1 Pedro 2:23 - Triqui de San Juan Copala

²³ Caꞌmii chre̱e yuvii̱ cheꞌé soꞌ, tza̱j ne̱ ne caꞌmi̱i̱ chre̱e soꞌ cheꞌé nij yuvii̱ maꞌ. Quiranꞌ soꞌ sayuun, tza̱j ne̱ ne caꞌmi̱i̱ soꞌ nana̱ qui̱j maꞌ. Tana̱nj guun rá soꞌ se vaa Yaꞌanj si̱j aꞌneꞌ nica̱ cacunꞌ cheꞌé níꞌ roꞌ, soꞌ me síí caꞌne̱ꞌ cacunꞌ cheꞌé soꞌ vaa güii a.

1 Pedro 2:23 ပူးပေါင်းရင်းမြစ်များ

San Lucas 23:41

Dan me se xa̱ꞌ níꞌ, tza̱j ne̱ vaa cheꞌé cavi̱ꞌ níꞌ, ne̱ ranꞌ níꞌ sayuun cheꞌé cacunꞌ tumé níꞌ a. Tza̱j ne̱ síí nihánj me se taj va̱j a̱ doj se chiꞌi̱i̱ quiꞌyaj síí nihánj a̱ maꞌ ―taj ꞌó síí tumé cacunꞌ yoꞌ rihaan tuviꞌ soꞌ a.

San Lucas 23:46

Ga̱a ne̱ nucua̱j ndoꞌo caguáj Jesús, cataj soꞌ a: ―Naca̱j so̱ꞌ nimanj, Ata̱j Chij ―taj soꞌ a. Ne̱ veé dan caviꞌ soꞌ a.

San Lucas 23:9

Dan me se xnáꞌanj ndoꞌo soꞌ nana̱ man Jesús, tza̱j ne̱ a̱ ꞌó nana̱ ne cata̱j Jesús rihaan soꞌ a̱ maꞌ.

Hechos 17:31

Ne̱ dan me se cachrón Yaꞌanj ꞌo̱ güii caꞌne̱ꞌ nica̱ soꞌ cacunꞌ cheꞌé cunuda̱nj nij yuvii̱ ma̱n rihaan chumii̱ a. Ne̱ a̱j cuneꞌ soꞌ man ꞌo̱ snóꞌo guun síí caꞌne̱ꞌ cacunꞌ cheꞌé yuvii̱ a. Ne̱ cheꞌé se cunuu iꞌna̱ꞌ uún snóꞌo yoꞌ, quiꞌyaj Yaꞌanj, ga̱a caviꞌ soꞌ, ne̱ cheꞌé dan no̱ xcúún cunuda̱nj yuvii̱ cuchuma̱n rá nij yuvii̱ se vaa veé ya̱ snóꞌo yoꞌ me soꞌ ado̱nj ―taj Pabló rihaan nij síí ma̱n Atenas yoꞌ a.

Hechos 4:29

’Señor, nihánj me se xca̱j so̱ꞌ cuentá se vaa caꞌmii yuva̱a̱ ndoꞌo nij soꞌ rihaan núj, ne̱ ra̱cuíj so̱ꞌ man núj si̱j ꞌyaj se‑su̱u̱n so̱ꞌ se vaa se̱ cuchuꞌviꞌ núj caꞌmi̱i̱ núj snana̱ so̱ꞌ rihaan yuvii̱ maꞌ.

Hechos 7:59

Ga̱a ne̱ goꞌ ndoꞌo nij soꞌ yahij man Esteban, ne̱ cachíín niꞌya̱j soꞌ rihaan Jesús, ne̱ cataj soꞌ a: ―Señor Jesús, nihánj me se naca̱j so̱ꞌ nimanj á ―taj soꞌ, cachíín niꞌya̱j soꞌ rihaan Jesús a.

Hechos 9:1

Dan me se síí cuꞌna̱j Saulo me se ꞌo̱ guun rá soꞌ quiꞌya̱j soꞌ sayuun man nij síí noco̱ꞌ snana̱ Jesús Si̱j ꞌNi̱j Raꞌa man níꞌ a. Ne̱ nda̱a guun rá soꞌ cavi̱ꞌ nij soꞌ a. Ne̱ caꞌanj soꞌ rej ya̱nj xrej ata̱ suun noco̱o doj,

Romanos 2:5

Tza̱j ne̱ veé dan me se naꞌvej uxrá rá so̱ꞌ ta̱náj so̱ꞌ chrej noco̱ꞌ so̱ꞌ, ne̱ naꞌvej rá so̱ꞌ nuchra̱nꞌ nimán so̱ꞌ ca̱nocóꞌ so̱ꞌ man Yaꞌanj maꞌ. Ne̱ vaa güii caꞌne̱ꞌ Yaꞌanj cacunꞌ cheꞌé yuvii̱, ne̱ caꞌmi̱i̱ ya̱ Yaꞌanj, ne̱ cuya̱nj rá Yaꞌanj ni̱ꞌyaj Yaꞌanj man cunuda̱nj nij síí tumé cacunꞌ, ne̱ dan me se cuya̱nj rá Yaꞌanj ni̱ꞌyaj Yaꞌanj man ma̱ꞌán so̱ꞌ uún ado̱nj.

Efesios 6:9

Ne̱ soj si̱j ruꞌvee roꞌ, veꞌé quiꞌya̱j soj ga̱ se‑mo̱zó soj uún á. Caꞌne̱ꞌ rá soj ga̱ suun axríj yuva̱a̱ man mozó, ne̱ caꞌne̱ꞌ rá soj ga̱ suun tuchuꞌviꞌ man mozó uún á. ꞌO̱ se neꞌen soj se vaa nicu̱nꞌ Síí ꞌNi̱j Raꞌa man soj do̱ꞌ, man se‑mo̱zó soj do̱ꞌ, rej xta̱ꞌ, ne̱ ꞌo̱ cuya̱a̱n vaa ta̱ranꞌ níꞌ rihaan soꞌ ado̱nj.

2 Tesalonicenses 1:5

Cheꞌé se vaa ꞌyaj soj, cheꞌé dan neꞌen níꞌ se vaa nica̱ vaa nana̱ cataj xnaꞌanj Yaꞌanj cheꞌé soj a. Dan me se nuchruj ra̱a̱ Yaꞌanj cheꞌé soj, ne̱ cataj xnaꞌanj Yaꞌanj se vaa caꞌve̱e ca̱yáán soj rej gu̱un chij Yaꞌanj, ne̱ ma̱an cheꞌé dan ranꞌ soj sayuun na̱nj á.

2 Timoteo 1:12

Ma̱an cheꞌé dan ránꞌ ꞌu̱nj sayuun nihánj cuano̱, tza̱j ne̱ ne naꞌa̱j ꞌu̱nj a̱ doj se vaa ránꞌ ꞌu̱nj maꞌ. ꞌO̱ se neꞌén ꞌu̱nj se vaa Yaꞌanj me síí cuchumán raj niꞌya̱j ꞌu̱nj man, ne̱ guun ya̱ raj se vaa uun nucua̱j soꞌ tu̱mé soꞌ manj qui̱ꞌyáj nu̱ꞌ suun caꞌneꞌ soꞌ rihanj a. Ne̱ da̱nj ina̱nj quiꞌya̱j soꞌ, ra̱cuíj soꞌ manj nda̱a güii caꞌna̱ꞌ uún Cristó ado̱nj.

2 Timoteo 4:8

Ne̱ cuano̱ nihánj me se ma̱an se naꞌvi̱j ꞌu̱nj quisi̱j güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj, ne̱ rque̱ soꞌ ꞌo̱ cachriin yâj cu̱nuû raá ꞌu̱nj, ne̱ cata̱j soꞌ se vaa nuviꞌ cacunꞌ ta̱j xráj a. Dan me se cuese̱ nica̱ nimán ya̱ me Síí ꞌNi̱j Raꞌa man níꞌ, ne̱ né cheꞌe̱ ina̱nj ma̱ꞌán ꞌu̱nj me quiꞌya̱j soꞌ da̱nj maꞌ. Ne̱ veé da̱nj quiꞌya̱j soꞌ cheꞌé cunuda̱nj nij yuvii̱ me ndoꞌo rá caꞌna̱ꞌ uún soꞌ rihaan chumii̱ nihánj na̱nj ado̱nj.

Hebreos 12:3

Cheꞌé dan me nuchru̱j ra̱a̱ soj se vaa ase vaa ta̱j riꞌyunj yuvii̱ tumé cacunꞌ man soj roꞌ, da̱nj táá riꞌyunj yuvii̱ tumé cacunꞌ man Jesucristó, tza̱j ne̱ ne caꞌne̱ꞌ rá soꞌ maꞌ. Ne̱ veé da̱nj quiꞌya̱j gue̱e̱ soj, ne̱ nuchru̱j ra̱a̱ soj, ne̱ se̱ ninaj nimán soj maꞌ.

1 Pedro 3:9

Caꞌve̱e se quiꞌya̱j chiꞌi̱i̱ yuvii̱ man soj, tza̱j ne̱ se̱ quiꞌyaj chiꞌi̱i̱ soj man nij yuvii̱ maꞌ. Caꞌve̱e se caꞌmi̱i̱ chre̱e yuvii̱ cheꞌé soj, tza̱j ne̱ se̱ caꞌmii chre̱e soj cheꞌé nij yuvii̱ maꞌ. Tana̱nj cachi̱nj niꞌya̱j soj rihaan Yaꞌanj quiꞌya̱j soꞌ se lu̱j ga̱ nij yuvii̱ yoꞌ á. ꞌO̱ se canacúún Yaꞌanj man soj, cheꞌé rej quiꞌya̱j soj da̱nj, ga̱a ne̱ caꞌve̱e quiꞌya̱j Yaꞌanj se lu̱j ga̱ maꞌa̱n soj chugua̱nj.

1 Pedro 4:19

Cheꞌé dan xa̱ꞌ nij síí ranꞌ sayuun nda̱a vaa me rá Yaꞌanj quira̱nꞌ nij soꞌ, tza̱j ne̱ ꞌo̱ ina̱nj quiꞌya̱j sa̱ꞌ nij soꞌ, ne̱ dan me se caꞌve̱j rá nij soꞌ ni̱caj yuꞌunj Yaꞌanj man nimán nij soꞌ á. ꞌO̱ se Yaꞌanj me síí quiꞌyaj man nij soꞌ, ne̱ vaa cheꞌé ga̱a̱ nucua̱j rá nij soꞌ man soꞌ ado̱nj.

Apocalipsis 19:11

Ga̱a ne̱ queneꞌén ꞌu̱nj se vaa naxraꞌ rej xta̱ꞌ, ne̱ dan me se cavii ꞌo̱ cuayó catzi̱i̱, ne̱ síí ta̱j xráá cuayó yoꞌ roꞌ, me síí cuꞌna̱j Síí Nica̱ Nimán ne̱ Síí Aꞌmii Nana̱ Ya̱, ne̱ aꞌneꞌ nica̱ soꞌ cacunꞌ cheꞌé yuvii̱, ne̱ nica̱ unuꞌ soꞌ a.