1 Pedro 5:5 - Triqui de San Juan Copala

⁵ Da̱nj na̱nj soj si̱j tachru̱u̱, ne̱ cuno̱ soj rihaan nij síí chij, ne̱ ta̱ranꞌ soj me se naquiꞌya̱j nica̱ꞌ soj nimán soj rihaan tuviꞌ soj á. ꞌO̱ se nana̱ nihánj nó rihaan Danj Yaꞌanj, taj yoꞌ a: Aráán Yaꞌanj chrej rihaan nij síí xta̱ꞌ nimán se̱ cavii sa̱ꞌ nij soꞌ, tza̱j ne̱ ꞌyaj Yaꞌanj se lu̱j ga̱ nij síí nica̱ꞌ nimán a, taj nana̱ yoꞌ a.

1 Pedro 5:5 ပူးပေါင်းရင်းမြစ်များ

San Lucas 22:26

Tza̱j ne̱ se̱ guun soj síí vaa da̱nj maꞌ. Ma̱an se tuviꞌ soj síí guun rá se vaa gu̱un chij soꞌ doj rihaan soj roꞌ, vaa cheꞌé gu̱un soꞌ síí noco̱ꞌ doj rihaan soj, ne̱ gu̱un soꞌ ase vaa ꞌo̱ se‑mo̱zó soj a.

Romanos 12:10

Ga̱a̱ ꞌe̱e̱ ndoꞌo rá soj man tinúú soj síí noco̱ꞌ man Cristó, ne̱ gu̱un niha̱ꞌ rá soj cara̱a̱ cochro̱j soj rihaan tinúú soj á.

Romanos 13:14

Se̱ guun rá níꞌ quiꞌya̱j níꞌ nda̱a vaa me rá nee̱ man níꞌ maꞌ. Tana̱nj tu̱cuꞌyón níꞌ nda̱a vaa quiꞌyaj Jesucristó Si̱j ꞌNi̱j Raꞌa man níꞌ, ne̱ ase vaa quiꞌyaj soꞌ roꞌ, da̱nj ga̱a̱ quiꞌya̱j gue̱e̱ níꞌ na̱nj ado̱nj.

Efesios 5:21

Veꞌé quiꞌya̱j cunuda̱nj soj nda̱a vaa me rá tuviꞌ soj cheꞌé se aráj cochro̱j uxrá soj rihaan Cristó á.

Filipenses 2:3

Se̱ guun xco̱j ruva̱a̱ rá soj ni̱ꞌyaj soj tinúú soj maꞌ. Se̱ guun rá soj se vaa cata̱j tinúú soj se vaa sa̱ꞌ uxrá vaa maꞌa̱n soj maꞌ. Tza̱j ne̱ ga̱a̱ nica̱ꞌ nimán soj, cata̱j soj se vaa sa̱ꞌ doj vaa tinúú soj rihaan maꞌa̱n soj á.

Colosenses 3:12

Dan me se narii Yaꞌanj man soj canoco̱ꞌ soj man soꞌ, ne̱ cunuu sa̱ꞌ nimán soj rihaan Yaꞌanj, ne̱ ꞌe̱e̱ rá Yaꞌanj man soj, ne̱ cheꞌé dan cunu̱u ꞌe̱e̱ rá soj tuviꞌ soj chugua̱nj. Dan me se ga̱a̱ sa̱ꞌ nimán soj, ne̱ ga̱a̱ nica̱ꞌ nimán soj, ne̱ se̱ guun yuva̱a̱ soj man tuviꞌ soj maꞌ. Tana̱nj ga̱a̱ ina̱j nimán soj na̱nj á.

1 Timoteo 5:1

Se̱ caxríj yuva̱a̱ so̱ꞌ man nij chii nga̱ maꞌ. Tana̱nj veꞌé caꞌmi̱i̱ so̱ꞌ rihaan nij soꞌ narque̱ so̱ꞌ chrej sa̱ꞌ man nij soꞌ á. Da̱j se aꞌmii so̱ꞌ ga̱ réé so̱ꞌ roꞌ, da̱nj caꞌmi̱i̱ so̱ꞌ ga̱ nij chii nga̱ á. Ase aꞌmii so̱ꞌ ga̱ tinúú so̱ꞌ roꞌ, da̱nj caꞌmi̱i̱ so̱ꞌ ga̱ nij síí tachru̱u̱ uún a.

Hebreos 13:17

Veꞌé cuno̱ soj rihaan nij síí tumé sa̱ꞌ rihaan Yaꞌanj man soj á. ꞌO̱ se síí tumé nimán soj me nij soꞌ, ne̱ vaa güii xna̱ꞌanj Yaꞌanj man nij soꞌ da̱j quiꞌyaj nij soꞌ cheꞌé soj ado̱nj. Ne̱ veꞌé cuno̱ soj, cheꞌé yan gu̱un niha̱ꞌ rá nij soꞌ nago̱ꞌ nij soꞌ cuentá cheꞌé soj chugua̱nj. Ne̱ se̱ rnúj soj rihaan nij síí uun chij maꞌ. ꞌO̱ se sese rnu̱j soj rihaan nij soꞌ, ne̱ se̱ cavii sa̱ꞌ soj maꞌ.

Santiago 4:6

Ne̱ uxrá doj ꞌyaj Yaꞌanj se lu̱j cheꞌé níꞌ, ne̱ cheꞌé dan no̱ nana̱ nihánj rihaan Danj Yaꞌanj a: “Aráán Yaꞌanj chrej rihaan nij síí xta̱ꞌ nimán se̱ cavii sa̱ꞌ nij soꞌ, tza̱j ne̱ ꞌyaj Yaꞌanj se lu̱j cheꞌé nij síí vaa nica̱ꞌ nimán a”, taj Danj Yaꞌanj a.

1 Pedro 3:8

Da̱j ꞌó nana̱ cata̱j xnaꞌanj ꞌu̱nj rihaan soj, ne̱ dan me se cuya̱a̱n ga̱a̱ rá nimán ta̱ranꞌ soj ga̱ tuviꞌ soj, ne̱ dan me se ase ꞌe̱e̱ rá soj tinúú aꞌngaa soj roꞌ, da̱nj ga̱a̱ ꞌe̱e̱ rá soj man tuviꞌ soj ꞌó nij síí noco̱ꞌ man Cristó á. Ra̱cuíj soj man nij síí ranꞌ sayuun, ne̱ ga̱a̱ nica̱ꞌ nimán soj á.

1 Pedro 4:1

Dan me se cheꞌé se quiranꞌ ndoꞌo Cristó sayuun ga̱a me soꞌ yuvii̱ roꞌ, cheꞌé dan no̱ xcúún soj caꞌne̱j nucua̱j soj nimán soj, ga̱a ne̱ caꞌve̱e gu̱un nucua̱j soj rihaan sayuun quira̱nꞌ soj ado̱nj. Neꞌen soj se vaa síí quiranꞌ sayuun nee̱ man maꞌa̱n cheꞌé Yaꞌanj me se daj chiha̱a̱ míj se̱ quiꞌyaj canaán cacunꞌ rihaan soꞌ maꞌ.

1 Pedro 4:5

Tza̱j ne̱ a̱j nicu̱nꞌ chru̱u̱n Cristó caꞌne̱ꞌ soꞌ cacunꞌ cheꞌé nij síí vaa iꞌna̱ꞌ do̱ꞌ, cheꞌé nij síí caviꞌ do̱ꞌ, ne̱ nij síí chiꞌi̱i̱ yoꞌ roꞌ, no̱ xcúún nij soꞌ nago̱ꞌ nij soꞌ cuentá rihaan Cristó cheꞌé nu̱ꞌ nij se chiꞌi̱i̱ quiꞌyaj nij soꞌ ado̱nj.