1 Pedro 2:4 - Triqui de San Juan Copala

⁴ Caꞌna̱ꞌ soj rihaan Cristó á. Ase vaa ꞌo̱ yuvej xi̱j sa̱ꞌ uchruj nii asino ya̱a̱n tacóó veꞌ ga̱a nachráj nii veꞌ roꞌ, da̱nj vaa soꞌ na̱nj ado̱nj. Tza̱j ne̱ nij síí ma̱n rihaan chumii̱ nihánj me se nachriꞌ nij soꞌ niꞌya̱j nij soꞌ yuvej yoꞌ, tza̱j ne̱ síí vaa ndoꞌo yuꞌvee nó narii Yaꞌanj me soꞌ na̱nj ado̱nj.

1 Pedro 2:4 ပူးပေါင်းရင်းမြစ်များ

San Mateo 11:28

Ne̱ sese vaa síí navij ndoꞌo rá cheꞌé yan nanoꞌ uxrá soꞌ tucuáán sa̱ꞌ do̱ꞌ, sese vaa síí nanó ndoꞌo rá cheꞌé yan ne gu̱un nucua̱j soꞌ quiꞌya̱j soꞌ nu̱ꞌ tucuáán sa̱ꞌ tucuáán noco̱ꞌ soꞌ do̱ꞌ, ne̱ caꞌna̱ꞌ nij síí vaa da̱nj rihanj á. ꞌO̱ se nara̱a̱n rá nij síí vaa da̱nj, qui̱ꞌyáj na̱nj ado̱nj.

San Mateo 12:18

Ni̱ꞌyaj soj man síí nihánj á. Síí nu̱u̱ rihaan ꞌu̱nj do̱ꞌ, síí narii ꞌu̱nj do̱ꞌ, me soꞌ ado̱nj. ꞌE̱e̱ rá ꞌu̱nj do̱ꞌ, aranꞌ rá nimán ꞌu̱nj do̱ꞌ, niꞌya̱j ꞌu̱nj man soꞌ a. Caꞌne̱j ꞌu̱nj Nimán ꞌu̱nj nimán soꞌ, ne̱ nata̱ꞌ soꞌ rihaan nij síí yaníj se vaa veꞌé caꞌne̱ꞌ ꞌu̱nj cacunꞌ cheꞌé nij soꞌ a.

San Mateo 21:42

Ga̱a ne̱ cataj Jesús a: ―Me cheꞌé ne naya̱a̱ nij soj nana̱ nihánj nana̱ no̱ rihaan Danj Yaꞌanj ga̱: Yuvej quiriꞌíj nij síí cuneꞌ veꞌ roꞌ, guun yuvej sa̱ꞌ vaa se uun doj rihaan cunuda̱nj nij yuvej ma̱n tacóó veꞌ yoꞌ na̱nj ado̱nj. Maꞌa̱n Yaꞌanj Si̱j ꞌNi̱j Raꞌa man níꞌ quiꞌyaj da̱nj, ne̱ cuna̱j uxrá vaa yoꞌ, rá níꞌ ado̱nj, taj Danj Yaꞌanj a.

San Juan 14:19

Nichrunꞌ caꞌa̱nj ꞌu̱nj, ne̱ se̱ queneꞌen uún nij síí noco̱ꞌ se‑chre̱j chumii̱ nihánj manj maꞌ. Tza̱j ne̱ queneꞌe̱n maꞌa̱n soj manj, cheꞌé se ꞌo̱ vaa iꞌna̱ꞌ ꞌu̱nj, ne̱ ga̱a̱ iꞌna̱ꞌ nimán soj ado̱nj.

San Juan 14:6

Ga̱a ne̱ cataj Jesús rihaan soꞌ a: ―Ma̱ꞌanj me guun chrej rihaan soj, ne̱ ma̱ꞌanj me nana̱ ya̱ cuno̱ soj, ne̱ ma̱ꞌanj me síí quiꞌya̱j ga̱a̱ iꞌna̱ꞌ nimán soj ado̱nj. Sese se̱ caꞌvej rá ꞌo̱ soꞌ canoco̱ꞌ soꞌ manj, ne̱ daj chiha̱a̱ míj se̱ cuchiꞌ soꞌ rihaan Réj Yaꞌanj a̱ maꞌ.

San Juan 5:26

ꞌO̱ se ase vaa vaa iꞌna̱ꞌ maꞌa̱n Réj Yaꞌanj, ne̱ vaa iꞌna̱ꞌ ta̱ranꞌ nij rasu̱u̱n ꞌyaj Réj Yaꞌanj roꞌ, da̱nj vaa vaa iꞌna̱ꞌ ma̱ꞌanj si̱j Taꞌni̱j Yaꞌanj uún, ꞌyaj Yaꞌanj, ne̱ cunu̱u iꞌna̱ꞌ yuvii̱, qui̱ꞌyáá ꞌu̱nj a.

San Juan 5:40

Tza̱j ne̱ naꞌvej rá soj caꞌna̱ꞌ soj rihanj, cheꞌé rej caꞌve̱e ca̱yáán soj ga̱ Yaꞌanj nu̱ꞌ cavii nu̱ꞌ caꞌanj qui̱ꞌyáj maꞌ.

San Juan 6:37

Xa̱ꞌ nij síí rqué Réj Yaꞌanj manj, tza̱j ne̱ caꞌna̱ꞌ nij soꞌ rihanj, ne̱ veꞌé caꞌmi̱i̱ ꞌu̱nj ga̱ nij soꞌ a. Ne̱ xa̱ꞌ nij síí ꞌnaꞌ rihanj, tza̱j ne̱ daj chiha̱a̱ míj se̱ quiriꞌíj yaníj ꞌu̱nj man nij soꞌ maꞌ.

San Juan 6:57

Ase vaa vaa iꞌna̱ꞌ Réé ꞌu̱nj síí caꞌnéé mán ꞌu̱nj rihaan chumii̱ nihánj roꞌ, da̱nj vaa vaa iꞌna̱ꞌ ꞌu̱nj, ꞌyaj Réé ꞌu̱nj a. Ne̱ xa̱ꞌ síí chá mán ꞌu̱nj, tza̱j ne̱ ꞌo̱ ga̱a̱ iꞌna̱ꞌ nimán soꞌ, qui̱ꞌyáá ꞌu̱nj a.

Romanos 5:10

Nda̱ꞌ se síí ta̱j riꞌyunj man Yaꞌanj me níꞌ ga̱a rque̱, tza̱j ne̱ caꞌnéé Yaꞌanj Taꞌníí Yaꞌanj cavi̱ꞌ soꞌ cheꞌé yuvii̱, ne̱ guun tuvi̱ꞌ níꞌ ga̱ Yaꞌanj, quiꞌyaj soꞌ a. Ne̱ cunuu iꞌna̱ꞌ uún Cristó, ne̱ cheꞌé dan neꞌen níꞌ se vaa ya̱ nani̱i̱ níꞌ rihaan sayuun ne̱ cavi̱i̱ sa̱ꞌ níꞌ vaa güii ado̱nj.

1 Corintios 3:11

ꞌO̱ se stucua̱nj Jesucristó me tucuáán cuchruj ꞌu̱nj rihaan soj, ne̱ se̱ guun natuna̱ nii tucuáán yoꞌ a̱ maan ado̱nj. Da̱j se vaa sca̱ꞌ ndoꞌo tacóó veꞌ roꞌ, da̱j vaa stucua̱nj Jesucristó a.

Colosenses 3:4

Ne̱ Cristó me síí ꞌyaj vaa iꞌna̱ꞌ nimán soj, ne̱ vaa güii caꞌna̱ꞌ uún soꞌ rihaan chumii̱ nihánj, ne̱ niꞌndaj ya̱ veꞌé ga̱a̱ curuvi̱ꞌ soj ga̱ soꞌ na̱nj ado̱nj.

1 Pedro 1:19

Tana̱nj caꞌnéé Yaꞌanj man Cristó cavi̱ꞌ ya̱ soꞌ caya̱nj ton man soꞌ cheꞌé níꞌ ado̱nj. Ase vaa aviꞌ matzinj leꞌe̱j sa̱ꞌ ina̱nj ꞌyaj nij síí israelitá cheꞌé cacunꞌ tumé nij soꞌ roꞌ, da̱nj vaa caviꞌ Cristó cheꞌé níꞌ, ne̱ soꞌ roꞌ, vaa yuꞌvee ndoꞌo nó soꞌ cheꞌé se taj cacunꞌ tumé soꞌ maan chugua̱nj.

1 Pedro 1:7

Dan me se agaꞌ oró míí me se se ma̱n u̱u̱n rihaan chumii̱ nihánj me yoꞌ, ne̱ vaa güii caꞌa̱nj niꞌya̱ yoꞌ, tza̱j ne̱ axríj yaꞌan nii man agaꞌ oró míí yoꞌ, cheꞌé se me rá nii xca̱j nii cuentá sese agaꞌ sa̱ꞌ me yoꞌ niꞌ, ase agaꞌ nij me yoꞌ a. Ne̱ ase vaa yaꞌan rihaan agaꞌ oró míí yoꞌ roꞌ, da̱nj vaa sayuun rihaan soj, ne̱ cheꞌé sayuun ranꞌ soj roꞌ, cheꞌé dan acaj níꞌ cuentá sese ya̱ ya̱ amán rá soj niꞌya̱j soj man Yaꞌanj niꞌ, ase ꞌyaj rmaꞌa̱n soj a. Tza̱j ne̱ sa̱ꞌ doj vaa soj rihaan agaꞌ oró míí yoꞌ, ne̱ daj chiha̱a̱ míj se̱ caꞌanj niꞌya̱ soj, sese amán ya̱ rá soj niꞌya̱j soj man Yaꞌanj maꞌ. Dan me se cheꞌé se amán rá soj, ne̱ sa̱ꞌ uxrá caꞌmi̱i̱ nii do̱ꞌ, niꞌndaj ya̱ veꞌé caꞌmi̱i̱ nii do̱ꞌ, veꞌé caꞌmi̱i̱ cochro̱j nii do̱ꞌ, ni̱ꞌyaj nii man Yaꞌanj, asa̱ꞌ curuviꞌ uún Jesucristó chugua̱nj.

1 Pedro 2:7

Vaa yuꞌvee ndoꞌo nó Cristó rihaan soj si̱j amán rá niꞌya̱j man soꞌ, tza̱j ne̱ xa̱ꞌ nij síí ne amán rá niꞌya̱j man Cristó me se quisi̱j ya̱ nda̱a vaa taj nana̱ nihánj nana̱ no̱ rihaan Danj Yaꞌanj ado̱nj: Yuvej quiriꞌíj nij síí cuneꞌ veꞌ roꞌ, guun yuvej vaa se uun doj rihaan ꞌó da̱nj yuvej na̱nj ado̱nj, taj Danj Yaꞌanj a.

2 Pedro 1:1

ꞌU̱nj roꞌ, me síí cuꞌna̱j Simón Pedró, síí nu̱u̱ rihaan Jesucristó, ne̱ síí cuneꞌ soꞌ caꞌa̱nj nata̱ꞌ snana̱ soꞌ rihaan yuvii̱ mej, ne̱ qui̱ꞌyáá ꞌu̱nj yanj nihánj caꞌne̱j ꞌu̱nj rihaan soj si̱j noco̱ꞌ man Cristó, ne̱ dan me se cuya̱a̱n vaa yuꞌvee nó soj ga̱ núj rihaan Yaꞌanj ado̱nj. Dan me se síí nica̱ nimán me Jesucristó, ne̱ amán rá soj ga̱ núj niꞌya̱j soj man Yaꞌanj, ꞌyaj Jesucristó, ne̱ soꞌ roꞌ, me Taꞌanj níꞌ, ne̱ soꞌ me Síí Tinanii man níꞌ rihaan Sayuun ado̱nj.

2 Pedro 1:4

Ne̱ cheꞌé dan cataꞌ tuꞌva soꞌ cheꞌé niꞌndaj ya̱ nij se lu̱j quiꞌya̱j ndoꞌo soꞌ ga̱ níꞌ, cheꞌé rej caꞌve̱e nani̱i̱ soj rihaan se chiꞌi̱i̱ nu̱u̱ nimán nij síí ma̱n rihaan chumii̱ nihánj, ne̱ ase vaa maꞌa̱n Yaꞌanj roꞌ, da̱nj ga̱a̱ soj a.