2 Corintios 1:23 - Triqui de San Juan Copala

²³ Neꞌen Yaꞌanj nimanj, se vaa ya̱ vaa nana̱ aꞌmij rihaan soj cuano̱ nihánj, ne̱ cheꞌé se ne caꞌve̱j ya̱ raj qui̱ꞌyáj sayuun man soj, cheꞌé dan ne cuchi̱j chumanꞌ Corinto ado̱nj.

2 Corintios 1:23 ပူးပေါင်းရင်းမြစ်များ

Hechos 18:1

Cachén doj, ga̱a ne̱ cavii Pabló chumanꞌ Atenas, caꞌanj soꞌ nda̱a chumanꞌ Corinto a.

Hechos 18:8

Dan me se ꞌo̱ síí cuꞌna̱j Crispo síí ꞌni̱j raꞌa veꞌ tucuꞌyón nij yuvii̱ israelitá stucua̱nj Moisés roꞌ, cuchumán rá nu̱ꞌ nij tucua̱ soꞌ niꞌya̱j nij soꞌ man Síí ꞌNi̱j Raꞌa man níꞌ a. Ga̱a ne̱ cuchiꞌ nana̱ rihaan nij síí ma̱n Corinto se vaa síí cuꞌna̱j Crispo me síí cuchumán rá niꞌya̱j man Síí ꞌNi̱j Raꞌa man níꞌ, ne̱ cheꞌé dan cuchumán rá uún queꞌe̱e̱ nij soꞌ niꞌya̱j nij soꞌ man Jesucristó, ne̱ cataꞌ ne cunuda̱nj nij soꞌ a.

Romanos 1:9

Dan me se nda̱a nimán yá ꞌu̱nj ꞌyáá ꞌu̱nj suun rihaan Yaꞌanj natáꞌ ꞌu̱nj nana̱ sa̱ꞌ cheꞌé Taꞌníí soꞌ, ne̱ neꞌen Yaꞌanj se vaa ya̱ ya̱ niga̱nj achíín ni̱ꞌyáj cheꞌé soj ado̱nj.

Romanos 9:1

Cheꞌé se síí noco̱ꞌ man Cristó mé ꞌu̱nj, ne̱ se̱ caꞌmii ne̱ ꞌu̱nj rihaan nij soj maꞌ. ꞌO̱ se ya̱nj Nimán Yaꞌanj ga̱ ꞌu̱nj, ne̱ maꞌa̱n Nimán Yaꞌanj cataj rihanj se vaa nana̱ ya̱ caꞌmij á.

1 Corintios 4:21

Me se me rá soj qui̱ꞌyáj ga̱ soj asa̱ꞌ cuchíꞌ ꞌu̱nj rihaan soj ga̱. Me rá soj cayu̱u̱n soj qui̱ꞌyáj naꞌ. Ase me rá soj ga̱a̱ ꞌe̱e̱ rá ꞌu̱nj man soj ne̱ veꞌé caꞌmi̱j ga̱ soj xa̱ꞌ.

1 Corintios 5:5

ne̱ taj xnaꞌanj ꞌu̱nj rihaan soj se vaa ta̱cuachén soj man síí tumé cacunꞌ yoꞌ rihaan Síí Chre̱e, ga̱a ne̱ quira̱nꞌ ndoꞌo nee̱ man soꞌ sayuun, quiꞌya̱j Síí Chre̱e, ga̱a ne̱ sese xca̱j sa̱ꞌ soꞌ cuentá, ne̱ asa̱ꞌ caꞌnaꞌ Síí ꞌNi̱j Raꞌa man níꞌ caꞌne̱ꞌ soꞌ cacunꞌ cheꞌé yuvii̱, ga̱a ne̱ nani̱i̱ nimán soꞌ, quiꞌya̱j Síí ꞌNi̱j Raꞌa man níꞌ a.

2 Corintios 1:1

ꞌU̱nj me síí cuꞌna̱j Pabló si̱j cuneꞌ Cristó Jesús caꞌa̱nj nata̱ꞌ snana̱ soꞌ rihaan yuvii̱, nda̱a vaa me rá maꞌa̱n Yaꞌanj qui̱ꞌyáj a. Ya̱nj tinúꞌ Timoteo ga̱j, ne̱ ꞌyaj rój yanj nihánj caꞌne̱j rój rihaan soj xꞌneꞌ nij síí noco̱ꞌ man Cristó ya̱nj chumanꞌ cuꞌna̱j Corinto, ga̱ cunuda̱nj ꞌó nij soj si̱j noco̱ꞌ man Cristó ya̱nj nu̱ꞌ estadó cuꞌna̱j Acaya uún a.

2 Corintios 1:18

Da̱j se vaa ya̱ vaa Yaꞌanj roꞌ, da̱nj ya̱ vaa snana̱ núj, ne̱ né taꞌa̱j nana̱ “caꞌve̱e” do̱ꞌ, taꞌa̱j nana̱ “se̱ caꞌvee” do̱ꞌ, me nana̱ caꞌmii núj maꞌ.

2 Corintios 10:2

se vaa quiꞌya̱j soj se ndoꞌo, ne̱ se̱ quiꞌyaj tuchi̱ꞌ soj cuma̱n soj, ne̱ asa̱ꞌ cuchíꞌ ꞌu̱nj, ga̱a ne̱ se̱ caxríj yuva̱a̱ ꞌu̱nj man soj maan rugua̱nj. Ya̱ quisi̱j rá ꞌu̱nj caxri̱i̱ yuva̱a̱ ꞌu̱nj man nij síí taj se vaa ina̱nj ꞌyaj núj se vaa me rá nee̱ man núj quiꞌya̱j núj na̱nj á.

2 Corintios 11:10

Cheꞌé se ya̱nj Cristó ga̱ ꞌu̱nj, cheꞌé dan neꞌen soj se vaa ya̱ vaa nana̱ aꞌmii ꞌu̱nj rihaan soj, ne̱ cata̱j xnaꞌanj ꞌu̱nj rihaan soj cuano̱ se vaa se̱ guun daj chiha̱a̱ míj cata̱j yuvii̱ ma̱n estadó ma̱n soj se vaa quitaꞌaj se‑saꞌa̱nj soj maꞌ.

2 Corintios 11:11

Me cheꞌé tuꞌvaj da̱nj, rá soj ga̱. Da̱nj tuꞌvaj cheꞌé se ne ꞌe̱e̱ raj man soj, rá soj naꞌ. Taj maꞌ. ꞌO̱ se neꞌen Yaꞌanj se vaa ya̱ ya̱ ꞌe̱e̱ rá ꞌu̱nj man soj ado̱nj.

2 Corintios 11:31

Yaꞌanj Rej Jesús Si̱j ꞌNi̱j Raꞌa man níꞌ roꞌ, neꞌen soꞌ se vaa ya̱ aꞌmii ꞌu̱nj, ne̱ veꞌé uxrá caꞌmi̱i̱ níꞌ cheꞌé soꞌ nu̱ꞌ cavii nu̱ꞌ caꞌanj na̱nj á.

2 Corintios 12:20

ꞌO̱ se chuꞌvíꞌ ꞌu̱nj do̱j tzínꞌ se vaa cuchi̱ꞌ ꞌu̱nj chiháán soj ne̱ que̱neꞌenj se vaa ne ꞌyaj soj nda̱a vaa no̱ xcúún soj quiꞌya̱j soj, ne̱ cata̱j soj se vaa ne ꞌyáá ꞌu̱nj nda̱a vaa me rá soj qui̱ꞌyáá ꞌu̱nj a. Chuꞌvíꞌ ꞌu̱nj se vaa que̱neꞌén ꞌu̱nj se vaa aꞌmii unuꞌ soj ga̱ tinúú soj do̱ꞌ, se vaa uun xco̱j ruva̱a̱ rá soj niꞌya̱j soj tinúú soj do̱ꞌ, se vaa aꞌmaan rá soj niꞌya̱j soj tinúú soj do̱ꞌ, se vaa uxraꞌ taꞌa̱j soj man maꞌa̱n soj ne̱ uun rá soj cunu̱ꞌ soj do̱ꞌ, se vaa nanó soj cuentó ne̱ cheꞌé tinúú soj do̱ꞌ, se vaa aꞌmii soj nana̱ nij cheꞌé tinúú soj do̱ꞌ, se vaa aꞌmii xta̱ꞌ soj do̱ꞌ, se vaa vaa sayuun scaꞌnúj soj do̱ꞌ chugua̱nj.

2 Corintios 13:10

Cheꞌé dan cuano̱ nihánj me se cachrón ꞌu̱nj nana̱ nihánj rihaan yanj cartá naya̱a̱ soj a. Dan me se nda̱ꞌ se nuvíꞌ ꞌu̱nj yáán ga̱ soj cuano̱, tza̱j ne̱ cachrón ꞌu̱nj nana̱ nihánj, ga̱a ne̱ güii cuchi̱ꞌ ꞌu̱nj rihaan soj me se se̱ gaa suun rihanj quiꞌya̱j ndoꞌoj sayuun man soj a̱ maꞌ. Dan me se caꞌneꞌ Síí ꞌNi̱j Raꞌa man níꞌ suun rihanj cu̱tumej man soj, ne̱ dan me se naꞌvej rá soꞌ quiri̱ꞌ soj qui̱ꞌyáj a̱ maꞌ. ꞌO̱ se me rá soꞌ ra̱cuíj ꞌu̱nj man soj yan canoco̱ꞌ sa̱ꞌ soj man soꞌ ado̱nj.

2 Corintios 13:2

Ga̱a quisíj vi̱j cuchíꞌ ꞌu̱nj rihaan soj, ne̱ cataj xnaꞌanj ꞌu̱nj rihaan soj se vaa sese cuchi̱ꞌ uún ꞌu̱nj rihaan soj, ne̱ se̱ caráj xꞌnaj ni̱ꞌyaj man síí veé da̱nj ꞌyaj cacunꞌ maꞌ. Ne̱ cuano̱ nihánj me se nuvíꞌ ꞌu̱nj yáán rej ma̱n soj, tza̱j ne̱ cata̱j xnaꞌanj uún ꞌu̱nj rihaan soj se vaa ya̱ ya̱ qui̱ꞌyáá ꞌu̱nj sayuun man cunuda̱nj nij síí tumé cacunꞌ yoꞌ a.

2 Corintios 6:6

Ne̱ tumé núj man núj cheꞌé yan se̱ quiꞌyaj núj cacunꞌ maꞌ. Ne̱ aꞌnéé nimán núj quiꞌya̱j núj se‑su̱u̱n Yaꞌanj, ne̱ núj roꞌ, ne uun yuva̱a̱ núj man tuviꞌ núj maꞌ. Tana̱nj veꞌé ꞌyaj núj rihaan tuviꞌ núj, ne̱ noco̱ꞌ núj Nimán Yaꞌanj, ne̱ ya̱ ya̱ ꞌe̱e̱ rá núj man tuviꞌ núj ado̱nj.

Gálatas 1:20

Neꞌen ya̱ Yaꞌanj se vaa ya̱ vaa nana̱ nihánj nana̱ cachrón ꞌu̱nj rihaan yanj nihánj ado̱nj.

Filipenses 1:8

Ne̱ Yaꞌanj me síí neꞌen ya̱ se vaa ase vaa ꞌe̱e̱ rá Cristó Jesús man nij soj roꞌ, veé da̱nj ꞌe̱e̱ gue̱e̱ rá ma̱ꞌanj man cunuda̱nj nij soj chugua̱nj.

1 Tesalonicenses 2:5

Neꞌen soj do̱ꞌ, neꞌen maꞌa̱n Yaꞌanj do̱ꞌ, se vaa ne caꞌmi̱i̱ yaꞌa̱nj ndoꞌo núj ga̱ soj, ne̱ ne gu̱un rá núj caꞌne̱e̱ núj saꞌanj man soj maꞌ.

1 Timoteo 1:20

Dan me se vi̱j nij soꞌ me ro̱j síí cuꞌna̱j Himeneo ga̱ Alejandró síí caꞌmii qui̱j cheꞌé Yaꞌanj a. Dan me se nagoꞌ yá ꞌu̱nj man ro̱j soꞌ raꞌa Síí Chre̱e, ga̱a ne̱ xca̱j ro̱j soꞌ cuentá, ne̱ se̱ caꞌmii qui̱j ro̱j soꞌ cheꞌé Yaꞌanj maꞌ.