2 Corintios 11:26 - Triqui de San Juan Copala

²⁶ Dan me se a̱j cachéé ndoꞌoj nu̱ꞌ nij chrej, ne̱ vaa ndoꞌo sayuun quiránꞌ ꞌu̱nj rihaan chráá do̱ꞌ, cheꞌé síí itu̱u̱ do̱ꞌ, cheꞌé nij síí israelitá ne nocoꞌ man Cristó do̱ꞌ, cheꞌé nij síí yaníj do̱ꞌ, rej chumanꞌ ma̱n ndoꞌo yuvii̱ do̱ꞌ, rej tacaan naco̱o̱ do̱ꞌ, rihaan na yaꞌa̱nj do̱ꞌ, cheꞌé nij síí tihaꞌ yuꞌunj manj se vaa tinúj me nij soꞌ do̱ꞌ a.

2 Corintios 11:26 ပူးပေါင်းရင်းမြစ်များ

Hechos 13:45

Tza̱j ne̱ queneꞌen nij yuvii̱ israelitá se vaa cuchiꞌ ndoꞌo yuvii̱ rihaan Pabló, ga̱a ne̱ cheꞌé dan guun xco̱j ruva̱a̱ rá nij yuvii̱ israelitá, ne̱ nij caꞌmii nij soꞌ cheꞌé Pabló, cataj nij soꞌ se vaa ina̱nj nana̱ ne̱ caꞌmii Pabló a.

Hechos 13:50

Tza̱j ne̱ caxríj nij síí israelitá chrej rque nij chana̱ yaníj noco̱ꞌ xraan man Yaꞌanj chana̱ xnaꞌa̱nj do̱ꞌ, rque nij síí nica̱j suun uun chij rihaan chumanꞌ yoꞌ do̱ꞌ, ne̱ táá riꞌyunj nij soꞌ man Pabló ga̱ Bernabé a. Ga̱a ne̱ tucunánj nij soꞌ man ro̱j soꞌ rej yoꞌ a.

Hechos 14:19

Tza̱j ne̱ cavii síí israelitá chumanꞌ Antioquía do̱ꞌ, chumanꞌ Iconio do̱ꞌ, caꞌnaꞌ nij soꞌ chumanꞌ Listra, ne̱ caxríj nij soꞌ chrej rque nij yuvii̱ ma̱n chumanꞌ Listra a. Ne̱ cheꞌé dan goꞌ ndoꞌo nij yuvii̱ yahij man Pabló, ne̱ cuxuun nij yuvii̱ man soꞌ nda̱a tuꞌva chumanꞌ, cheꞌé se guun rá nij yuvii̱ se vaa caviꞌ soꞌ a.

Hechos 14:5

Ga̱a ne̱ nij yuvii̱ israelitá ga̱ nij yuvii̱ yaníj roꞌ, ꞌo̱ guun rá nij soꞌ ga̱ nij síí uun chij rihaan nij soꞌ quiꞌya̱j chiꞌi̱i̱ nij soꞌ man Pabló ga̱ Bernabé, ne̱ nda̱a guun rá nij soꞌ go̱ꞌ nij soꞌ yahij man ro̱j soꞌ nda̱a se cavi̱ꞌ ro̱j soꞌ a.

Hechos 15:40

Ne̱ Pabló roꞌ, narii soꞌ man síí cuꞌna̱j Silas se vaa caꞌa̱nj soꞌ ga̱ Pabló a. Ne̱ cachíín niꞌya̱j nij tinúú ro̱j soꞌ nij síí ma̱n chumanꞌ Antioquía rihaan Yaꞌanj se vaa quiꞌya̱j Yaꞌanj se lu̱j ne̱ ra̱cuíj soꞌ man ro̱j soꞌ chrej caꞌa̱nj ro̱j soꞌ, ne̱ dan me se caꞌanj ro̱j soꞌ a.

Hechos 17:13

Dan me se xcaj nij síí israelitá ya̱nj chumanꞌ Tesalónica cuentá se vaa nda̱a chumanꞌ Berea nataꞌ uún Pabló snana̱ Yaꞌanj rihaan nij yuvii̱ a. Cheꞌé dan caꞌanj nij soꞌ chumanꞌ Berea, ne̱ caꞌmii ne̱ nij soꞌ cheꞌé Pabló, ne̱ cuyanj rá queꞌe̱e̱ ndoꞌo nij síí ma̱n Berea niꞌya̱j nij soꞌ man Pabló ga̱ Silas, quiꞌyaj nij síí ma̱n Tesalónica yoꞌ a.

Hechos 17:5

Tza̱j ne̱ guun xco̱j ruva̱a̱ rá ꞌó nij yuvii̱ israelitá niꞌya̱j nij soꞌ man Pabló ga̱ Silas, ne̱ cheꞌé dan nanoꞌ nij soꞌ do̱j síí chiꞌi̱i̱ ma̱n yuꞌvee a. Ne̱ cunuu chre̱ꞌ ndoꞌo yuvii̱, quiꞌyaj nij síí chiꞌi̱i̱ yoꞌ, ga̱a ne̱ naxuma̱a̱n ndoꞌo sayuun chumanꞌ yoꞌ, quiꞌyaj nij soꞌ a. Ga̱a ne̱ cuchiꞌ nij yuvii̱ yoꞌ rihaan veꞌ tucuá síí cuꞌna̱j Jasón veꞌ caranꞌ Pabló ga̱ Silas, ne̱ guun rá nij yuvii̱ quiri̱i̱ nij soꞌ man ro̱j soꞌ nda̱a rihaan yuvii̱ cunuu chre̱ꞌ a.

Hechos 18:12

Dan me se yoꞌ dan me se síí cuꞌna̱j Galión me síí nica̱j suun gobernador uun chij rihaan estadó cuꞌna̱j Acaya a. Ne̱ naxuma̱a̱n yuvii̱ israelitá, ne̱ ꞌo̱ cuya̱a̱n me nimán nij soꞌ niꞌya̱j nij soꞌ man Pabló, ne̱ caꞌanj ni̱caj nij soꞌ man Pabló rihaan síí nica̱j suun cuꞌna̱j Galión yoꞌ, cheꞌé rej naquiꞌya̱j cu̱u soꞌ cheꞌé Pabló a.

Hechos 19:1

Dan me se ga̱a cayáán síí cuꞌna̱j Apolos chumanꞌ Corinto, ne̱ cachén Pabló rej xra̱j doj cuchiꞌ soꞌ nda̱a chumanꞌ Éfeso, ne̱ nariꞌ soꞌ do̱j síí tucuꞌyón snana̱ Jesucristó a.

Hechos 19:23

Güii dan me se guun ndoꞌo sayuun cheꞌé Se‑Chre̱j Jesús a.

Hechos 20:19

ꞌO̱ vaa nica̱ꞌ nimán ꞌu̱nj nu̱u̱ ꞌu̱nj rihaan Síí ꞌNi̱j Raꞌa man níꞌ, ne̱ neꞌen soj da̱j vaa taꞌveé ꞌu̱nj, ne̱ da̱j vaa quiránꞌ ꞌu̱nj sayuun cheꞌé se nuchruj ra̱a̱ nij síí israelitá quiꞌya̱j nij soꞌ sayuun manj a.

Hechos 20:3

Dan me se quisíj vaꞌnu̱j yavii guun ra̱a̱n soꞌ estadó Grecia yoꞌ, ga̱a ne̱ guun rá soꞌ cavi̱i̱ soꞌ rque rihoo chéé rihaan na ne̱ caꞌa̱nj soꞌ estadó cuꞌna̱j Siria a. Tza̱j ne̱ xcaj soꞌ cuentá se vaa guun rá nij yuvii̱ israelitá ca̱ráán nij soꞌ chrej man soꞌ, ne̱ cheꞌé dan caꞌnéé nimán soꞌ asino ya̱a̱n cache̱e̱ taco̱j soꞌ cache̱n soꞌ scaꞌnúj estadó Macedonia ga̱a ne̱ ca̱nica̱j soꞌ nda̱a estadó Siria a.

Hechos 23:10

Ga̱a ne̱ caꞌmaan uxrá rá cunuda̱nj nij soꞌ, ne̱ cheꞌé dan cuchuꞌviꞌ tanuu uun chij doj se vaa cutu̱nꞌ nij soꞌ man Pabló a. Cheꞌé dan caꞌneꞌ soꞌ suun rihaan nij tanuu se vaa caꞌa̱nj nij tanuu ta̱ꞌaa nij tanuu man Pabló ne̱ quiri̱i̱ nij tanuu man Pabló scaꞌnúj nij síí uun chij rihaan nij yuvii̱ israelitá yoꞌ ne̱ caꞌa̱nj ni̱caj nij tanuu man Pabló rá cuarteé ma̱n nij tanuu a.

Hechos 25:3

cachíín niꞌya̱j nij soꞌ rihaan Festo se vaa caꞌne̱ꞌ soꞌ suun se vaa caꞌna̱ꞌ Pabló nda̱a chumanꞌ Jerusalén a. ꞌO̱ se guun rá nij soꞌ ca̱ráán nij soꞌ chrej ne̱ ticavi̱ꞌ nij soꞌ man Pabló a.

Hechos 27:42

Ne̱ guun rá nij tanuu ticavi̱ꞌ nij soꞌ man nij síí ꞌni̱j tagaꞌ tumé nij soꞌ, cheꞌé rej se̱ caꞌvee go̱ꞌ nij soꞌ xtáj rihaan na ne̱ cuna̱nj nij soꞌ rihaan nij tanuu a.

Romanos 15:19

Dan me se guun nu̱cuáá ꞌu̱nj ꞌyáá ꞌu̱nj da̱j a̱ nij suun sa̱ꞌ noco̱o, ꞌyaj snucua̱j Nimán Yaꞌanj a. Ga̱a ne̱ xcaj yuvii̱ ya̱nj nu̱ꞌ anica̱j chumanꞌ Jerusalén cuentá cheꞌé nana̱ sa̱ꞌ cheꞌé Cristó, ne̱ nda̱a yuvii̱ ya̱nj ꞌó nij chumanꞌ ga̱nꞌ doj nda̱a estadó cuꞌna̱j Ilírico roꞌ, xcaj cuentá cheꞌé nana̱ sa̱ꞌ cheꞌé Cristó, quiꞌyáj a.

Romanos 8:35

A̱ ꞌó güii se̱ guun yaníj Cristó rihaan níꞌ, quiꞌya̱j nij yuvii̱ maꞌ. ꞌO̱ ꞌe̱e̱ rá Cristó man níꞌ na̱nj ado̱nj. Caꞌve̱e se quira̱nꞌ níꞌ sayuun do̱ꞌ, caꞌve̱e se nano̱ ndoꞌo rá níꞌ do̱ꞌ, caꞌve̱e se quita̱j riꞌyunj yuvii̱ man níꞌ do̱ꞌ, caꞌve̱e se quinaꞌa̱an rque níꞌ do̱ꞌ, caꞌve̱e se taj yatzéj cu̱nuû níꞌ do̱ꞌ, caꞌve̱e se vaa yuvii̱ ticavi̱ꞌ man níꞌ do̱ꞌ, tza̱j ne̱ daj chiha̱a̱ míj se̱ guun yaníj Cristó rihaan níꞌ maꞌ.

1 Corintios 15:30

Me cheꞌé niga̱nj vaj núj rihaan sayuun cheꞌé snana̱ Yaꞌanj, rá soj ga̱.

1 Corintios 15:32

Quiranꞌ ndoꞌoj sayuun chumanꞌ Éfeso da̱j se vaa sayuun ranꞌ síí unuꞌ ga̱ xcuu yuva̱a̱, ne̱ taj cheꞌé quiꞌyáj da̱nj sese yu̱u̱n cheꞌe̱ cavi̱ꞌ níꞌ maꞌ. Sese se̱ cunuu iꞌna̱ꞌ uún nij síí caviꞌ, ga̱a̱ ne̱ táá a̱ se quiꞌya̱j níꞌ da̱j se vaa taj yuvii̱ ne nocoꞌ man Yaꞌanj a. “Cha̱ níꞌ do̱ꞌ, coꞌo̱ níꞌ do̱ꞌ, ya̱j ga̱a vaa iꞌna̱ꞌ níꞌ, cheꞌé se aꞌyuj me se cavi̱ꞌ níꞌ ado̱nj”, taj nij soꞌ a.

2 Corintios 11:32

Ga̱a cunuu ꞌu̱nj chumanꞌ Damasco roꞌ, ne̱ síí nica̱j suun ꞌyaj suun cheꞌé rey cuꞌna̱j Aretas roꞌ, caráán soꞌ rej atúj yuvii̱ chumanꞌ, cheꞌé se guun rá soꞌ ta̱ꞌaa soꞌ manj,

Gálatas 2:4

Tza̱j ne̱ do̱j nij síí tihaꞌ yuꞌunj taj se vaa tinúú níꞌ me nij soꞌ, tza̱j ne̱ taj maꞌ. Dan me se catúj yuve̱ nij soꞌ rej nuu chre̱ꞌ núj cheꞌé rej xca̱j nij soꞌ cuentá da̱j ꞌyaj núj a. ꞌO̱ se vaa yaꞌnúj rihaan níꞌ canoco̱ꞌ níꞌ man Cristó Jesús, ne̱ taj cheꞌé canoco̱ꞌ níꞌ nu̱ꞌ stucua̱nj Moisés nda̱a vaa guun rá nij síí tihaꞌ yuꞌunj quiꞌya̱j níꞌ a̱ maꞌ.