2 Corintios 11:10 - Triqui de San Juan Copala

¹⁰ Cheꞌé se ya̱nj Cristó ga̱ ꞌu̱nj, cheꞌé dan neꞌen soj se vaa ya̱ vaa nana̱ aꞌmii ꞌu̱nj rihaan soj, ne̱ cata̱j xnaꞌanj ꞌu̱nj rihaan soj cuano̱ se vaa se̱ guun daj chiha̱a̱ míj cata̱j yuvii̱ ma̱n estadó ma̱n soj se vaa quitaꞌaj se‑saꞌa̱nj soj maꞌ.

2 Corintios 11:10 ပူးပေါင်းရင်းမြစ်များ

Hechos 18:12

Dan me se yoꞌ dan me se síí cuꞌna̱j Galión me síí nica̱j suun gobernador uun chij rihaan estadó cuꞌna̱j Acaya a. Ne̱ naxuma̱a̱n yuvii̱ israelitá, ne̱ ꞌo̱ cuya̱a̱n me nimán nij soꞌ niꞌya̱j nij soꞌ man Pabló, ne̱ caꞌanj ni̱caj nij soꞌ man Pabló rihaan síí nica̱j suun cuꞌna̱j Galión yoꞌ, cheꞌé rej naquiꞌya̱j cu̱u soꞌ cheꞌé Pabló a.

Hechos 18:27

Dan me se guun rá síí cuꞌna̱j Apolos cache̱n soꞌ nda̱a estadó Acaya a. Ga̱a ne̱ doj a̱ nariꞌ nucuaj soꞌ quiꞌyaj nij tinúú níꞌ síí ma̱n chumanꞌ Éfeso, ne̱ quiꞌyaj nij soꞌ yanj cartá naya̱a̱ nij síí tucuꞌyón snana̱ Jesucristó ma̱n estadó Acaya, ne̱ cataj nij soꞌ se vaa veꞌé ni̱caj tuviꞌ nij síí ma̱n Acaya ga̱ Apolos a. Ga̱a ne̱ ga̱a cuchiꞌ Apolos nda̱a estadó Acaya, ne̱ racuíj ndoꞌo soꞌ man nij tinúú níꞌ síí cuchumán rá niꞌya̱j man Jesucristó cheꞌé se lu̱j quiꞌyaj Yaꞌanj a.

Romanos 1:9

Dan me se nda̱a nimán yá ꞌu̱nj ꞌyáá ꞌu̱nj suun rihaan Yaꞌanj natáꞌ ꞌu̱nj nana̱ sa̱ꞌ cheꞌé Taꞌníí soꞌ, ne̱ neꞌen Yaꞌanj se vaa ya̱ ya̱ niga̱nj achíín ni̱ꞌyáj cheꞌé soj ado̱nj.

Romanos 16:5

Cata̱j uún soj rihaan xꞌneꞌ yuvii̱ noco̱ꞌ man Cristó nuu chre̱ꞌ tucuá ro̱j soꞌ se vaa veꞌé cuma̱n nij soꞌ, raj á. Ne̱ da̱nj cata̱j uún soj rihaan síí cuꞌna̱j Epeneto á. ꞌO̱ se ꞌe̱e̱ raj man soꞌ, ne̱ soꞌ me síí cuchumán rá niꞌya̱j man Cristó asino ya̱a̱n rihaan cunuda̱nj nij yuvii̱ ma̱n estadó cuꞌna̱j Asia a.

Romanos 9:1

Cheꞌé se síí noco̱ꞌ man Cristó mé ꞌu̱nj, ne̱ se̱ caꞌmii ne̱ ꞌu̱nj rihaan nij soj maꞌ. ꞌO̱ se ya̱nj Nimán Yaꞌanj ga̱ ꞌu̱nj, ne̱ maꞌa̱n Nimán Yaꞌanj cataj rihanj se vaa nana̱ ya̱ caꞌmij á.

1 Corintios 16:15

Neꞌen nij soj man nij tucua̱ tinúú níꞌ síí cuꞌna̱j Estéfanas se vaa nij soꞌ me síí cuchumán rá niꞌya̱j man Jesucristó asino ya̱a̱n rihaan cunuda̱nj nij yuvii̱ ma̱n estadó Acaya a. Ne̱ caꞌnéé nimán maꞌa̱n nij soꞌ quiꞌya̱j suun nij soꞌ ra̱cuíj nij soꞌ man nij síí noco̱ꞌ man Cristó ado̱nj. Cuano̱ nihánj me se cata̱j xnaꞌanj ꞌu̱nj rihaan soj se vaa veꞌé cuno̱ soj rihaan cunuda̱nj yuvii̱ ꞌyaj suun nda̱a vaa ꞌyaj suun nij soꞌ, tinu̱j, nocoj. Ne̱ cuno̱ uún soj rihaan cunuda̱nj nij síí aꞌnéé ndoꞌo nimán quiꞌya̱j suun ga̱ nij soꞌ na̱nj á.

2 Corintios 1:1

ꞌU̱nj me síí cuꞌna̱j Pabló si̱j cuneꞌ Cristó Jesús caꞌa̱nj nata̱ꞌ snana̱ soꞌ rihaan yuvii̱, nda̱a vaa me rá maꞌa̱n Yaꞌanj qui̱ꞌyáj a. Ya̱nj tinúꞌ Timoteo ga̱j, ne̱ ꞌyaj rój yanj nihánj caꞌne̱j rój rihaan soj xꞌneꞌ nij síí noco̱ꞌ man Cristó ya̱nj chumanꞌ cuꞌna̱j Corinto, ga̱ cunuda̱nj ꞌó nij soj si̱j noco̱ꞌ man Cristó ya̱nj nu̱ꞌ estadó cuꞌna̱j Acaya uún a.

2 Corintios 1:23

Neꞌen Yaꞌanj nimanj, se vaa ya̱ vaa nana̱ aꞌmij rihaan soj cuano̱ nihánj, ne̱ cheꞌé se ne caꞌve̱j ya̱ raj qui̱ꞌyáj sayuun man soj, cheꞌé dan ne cuchi̱j chumanꞌ Corinto ado̱nj.

2 Corintios 10:15

Dan me se se̱ caꞌmii xta̱ꞌ núj cheꞌé se vaa quiꞌyaj ꞌó yuvii̱ maꞌ. Ne nó xcúún núj quiꞌya̱j núj da̱nj maꞌ. Ma̱an se naꞌvi̱j ndoꞌo núj se vaa cuchuma̱n doj rá soj ni̱ꞌyaj soj man Yaꞌanj, ga̱a ne̱ uxrá doj quiꞌya̱j núj se‑su̱u̱n Yaꞌanj scaꞌnúj soj, nda̱a vaa me rá Yaꞌanj quiꞌya̱j núj a.

2 Corintios 11:12

Tza̱j ne̱ neꞌen soj se vaa me rá ꞌó nij soꞌ cata̱j nij soꞌ se vaa ꞌo̱ cuya̱a̱n vaa se ꞌyaj núj ga̱ se ꞌyaj nij soꞌ, ne̱ cheꞌé dan ase vaa ꞌyáá ꞌu̱nj cuano̱ roꞌ, taꞌngaꞌ da̱nj ꞌo̱ qui̱ꞌyáá ꞌu̱nj, ne̱ se̱ caꞌnéj ꞌu̱nj saꞌanj man soj maꞌ. Ne̱ se̱ caꞌvee cata̱j nij soꞌ se vaa ꞌo̱ cuya̱a̱n ꞌyaj nij soꞌ ga̱ núj a̱ maꞌ.

2 Corintios 11:31

Yaꞌanj Rej Jesús Si̱j ꞌNi̱j Raꞌa man níꞌ roꞌ, neꞌen soꞌ se vaa ya̱ aꞌmii ꞌu̱nj, ne̱ veꞌé uxrá caꞌmi̱i̱ níꞌ cheꞌé soꞌ nu̱ꞌ cavii nu̱ꞌ caꞌanj na̱nj á.

2 Corintios 12:19

Dan me se cheꞌé se chuꞌviꞌ ndoꞌo núj se vaa cuta̱ꞌ soj cacunꞌ xráá núj me se caꞌmii ndoꞌo núj nu̱ꞌ nana̱ nihánj, rá soj naꞌ. Taj maꞌ. ꞌO̱ se neꞌen Yaꞌanj da̱j aꞌmii núj, ne̱ cheꞌé se si̱j noco̱ꞌ man Cristó me núj, ne̱ caꞌmii núj nu̱ꞌ nana̱ nihánj cheꞌé se ꞌe̱e̱ rá núj man soj, ne̱ me rá núj nari̱ꞌ sa̱ꞌ soj canoco̱ꞌ soj man Yaꞌanj, tinu̱j, nocoj.

2 Corintios 9:2

ꞌO̱ se a̱j neꞌén ꞌu̱nj se vaa guun niha̱ꞌ rá soj rque̱ soj saꞌanj rihaan nij soꞌ, ne̱ veꞌé caꞌmii ꞌu̱nj rihaan nij tinúú níꞌ síí ma̱n estadó Macedonia cheꞌé soj, cataj ꞌu̱nj se vaa asi̱j goj a̱j guun cheꞌe̱ nij soj si̱j ma̱n estadó Acaya racuíj nij soj man nij síí noco̱ꞌ man Cristó, ga̱a ne̱ guun niha̱ꞌ doj rá noco̱o doj nij soꞌ rque̱ maꞌa̱n nij soꞌ saꞌanj a.

Gálatas 1:20

Neꞌen ya̱ Yaꞌanj se vaa ya̱ vaa nana̱ nihánj nana̱ cachrón ꞌu̱nj rihaan yanj nihánj ado̱nj.

Gálatas 2:20

Canó rcuaꞌa̱a̱n ꞌu̱nj rihaan rcutze̱ ga̱ Cristó vaa ga̱a na̱nj ado̱nj. Ya̱j me se né ꞌu̱nj me síí ya̱nj cuano̱ maꞌ. ꞌO̱ se Cristó me síí ya̱nj nimanj, ne̱ cheꞌé dan vaa iꞌna̱ꞌ ꞌu̱nj cuano̱ ado̱nj. Cheꞌé se amán rá ꞌu̱nj niꞌya̱j ꞌu̱nj man Taꞌníí Yaꞌanj roꞌ, cheꞌé dan ina̱nj nocóꞌ ꞌu̱nj man soꞌ ga̱a chéé ꞌu̱nj rihaan chumii̱ nihánj ado̱nj. Ne̱ dan me se ma̱an cheꞌé se cunuu ꞌe̱e̱ uxrá rá soꞌ mán ꞌu̱nj roꞌ, cheꞌé dan caꞌneꞌ gue̱e̱ rá soꞌ caviꞌ soꞌ rihaan rcutze̱ cheꞌé ꞌu̱nj na̱nj ado̱nj.

1 Tesalonicenses 2:10

Queneꞌen maꞌa̱n soj do̱ꞌ, queneꞌen Yaꞌanj do̱ꞌ, se vaa si̱j sa̱ꞌ nimán do̱ꞌ, si̱j nica̱ nimán do̱ꞌ, si̱j ne quiꞌya̱j cacunꞌ do̱ꞌ, me núj rihaan soj si̱j amán rá niꞌya̱j man Yaꞌanj ado̱nj.

1 Tesalonicenses 2:5

Neꞌen soj do̱ꞌ, neꞌen maꞌa̱n Yaꞌanj do̱ꞌ, se vaa ne caꞌmi̱i̱ yaꞌa̱nj ndoꞌo núj ga̱ soj, ne̱ ne gu̱un rá núj caꞌne̱e̱ núj saꞌanj man soj maꞌ.

1 Timoteo 2:7

Ne̱ cuneꞌ Yaꞌanj mán ꞌu̱nj caꞌmi̱i̱ natáj ꞌu̱nj do̱ꞌ, caꞌa̱nj nata̱ꞌ ꞌu̱nj snana̱ Cristó do̱ꞌ, tu̱cuꞌyón ꞌu̱nj man nij yuvii̱ yaníj da̱j cuchuma̱n rá nij soꞌ ni̱ꞌyaj nij soꞌ man Yaꞌanj ne̱ cuno̱ nij soꞌ nana̱ ya̱ caꞌmii Yaꞌanj do̱ꞌ a. Xa̱ꞌ nana̱ nihánj, tza̱j ne̱ nana̱ ya̱ uxrá me nana̱ nihánj, ne̱ ne aꞌmii ne̱ ꞌu̱nj maꞌ.