1 Pedro 4:13 - Triqui de San Juan Copala

¹³ Ma̱an se gu̱un niha̱ꞌ rá nimán soj cheꞌé se ase quiranꞌ Cristó sayuun roꞌ, da̱nj vaa ranꞌ gue̱e̱ soj ga̱ soꞌ, ga̱a ne̱ caꞌve̱e gu̱un niha̱ꞌ doj rá nimán soj güii caꞌna̱ꞌ uún soꞌ rihaan chumii̱ nihánj, cheꞌé se niꞌndaj ya̱ sa̱ꞌ veꞌé ga̱a̱ soꞌ curuvi̱ꞌ soꞌ na̱nj ado̱nj.

1 Pedro 4:13 ပူးပေါင်းရင်းမြစ်များ

San Mateo 16:27

’ꞌO̱ se ya̱ ya̱ caꞌna̱ꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, ne̱ niꞌndaj ya̱ sa̱ꞌ veꞌé ga̱a̱ ꞌu̱nj, quiꞌya̱j Réé ꞌu̱nj, ne̱ caꞌna̱ꞌ nij se‑mo̱zó soꞌ ga̱ ꞌu̱nj na̱nj ado̱nj. Ga̱a ne̱ na̱ruꞌvee ꞌu̱nj rihaan ꞌo̱ ꞌo̱ soꞌ cheꞌé se vaa quiꞌyaj ꞌo̱ ꞌo̱ soꞌ na̱nj ado̱nj.

San Mateo 25:21

Ne̱ cataj ruꞌvee yoꞌ rihaan se‑mo̱zó soꞌ a: “Cuna̱j uxrá vaa quiꞌyáá so̱ꞌ chugua̱nj. Mozó sa̱ꞌ mé so̱ꞌ, ne̱ ga̱a̱ nucua̱j raj mán so̱ꞌ ado̱nj. Veꞌé tumé so̱ꞌ man do̱j siꞌyáj á. Cheꞌé dan, ne̱ ya̱j ca̱yáán so̱ꞌ tu̱mé so̱ꞌ noco̱o doj siꞌyáj á. Caꞌna̱ꞌ so̱ꞌ ca̱yáán so̱ꞌ ga̱ ꞌu̱nj, ne̱ veꞌé ca̱yáán níꞌ na̱nj á”, taj soꞌ rihaan se‑mo̱zó soꞌ a.

San Mateo 25:23

Ne̱ cataj ruꞌvee yoꞌ rihaan soꞌ a: “Cuna̱j uxrá vaa quiꞌyáá so̱ꞌ chugua̱nj. Mozó sa̱ꞌ mé so̱ꞌ uún, ne̱ ga̱a̱ nucua̱j raj mán so̱ꞌ uún ado̱nj. Veꞌé tumé so̱ꞌ man do̱j siꞌyáj, ne̱ cheꞌé dan ya̱j ca̱yáán so̱ꞌ tu̱mé so̱ꞌ noco̱o doj siꞌyáj ya̱ ado̱nj. Caꞌna̱ꞌ so̱ꞌ, ca̱yáán so̱ꞌ ga̱ ꞌu̱nj, ne̱ veꞌé ca̱yáán níꞌ na̱nj á”, taj ruꞌvee yoꞌ rihaan ꞌó se‑mo̱zó soꞌ a.

San Mateo 25:31

’Asa̱ꞌ caꞌnaꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj, ne̱ niꞌndaj ya̱ sa̱ꞌ veꞌé ga̱a̱ caꞌna̱ꞌ ꞌu̱nj, ne̱ caꞌna̱ꞌ cunuda̱nj nij se‑mo̱zó ꞌu̱nj nij síí gue̱e̱ a. Ne̱ asa̱ꞌ caꞌnáꞌ ꞌu̱nj, ne̱ quita̱j ꞌu̱nj rihaan xrúún ꞌu̱nj chruun xlá niꞌndaj ya̱ veꞌé vaa, ne̱ caꞌne̱ꞌ ꞌu̱nj cacunꞌ cheꞌé yuvii̱ ado̱nj.

San Mateo 25:34

’Ne̱ guún ꞌu̱nj síí nica̱j suun rey, quiri̱i̱ taꞌngáꞌ ꞌu̱nj rihaan nij soꞌ, ne̱ dan me se caꞌmi̱i̱ ꞌu̱nj rihaan nij síí nicu̱nꞌ rej nuva̱ꞌ ꞌu̱nj, cata̱j ꞌu̱nj a: “Caꞌna̱ꞌ soj si̱j ꞌyaj Réé ꞌu̱nj se lu̱j rihaan á. Ni̱caj soj rej sa̱ꞌ ndoꞌo ca̱yáán soj rej quiꞌyaj chuvi̱i Réé ꞌu̱nj asi̱j güii quiꞌyaj soꞌ chumii̱ á.

San Mateo 5:12

Ga̱a ne̱ no̱ xcúún soj gu̱un niha̱ꞌ uxrá rá nimán soj, cheꞌé se quiꞌya̱j uxrá Yaꞌanj se sa̱ꞌ ga̱ soj asa̱ꞌ nucuiꞌ soj rej xta̱ꞌ ado̱nj. ꞌO̱ se ase vaa ꞌyaj nii sayuun man soj roꞌ, taꞌngaꞌ da̱nj quiꞌyaj nii sayuun man nij síí nataꞌ snana̱ Yaꞌanj rihaan yuvii̱ ga̱a naá uún ado̱nj.

San Marcos 8:38

’Dan me se xa̱ꞌ síí uun naꞌa̱j niꞌya̱j manj ga̱ snana̱j ga̱a yáán soꞌ scaꞌnúj nij síí ma̱n rihaan chumii̱ nihánj cuano̱ se vaa síí ne nocoꞌ man Yaꞌanj do̱ꞌ, síí ꞌyaj se chiꞌi̱i̱ do̱ꞌ, me nij soꞌ roꞌ, vaa güii gu̱un naꞌa̱j ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ ni̱ꞌyaj ꞌu̱nj man soꞌ asa̱ꞌ caꞌnaꞌ uún ꞌu̱nj a. Ne̱ güii caꞌna̱ꞌ ꞌu̱nj me se niꞌndaj ya̱ sa̱ꞌ veꞌé gu̱un chij ꞌu̱nj da̱j se vaa uun chij Réé ꞌu̱nj Yaꞌanj, ne̱ caꞌna̱ꞌ nij se‑mo̱zó Yaꞌanj síí gue̱e̱ ga̱ ꞌu̱nj, ado̱nj ―taj Jesús a.

San Lucas 17:30

Ne̱ ase vaa ne xca̱j nij yuvii̱ ma̱n ga̱a naá cuentá se vaa quira̱nꞌ nij soꞌ sayuun roꞌ, da̱nj ga̱a̱ uún yuvii̱ asa̱ꞌ quisíj caꞌna̱ꞌ uún ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ rihaan chumii̱ nihánj ado̱nj.

Hechos 16:25

Dan me se rej nii̱ ya̱nꞌ achíín niꞌya̱j ndoꞌo Pabló ga̱ Silas ne̱ achráá ro̱j soꞌ chraꞌ rihaan Yaꞌanj, ne̱ uno nij síí ma̱n tagaꞌ se vaa ꞌyaj ro̱j soꞌ a.

Hechos 5:41

Dan me se curiha̱nj nij síí cuneꞌ Jesús rej nuu chre̱ꞌ xꞌneꞌ nij síí ata̱ suun noco̱o doj rihaan nij yuvii̱ israelitá a. Ne̱ guun niha̱ꞌ uxrá rá nimán nij síí cuneꞌ Jesús cheꞌé se si̱j vaa sa̱ꞌ me nij soꞌ niꞌya̱j Yaꞌanj ne̱ cheꞌé dan caꞌvee quiranꞌ nij soꞌ sayuun cheꞌé se‑chuvi̱i Jesús a.

Romanos 5:3

Ne̱ vaa cheꞌé gu̱un niha̱ꞌ rá níꞌ cheꞌé sayuun ranꞌ níꞌ, ne̱ neꞌen níꞌ se vaa cheꞌé sayuun ranꞌ níꞌ me se nariꞌ nucuaj doj nimán níꞌ,

Romanos 8:17

Cheꞌé dan vaa güii rque̱ ndoꞌo Yaꞌanj se sa̱ꞌ rihaan níꞌ ga̱ Cristó, ne̱ ꞌo̱ cuya̱a̱n ga̱a̱ se sa̱ꞌ rihaan Cristó ga̱ níꞌ a. Veé dan me cheꞌé se ranꞌ níꞌ sayuun nda̱a vaa quiranꞌ Cristó roꞌ, cheꞌé dan cavi̱i̱ sa̱ꞌ níꞌ ga̱ soꞌ, ne̱ niꞌndaj ya̱ veꞌé ga̱a̱ níꞌ ga̱ soꞌ vaa güii ado̱nj.

Romanos 8:18

Veé dan me se ranꞌ xa̱ꞌ níꞌ sayuun cuano̱, tza̱j ne̱ vaa güii, ne̱ cavi̱i̱ sa̱ꞌ uxrá níꞌ doj rihaan sayuun ranꞌ níꞌ cuano̱ ado̱nj. ꞌO̱ se ataa ti̱haa̱n Yaꞌanj rihaan níꞌ se vaa niꞌndaj ya̱ veꞌé ga̱a̱ níꞌ, quiꞌya̱j Yaꞌanj na̱nj chugua̱nj. Da̱nj vaa raj na̱nj á.

2 Corintios 1:5

Dan me se nda̱ꞌ rá se vaa quiranꞌ uxrá Cristó sayuun roꞌ, da̱nj vaa ꞌnaꞌ uxrá sayuun xráá núj, ne̱ cheꞌé dan cunuu ꞌe̱e̱ uxrá rá Cristó man núj cheꞌé sayuun ranꞌ núj ado̱nj. Cheꞌé dan nariꞌ nucuaj rá núj cheꞌé Cristó, ꞌyaj Yaꞌanj a.

2 Corintios 1:7

Dan me se ꞌo̱ nucua̱j ya̱ rá núj niꞌya̱j núj man soj cheꞌé se vaa ranꞌ soj na̱nj á. ꞌO̱ se nda̱ꞌ rá se vaa ꞌnaꞌ sayuun xráá soj roꞌ, veé da̱nj vaa aꞌnéé Yaꞌanj se nucua̱j nimán soj uún chugua̱nj. Ase vaa ranꞌ núj sayuun roꞌ, da̱nj vaa ranꞌ gue̱e̱ soj sayuun, ne̱ ase vaa nariꞌ nucuaj rá núj ꞌyaj Yaꞌanj roꞌ, da̱nj vaa nariꞌ nucuaj rá soj ꞌyaj uún Yaꞌanj a.

2 Corintios 4:10

Niga̱nj neꞌen ya̱ núj se vaa ase guun rá nii ga̱a ticaviꞌ nii man Jesús roꞌ, veé da̱nj me rá nii ticavi̱ꞌ nii man núj ado̱nj. Cheꞌé se ne cavi̱ꞌ núj, ga̱a ne̱ caráyaꞌa̱nj uxrá nij yuvii̱ ado̱nj. Ne̱ xca̱j nij yuvii̱ cuentá se vaa vaa iꞌna̱ꞌ núj cheꞌé se ya̱nj Jesús nimán núj ne̱ tumé soꞌ man núj ado̱nj.

2 Corintios 4:17

Cuano̱ ya̱j me se vaa do̱j sayuun ranꞌ núj, tza̱j ne̱ raꞌya̱nj cache̱n nu̱ꞌ sayuun yoꞌ, ne̱ cheꞌé sayuun roꞌ, cavi̱i̱ sa̱ꞌ uxrá núj nu̱ꞌ cavii nu̱ꞌ caꞌanj na̱nj á.

Filipenses 3:10

Ina̱nj me rá ꞌu̱nj doj a̱ doj a̱ sa̱ꞌ doj que̱neꞌén ꞌu̱nj man Cristó á. Dan me se nucua̱j Yaꞌanj, ne̱ cunuu iꞌna̱ꞌ uún Cristó ga̱a caviꞌ soꞌ, quiꞌyaj Yaꞌanj, ne̱ cheꞌé dan me ndoꞌo raj que̱neꞌenj da̱j quiꞌya̱j Yaꞌanj nimán ꞌu̱nj a. Ne̱ ase vaa quiranꞌ Cristó sayuun roꞌ, da̱nj ga̱a̱ quira̱nꞌ ma̱ꞌán ꞌu̱nj sayuun ga̱ soꞌ, raj, ne̱ ase vaa caꞌvej rá Cristó cavi̱ꞌ soꞌ cheꞌé níꞌ roꞌ, da̱nj ga̱a̱ ꞌu̱nj, raj ado̱nj.

Colosenses 1:24

A̱j quiránꞌ ꞌu̱nj sayuun cheꞌé nij soj, ne̱ nihánj me guun niha̱ꞌ raj cheꞌé sayuun ránꞌ ꞌu̱nj á. Dan me se ase vaa sayuun quiranꞌ Cristó cheꞌé nij síí noco̱ꞌ man soꞌ roꞌ, da̱nj vaa sayuun ranꞌ ma̱ꞌán ꞌu̱nj cheꞌé xꞌneꞌ yuvii̱ noco̱ꞌ man soꞌ a.

2 Timoteo 2:12

Sese se̱ cunánj níꞌ rihaan sayuun, ga̱a ne̱ gu̱un chij níꞌ ga̱ soꞌ uún a. Sese cata̱j níꞌ se vaa né si̱j noco̱ꞌ man soꞌ me níꞌ, ne̱ cata̱j soꞌ se vaa né tuvi̱ꞌ soꞌ me níꞌ uún a.

1 Pedro 1:13

Cheꞌé dan ꞌo̱ caꞌne̱j nimán soj quiꞌya̱j soj nda̱a vaa me rá Yaꞌanj na̱nj á. Ga̱a̱ chij rá soj ga̱ tuviꞌ soj, ne̱ ꞌo̱ ga̱a̱ nucua̱j rá soj man Yaꞌanj se vaa quiꞌya̱j ndoꞌo soꞌ se lu̱j cheꞌé soj asa̱ꞌ curuviꞌ uún Jesucristó á.

1 Pedro 2:21

ꞌO̱ se canacúún Yaꞌanj man níꞌ canoco̱ꞌ níꞌ man soꞌ ne̱ quira̱nꞌ níꞌ sayuun ado̱nj. Xa̱ꞌ Cristó, tza̱j ne̱ quiranꞌ soꞌ sayuun cheꞌé níꞌ, ne̱ caꞌneꞌ sa̱ꞌ gue̱e̱ rá soꞌ ga̱a quiranꞌ soꞌ da̱nj ado̱nj. Dan me se nda̱a rá se vaa caꞌneꞌ rá Cristó ga̱a quiranꞌ soꞌ sayuun cheꞌé níꞌ roꞌ, da̱nj ga̱a̱ gue̱e̱ caꞌne̱ꞌ rá níꞌ quira̱nꞌ níꞌ sayuun, rá soꞌ ado̱nj.

1 Pedro 5:1

Rihaan soj si̱j tumé sa̱ꞌ rihaan Yaꞌanj man nij síí noco̱ꞌ man Cristó ma̱n da̱j a̱ chumanꞌ caꞌmi̱i̱ nu̱cuáj cuano̱ a. ꞌO̱ se síí tumé sa̱ꞌ rihaan Yaꞌanj man yuvii̱ mé ꞌu̱nj ga̱ soj, ne̱ síí queneꞌen sayuun se vaa quiranꞌ Cristó mé ꞌu̱nj, ne̱ dan me se veꞌé gu̱un chij ꞌu̱nj ga̱ Cristó asa̱ꞌ curuviꞌ uún soꞌ rihaan chumii̱ nihánj, raj a.

1 Pedro 5:10

Dan me se Yaꞌanj roꞌ, me síí ꞌyaj da̱j a̱ se lu̱j cheꞌé soj, ne̱ soꞌ me síí canacúún man soj cavi̱i̱ sa̱ꞌ uxrá soj ga̱ soꞌ nu̱ꞌ cavii nu̱ꞌ caꞌanj cheꞌé Cristó ado̱nj. Asa̱ꞌ quisíj quiranꞌ soj sayuun do̱j güii rihaan chumii̱ nihánj, ga̱a ne̱ naquiꞌya̱j sa̱ꞌ Yaꞌanj man soj, ne̱ naquiꞌya̱j sca̱ꞌ soꞌ man soj, ne̱ ga̱a̱ nucua̱j ina̱nj rá soj, quiꞌya̱j soꞌ, ne̱ cune̱ꞌ sa̱ꞌ soꞌ man soj ado̱nj.

Judas 1:24

Cara̱a̱ cochro̱j soj rihaan síí uun nucua̱j ca̱ráán rihaan soj se̱ quiꞌyaj soj cacunꞌ do̱ꞌ, síí uun nucua̱j tu̱mé man soj nda̱a güii ca̱yáán soj rihaan soꞌ rej niꞌndaj ya̱ veꞌé vaa do̱ꞌ á. Rej yoꞌ me se ga̱a̱ nica̱ nimán soj, ne̱ ga̱a̱ niha̱ꞌ uxrá rá nimán soj ado̱nj.

Apocalipsis 1:7

Ni̱ꞌyaj soj se vaa ꞌnaꞌ soꞌ xráá ngaa, ne̱ queneꞌe̱n cunuda̱nj nij yuvii̱ man soꞌ, ne̱ nda̱a nij síí choꞌoj chruun siha̱a̱ raa̱ xꞌnúú soꞌ queneꞌe̱n man soꞌ, ne̱ go̱ꞌ cunuda̱nj nij xꞌneꞌ yuvii̱ ma̱n rihaan chumii̱ cuxruꞌ nimán nij soꞌ, cheꞌé se nano̱ ndoꞌo rá nij soꞌ cheꞌé cacunꞌ tumé nij soꞌ ado̱nj. Veé da̱nj ga̱a̱ ya̱ ado̱nj.

Apocalipsis 1:9

ꞌU̱nj si̱j cuꞌna̱j Juan roꞌ, tinúú soj mé ꞌu̱nj, ne̱ cheꞌé se nuu rcuꞌa̱a̱n níꞌ ga̱ Jesús roꞌ, síí ranꞌ sayuun ga̱ soj mé ꞌu̱nj, ne̱ síí uun chij Yaꞌanj rihaan mej ga̱ soj, ne̱ síí nucua̱j nimán rihaan sayuun mej ga̱ soj ado̱nj. Dan me se yáán ꞌu̱nj yoꞌóó ta̱j rihaan na yaꞌa̱nj yoꞌóó cuꞌna̱j Patmos, ne̱ yoꞌ me rej caꞌnéé nii manj cheꞌé se si̱j nataꞌ snana̱ Yaꞌanj mej ne̱ si̱j taj xnaꞌanj nana̱ cheꞌé Jesús mej a.