1 Pedro 4:11 - Triqui de San Juan Copala

¹¹ Sese caꞌmi̱i̱ natáj ꞌo̱ tuviꞌ soj, ne̱ ꞌo̱ cu̱nuû rá soꞌ se vaa snana̱ Yaꞌanj me nij nana̱ aꞌmii natáj soꞌ á. Sese ra̱cuíj ꞌo̱ tuviꞌ soj man soj, ne̱ quiꞌya̱j soꞌ nu̱ꞌ nda̱a vaa gu̱un nucua̱j soꞌ quiꞌya̱j soꞌ quiꞌya̱j Yaꞌanj á. Ga̱a ne̱ caꞌve̱e caꞌmi̱i̱ sa̱ꞌ yuvii̱ cheꞌé Yaꞌanj ni̱ꞌyaj nij yuvii̱ man soj si̱j noco̱ꞌ man Cristó chugua̱nj. Ne̱ Yaꞌanj me se nu̱ꞌ cavii nu̱ꞌ caꞌanj veꞌé uxrá caꞌmi̱i̱ níꞌ cheꞌé soꞌ, ne̱ gu̱un chij ndoꞌo soꞌ ado̱nj. Veé da̱nj ga̱a̱ ya̱ ado̱nj.

1 Pedro 4:11 ပူးပေါင်းရင်းမြစ်များ

San Mateo 6:13

Ca̱ráán raꞌá so̱ꞌ xráá núj rihaan chrej chiꞌi̱i̱, ne̱ ti̱nanii so̱ꞌ man núj se̱ quiꞌyaj núj cacunꞌ, quiꞌya̱j Síí Chre̱e maꞌ. Ina̱nj da̱nj caꞌmi̱i̱ soj cachi̱nj niꞌya̱j soj rihaan Yaꞌanj ado̱nj.

San Juan 13:31

Cheꞌé dan ga̱a quisíj curiha̱nj Judas, ne̱ cataj Jesús rihaan ꞌó da̱nj nij soꞌ a: ―Da̱j doj queneꞌe̱n yuvii̱ se vaa niꞌndaj ya̱ sa̱ꞌ veꞌé vaa ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, ne̱ cheꞌé dan queneꞌe̱n nij yuvii̱ se vaa niꞌndaj ya̱ sa̱ꞌ veꞌé vaa maꞌa̱n Yaꞌanj ado̱nj.

Hechos 7:38

’Ne̱ Moisés me síí va̱j ga̱ cunuda̱nj nij yuvii̱ israelitá rej tacaan, ne̱ va̱j soꞌ ga̱ síí caꞌnéé Yaꞌanj síí nataꞌ rihaan soꞌ rej quij cuꞌna̱j Sinaí a. Va̱j soꞌ ga̱ nij xi̱i níꞌ, ne̱ cuno soꞌ nana̱ ꞌyaj vaa iꞌna̱ꞌ nimán níꞌ, cheꞌé rej ta̱cuachén soꞌ nana̱ yoꞌ nda̱a rihaan níꞌ a.

Romanos 11:36

Dan me se maꞌa̱n Yaꞌanj quiꞌyaj cunuda̱nj rasu̱u̱n, ne̱ cheꞌé maꞌa̱n Yaꞌanj mán rasu̱u̱n rihaan chumii̱, ne̱ se rásuun Yaꞌanj me cunuda̱nj rasu̱u̱n a. Veꞌé uxrá caꞌmi̱i̱ cunuda̱nj yuvii̱ cheꞌé Yaꞌanj nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj.

Romanos 12:3

Dan me se quiꞌyaj Yaꞌanj se lu̱j ga̱ ꞌu̱nj, caꞌneꞌ Yaꞌanj suun rihanj tu̱cuꞌyonj man nij soj, ne̱ cheꞌé dan cata̱j xnaꞌanj ꞌu̱nj rihaan ꞌo̱ ꞌo̱ soj da̱j quiꞌya̱j soj se‑su̱u̱n Yaꞌanj á. Dan me se ino̱ ga̱a̱ suun quiꞌya̱j ꞌo̱ ꞌo̱ soj rihaan Yaꞌanj, ne̱ ra̱cuíj Yaꞌanj man soj se vaa gu̱un ya̱ rá ꞌo̱ ꞌo̱ soj me suun gu̱un nucua̱j soj quiꞌya̱j soj rihaan Yaꞌanj a. Tza̱j ne̱ se̱ guun rá soj ca̱ta̱ soj suun noco̱o doj maꞌ. Ma̱an se xca̱j soj cuentá, ne̱ cata̱j soj se vaa sa̱ꞌ vaa suun vaa rihaan soj na̱nj á.

Romanos 16:27

Ne̱ Yaꞌanj me se o̱rúnꞌ Yaꞌanj, ne̱ raa̱ o̱rúnꞌ soꞌ avii cunuda̱nj nana̱ cu̱u sa̱ꞌ a. Sa̱ꞌ uxrá quiꞌyaj Jesucristó cheꞌé níꞌ, ne̱ cheꞌé dan niꞌndaj ya̱ sa̱ꞌ veꞌé vaa Yaꞌanj cata̱j níꞌ nu̱ꞌ cavii nu̱ꞌ caꞌanj a. Veé da̱nj ga̱a̱ ya̱ ado̱nj.

Romanos 3:2

ꞌO̱ se vaa se uun ya̱ nij síí israelitá a. Dan me se asino cataj xnaꞌanj Yaꞌanj nu̱ꞌ snana̱ Yaꞌanj rihaan xi̱i nij soꞌ ga̱a naá, ne̱ nucua̱j rá Yaꞌanj man nij soꞌ se vaa tu̱mé sa̱ꞌ nij soꞌ snana̱ soꞌ, ne̱ se̱ niꞌyón nij soꞌ man yoꞌ, rá Yaꞌanj a.

1 Corintios 10:31

Dan me se nu̱ꞌ se cha̱ soj do̱ꞌ, nu̱ꞌ se coꞌo̱ soj do̱ꞌ, na̱j guun se quiꞌya̱j soj do̱ꞌ, ina̱nj cheꞌé Yaꞌanj quiꞌya̱j soj cunuda̱nj nij rasu̱u̱n yoꞌ, ga̱a ne̱ veꞌé doj caꞌmi̱i̱ yuvii̱ cheꞌé Yaꞌanj, quiꞌya̱j soj chugua̱nj.

1 Corintios 12:4

Dan me se ino̱ vaa ꞌo̱ ꞌo̱ suun sa̱ꞌ rqué Nimán Yaꞌanj man ꞌo̱ ꞌo̱ níꞌ nica̱j níꞌ chugua̱nj. Tza̱j ne̱ o̱rúnꞌ Nimán Yaꞌanj me síí rqué man ꞌo̱ ꞌo̱ suun sa̱ꞌ yoꞌ na̱nj ado̱nj.

1 Corintios 3:10

Dan me se ase vaa síí veꞌé uchruj taꞌngaꞌ chihón ca̱yáán tacóó veꞌ roꞌ, vaa ꞌu̱nj, ne̱ veꞌé cuchruj ꞌu̱nj tucuáán canocoꞌ soj, cheꞌé se lu̱j quiꞌyaj Yaꞌanj ga̱ ꞌu̱nj, cheꞌé se caꞌneꞌ Yaꞌanj suun yoꞌ rihanj a. Ne̱ cuano̱ roꞌ, ꞌyaj suun ꞌó soꞌ racuíj soꞌ man soj, ne̱ da̱j se ꞌyaj síí utaꞌ doj yahij xráá tacóó veꞌ roꞌ, vaa soꞌ a. Dan me se, da̱j se no̱ xcúún ꞌo̱ ꞌo̱ síí ꞌyaj ꞌo̱ veꞌ tu̱mé soꞌ se‑su̱u̱n soꞌ roꞌ, da̱nj no̱ xcúún ꞌo̱ ꞌo̱ síí ꞌyaj se‑su̱u̱n Yaꞌanj tu̱mé soꞌ man maꞌa̱n soꞌ, ne̱ sa̱ꞌ ga̱a̱ suun quiꞌya̱j nij soꞌ á.

1 Corintios 6:20

Dan me se vaa ndoꞌo yuꞌvee nó soj rihaan Yaꞌanj, ne̱ noco̱o uxrá naruꞌvee soꞌ ga̱a quiránj soꞌ man soj, ne̱ cheꞌé dan no̱ xcúún soj quiꞌya̱j nee̱ man soj se‑su̱u̱n Yaꞌanj, ne̱ veꞌé ndoꞌo caꞌmi̱i̱ yuvii̱ cheꞌé Yaꞌanj, quiꞌya̱j soj ado̱nj.

2 Corintios 2:17

ꞌO̱ se núj me se ne ꞌyaj núj nda̱a vaa ꞌyaj taꞌa̱j nij síí aꞌmii natáj snana̱ Yaꞌanj a̱ maꞌ. ꞌO̱ se taꞌa̱j nij soꞌ me síí me ina̱nj rá quiꞌya̱j canaán saꞌanj cheꞌé snana̱ Yaꞌanj, ne̱ xa̱ꞌ núj, tza̱j ne̱ ina̱nj nana̱ ya̱ me rá núj caꞌmi̱i̱ núj, ne̱ naꞌvej rá núj caꞌne̱e̱ núj saꞌanj cheꞌé snana̱ Yaꞌanj rihaan yuvii̱ maꞌ. ꞌO̱ se Yaꞌanj me síí caꞌneꞌ suun rihaan núj caꞌmi̱i̱ natáj núj, ne̱ tumé Yaꞌanj man núj da̱j caꞌmi̱i̱ núj, ne̱ síí noco̱ꞌ man Cristó me núj ado̱nj.

2 Corintios 9:13

Ne̱ queneꞌe̱n nij yuvii̱ se vaa ya̱ uno soj nana̱ sa̱ꞌ cheꞌé Cristó nana̱ sa̱ꞌ noco̱ꞌ níꞌ, ne̱ queneꞌe̱n nij yuvii̱ se vaa niha̱ꞌ rá soj rque̱ soj siꞌyaj soj man nij síí noco̱ꞌ man Cristó ya̱nj chumanꞌ Jerusalén do̱ꞌ, man ta̱ranꞌ nij tinúú níꞌ do̱ꞌ, ne̱ cheꞌé dan gu̱un ya̱ rá nij soꞌ se vaa ya̱ ya̱ si̱j noco̱ꞌ man Yaꞌanj me soj, ne̱ veꞌé uxrá caꞌmi̱i̱ nij soꞌ cheꞌé Yaꞌanj a.

Efesios 1:19

ne̱ queneꞌe̱n soj se vaa niꞌndaj ya̱ veꞌé gu̱un nucua̱j ya̱ Yaꞌanj ra̱cuíj Yaꞌanj man níꞌ si̱j amán rá niꞌya̱j man soꞌ a. Nucua̱j ndoꞌo Yaꞌanj ado̱nj.

Efesios 4:29

Se̱ caꞌvej soj caꞌmi̱i̱ soj nana̱ qui̱j maꞌ. Tana̱nj gu̱un rá soj veꞌé caꞌmi̱i̱ soj, ne̱ nana̱ sa̱ꞌ nana̱ achiin man tinúú soj roꞌ, yoꞌ me nago̱ꞌ soj rihaan tinúú soj á. Ne̱ cavi̱i̱ sa̱ꞌ doj ta̱ranꞌ nij síí cuno̱ nana̱ caꞌmi̱i̱ soj, sese sa̱ꞌ caꞌmi̱i̱ soj ado̱nj.

Efesios 5:20

Ne̱ niga̱nj cata̱j soj guun niꞌya̱j níꞌ rihaan Rej níꞌ Yaꞌanj cheꞌé cunuda̱nj rasu̱u̱n, cheꞌé se‑chuvi̱i Jesucristó Si̱j ꞌNi̱j Raꞌa man níꞌ á.

Efesios 6:10

Da̱j ꞌó nana̱ cata̱j xnaꞌanj ꞌu̱nj rihaan soj a. ꞌO̱ ga̱a̱ chre̱ꞌ soj ga̱ Yaꞌanj Si̱j ꞌNi̱j Raꞌa man níꞌ á. Caꞌve̱j soj caꞌne̱j Síí ꞌNi̱j Raꞌa man níꞌ se nucua̱j nimán soj, ne̱ da̱j se vaa se nucua̱j nica̱j maꞌa̱n soꞌ roꞌ, da̱nj ga̱a̱ se nucua̱j ni̱caj maꞌa̱n soj, quiꞌya̱j soꞌ chugua̱nj.

Filipenses 1:11

Dan me se ya̱ gu̱un soj yuvii̱ cunuu sa̱ꞌ nimán quiꞌya̱j Jesucristó, cheꞌé rej xca̱j nii cuentá se vaa niꞌndaj ya̱ veꞌé vaa Yaꞌanj ne̱ cata̱j nii se vaa sa̱ꞌ uxrá vaa soꞌ ado̱nj.

Filipenses 2:11

ne̱ cata̱j ya̱ cunuda̱nj nij soꞌ se vaa maꞌa̱n Jesucristó me Síí ꞌNi̱j Raꞌa man níꞌ, ga̱a ne̱ queneꞌe̱n ya̱ nij soꞌ se vaa sa̱ꞌ uxrá quiꞌyaj Rej níꞌ Yaꞌanj ado̱nj.

Colosenses 4:6

Nu̱ꞌ cuentó nanó soj ga̱ nij soꞌ me se ina̱nj cuentó veꞌé lu̱j caꞌmi̱i̱ do̱ꞌ, ina̱nj cuentó sa̱ꞌ aranꞌ rá nij soꞌ do̱ꞌ, caꞌmi̱i̱ soj, ga̱a ne̱ queneꞌe̱n soj me nana̱ caꞌmi̱i̱ soj rihaan ꞌo̱ ꞌo̱ nij síí xnáꞌanj man soj cheꞌé tucuáán noco̱ꞌ soj ado̱nj.

1 Tesalonicenses 2:4

ꞌO̱ se guun nucua̱j rá Yaꞌanj man núj, ne̱ caꞌneꞌ soꞌ suun rihaan núj nata̱ꞌ núj nana̱ sa̱ꞌ cheꞌé Cristó, ne̱ da̱nj ꞌyaj gue̱e̱ núj ado̱nj. Ne uun rá núj cata̱j yuvii̱ se vaa veꞌé ꞌyaj núj maꞌ. Ma̱an se me rá núj gu̱un niha̱ꞌ rá Yaꞌanj ni̱ꞌyaj Yaꞌanj man núj, ne̱ Yaꞌanj me síí acaj cuentá da̱j vaa nimán núj ado̱nj.

1 Timoteo 1:17

Nu̱ꞌ cavii nu̱ꞌ caꞌanj cata̱j níꞌ se vaa niꞌndaj ya̱ sa̱ꞌ vaa Yaꞌanj, ne̱ soꞌ me Rey gu̱un chij nu̱ꞌ cavii nu̱ꞌ caꞌanj, ne̱ daj chiha̱a̱ míj se̱ caviꞌ soꞌ maꞌ. Ne ruviꞌ soꞌ niꞌya̱j yuvii̱ maꞌ. Taj va̱j ꞌó Yaꞌanj maꞌ. O̱rúnꞌ soꞌ me Yaꞌanj ya̱ ado̱nj. Veé da̱nj ga̱a̱ ya̱ ado̱nj.

1 Timoteo 6:16

O̱rúnꞌ soꞌ me síí vaa iꞌna̱ꞌ nu̱ꞌ cavii nu̱ꞌ caꞌanj, ne̱ ya̱nj soꞌ rej acoꞌ yaꞌan chuguu̱n rej naꞌvee nichru̱nꞌ yuvii̱ á. A̱ ꞌó yuvii̱ ne queneꞌe̱n man soꞌ, ne̱ daj chiha̱a̱ míj se̱ caꞌvee queneꞌe̱n yuvii̱ man soꞌ maꞌ. Cheꞌé dan cara̱a̱ cochro̱j níꞌ rihaan soꞌ, ne̱ ga̱a̱ nucua̱j ndoꞌo soꞌ nu̱ꞌ cavii nu̱ꞌ caꞌanj rugua̱nj. Veé da̱nj ga̱a̱ ya̱ ado̱nj.

Tito 2:1

Ne̱ ma̱ꞌán so̱ꞌ me se tu̱cuꞌyón so̱ꞌ nana̱ nda̱a vaa taj tucuáán ya̱ na̱nj á.

Tito 2:15

Nana̱ nihánj me chrej sa̱ꞌ ya̱ nago̱ꞌ so̱ꞌ rihaan nij tinúú níꞌ, ne̱ sca̱ꞌ ndoꞌo caꞌmi̱i̱ so̱ꞌ, caꞌne̱ꞌ so̱ꞌ suun rihaan nij soꞌ, ga̱a ne̱ caꞌne̱ꞌ rá nij soꞌ ga̱ se chiꞌi̱i̱ á. Ne̱ da̱nj qui̱ꞌyáá so̱ꞌ do̱ꞌ, da̱nj caꞌmi̱i̱ so̱ꞌ do̱ꞌ, ga̱a ne̱ daj chiha̱a̱ míj se̱ guun cata̱j yuvii̱ se vaa taj yuꞌvee nó so̱ꞌ do̱ꞌ, nana̱ aꞌmii so̱ꞌ do̱ꞌ a̱ maꞌ.

Hebreos 13:7

Nuchru̱j ra̱a̱ soj da̱j ꞌyaj nij síí tumé sa̱ꞌ rihaan Yaꞌanj man soj, nij síí cataj xnaꞌanj snana̱ Yaꞌanj rihaan soj á. Xca̱j uxrá soj cuentá da̱j ꞌyaj nij soꞌ ga̱a cayáán nij soꞌ rihaan chumii̱ nihánj, ne̱ xca̱j uxrá soj cuentá da̱j guun cheꞌé nda̱a vaa cayáán nij soꞌ a. Ne̱ ase vaa nucua̱j uxrá rá nij soꞌ niꞌya̱j nij soꞌ Yaꞌanj roꞌ, da̱nj ga̱a̱ quiꞌya̱j soj uún á.

Hebreos 5:12

Dan me se guun queꞌe̱e̱ yoꞌ nocoꞌ soj man Cristó, ne̱ no̱ xcúún soj tu̱cuꞌyón soj stucua̱nj Cristó rihaan tuviꞌ soj, tza̱j ne̱ ne gu̱un nucua̱j soj quiꞌya̱j soj da̱nj maan asânj. ꞌO̱ se achiin ꞌo̱ síí tu̱cuꞌyón asi̱j tacóó snana̱ Yaꞌanj man soj, ne̱ cheꞌé dan ase vaa neꞌej vaa soj, ne̱ neꞌej me se ne neꞌen neꞌej cha̱ neꞌej se chá maꞌ. Tiha̱j utzii neꞌej na̱nj ado̱nj. Ne̱ taꞌngaꞌ da̱nj vaa soj, ne̱ tiha̱j nda̱a tacóó snana̱ Yaꞌanj gu̱un nucua̱j soj cuno̱ soj na̱nj ado̱nj.

Santiago 1:19

Se̱ niꞌyón soj nana̱ nihánj, maan tinu̱j, maan nocoj. Ga̱a̱ niha̱ꞌ rá ta̱ranꞌ níꞌ nano̱ xre̱j níꞌ á. Tza̱j ne̱ se̱ gaa niha̱ꞌ rá níꞌ caꞌmi̱i̱ níꞌ do̱ꞌ, caꞌma̱an rá níꞌ do̱ꞌ maꞌ.

Santiago 1:26

Me maꞌa̱n síí uun rá se vaa síí veꞌé nocoꞌ man Yaꞌanj me soꞌ, tza̱j ne̱ niha̱ꞌ rá soꞌ nano̱ soꞌ cuentó cheꞌé tuviꞌ soꞌ, ne̱ né si̱j noco̱ꞌ ya̱ man Yaꞌanj me soꞌ maꞌ. Tana̱nj síí tihaꞌ yuꞌunj man maꞌa̱n me soꞌ na̱nj chugua̱nj.

1 Pedro 2:12

Ne̱ veꞌé ina̱nj quiꞌya̱j soj rej ya̱nj soj scaꞌnúj nij síí chiꞌi̱i̱ ma̱n rihaan chumii̱ nihánj, ga̱a ne̱ sese gu̱un rá nij soꞌ cuta̱ꞌ nij soꞌ cacunꞌ rmi̱ꞌ xráá soj se vaa nij ꞌyaj soj, ga̱a ne̱ xca̱j nij soꞌ cuentá se vaa veꞌé ina̱nj ꞌyaj soj ado̱nj. Ga̱a ne̱ güii caꞌna̱ꞌ Yaꞌanj rihaan chumii̱ nihánj caꞌne̱ꞌ soꞌ cacunꞌ cheꞌé yuvii̱ me se cata̱j nij soꞌ se vaa sa̱ꞌ uxrá vaa Yaꞌanj chugua̱nj.

1 Pedro 2:5

Ne̱ ase vaa nij yuvej leꞌe̱j nii nataꞌ xráá yuvej xi̱j roꞌ, da̱nj vaa ta̱ranꞌ soj, sese canoco̱ꞌ xraan soj man Jesucristó, ne̱ veꞌé cuma̱n rcuaꞌa̱a̱n soj, quiꞌya̱j Jesucristó a. Ga̱a ne̱ cunu̱u sa̱ꞌ nimán soj, ga̱a ne̱ ase vaa xrej narii Yaꞌanj cu̱nuû rihaan soꞌ roꞌ, da̱nj ga̱a̱ soj rihaan Yaꞌanj a. Ne̱ ase vaa se sa̱ꞌ rqué nij xrej rihaan Yaꞌanj roꞌ, da̱nj ga̱a̱ se sa̱ꞌ quiꞌya̱j soj cheꞌé Jesucristó, ga̱a ne̱ cara̱nꞌ rá Yaꞌanj se vaa ꞌyaj soj ado̱nj.

1 Pedro 4:10

Dan me se quiꞌyaj Yaꞌanj se lu̱j ga̱ ꞌo̱ ꞌo̱ níꞌ, rqué Yaꞌanj suun rihaan ꞌo̱ ꞌo̱ níꞌ quiꞌya̱j níꞌ cheꞌé tinúú níꞌ, ne̱ ino̱ doj vaa suun ꞌyaj ꞌo̱ ꞌo̱ níꞌ cheꞌé tinúú níꞌ, ne̱ cheꞌé dan no̱ xcúún soj ra̱cuíj soj man tinúú soj, nda̱a vaa uun nucua̱j soj chugua̱nj.

1 Pedro 4:16

Tza̱j ne̱ sese quira̱nꞌ ꞌo̱ tuviꞌ soj sayuun cheꞌé se si̱j noco̱ꞌ man Cristó me soꞌ, ne̱ taj cheꞌé gu̱un naꞌa̱j soꞌ maꞌ. Tana̱nj cheꞌé se si̱j noco̱ꞌ man Cristó me soꞌ roꞌ, cheꞌé dan cata̱j soꞌ se vaa sa̱ꞌ uxrá vaa Yaꞌanj a.

1 Pedro 5:11

Ne̱ gu̱un chij ndoꞌo Yaꞌanj nu̱ꞌ cavii nu̱ꞌ caꞌanj, ne̱ niꞌndaj ya̱ sa̱ꞌ veꞌé ga̱a̱ soꞌ na̱nj ado̱nj. Veé da̱nj ga̱a̱ ya̱ ado̱nj.

Judas 1:25

Dan me se o̱rúnꞌ Yaꞌanj Si̱j Tinanii man níꞌ rihaan Sayuun me soꞌ chugua̱nj. Cheꞌé Jesucristó Si̱j ꞌNi̱j Raꞌa man níꞌ roꞌ, cata̱j níꞌ se vaa niꞌndaj ya̱ sa̱ꞌ veꞌé ga̱a̱ Yaꞌanj do̱ꞌ, se vaa gu̱un chij soꞌ do̱ꞌ, se vaa ni̱caj soꞌ se nucua̱j do̱ꞌ, se vaa ni̱caj soꞌ suun noco̱o do̱ꞌ á. Nu̱ꞌ nihánj me se nó xcúún soꞌ ni̱caj soꞌ nu̱ꞌ cavii nu̱ꞌ caꞌnaꞌ do̱ꞌ, yoꞌ ya̱j do̱ꞌ, nu̱ꞌ cavii nu̱ꞌ caꞌanj do̱ꞌ á. Veé da̱nj ga̱a̱ ya̱ ado̱nj.