1 Pedro 1:23 - Triqui de San Juan Copala

²³ ꞌO̱ se caꞌngaa naca̱ nimán soj, quiꞌyaj snana̱ Yaꞌanj, ne̱ né se cavi̱ꞌ me snana̱ Yaꞌanj maꞌ. Tana̱nj ase vaa ꞌo̱ rasu̱u̱n vaa iꞌna̱ꞌ vaa snana̱ Yaꞌanj, ne̱ daj chiha̱a̱ míj se̱ caꞌanj niꞌya̱ yoꞌ maꞌ.

1 Pedro 1:23 ပူးပေါင်းရင်းမြစ်များ

San Mateo 24:35

Vaa güii caꞌa̱nj niꞌya̱ chumii̱ ga̱ xta̱ꞌ, tza̱j ne̱ snana̱j me se daj chiha̱a̱ míj se̱ caꞌanj niꞌya̱ yoꞌ maꞌ.

San Lucas 8:11

Canica̱j Jesús, cataj soꞌ a: ―Nihánj me cata̱j xnaꞌanj ꞌu̱nj cheꞌé se‑cuento̱ ꞌnúú trigó, ne̱ ase vaa ꞌnúú trigó yoꞌ roꞌ, da̱nj vaa snana̱ Yaꞌanj ado̱nj.

San Juan 1:13

Ne̱ nij síí guun taꞌni̱j Yaꞌanj man, tza̱j ne̱ né cheꞌe̱ se nayón nij soꞌ rque nii nij soꞌ do̱ꞌ, né cheꞌe̱ se guun rá yuvii̱ caꞌnga̱a̱ nij soꞌ do̱ꞌ, né cheꞌe̱ se guun rá rej nij soꞌ nayo̱n nij soꞌ rque nii nij soꞌ do̱ꞌ, me guun taꞌni̱j Yaꞌanj man nij soꞌ maꞌ. Ma̱an se maꞌa̱n Yaꞌanj me síí quiꞌyaj guun taꞌni̱j Yaꞌanj man nij soꞌ ado̱nj.

San Juan 1:3

ne̱ quiꞌyaj soꞌ nu̱ꞌ rasu̱u̱n, quiꞌyaj Yaꞌanj a. Taj va̱j a̱ ꞌó rasu̱u̱n guun sese nuviꞌ Snana̱ Yaꞌanj; tana̱nj o̱rúnꞌ maꞌa̱n soꞌ quiꞌyaj cunuda̱nj na̱nj ado̱nj.

San Juan 3:3

Ga̱a ne̱ cataj Jesús rihaan soꞌ a: ―Ya̱ ya̱ cata̱j xnaꞌanj ꞌu̱nj rihaan so̱ꞌ cuano̱ se vaa síí se̱ caꞌngaa naca̱ uún roꞌ, daj chiha̱a̱ míj se̱ caꞌvee queneꞌe̱n soꞌ se vaa uun chij Yaꞌanj a̱ maꞌ ―taj Jesús rihaan soꞌ a.

San Juan 3:5

Ga̱a ne̱ cataj uún Jesús a: ―Ya̱ ya̱ cata̱j xnaꞌanj ꞌu̱nj rihaan so̱ꞌ se vaa sese se̱ caꞌngaa ꞌo̱ soꞌ quiꞌya̱j na, ne̱ sese se̱ caꞌngaa naca̱ nimán soꞌ, ne̱ se̱ caꞌvee catu̱u̱ soꞌ rej uun chij Yaꞌanj a̱ maꞌ.

San Juan 6:63

Dan me se Nimán Yaꞌanj me síí ꞌyaj vaa iꞌna̱ꞌ nimán yuvii̱ ado̱nj. Tza̱j ne̱ taj se gúnꞌ man nee̱ man yuvii̱ quiꞌya̱j yoꞌ ga̱a̱ iꞌna̱ꞌ yuvii̱ a̱ maꞌ. Xa̱ꞌ nana̱ caꞌmij rihaan soj, tza̱j ne̱ nana̱ cavii Nimán Yaꞌanj me nana̱ yoꞌ, ne̱ caꞌve̱e ga̱a̱ iꞌna̱ꞌ nimán soj, quiꞌya̱j snana̱j ado̱nj.

Romanos 1:23

Yaꞌanj me síí niꞌndaj ya̱ sa̱ꞌ veꞌé vaa, ne̱ daj chiha̱a̱ míj ne aviꞌ soꞌ, ne̱ cheꞌé dan no̱ xcúún yuvii̱ canoco̱ꞌ yuvii̱ man soꞌ ado̱nj. Tza̱j ne̱ naꞌvej rá nij yuvii̱ canoco̱ꞌ nij yuvii̱ Yaꞌanj ya̱ maꞌ. Tana̱nj quiꞌyaj nij yuvii̱ rasu̱u̱n ase vaa yuvii̱ do̱ꞌ, xtâj do̱ꞌ, xcuu do̱ꞌ, xcuáá do̱ꞌ, ne̱ ꞌó rasu̱u̱n ꞌanj niꞌya̱ u̱u̱n rihaan yoꞌóó nihánj quiꞌyaj nij soꞌ, ne̱ taj nij soꞌ se vaa yaꞌanj me rasu̱u̱n quiꞌyaj nij soꞌ na̱nj ado̱nj.

Hebreos 4:12

ꞌO̱ se vaa iꞌna̱ꞌ ya̱ snana̱ Yaꞌanj ado̱nj. Ne̱ nucua̱j uxrá yoꞌ, ne̱ ase vaa ꞌo̱ neê espadá siha̱a̱ nu̱ꞌ niha̱ rihaan roꞌ, vaa yoꞌ, tza̱j ne̱ né ina̱nj cúú do̱ꞌ, nee̱ do̱ꞌ, me se aꞌneꞌ yoꞌ maꞌ. ꞌO̱ se aꞌneꞌ yoꞌ nda̱a nimán ya̱ níꞌ, ne̱ cheꞌé snana̱ Yaꞌanj yoꞌ roꞌ, uun nucua̱j Yaꞌanj xcaj Yaꞌanj cuentá da̱j uun rá níꞌ ne̱ da̱j uun nimán níꞌ chugua̱nj.

Santiago 1:18

Guun rá soꞌ gu̱un taꞌni̱j soꞌ man níꞌ, ga̱a ne̱ cuno níꞌ snana̱ soꞌ nana̱ ya̱, quiꞌyaj soꞌ, ne̱ cheꞌé dan guun taꞌni̱j soꞌ man níꞌ ga̱a asino ya̱a̱n, ga̱a ne̱ vaa güii naquiꞌya̱j sa̱ꞌ soꞌ man cunuda̱nj nij rasu̱u̱n quiꞌyaj soꞌ a.

1 Pedro 1:25

Tza̱j ne̱ daj chiha̱a̱ míj se̱ navij snana̱ Síí ꞌNi̱j Raꞌa man níꞌ maꞌ. Da̱nj taj nana̱ no̱ rihaan Danj Yaꞌanj, ne̱ snana̱ Yaꞌanj yoꞌ me nana̱ sa̱ꞌ nataꞌ núj rihaan soj ado̱nj.

1 Pedro 1:3

Cata̱j níꞌ se vaa ina̱nj sa̱ꞌ uxrá vaa Yaꞌanj Rej Jesucristó Si̱j ꞌNi̱j Raꞌa man níꞌ á. Cheꞌé se ꞌe̱e̱ uxrá rá Yaꞌanj niꞌya̱j soꞌ man níꞌ, ne̱ naquiꞌyaj iꞌna̱ꞌ soꞌ man Jesucristó, yan caꞌnga̱a̱ naca̱ nimán níꞌ ne̱ uun ya̱ rá níꞌ se vaa ca̱yáán níꞌ rihaan soꞌ nu̱ꞌ cavii nu̱ꞌ caꞌanj ado̱nj.

1 Juan 3:9

Ne̱ ta̱ranꞌ nij síí caꞌngaa naca̱ nimán quiꞌyaj Yaꞌanj roꞌ, né ꞌo̱ ꞌyaj nij soꞌ cacunꞌ a̱ maꞌ. ꞌO̱ se Yaꞌanj me síí quiꞌyaj caꞌngaa naca̱ nimán nij soꞌ, ne̱ se̱ caꞌvee ꞌo̱ quiꞌya̱j nij soꞌ cacunꞌ, ese maꞌa̱n Yaꞌanj quiꞌyaj caꞌngaa naca̱ nimán nij soꞌ na̱nj ado̱nj.

1 Juan 5:18

Dan me se neꞌen níꞌ se vaa nu̱ꞌ nij síí caꞌngaa naca̱ nimán quiꞌyaj Yaꞌanj roꞌ, ne ꞌyaj nij soꞌ cacunꞌ a̱ maan ado̱nj. ꞌO̱ se tumé Taꞌníí Yaꞌanj man nij soꞌ, ne̱ se̱ caꞌvee quiꞌya̱j chiꞌi̱i̱ Síí Chre̱e man nij soꞌ a̱ maꞌ.