1 Tesalonicenses 4:5 - Triqui de San Juan Copala

⁵ Dan me se se̱ guun canoco̱ꞌ soj tucuáán noco̱ꞌ nij yuvii̱ ne neꞌen man Yaꞌanj maꞌ. Ma̱an cheꞌé se veꞌé vaa chana̱ rihaan nij soꞌ, ne̱ uun rá nij soꞌ coto̱j nij soꞌ ga̱ chana̱ a.

1 Tesalonicenses 4:5 ပူးပေါင်းရင်းမြစ်များ

San Mateo 6:32

ꞌO̱ se nij síí ne neꞌen da̱j vaa Yaꞌanj roꞌ, ina̱nj ꞌyaj suun ndoꞌo nij soꞌ cheꞌé rasu̱u̱n ma̱n rihaan chumii̱ nihánj ado̱nj. Tza̱j ne̱ nu̱ꞌ rasu̱u̱n achiin man soj roꞌ, a̱j neꞌen Rej soj síí nicu̱nꞌ xta̱ꞌ se vaa achiin nu̱ꞌ rasu̱u̱n yoꞌ man soj ado̱nj.

San Lucas 12:30

ꞌO̱ se nij síí ma̱n rihaan chumii̱ nihánj síí ne neꞌen da̱j vaa Yaꞌanj roꞌ, ina̱nj ꞌyaj suun ndoꞌo nij soꞌ cheꞌé rasu̱u̱n ma̱n rihaan chumii̱ nihánj ado̱nj. Tza̱j ne̱ nu̱ꞌ rasu̱u̱n achiin man soj roꞌ, a̱j neꞌen Rej soj Yaꞌanj se vaa achiin rasu̱u̱n yoꞌ man soj ado̱nj.

Hechos 17:23

ꞌO̱ se ga̱a cachenj chumanꞌ ma̱n soj, ne̱ queneꞌén ꞌu̱nj nij rej aráj gue̱e̱ soj rihaan nij yaꞌanj noco̱ꞌ soj, ne̱ queneꞌén ꞌu̱nj ꞌo̱ chraan altar, ne̱ nana̱ no̱ rihaan chraan altar yoꞌ cataj, “Rej aráj gue̱e̱ níꞌ rihaan yaꞌanj ne neꞌen níꞌ man a”, taj nana̱ no̱ rihaan chraan altar yoꞌ a. Ne̱ xa̱ꞌ ꞌu̱nj, tza̱j ne̱ nihánj me se nata̱ꞌ ꞌu̱nj rihaan nij soj cheꞌé maꞌa̱n yaꞌanj yoꞌ yaꞌanj aráj gue̱e̱ soj rihaan, yaꞌanj ne neꞌen soj man na̱nj ado̱nj.

Romanos 1:24

Cheꞌé dan caꞌneꞌ rá Yaꞌanj ga̱ nij soꞌ quiꞌya̱j nij soꞌ me se nij me rá maꞌa̱n nij soꞌ quiꞌya̱j nij soꞌ, ne̱ ina̱nj se nij ndoꞌo quiꞌyaj nij soꞌ na̱nj ado̱nj. Dan me se quiꞌyaj ndoꞌo nij soꞌ rasu̱u̱n naꞌa̱j qui̱j ga̱ nee̱ man maꞌa̱n nij soꞌ do̱ꞌ, ga̱ tuviꞌ nij soꞌ do̱ꞌ,

Romanos 1:26

Cheꞌé dan caꞌneꞌ rá Yaꞌanj ga̱ nij yuvii̱ quiꞌya̱j maꞌa̱n nij yuvii̱ rasu̱u̱n naꞌa̱j qui̱j, ne̱ nij chana̱ me se ne caꞌve̱j rá nij chana̱ coto̱j nij noꞌ ga̱ nica̱ nij noꞌ a̱ maꞌ. ꞌO̱ se naquiꞌyaj taꞌa̱j nij chana̱ sno̱ꞌo man nij chana̱, ne̱ otoj nij noꞌ ga̱ tuviꞌ cha̱na̱ maꞌa̱n nij noꞌ na̱nj ado̱nj.

Romanos 1:28

Ne caꞌve̱j rá nij yuvii̱ queneꞌe̱n nij yuvii̱ da̱j vaa Yaꞌanj a̱ maꞌ. Cheꞌé dan caꞌneꞌ rá Yaꞌanj ga̱ nij yuvii̱, ne̱ navij raa̱ nij yuvii̱ quiriꞌ na̱nj á. Nda̱a síj, ga̱a ne̱ ina̱nj se nij ꞌyaj nij yuvii̱, ne̱ dan me se ꞌyaj nij soꞌ ina̱nj se naꞌvej rá Yaꞌanj quiꞌya̱j nij soꞌ na̱nj ado̱nj.

1 Corintios 1:21

ꞌO̱ se nij síí ma̱n rihaan chumii̱ nihánj roꞌ, ne cavi̱i̱ raa̱ nij soꞌ da̱j vaa Yaꞌanj maꞌ. Tza̱j ne̱ síí cu̱u raa̱ me Yaꞌanj, ne̱ maꞌa̱n Yaꞌanj caráán chrej rihaan nij soꞌ se̱ gaa na̱nj xca̱j nij soꞌ cuentá cheꞌé soꞌ ado̱nj. ꞌO̱ se me rá Yaꞌanj cuno̱ nij yuvii̱ nana̱ aꞌmii natáj núj, ne̱ sese cuno̱ nij yuvii̱, ne̱ ti̱nanii Yaꞌanj man nij yuvii̱ rihaan sayuun, ne̱ dan me se nda̱ꞌ se nana̱ snúú rmaꞌa̱n me nana̱ aꞌmii núj, rá taꞌa̱j nij yuvii̱, tza̱j ne̱ o̱rúnꞌ nana̱ yoꞌ me nana̱ ti̱nanii man yuvii̱ rihaan sayuun na̱nj ado̱nj.

1 Corintios 15:34

No̱ xcúún soj xca̱j naca̱ soj cuentá, ne̱ caꞌne̱ꞌ rá soj ga̱ suun ꞌyaj cacunꞌ á. ꞌO̱ se taꞌa̱j soj me síí ne neꞌen uxrá da̱j vaa Yaꞌanj, raj a̱ maꞌ. ꞌO̱ se vaa cheꞌé gu̱un naꞌa̱j soj chugua̱nj.

Gálatas 4:8

Ga̱a rque̱ me se ne neꞌen ya̱ soj da̱j vaa Yaꞌanj maꞌ. Cheꞌé dan me soj mozó rihaan nij yaꞌanj uun chij rihaan rasu̱u̱n ma̱n rihaan chumii̱ nihánj, tza̱j ne̱ né yaꞌa̱nj ya̱ me nij yaꞌanj yoꞌ maꞌ.

Efesios 2:12

se vaa ga̱a rque̱ roꞌ, né si̱j noco̱ꞌ man Cristó me nij soj maꞌ. ꞌO̱ se si̱j yaníj rihaan núj si̱j israelitá me soj ga̱a naá na̱nj ado̱nj. Dan me se né si̱j no̱ xcúún a̱ ꞌó xcoꞌ canoco̱ꞌ man Yaꞌanj me soj ga̱a rque̱ maꞌ. Ma̱an se si̱j ya̱nj rmaꞌa̱n rihaan chumii̱ me soj na̱nj ado̱nj. Dan me se ya̱ cataꞌ tuꞌva Yaꞌanj cheꞌé núj si̱j israelitá da̱j caꞌve̱e cavi̱i̱ sa̱ꞌ núj, tza̱j ne̱ taj nana̱ cataꞌ tuꞌva Yaꞌanj cheꞌé nij soj ga̱a rque̱ maꞌ. Dan me se a̱j queneꞌen nij soj se vaa se̱ cavii sa̱ꞌ nij soj do̱ꞌ, se̱ racuíj Yaꞌanj man nij soj do̱ꞌ, ga̱a maan ado̱nj. Ma̱an se chéé u̱u̱n nij soj rihaan chumii̱ ga̱a rque̱ na̱nj ado̱nj.

Colosenses 3:5

Cheꞌé se síí noco̱ꞌ man Cristó si̱j ya̱nj rej xta̱ꞌ me soj roꞌ, cheꞌé dan yu̱u̱n cheꞌe̱ caꞌne̱ꞌ rá soj ga̱ suun ꞌyaj me maꞌa̱n se chiꞌi̱i̱ ꞌyaj nij síí noco̱ꞌ se‑chre̱j chumii̱ nihánj á. ꞌO̱ se se chiꞌi̱i̱ yoꞌ roꞌ, me se otoj níꞌ ga̱ ꞌó yuvii̱ sese né ni̱ca̱ níꞌ me yuvii̱ do̱ꞌ, se canique̱ do̱ꞌ, se nij niha̱ꞌ rmaꞌa̱n rá nee̱ man níꞌ quiꞌya̱j níꞌ do̱ꞌ, se chiꞌi̱i̱ me ndoꞌo rá níꞌ quiꞌya̱j níꞌ do̱ꞌ, se ꞌe̱e̱ rá saꞌanj do̱ꞌ a. ꞌO̱ se síí ꞌe̱e̱ rá saꞌanj roꞌ, da̱j se vaa síí aráj gue̱e̱ rihaan yaꞌanj quiꞌyaj yuvii̱ vaa soꞌ na̱nj á.

2 Tesalonicenses 1:8

Ne̱ quiꞌya̱j soꞌ sayuun man nij yuvii̱ ne neꞌen man Yaꞌanj do̱ꞌ, man nij yuvii̱ naꞌvej rá cuno̱ nana̱ sa̱ꞌ cheꞌé Jesús Si̱j ꞌNi̱j Raꞌa man níꞌ do̱ꞌ a.

1 Pedro 4:3

Dan me se ga̱a naá me se ya̱ quiꞌyaj ndoꞌo soj nu̱ꞌ nij rasu̱u̱n nij nda̱a vaa me rá nij síí yaníj chugua̱nj. Dan me se cachéé soj chrej chiꞌi̱i̱ do̱ꞌ, chrej aꞌmii ga̱ chana̱ niha̱ꞌ rá do̱ꞌ, chrej uun xno̱ do̱ꞌ, chrej chiꞌi̱i̱ snúú rmaꞌa̱n do̱ꞌ, ꞌó nij chrej chiꞌi̱i̱ do̱ꞌ, ꞌyaj soj chugua̱nj. Ne̱ caráj gue̱e̱ soj rihaan yaꞌanj quiꞌyaj maꞌa̱n yuvii̱ nda̱a vaa naꞌvej rá Yaꞌanj quiꞌya̱j soj ado̱nj.