1 Corintios 9:18 - Triqui de San Juan Copala

¹⁸ Ne̱ me se na̱ruꞌvee Yaꞌanj rihanj, rá soj ga̱. ꞌO̱ se ina̱nj caꞌve̱j rá Yaꞌanj rque̱ u̱u̱n ꞌu̱nj nana̱ sa̱ꞌ rihaan yuvii̱, ne̱ cuno̱ u̱u̱n yuvii̱ nana̱ sa̱ꞌ cheꞌé Cristó caꞌmi̱i̱ natáj ꞌu̱nj, ne̱ se̱ rqué yuvii̱ saꞌanj rihanj maꞌ. Ma̱an se cuno̱ u̱u̱n nij yuvii̱, ne̱ se lu̱j rqué Yaꞌanj manj me nana̱ yoꞌ, ne̱ se̱ naruꞌvee yuvii̱ rihanj maꞌ.

1 Corintios 9:18 ပူးပေါင်းရင်းမြစ်များ

San Juan 4:36

Naruꞌvee Yaꞌanj rihaan nij síí rii naa̱ yoꞌ, ne̱ naquiꞌyaj chre̱ꞌ ndoꞌo nij soꞌ man nij síí ca̱yáán ga̱ Yaꞌanj nu̱ꞌ cavii nu̱ꞌ caꞌanj, ne̱ rej riha̱a̱n gu̱un niha̱ꞌ rá síí cunô ga̱ síí rii naa̱ ado̱nj.

Hechos 18:3

ne̱ cheꞌé se cuya̱a̱n vaa suun ꞌyaj suun Pabló ga̱ suun ꞌyaj suun ro̱j soꞌ roꞌ, cheꞌé dan caranꞌ Pabló ga̱ ro̱j soꞌ, ne̱ quiꞌyaj suun soꞌ ga̱ ro̱j soꞌ a.

Romanos 14:15

Sese yuꞌva̱ꞌ cha̱ꞌ ꞌo̱ rasu̱u̱n rá tinúú so̱ꞌ, ne̱ sese cha̱ so̱ꞌ man yoꞌ, ne̱ gu̱un rá soꞌ cha̱ soꞌ uún, ne̱ dan me se cha̱ soꞌ, ga̱a ne̱ quira̱nꞌ soꞌ cacunꞌ, qui̱ꞌyáá so̱ꞌ á. Sese da̱nj qui̱ꞌyáá so̱ꞌ, ne̱ né si̱j ꞌe̱e̱ rá man tinúú mé so̱ꞌ ga̱a a̱ maꞌ. Se̱ caꞌvej rá so̱ꞌ quira̱nꞌ tinúú so̱ꞌ cacunꞌ cheꞌé se chá chá so̱ꞌ maꞌ. ꞌO̱ se neꞌén so̱ꞌ se vaa caviꞌ Cristó cheꞌé maꞌa̱n tinúú so̱ꞌ ado̱nj.

1 Corintios 10:33

Ina̱nj da̱nj ꞌyaj ma̱ꞌanj, ne̱ nu̱ꞌ se vaa me rá ꞌo̱ ꞌo̱ taꞌa̱j yuvii̱ qui̱ꞌyáá ꞌu̱nj roꞌ, ꞌyáá ꞌu̱nj, ne̱ ne ꞌyáá ꞌu̱nj ina̱nj se me raj ma̱ꞌanj qui̱ꞌyáj maꞌ. ꞌO̱ se ꞌyáá ꞌu̱nj nda̱a vaa me rá nij yuvii̱ na̱nj ado̱nj. ꞌO̱ se nanóꞌ ꞌu̱nj chrej cavi̱i̱ sa̱ꞌ cunuda̱nj nij yuvii̱ doj, ga̱a ne̱ nani̱i̱ nij soꞌ rihaan sayuun cheꞌé se sa̱ꞌ yoꞌ ado̱nj. Ina̱nj da̱nj quiꞌya̱j soj á.

1 Corintios 3:8

Ne̱ ꞌo̱ cuya̱a̱n vaa ꞌu̱nj ga̱ síí cuꞌna̱j Apolos, ne̱ vaa güii na̱ruꞌvee Yaꞌanj rihaan rój cheꞌé suun ꞌyaj ꞌo̱ ꞌo̱ rój,

1 Corintios 7:31

Ne̱ síí ꞌyaj suun ga̱ chumii̱ nihánj roꞌ, ase vaa síí ne achiin chumii̱ nihánj rihaan roꞌ, da̱nj ga̱a̱ soꞌ á. ꞌO̱ se va̱j navi̱j chumii̱ nihánj, ne̱ ino̱ uxrá ga̱a̱ chumii̱ nihánj vaa güii na̱nj á.

1 Corintios 8:9

Nda̱ꞌ se caꞌve̱e cha̱ soj me maꞌa̱n rasu̱u̱n, tza̱j ne̱ ta̱dó soj se vaa ma̱an cheꞌé se chá quiꞌya̱j tinúú soj cacunꞌ, quiꞌya̱j soj á.

1 Corintios 9:12

Sese no̱ xcúún ꞌó yuvii̱ cha̱ nij soꞌ se vaa rqué soj rihaan nij soꞌ, ne̱ táá a̱ núj, ne̱ doj a̱ no̱ xcúún núj cha̱ núj se vaa rqué soj rihaan núj, raj a. Tza̱j ne̱ ne achíín núj se chá rihaan soj maꞌ. ꞌO̱ se chuꞌviꞌ núj se vaa gu̱un rá yuvii̱ se vaa aꞌmii natáj núj nana̱ sa̱ꞌ cheꞌé Cristó cheꞌé saꞌanj do̱ꞌ, cheꞌé se chá do̱ꞌ, ne̱ se̱ cuchumán rá nij yuvii̱ cuno̱ nij yuvii̱ nana̱ sa̱ꞌ yoꞌ, rá núj maꞌ. ꞌO̱ se aꞌvej rá núj quira̱nꞌ núj me maꞌa̱n sayuun cheꞌé nana̱ sa̱ꞌ yoꞌ na̱nj ado̱nj.

1 Corintios 9:15

Tza̱j ne̱ a̱ ꞌó güii ne qui̱ꞌyáj da̱nj maꞌ. Né cheꞌe̱ se me raj rque̱ soj rasu̱u̱n rihanj me cachronj nana̱ nihánj maꞌ. ꞌO̱ se nda̱ꞌ se cavij, tza̱j ne̱ se̱ guun raj daj chiha̱a̱ míj rque̱ soj saꞌanj manj maꞌ. Sese ta̱ꞌaa ꞌu̱nj saꞌanj, ne̱ cata̱j yuvii̱ se vaa tuꞌva rma̱ꞌán ꞌu̱nj taj ꞌu̱nj se vaa se̱ taꞌaa ꞌu̱nj saꞌanj cheꞌé se‑su̱u̱n ꞌu̱nj, ne̱ cheꞌé dan daj chiha̱a̱ míj se̱ quiꞌyáj da̱nj maꞌ.

1 Corintios 9:17

Sese gu̱un niha̱ꞌ raj qui̱ꞌyáá ꞌu̱nj suun caꞌneꞌ Yaꞌanj rihanj, ne̱ na̱ruꞌvee Yaꞌanj rihanj a. Tza̱j ne̱ caꞌve̱e se ne ga̱a̱ niha̱ꞌ raj qui̱ꞌyáá ꞌu̱nj suun cheꞌé Yaꞌanj, tza̱j ne̱ daj chiha̱a̱ míj se̱ caꞌneꞌ raj ga̱ suun aꞌmii natáj nana̱ sa̱ꞌ maꞌ.

2 Corintios 4:5

Xa̱ꞌ núj, tza̱j ne̱ ne aꞌmii natáj núj cheꞌé maꞌa̱n núj maꞌ. Ina̱nj cheꞌé Jesucristó Si̱j ꞌNi̱j Raꞌa man níꞌ aꞌmii natáj núj, ne̱ taj núj se vaa cheꞌé se noco̱ꞌ núj man Jesús, ne̱ cheꞌé dan si̱j ꞌyaj se‑su̱u̱n Jesús rihaan soj me núj ado̱nj.

1 Tesalonicenses 2:6

Ne quiꞌya̱j núj da̱nj cheꞌé rej cata̱j soj do̱ꞌ, cata̱j ꞌó yuvii̱ do̱ꞌ, se vaa veꞌé ꞌyaj núj maꞌ. Nda̱ꞌ se Cristó me síí cuneꞌ man núj gu̱un núj síí caꞌa̱nj nata̱ꞌ snana̱ soꞌ, tza̱j ne̱ ne cachi̱nj núj rasu̱u̱n man soj maꞌ.