1 Pedro 4:7 - Triqui de San Juan Copala

⁷ Nichrunꞌ nu̱ꞌ caꞌa̱nj niꞌya̱ chumii̱ na̱nj á. Cheꞌé dan ga̱a̱ chij ina̱nj rá soj, ne̱ ꞌo̱ xca̱j soj cuentá, ga̱a ne̱ caꞌve̱e cachi̱nj niꞌya̱j soj rihaan Yaꞌanj chugua̱nj.

1 Pedro 4:7 ပူးပေါင်းရင်းမြစ်များ

San Mateo 24:42

Cheꞌé dan tu̱mé uxrá soj man soj á. ꞌO̱ se ne neꞌen soj me güii caꞌna̱ꞌ Síí ꞌNi̱j Raꞌa man soj a̱ maꞌ.

San Mateo 25:13

’Cheꞌé dan tu̱mé uxrá nij soj man soj á. ꞌO̱ se ne neꞌen soj me güii caꞌna̱ꞌ ꞌu̱nj ne neꞌen soj me orá caꞌna̱ꞌ ꞌu̱nj ne neꞌen soj maꞌ.

San Lucas 21:34

Ne̱ cataj uún Jesús a: ―Dan me se tu̱mé soj man soj se̱ gaa na̱nj ꞌo̱ nano̱ rá nimán soj cheꞌé se cache̱n ndoꞌo cha̱ soj do̱ꞌ, cheꞌé se gu̱un xno̱ soj do̱ꞌ, cheꞌé nu̱ꞌ sayuun ranꞌ soj rihaan chumii̱ nihánj do̱ꞌ maꞌ. Se quiꞌya̱j soj da̱nj, ta̱dó soj se̱ ta̱j niꞌyo̱n caꞌna̱j, ne̱ se̱ queneꞌen soj caꞌna̱j a.

San Lucas 21:36

Cheꞌé dan ꞌo̱ ni̱ꞌyaj soj, ne̱ xca̱j soj cuentá da̱j a̱ güii, ne̱ ina̱nj cachi̱nj niꞌya̱j soj rihaan Yaꞌanj se vaa caꞌve̱e nani̱i̱ soj rihaan nu̱ꞌ sayuun nihánj asa̱ꞌ gu̱un da̱nj rihaan chumii̱ nihánj a. Ga̱a ne̱ caꞌve̱e canicu̱nꞌ soj rihaan ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ á ―taj Jesús a.

San Lucas 22:46

Ga̱a ne̱ cataj Jesús rihaan nij soꞌ a: ―Me cheꞌé otoj soj ga̱. Na̱xuma̱a̱n soj cachi̱nj niꞌya̱j soj rihaan Yaꞌanj se̱ gaa na̱nj gu̱un rá soj quiꞌya̱j soj cacunꞌ quiꞌya̱j Síí Chre̱e á ―taj soꞌ rihaan nij síí tucuꞌyón snana̱ soꞌ a.

Romanos 12:12

Cheꞌé se uun ya̱ rá soj se vaa vaa güii cavi̱i̱ sa̱ꞌ ndoꞌo soj, quiꞌya̱j Yaꞌanj, ne̱ cheꞌé dan ga̱a̱ niha̱ꞌ uxrá rá nimán soj á. Caꞌne̱j nucuaj soj nimán soj ga̱a ranꞌ soj sayuun, ne̱ se̱ caꞌneꞌ rá soj ga̱ suun achíín niꞌya̱j rihaan Yaꞌanj maꞌ.

1 Corintios 15:24

Síj ga̱a ne̱ navi̱j nu̱ꞌ rasu̱u̱n a. ꞌO̱ se caꞌne̱e̱ Cristó suun ata̱ nu̱ꞌ nij síí rii taꞌngaꞌ do̱ꞌ, nu̱ꞌ nij síí nica̱j suun do̱ꞌ, nu̱ꞌ nij síí nucua̱j do̱ꞌ, ne̱ nago̱ꞌ soꞌ nu̱ꞌ suun rihaan Rej níꞌ Yaꞌanj a.

1 Corintios 7:29

Dan me se me raj cuno̱ soj ꞌo̱ nana̱, tinu̱j, nocoj: Nichrunꞌ quisi̱j tiempó nihánj, ne̱ cheꞌé dan me se̱ nica̱j xraan níꞌ man rasu̱u̱n ma̱n rihaan chumii̱ nihánj maꞌ. Dan me se síí vaa nica̱ roꞌ, ase vaa síí ya̱a̱n roꞌ, da̱nj ga̱a̱ soꞌ ca̱yáán soꞌ á.

Efesios 6:18

Ne̱ niga̱nj cachi̱nj niꞌya̱j uxrá soj rihaan Yaꞌanj, ne̱ ra̱cuíj Nimán Yaꞌanj man soj nacu̱nj soj ne̱ cachi̱nj niꞌya̱j soj ado̱nj. Se̱ caꞌneꞌ rá soj maꞌ. Tana̱nj ꞌo̱ cachi̱nj niꞌya̱j uxrá soj cheꞌé ta̱ranꞌ nij síí noco̱ꞌ man Cristó na̱nj á.

Filipenses 4:5

Ina̱nj niꞌya̱nj caꞌmi̱i̱ soj rihaan cunuda̱nj yuvii̱ ma̱n rihaan chumii̱ nihánj, ne̱ xca̱j nij yuvii̱ cuentá se vaa síí sa̱ꞌ me soj á. Nichrunꞌ caꞌna̱ꞌ uún Síí ꞌNi̱j Raꞌa man níꞌ na̱nj ado̱nj.

Colosenses 4:2

Dan me se se̱ caꞌneꞌ rá soj ga̱ suun cachi̱nj niꞌya̱j rihaan Yaꞌanj maꞌ. Ne̱ ta̱dó soj cuma̱n soj, ne̱ niga̱nj cata̱j soj guun niꞌya̱j níꞌ rihaan Yaꞌanj á.

2 Timoteo 4:5

Tza̱j ne̱ so̱ꞌ me se caꞌne̱j sa̱ꞌ ina̱nj so̱ꞌ tucuáán sa̱ꞌ, ne̱ ga̱a̱ ina̱j nimán so̱ꞌ ga̱a ránꞌ so̱ꞌ sayuun, ne̱ ꞌo̱ qui̱ꞌyáá so̱ꞌ suun caꞌmi̱i̱ natáj so̱ꞌ nana̱ sa̱ꞌ cheꞌé Cristó rihaan nij síí ataa cuchuma̱n rá na̱nj á. Dan me se quiꞌyáá so̱ꞌ nu̱ꞌ suun caꞌneꞌ Yaꞌanj rihaan so̱ꞌ á.

Tito 2:12

ne̱ cheꞌé dan xcaj níꞌ cuentá se vaa no̱ xcúún níꞌ caꞌne̱ꞌ rá níꞌ ga̱ rasu̱u̱n naꞌvej rá Yaꞌanj quiꞌya̱j níꞌ a. Ne̱ se̱ quiꞌyaj níꞌ ina̱nj se vaa me rá nij síí noco̱ꞌ se‑chre̱j chumii̱ nihánj quiꞌya̱j nij soꞌ maꞌ. Xca̱j níꞌ cuentá da̱j quiꞌya̱j níꞌ, ne̱ tucuáán nica̱ quiꞌya̱j níꞌ, ne̱ quiꞌya̱j níꞌ ina̱nj se vaa me rá Yaꞌanj quiꞌya̱j níꞌ ya̱j ga̱a yáán níꞌ rihaan chumii̱ nihánj cuano̱ á.

Hebreos 10:25

Ne̱ se̱ tanáj níꞌ tucuáán nuu chre̱ꞌ níꞌ ga̱ tinúú níꞌ maꞌ. ꞌO̱ se vaa yuvii̱ ne nocoꞌ tucuáán yoꞌ, tza̱j ne̱ no̱ xcúún soj nago̱ꞌ soj chrej nucua̱j man tinúú soj ga̱a nuu chre̱ꞌ soj á. Ne̱ ya̱j roꞌ, doj a̱ cunu̱u chre̱ꞌ soj, cheꞌé se neꞌen soj se vaa nichrunꞌ quisi̱j güii caꞌna̱ꞌ uún Cristó rihaan chumii̱ nihánj na̱nj ado̱nj.

Hebreos 9:26

ꞌO̱ se sese vaa cheꞌé quiꞌya̱j soꞌ da̱nj, ne̱ no̱ xcúún soꞌ queꞌe̱e̱ ndoꞌo quira̱nꞌ soꞌ sayuun asi̱j ga̱a quiꞌyaj Yaꞌanj chumii̱ nihánj nda̱a cuano̱ ado̱nj. Tza̱j ne̱ ya̱j roꞌ, nichrunꞌ navi̱j chumii̱ nihánj, ne̱ nda̱a ya̱j caꞌnaꞌ Cristó rihaan chumii̱ nihánj, ne̱ o̱rúnꞌ yu̱u̱n caviꞌ soꞌ cheꞌé níꞌ, ne̱ navij nu̱ꞌ cacunꞌ tumé níꞌ na̱nj ado̱nj.

1 Pedro 1:13

Cheꞌé dan ꞌo̱ caꞌne̱j nimán soj quiꞌya̱j soj nda̱a vaa me rá Yaꞌanj na̱nj á. Ga̱a̱ chij rá soj ga̱ tuviꞌ soj, ne̱ ꞌo̱ ga̱a̱ nucua̱j rá soj man Yaꞌanj se vaa quiꞌya̱j ndoꞌo soꞌ se lu̱j cheꞌé soj asa̱ꞌ curuviꞌ uún Jesucristó á.

1 Pedro 3:7

Ne̱ vaa soj sno̱ꞌo uún, ne̱ xca̱j soj cuentá ne̱ veꞌé tu̱mé soj man nica̱ soj, ne̱ veꞌé ca̱yáán soj ga̱ noꞌ á. Xca̱j soj cuentá se vaa nucua̱j soj doj rihaan noꞌ, ne̱ cheꞌé dan veꞌé quiꞌya̱j soj ga̱ noꞌ á. Ne̱ xca̱j soj cuentá se vaa ꞌo̱ cuya̱a̱n ca̱yáán chana̱ rihaan Yaꞌanj nu̱ꞌ cavii nu̱ꞌ caꞌanj a. Sese veꞌé quiꞌya̱j soj, ne̱ taj a̱ doj se̱ caráán chrej rihaan soj se vaa quiꞌya̱j Yaꞌanj nda̱a vaa achíín niꞌya̱j soj rihaan soꞌ maꞌ.

1 Pedro 5:8

Ga̱a̱ sca̱ꞌ rá soj, ne̱ tu̱mé soj man soj da̱j quiꞌya̱j soj á. ꞌO̱ se vaa síí ta̱j riꞌyunj niꞌya̱j man soj, ne̱ Síí Chre̱e me soꞌ, ne̱ ase ꞌyaj chuvaa̱ aguáj chéé nanoꞌ xcuu cha̱ roꞌ, da̱nj ꞌyaj Síí Chre̱e, chéé soꞌ nanoꞌ soꞌ man síí caꞌve̱e tiri̱ꞌ soꞌ man chugua̱nj.

Apocalipsis 16:15

Ne̱ nihánj me snana̱ Síí ꞌNi̱j Raꞌa man níꞌ a: “Dan me se ase vaa ꞌnaꞌ yuve̱ síí itu̱u̱ roꞌ, da̱nj ga̱a̱ cuchi̱ꞌ ꞌu̱nj rihaan soj ado̱nj. Ne̱ cavi̱i̱ sa̱ꞌ síí ne otoj, ne̱ niꞌya̱j ranga̱ꞌ nij soꞌ, ne̱ tumé sa̱ꞌ nij soꞌ saga̱nꞌ nij soꞌ yatzéj catzi̱i̱ ado̱nj. Dan me se se̱ gaa ca̱nj nij soꞌ cache̱e̱ nij soꞌ, ne̱ se̱ cunó chrej naꞌa̱j rihaan nij soꞌ ni̱ꞌyaj yuvii̱ man nij soꞌ maꞌ.” Da̱nj taj Síí ꞌNi̱j Raꞌa man níꞌ niꞌya̱j soꞌ man nij síí ne tumé cacunꞌ a.