꞌ da̱nj a̱ maꞌ.

1 Corintios 6:19

Ne̱ ne neꞌen soj se vaa ase vaa nuvií sa̱ꞌ ndoꞌo vaa nee̱ man soj, ne̱ rej ya̱nj Nimán Yaꞌanj me yoꞌ a̱ naꞌ. Dan me se Yaꞌanj me síí rqué nee̱ man soj rihaan soj, ne̱ né siꞌya̱j maꞌa̱n soj me nee̱ man soj a̱ maan ado̱nj.

1 Corintios 6:2

Ne̱ ne neꞌen soj se vaa vaa güii, ne̱ caꞌne̱ꞌ níꞌ si̱j noco̱ꞌ man Cristó cunuda̱nj cacunꞌ cheꞌé cunuda̱nj nij yuvii̱ ma̱n rihaan chumii̱ nihánj a̱ naꞌ. Sese caꞌne̱ꞌ soj cacunꞌ cheꞌé cunuda̱nj chumii̱ vaa güii, ga̱a ne̱ me cheꞌé se̱ guun nucua̱j soj caꞌne̱ꞌ soj cacunꞌ cheꞌé cacunꞌ leꞌe̱j nii cuano̱ ga̱.

1 Corintios 9:24

Neꞌen soj se vaa nij síí unánj tico tuviꞌ roꞌ, nucua̱j unánj cunuda̱nj nij soꞌ, tza̱j ne̱ o̱rúnꞌ tuviꞌ nij soꞌ ꞌyaj canaán ado̱nj. Dan me se ase vaa ꞌyaj síí ꞌyaj canaán roꞌ, da̱nj quiꞌya̱j soj cheꞌé Cristó, ga̱a ne̱ quiꞌya̱j canaán soj, ne̱ cavi̱i̱ sa̱ꞌ soj á.

1 Corintios 9:27

Dan me se síí tico tuviꞌ cuxruꞌ roꞌ, me se oꞌ soꞌ man maꞌa̱n soꞌ, cheꞌé se me rá soꞌ ga̱a̱ sca̱ꞌ nee̱ man soꞌ, ga̱a ne̱ quiꞌya̱j canaán soꞌ man tuviꞌ soꞌ a. Uxrá tumé soꞌ man nee̱ man maꞌa̱n soꞌ, ne̱ da̱nj vaa tumej man ma̱ꞌanj a. Dan me se caꞌmii natáj ꞌu̱nj rihaan ꞌó yuvii̱ se vaa canoco̱ꞌ nij soꞌ man Cristó, ne̱ naꞌvej raj cata̱j Cristó se vaa ne canoco̱ꞌ ya̱ ma̱ꞌanj man soꞌ maꞌ.

2 Corintios 6:16

Ne̱ xa̱ꞌ níꞌ si̱j noco̱ꞌ man Yaꞌanj, tza̱j ne̱ asa̱ꞌ caꞌve̱e cunu̱u chre̱ꞌ níꞌ ga̱ yaꞌanj quiꞌyaj maꞌa̱n yuvii̱, rá soj ga̱. Ne̱ xa̱ꞌ Yaꞌanj, tza̱j ne̱ síí vaa iꞌna̱ꞌ me soꞌ, ne̱ ya̱nj soꞌ nimán níꞌ ado̱nj. ꞌO̱ cuya̱a̱n vaa nana̱ nihánj ga̱ nana̱ caꞌmii Yaꞌanj ga̱a naá ga̱a cataj Yaꞌanj a: Ca̱yáán ꞌu̱nj ga̱ nij soꞌ, ne̱ cache̱e̱ ꞌu̱nj ga̱ nij soꞌ, ne̱ guún ꞌu̱nj Taꞌanj nij soꞌ, ne̱ gu̱un nij soꞌ se‑chuma̱nꞌ ꞌu̱nj a, taj Yaꞌanj ga̱a naá a.

Gálatas 2:20

Canó rcuaꞌa̱a̱n ꞌu̱nj rihaan rcutze̱ ga̱ Cristó vaa ga̱a na̱nj ado̱nj. Ya̱j me se né ꞌu̱nj me síí ya̱nj cuano̱ maꞌ. ꞌO̱ se Cristó me síí ya̱nj nimanj, ne̱ cheꞌé dan vaa iꞌna̱ꞌ ꞌu̱nj cuano̱ ado̱nj. Cheꞌé se amán rá ꞌu̱nj niꞌya̱j ꞌu̱nj man Taꞌníí Yaꞌanj roꞌ, cheꞌé dan ina̱nj nocóꞌ ꞌu̱nj man soꞌ ga̱a chéé ꞌu̱nj rihaan chumii̱ nihánj ado̱nj. Ne̱ dan me se ma̱an cheꞌé se cunuu ꞌe̱e̱ uxrá rá soꞌ mán ꞌu̱nj roꞌ, cheꞌé dan caꞌneꞌ gue̱e̱ rá soꞌ caviꞌ soꞌ rihaan rcutze̱ cheꞌé ꞌu̱nj na̱nj ado̱nj.

Gálatas 4:19

Dan me se ase vaa taꞌníí ꞌu̱nj neꞌej roꞌ, da̱nj vaa nij soj, tinu̱j, nocoj. Cuano̱ nihánj me se uun cheꞌe̱ uún ꞌu̱nj nanó ndoꞌo rá ꞌu̱nj cheꞌé soj nda̱a vaa nanó rá ꞌu̱nj ga̱a rque̱ a. Dan me se ase vaa nanó rá chana̱ nichrunꞌ cuchru̱j neꞌej roꞌ, da̱nj vaa nanó rá ꞌu̱nj cheꞌé soj cuano̱ chugua̱nj. Ne̱ veé ina̱nj da̱nj nanó ndoꞌo rá uún ꞌu̱nj cheꞌé nij soj nda̱a nari̱ꞌ ya̱ ya̱ soj nda̱a vaa quiꞌyaj maꞌa̱n ya̱ Cristó na̱nj á.

Gálatas 6:4

Tza̱j ne̱ naquiꞌya̱j cu̱u ꞌo̱ ꞌo̱ níꞌ da̱j ꞌyaj maꞌa̱n níꞌ, ne̱ sese veꞌé ꞌyaj níꞌ, ne̱ gu̱un niha̱ꞌ rá níꞌ cheꞌé se vaa veꞌé ꞌyaj maꞌa̱n níꞌ na̱nj á. Tza̱j ne̱ ne nó xcúún níꞌ naquiꞌya̱j cu̱u níꞌ da̱j ꞌyaj tinúú níꞌ maꞌ. Se̱ cataj níꞌ se vaa sa̱ꞌ doj ꞌyaj níꞌ rihaan tinúú níꞌ maꞌ.

Efesios 3:17

Ne̱ achíín ni̱ꞌyáj se vaa cuchuma̱n doj rá soj ni̱ꞌyaj soj man Cristó, ne̱ ꞌo̱ natu̱u̱ Cristó nimán soj quiꞌya̱j Yaꞌanj, ga̱a ne̱ ꞌo̱ cunu̱u ꞌe̱e̱ rá soj man ta̱ranꞌ tinúú soj ado̱nj.

Colosenses 1:23

Dan me se cavi̱i̱ sa̱ꞌ soj, sese ꞌo̱ canoco̱ꞌ soj stucua̱nj Cristó na̱nj ado̱nj. Raan canoco̱ꞌ soj man soꞌ á. A̱j cuno soj nana̱ sa̱ꞌ cheꞌé Cristó, ne̱ cheꞌé dan uun ya̱ rá soj se vaa cavi̱i̱ sa̱ꞌ soj, ne̱ se̱ guun cata̱j soj se vaa ne ya̱ vaa nana̱ sa̱ꞌ cuno soj maꞌ. ꞌO̱ se nana̱ caꞌmii natáj nii rihaan cunuda̱nj nij yuvii̱ ma̱n rihaan chumii̱ me nana̱ sa̱ꞌ yoꞌ, ne̱ ꞌu̱nj nihánj guun ꞌo̱ síí aꞌmii natáj snana̱ Yaꞌanj nana̱ sa̱ꞌ yoꞌ rihaan yuvii̱ na̱nj ado̱nj.

Colosenses 1:27

Dan me se guun rá Yaꞌanj xca̱j cunuda̱nj níꞌ si̱j noco̱ꞌ man soꞌ cuentá cheꞌé nana̱ sa̱ꞌ yuve̱ nihánj nana̱ tihaa̱n naca̱ Yaꞌanj se vaa niꞌndaj ya̱ sa̱ꞌ quiꞌyaj Yaꞌanj cheꞌé soj si̱j yaníj na̱nj ado̱nj. Dan me se yuvii̱ yaníj me soj, tza̱j ne̱ ya̱nj Cristó nimán soj, ne̱ cheꞌé dan uun ya̱ rá níꞌ se vaa niꞌndaj ya̱ cavi̱i̱ sa̱ꞌ soj ga̱ Yaꞌanj vaa güii na̱nj ado̱nj.

Colosenses 2:19

Dan me se taj cúú yave̱ nij soꞌ táá gaán chihá nij soꞌ vaa, ese taj Cristó rihaan nij soꞌ maꞌ. Ne uno nij soꞌ snana̱ Cristó maꞌ. Ne̱ ase vaa rii taꞌngaꞌ cúú yave̱ níꞌ rihaan nee̱ man níꞌ roꞌ, da̱nj vaa rii taꞌngaꞌ Cristó rihaan ta̱ranꞌ níꞌ si̱j noco̱ꞌ man soꞌ, ne̱ sa̱ꞌ doj nocoꞌ níꞌ man Yaꞌanj, ꞌyaj Cristó, ne̱ ina̱nj da̱nj me rá Yaꞌanj quiꞌya̱j níꞌ na̱nj ado̱nj. Ne̱ ase vaa vaa sca̱ꞌ nee̱ man níꞌ ꞌyaj yaꞌaâ man níꞌ roꞌ, da̱nj vaa cuya̱a̱n vaa ta̱ranꞌ níꞌ si̱j noco̱ꞌ man Yaꞌanj ꞌyaj Cristó ado̱nj.

Colosenses 2:7

Dan me se ꞌo̱ gu̱un xe̱j soj rihaan soꞌ, ne̱ ꞌo̱ canicu̱nꞌ xraan soj rihaan soꞌ, ne̱ ꞌo̱ cuno̱ soj rihaan soꞌ, ne̱ ꞌo̱ ca̱yáán soj nda̱a vaa taj tucuáán tucuꞌyón núj man soj, ne̱ o̱rúnꞌ soꞌ cuchuma̱n rá soj ni̱ꞌyaj soj, ne̱ cata̱j uxrá soj guun niꞌya̱j níꞌ rihaan Yaꞌanj á.

1 Timoteo 2:15

Tza̱j ne̱ cavi̱i̱ sa̱ꞌ nij chana̱ ga̱a cuchru̱j chana̱ neꞌej, sese ꞌo̱ cuchuma̱n rá chana̱ ni̱ꞌyaj chana̱ man Yaꞌanj do̱ꞌ, sese ꞌo̱ cunu̱u ꞌe̱e̱ rá chana̱ tuviꞌ chana̱ do̱ꞌ, sese ꞌo̱ cunu̱u sa̱ꞌ nimán chana̱ rihaan Yaꞌanj do̱ꞌ, ne̱ veꞌé tu̱mé chana̱ man maꞌa̱n chana̱ da̱j quiꞌya̱j noꞌ ado̱nj.

2 Timoteo 3:8

Ne̱ xa̱ꞌ nij síí chiꞌi̱i̱ yoꞌ, tza̱j ne̱ nda̱ꞌ rá se vaa quiranꞌ ro̱j síí chru̱u̱n cuꞌna̱j Janes ga̱ Jambres ga̱a quitáá riꞌyunj ro̱j soꞌ man síí cuꞌna̱j Moisés ga̱a naá roꞌ, da̱nj quira̱nꞌ gue̱e̱ nij síí ta̱j riꞌyunj man nana̱ ya̱ ado̱nj. ꞌO̱ se síí ma̱n ina̱nj nana̱ chiꞌi̱i̱ raa̱ me nij soꞌ do̱ꞌ, síí a̱j tanáj xco̱ stucua̱nj Yaꞌanj do̱ꞌ, me nij soꞌ na̱nj á.

Tito 1:13

Ne̱ dan me se ya̱ uxrá cataj soꞌ cheꞌé nij tuviꞌ soꞌ na̱nj ado̱nj. Cheꞌé dan sca̱ꞌ ina̱nj cata̱j xnaꞌanj so̱ꞌ cheꞌé se‑cacu̱nꞌ nij soꞌ rihaan nij soꞌ, ga̱a ne̱ caꞌve̱e ca̱nica̱j nimán nij soꞌ canoco̱ꞌ nij soꞌ stucua̱nj níꞌ si̱j amán rá niꞌya̱j man Cristó, ne̱ ga̱a̱ sa̱ꞌ nimán nij soꞌ ado̱nj.

Tito 1:16

Neꞌen nij soꞌ man Yaꞌanj, taj maꞌa̱n nij soꞌ, tza̱j ne̱ niꞌya̱j níꞌ se vaa ꞌyaj nij soꞌ, ne̱ xcaj níꞌ cuentá se vaa ne neꞌen uxrá nij soꞌ man Yaꞌanj a̱ maꞌ. Tana̱nj síí nachriꞌ yuvii̱ man do̱ꞌ, síí tucuáá do̱ꞌ, me nij soꞌ, ne̱ taj va̱j a̱ doj suun sa̱ꞌ caꞌve̱e quiꞌya̱j nij soꞌ a̱ maꞌ.

Tito 2:2

Cata̱j xnaꞌanj so̱ꞌ rihaan nij chii nga̱ se vaa síí na̱j nimán gu̱un nij soꞌ á. Ga̱a̱ chij rá nij soꞌ á. Xca̱j nij soꞌ cuentá da̱j quiꞌya̱j maꞌa̱n nij soꞌ á. ꞌO̱ cuchuma̱n rá nij soꞌ ni̱ꞌyaj nij soꞌ man Yaꞌanj, ne̱ ga̱a̱ ꞌe̱e̱ rá nij soꞌ tuviꞌ nij soꞌ, ne̱ nda̱ꞌ se ranꞌ nij soꞌ sayuun, tza̱j ne̱ ꞌo̱ xraan canoco̱ꞌ nij soꞌ man Cristó a.

Hebreos 12:15

Ne̱ tu̱mé soj man soj, ga̱a ne̱ se̱ gaa na̱nj ta̱náj ꞌo̱ tinúú soj se lu̱j quiꞌyaj Yaꞌanj ga̱ níꞌ á. Dan me se se̱ guun nachri̱ꞌ ꞌo̱ tinúú soj ni̱ꞌyaj soꞌ tinúú soꞌ maꞌ. Ta̱dó uxrá soj cheꞌé se ꞌo̱ síí nachriꞌ niꞌya̱j tinúú roꞌ, quiꞌya̱j quiri̱ꞌ rá queꞌe̱e̱ tinúú soj na̱nj ado̱nj.

Hebreos 4:1

Ga̱a rque̱ me se cataꞌ tuꞌva Yaꞌanj se vaa caꞌve̱e catu̱u̱ níꞌ rej caꞌa̱nj níꞌ nara̱a̱n rá níꞌ ga̱ Yaꞌanj, ne̱ veé da̱nj vaa yaꞌnúj rihaan níꞌ nda̱a cuano̱ ado̱nj. Cheꞌé dan tu̱mé uxrá níꞌ man níꞌ, ne̱ ta̱dó níꞌ se̱ gaa na̱nj ca̱ráán níꞌ xréé níꞌ rihaan nana̱ yoꞌ na̱nj á.

Hebreos 6:8

Tza̱j ne̱ sese quixra̱ꞌ uxrá coj tanj u̱u̱n do̱ꞌ, tanj yaꞌa̱a u̱u̱n do̱ꞌ, rihaan yoꞌóó yoꞌ, ne̱ quira̱nꞌ uxrá yoꞌóó yoꞌ sayuun, quiꞌya̱j Yaꞌanj, ne̱ caca̱a̱ nu̱ꞌ yoꞌóó yoꞌ, quiꞌya̱j Yaꞌanj na̱nj á.

Santiago 4:4

Ne̱ ase vaa chana̱ otoj ga̱ ꞌó snóꞌo roꞌ, da̱nj vaa soj, ne̱ ne nocoꞌ ya̱ nimán soj man Yaꞌanj a̱ maꞌ. Xca̱j soj cuentá se vaa síí me rá cavi̱i̱ sa̱ꞌ ina̱nj rihaan chumii̱ nihánj roꞌ, soꞌ me síí ta̱j riꞌyunj man Yaꞌanj ado̱nj. Ya̱ uxrá á.

1 Pedro 5:9

ꞌO̱ xraan canoco̱ꞌ soj man Yaꞌanj, ne̱ daj chiha̱a̱ míj se̱ cuno soj rihaan Síí Chre̱e maꞌ. Xca̱j soj cuentá se vaa ase vaa sayuun ranꞌ soj roꞌ, da̱nj vaa gue̱e̱ sayuun ranꞌ ta̱ranꞌ nij síí noco̱ꞌ man Cristó ma̱n rihaan chumii̱ nihánj chugua̱nj.

Apocalipsis 2:5

’Cheꞌé dan nanu̱j rá soj da̱j quiꞌyaj soj ga̱a ataa caꞌa̱nj yaníj soj rihanj, ne̱ ca̱nica̱j nimán soj, ne̱ quiꞌya̱j soj nda̱a vaa quiꞌyaj soj asino ya̱a̱n á. Sese se̱ canica̱j nimán soj, ne̱ cuchi̱ꞌ ꞌu̱nj rihaan soj, ne̱ caꞌne̱e̱ ꞌu̱nj se‑aga̱ꞌ soj agaꞌ ta̱j agaꞌ yaꞌan rej nicu̱nꞌ yoꞌ na̱nj ado̱nj.