2 Corintios 12:20 - Triqui de San Juan Copala

²⁰ ꞌO̱ se chuꞌvíꞌ ꞌu̱nj do̱j tzínꞌ se vaa cuchi̱ꞌ ꞌu̱nj chiháán soj ne̱ que̱neꞌenj se vaa ne ꞌyaj soj nda̱a vaa no̱ xcúún soj quiꞌya̱j soj, ne̱ cata̱j soj se vaa ne ꞌyáá ꞌu̱nj nda̱a vaa me rá soj qui̱ꞌyáá ꞌu̱nj a. Chuꞌvíꞌ ꞌu̱nj se vaa que̱neꞌén ꞌu̱nj se vaa aꞌmii unuꞌ soj ga̱ tinúú soj do̱ꞌ, se vaa uun xco̱j ruva̱a̱ rá soj niꞌya̱j soj tinúú soj do̱ꞌ, se vaa aꞌmaan rá soj niꞌya̱j soj tinúú soj do̱ꞌ, se vaa uxraꞌ taꞌa̱j soj man maꞌa̱n soj ne̱ uun rá soj cunu̱ꞌ soj do̱ꞌ, se vaa nanó soj cuentó ne̱ cheꞌé tinúú soj do̱ꞌ, se vaa aꞌmii soj nana̱ nij cheꞌé tinúú soj do̱ꞌ, se vaa aꞌmii xta̱ꞌ soj do̱ꞌ, se vaa vaa sayuun scaꞌnúj soj do̱ꞌ chugua̱nj.

2 Corintios 12:20 ပူးပေါင်းရင်းမြစ်များ

Romanos 1:29

Se araa nimán nij soꞌ me cunuda̱nj se ne nica̱ vaa do̱ꞌ, se chiꞌi̱i̱ do̱ꞌ, se nij do̱ꞌ, se uun ne̱ rá saꞌanj do̱ꞌ, se qui̱j do̱ꞌ a. Ina̱nj síí xco̱j ruva̱a̱ rá do̱ꞌ, síí ticaviꞌ do̱ꞌ, síí anó tuviꞌ do̱ꞌ, síí taꞌyunj do̱ꞌ, síí riꞌyunj do̱ꞌ, me nij soꞌ ado̱nj. Aꞌmii ne̱ nij soꞌ do̱ꞌ,

Romanos 1:30

nanó nij soꞌ cuentó ne̱ do̱ꞌ, nachriꞌ nij soꞌ man Yaꞌanj do̱ꞌ, aꞌmii nij nij soꞌ do̱ꞌ, xta̱ꞌ nimán nij soꞌ do̱ꞌ, aꞌmii xta̱ꞌ nij soꞌ do̱ꞌ a. Nanoꞌ nij soꞌ rej quiꞌya̱j nij soꞌ se chiꞌi̱i̱ a. Ne uno nij soꞌ rihaan rej nij soꞌ do̱ꞌ, rihaan nii nij soꞌ do̱ꞌ maꞌ.

Romanos 2:8

Xco̱j ruva̱a̱ ndoꞌo rá ꞌó taꞌa̱j yuvii̱, ne̱ ne uno nij soꞌ nana̱ ya̱ maꞌ. Tana̱nj tucuáán chiꞌi̱i̱ ina̱nj nocoꞌ nij soꞌ, ne̱ cheꞌé dan cuya̱nj rá Yaꞌanj ni̱ꞌyaj Yaꞌanj man nij soꞌ a.

1 Corintios 1:11

Dan me se cataj xnaꞌanj taꞌa̱j nij síí ma̱n tucuá níí cuꞌna̱j Cloé rihanj se vaa aꞌmii anó tuviꞌ soj ga̱ tinúú soj ne̱ uun vi̱j ndoꞌo soj, na̱nj tinu̱j, nocoj.

1 Corintios 14:33

Dan me se xa̱ꞌ Yaꞌanj, tza̱j ne̱ né si̱j tinachej rasu̱u̱n me Yaꞌanj maꞌ. ꞌO̱ se Yaꞌanj roꞌ, me síí ꞌyaj nica̱ vaa nu̱ꞌ rasu̱u̱n ado̱nj. Dínj ga̱a̱ tuꞌva chana̱ ga̱a nuu chre̱ꞌ nij xꞌneꞌ nij soj si̱j noco̱ꞌ man Cristó á. Ne nó xcúún chana̱ caꞌmi̱i̱ chana̱ maꞌ. Ma̱an se nano̱ xre̱j noꞌ á. Ina̱nj da̱nj taj stucua̱nj Moisés, ne̱ ina̱nj da̱nj vaa tucuáán noco̱ꞌ cunuda̱nj nij xꞌneꞌ nij síí noco̱ꞌ man Cristó ma̱n da̱j a̱ chumanꞌ a.

1 Corintios 5:2

Me cheꞌé aꞌmii xta̱ꞌ soj ga̱. Me cheꞌé ne nanó rá soj ga̱. Me cheꞌé ne quiri̱i̱ yaníj soj man síí tumé cacunꞌ ꞌni̱j scaꞌnúj soj ga̱.

2 Corintios 1:23

Neꞌen Yaꞌanj nimanj, se vaa ya̱ vaa nana̱ aꞌmij rihaan soj cuano̱ nihánj, ne̱ cheꞌé se ne caꞌve̱j ya̱ raj qui̱ꞌyáj sayuun man soj, cheꞌé dan ne cuchi̱j chumanꞌ Corinto ado̱nj.

2 Corintios 10:2

se vaa quiꞌya̱j soj se ndoꞌo, ne̱ se̱ quiꞌyaj tuchi̱ꞌ soj cuma̱n soj, ne̱ asa̱ꞌ cuchíꞌ ꞌu̱nj, ga̱a ne̱ se̱ caxríj yuva̱a̱ ꞌu̱nj man soj maan rugua̱nj. Ya̱ quisi̱j rá ꞌu̱nj caxri̱i̱ yuva̱a̱ ꞌu̱nj man nij síí taj se vaa ina̱nj ꞌyaj núj se vaa me rá nee̱ man núj quiꞌya̱j núj na̱nj á.

2 Corintios 10:6

Ne̱ asa̱ꞌ cuno maꞌa̱n soj rihaan Yaꞌanj, ne̱ gu̱un nucua̱j núj quiꞌya̱j núj sayuun man cunuda̱nj nij tuviꞌ soj síí naꞌvej rá cuno̱ rihaan Yaꞌanj ado̱nj.

2 Corintios 12:21

Dan me se chuꞌviꞌ uún ꞌu̱nj se vaa asa̱ꞌ cuchíꞌ ꞌu̱nj rihaan soj, ne̱ gu̱un naꞌa̱j ndoꞌo ꞌu̱nj quiꞌya̱j Yaꞌanj cheꞌé soj, ne̱ nano̱ ndoꞌo rá ꞌu̱nj cheꞌé queꞌe̱e̱ nij tinúú níꞌ nij síí tumé cacunꞌ, cheꞌé se naꞌvej rá nij soꞌ nuchra̱nꞌ nimán nij soꞌ ne̱ ta̱náj nij soꞌ chrej chiꞌi̱i̱ a. ꞌO̱ se ꞌo̱ tu̱mé nij soꞌ cacunꞌ se vaa nij ndoꞌo ꞌyaj nij soꞌ do̱ꞌ, se vaa ꞌyaj nij soꞌ cacunꞌ ga̱ ꞌó yuvii̱ né ni̱ca̱ nij soꞌ me do̱ꞌ na̱nj ado̱nj.

2 Corintios 13:2

Ga̱a quisíj vi̱j cuchíꞌ ꞌu̱nj rihaan soj, ne̱ cataj xnaꞌanj ꞌu̱nj rihaan soj se vaa sese cuchi̱ꞌ uún ꞌu̱nj rihaan soj, ne̱ se̱ caráj xꞌnaj ni̱ꞌyaj man síí veé da̱nj ꞌyaj cacunꞌ maꞌ. Ne̱ cuano̱ nihánj me se nuvíꞌ ꞌu̱nj yáán rej ma̱n soj, tza̱j ne̱ cata̱j xnaꞌanj uún ꞌu̱nj rihaan soj se vaa ya̱ ya̱ qui̱ꞌyáá ꞌu̱nj sayuun man cunuda̱nj nij síí tumé cacunꞌ yoꞌ a.

2 Corintios 2:1

Ma̱an cheꞌé se guun raj ꞌo̱ ga̱a̱ niha̱ꞌ nimán soj roꞌ, cheꞌé dan ne cuchi̱j rej ma̱n soj na̱nj ado̱nj.

Gálatas 5:15

Tza̱j ne̱ sese aꞌmii anó tuviꞌ soj do̱ꞌ, sese gu̱un xco̱j ruva̱a̱ rá soj ni̱ꞌyaj soj tuviꞌ soj do̱ꞌ, sese quiꞌya̱j soj sayuun man tuviꞌ soj do̱ꞌ, ne̱ dan me se ta̱dó uxrá soj á. ꞌO̱ se sese da̱nj uun rá soj, ne̱ quiri̱ꞌ cunuda̱nj nij tuvi̱ꞌ soj, quiꞌya̱j soj na̱nj chugua̱nj.

Gálatas 5:26

Se̱ caꞌmii xta̱ꞌ níꞌ a̱ ꞌó xcoꞌ a̱ maꞌ. Se̱ caꞌmii raꞌyunj níꞌ rihaan tuviꞌ níꞌ a̱ maꞌ. Se̱ guun xco̱j ruva̱a̱ rá níꞌ ni̱ꞌyaj níꞌ tuviꞌ níꞌ a̱ maꞌ.

Santiago 4:11

Se̱ guun caꞌmi̱i̱ soj nana̱ nij cheꞌé tuviꞌ soj, maan tinu̱j, maan nocoj. Síí aꞌmii cheꞌé tuviꞌ do̱ꞌ, síí araa cacunꞌ xráá tuviꞌ do̱ꞌ, soꞌ me síí taj se vaa taj cheꞌé cuno̱ níꞌ cunuda̱nj stucua̱nj Yaꞌanj chugua̱nj. Ne̱ síí aꞌmii da̱nj roꞌ, né si̱j uno stucua̱nj Yaꞌanj me soꞌ maꞌ. Ma̱an se síí naquiꞌyaj cu̱u stucua̱nj Yaꞌanj me soꞌ vaa ga̱a na̱nj á.

1 Pedro 2:1

Cheꞌé dan caꞌne̱ꞌ rá soj ga̱ nu̱ꞌ suun nachriꞌ man tuviꞌ á. A̱ ꞌó xcoꞌ se̱ tihaꞌ yuꞌunj soj man tuviꞌ soj maꞌ. ꞌO̱ nda̱a vaa taj soj roꞌ, veé da̱nj quiꞌya̱j gue̱e̱ soj á. Se̱ guun xco̱j ruva̱a̱ rá soj ni̱ꞌyaj soj tuviꞌ soj maꞌ. Ne̱ da̱j a̱ cuentó ne̱ roꞌ, se̱ nanó soj cheꞌé tuviꞌ soj a maan ado̱nj.

2 Pedro 2:18

Dan me se aꞌmii xta̱ꞌ ndoꞌo nij soꞌ nana̱ nij rmaꞌa̱n, ne̱ uno nij síí tiha̱j uun yaníj rihaan nij síí ne acaj cuentá ma̱n rihaan chumii̱ nihánj, tza̱j ne̱ nanica̱j nij soꞌ, ne̱ tanáj nij soꞌ chrej sa̱ꞌ, ne̱ ꞌyaj uún nij soꞌ se chiꞌi̱i̱ nda̱a vaa me rá maꞌa̱n nij soꞌ quiꞌya̱j nij soꞌ a.

Judas 1:16

Nij soꞌ me se taj se qui̱ꞌyáꞌ cara̱nꞌ rá nij soꞌ ni̱ꞌyaj nij soꞌ se vaa ꞌyaj Yaꞌanj do̱ꞌ, se vaa ꞌyaj tuviꞌ nij soꞌ do̱ꞌ maꞌ. Ina̱nj ꞌyaj nij soꞌ se nij nda̱a vaa me rá maꞌa̱n nij soꞌ na̱nj chugua̱nj. Síí xta̱ꞌ ina̱nj aꞌmii me nij soꞌ, ne̱ veꞌé ndoꞌo aꞌmii nij soꞌ cheꞌé yuvii̱ cheꞌé se ina̱nj me rá nij soꞌ cavi̱i̱ sa̱ꞌ doj maꞌa̱n nij soꞌ ado̱nj.