1 Corintios 6:11 - Triqui de San Juan Copala

¹¹ Dan me se da̱nj ina̱nj quiꞌyaj taꞌa̱j soj ga̱a rque̱, tza̱j ne̱ ya̱j me se xꞌnéj cacunꞌ ta̱j xráá soj, ne̱ cunuu sa̱ꞌ nimán soj, ne̱ cunuu nica̱ nimán soj rihaan Yaꞌanj, cheꞌé se‑chuvi̱i Jesús Si̱j ꞌNi̱j Raꞌa man níꞌ do̱ꞌ, cheꞌé Nimán Yaꞌanj si̱j noco̱ꞌ níꞌ man do̱ꞌ, cuano̱ ado̱nj.

1 Corintios 6:11 ပူးပေါင်းရင်းမြစ်များ

San Mateo 20:4

Ga̱a ne̱ cataj soꞌ rihaan nij soꞌ a: “Caꞌa̱nj soj quiꞌya̱j suun soj rihaan toꞌój, ne̱ na̱ruꞌvee ꞌu̱nj rihaan soj cheꞌé nu̱ꞌ suun quiꞌya̱j suun soj ado̱nj”, taj soꞌ rihaan nij mozó a. Dan me se caꞌanj nij snóꞌo yoꞌ quiꞌyaj suun nij soꞌ uún toꞌóó síí toꞌo̱j yoꞌ a.

San Lucas 18:14

’Ne̱ cuano̱ nihánj me se cata̱j xnaꞌanj ꞌu̱nj rihaan soj se vaa ga̱a quinanꞌ síí tihaꞌ yuꞌunj man yuvii̱ cheꞌé impuestó yoꞌ tucuá soꞌ, ga̱a ne̱ a̱j cunuu sa̱ꞌ nimán soꞌ rihaan Yaꞌanj na̱nj á. Tza̱j ne̱ ꞌó soꞌ roꞌ, taj maꞌ. ꞌO̱ se xa̱ꞌ síí me rá ta̱cavii sa̱ꞌ man maꞌa̱n, tza̱j ne̱ quiri̱ꞌ soꞌ, ne̱ gu̱un naꞌa̱j soꞌ a. Ne̱ xa̱ꞌ síí naquiꞌyaj nica̱ꞌ nimán, tza̱j ne̱ cavi̱i̱ sa̱ꞌ ndoꞌo soꞌ ado̱nj ―taj Jesús rihaan nij yuvii̱ yoꞌ a.

San Juan 13:10

Ga̱a ne̱ cataj Jesús rihaan soꞌ a: ―Xa̱ꞌ síí a̱j cane, tza̱j ne̱ taj cheꞌé naꞌnu̱ꞌ nii man nu̱ꞌ nee̱ man soꞌ maꞌ. ꞌO̱ se a̱j naruvii man soꞌ na̱nj á. Ma̱an se ina̱nj tacóó soꞌ naꞌnu̱ꞌ nii na̱nj ado̱nj. Ne̱ nda̱ꞌ se a̱j naruvii man taꞌa̱j soj, tza̱j ne̱ né ta̱ranꞌ soj me síí naruvii man maꞌ ―taj Jesús a.

San Juan 13:8

―Daj chiha̱a̱ míj se̱ guun naꞌnu̱ꞌ so̱ꞌ tacój a̱ maꞌ ―taj Pedró rihaan Jesús a. Ga̱a ne̱ cataj Jesús rihaan Pedró a: ―Tza̱j ne̱ sese se̱ naꞌnúꞌ ꞌu̱nj tacóó so̱ꞌ, ne̱ se̱ caꞌvee guún so̱ꞌ tuvíꞌ ꞌu̱nj maꞌ ―taj Jesús rihaan Pedró a.

San Juan 5:4

Dan me se nda̱a vaa orá nanij ꞌo̱ se‑mo̱zó Síí ꞌNi̱j Raꞌa man níꞌ rá na yoꞌ, ne̱ tanica̱j soꞌ na yoꞌ, taj nij yuvii̱ yoꞌ a. Ne̱ ga̱a anica̱j na yoꞌ, ne̱ síí nanij asino ya̱a̱n rque na roꞌ, o̱rúnꞌ soꞌ güe̱j na̱j guun chiꞌii̱ xráá, taj uún nij yuvii̱ yoꞌ a.

Hechos 13:39

Cheꞌé Jesús me se cunuda̱nj yuvii̱ amán rá niꞌya̱j man soꞌ roꞌ, nuu sa̱ꞌ nimán nij soꞌ rihaan da̱j a̱ cacunꞌ ado̱nj. ꞌO̱ se cacunꞌ yoꞌ roꞌ, a̱ doj se̱ caꞌvee navi̱j yoꞌ quiꞌya̱j stucua̱nj Moisés a̱ maan ado̱nj.

Hechos 22:16

Ne̱ nihánj me se se̱ guun ra̱a̱n so̱ꞌ doj a̱ maꞌ. Ma̱an se na̱xuma̱a̱n so̱ꞌ, ne̱ cata̱ꞌ ne so̱ꞌ, ne̱ cachi̱nj ni̱ꞌyáá so̱ꞌ rihaan Jesús cheꞌé rej ti̱naruvii Yaꞌanj nu̱ꞌ cacunꞌ xráá so̱ꞌ á”, taj Ananías rihanj a.

Hechos 26:18

cheꞌé rej naxra̱ꞌ rihaan nij soꞌ ne̱ xca̱j nij soꞌ cuentá qui̱ꞌyáá so̱ꞌ ado̱nj. Ga̱a ne̱ ta̱náj xco̱ nij soꞌ rej rmi̱ꞌ rej uun chij Síí Chre̱e rihaan nij soꞌ, ne̱ ca̱nica̱j nij soꞌ rihaan Yaꞌanj rej ranga̱ꞌ rej gu̱un nucua̱j nij soꞌ xca̱j nij soꞌ cuentá a. Ga̱a ne̱ caꞌve̱e navi̱j nu̱ꞌ cacunꞌ tumé nij soꞌ, ne̱ caꞌve̱e cavi̱i̱ sa̱ꞌ nij soꞌ ga̱ nij síí cunuu sa̱ꞌ nimán rihaan Yaꞌanj, sese cuchuma̱n rá nij soꞌ ni̱ꞌyaj nij soꞌ mán ꞌu̱nj, qui̱ꞌyáá so̱ꞌ á”, taj Síí ꞌNi̱j Raꞌa man níꞌ rihanj a.

Romanos 3:24

ꞌO̱ se ma̱an cheꞌé se cunuu ꞌe̱e̱ rá Yaꞌanj man cunuda̱nj yuvii̱ ne̱ quiꞌyaj maꞌa̱n Yaꞌanj se lu̱j cheꞌé nij yuvii̱ me caꞌvee tinavij Yaꞌanj cacunꞌ tumé nij yuvii̱ ado̱nj. Dan me se caꞌnéé Yaꞌanj man Cristó Jesús rihaan chumii̱, cheꞌé rej caꞌne̱e̱ soꞌ cacunꞌ xráá nij síí amán rá niꞌya̱j man soꞌ,

Romanos 4:5

Tza̱j ne̱ sese ne ꞌyaj suun yuvii̱ rihaan Yaꞌanj, tza̱j ne̱ tana̱nj amán rá yuvii̱ niꞌya̱j yuvii̱ Yaꞌanj se vaa caꞌve̱e tinavi̱j Yaꞌanj cacunꞌ tumé yuvii̱, ne̱ cheꞌé dan taj Yaꞌanj se vaa síí sa̱ꞌ nimán me yuvii̱ yoꞌ na̱nj ado̱nj.

Romanos 5:1

Dan me se amán rá níꞌ neꞌen níꞌ Yaꞌanj, ne̱ cheꞌé dan navij cacunꞌ tumé níꞌ, ne̱ cunuu sa̱ꞌ nimán níꞌ rihaan Yaꞌanj, ne̱ cheꞌé dan me ne chuꞌviꞌ níꞌ ya̱j, cheꞌé se a̱j naꞌmii sa̱ꞌ níꞌ ga̱ Yaꞌanj quiꞌyaj Jesucristó Si̱j ꞌNi̱j Raꞌa man níꞌ ado̱nj.

Romanos 5:9

Cuano̱ me se a̱j cunuu sa̱ꞌ nimán níꞌ rihaan Yaꞌanj, cheꞌé se cayanj ton man Cristó ga̱a caviꞌ soꞌ, ne̱ cheꞌé dan neꞌen níꞌ se vaa ti̱nanii Cristó man níꞌ rihaan sayuun quiꞌya̱j Yaꞌanj güii cuya̱nj rá Yaꞌanj ni̱ꞌyaj Yaꞌanj man yuvii̱ tumé cacunꞌ ado̱nj.

Romanos 8:30

Ga̱a ne̱ canacúún Yaꞌanj man níꞌ, ga̱a ne̱ cunuu sa̱ꞌ níꞌ rihaan Yaꞌanj, quiꞌyaj Yaꞌanj, ga̱a ne̱ ya̱ niꞌndaj ya̱ veꞌé ga̱a̱ níꞌ, quiꞌya̱j maꞌa̱n Yaꞌanj ado̱nj.

Romanos 8:33

Níꞌ si̱j narii Yaꞌanj man me se se̱ guun cuta̱ꞌ yuvii̱ cacunꞌ xráá níꞌ rihaan Yaꞌanj maꞌ. ꞌO̱ se maꞌa̱n Yaꞌanj cataj se vaa cunuu sa̱ꞌ níꞌ rihaan soꞌ chugua̱nj.

1 Corintios 1:2

ne̱ ꞌyaj núj yanj nihánj caꞌne̱j núj rihaan nij soj xꞌneꞌ nij síí noco̱ꞌ man Yaꞌanj ya̱nj chumanꞌ Corinto a. Dan me se narii Yaꞌanj man soj canoco̱ꞌ soj man Cristó Jesús, ne̱ canacúún Yaꞌanj man soj gu̱un soj síí nuu sa̱ꞌ nimán a. Ne̱ veé yanj nihánj caꞌne̱j cuchi̱ꞌ rihaan cunuda̱nj ꞌó nij síí ya̱nj me rej maꞌa̱n síí ataꞌ tuꞌva̱ se‑chuvi̱i Jesucristó Si̱j ꞌNi̱j Raꞌa man níꞌ a. Dan me se Síí ꞌNi̱j Raꞌa man nij soꞌ ne̱ Síí ꞌNi̱j Raꞌa man maꞌa̱n ya̱ níꞌ me ya̱ soꞌ a.

1 Corintios 1:30

Dan me se Yaꞌanj me síí ꞌyaj ꞌni̱j raꞌa Cristó Jesús man soj, ne̱ cheꞌé o̱rúnꞌ soꞌ avii raa̱ níꞌ do̱ꞌ, cunuu sa̱ꞌ nimán níꞌ rihaan Yaꞌanj do̱ꞌ, guun níꞌ síí sa̱ꞌ rihaan Yaꞌanj do̱ꞌ, nanii níꞌ rihaan sayuun do̱ꞌ, quiꞌyaj Yaꞌanj á.

1 Corintios 12:2

Neꞌen soj se vaa ga̱a ataa canoco̱ꞌ soj man Yaꞌanj, ne̱ náá quiꞌyaj rmaꞌa̱n nii man soj, tihaꞌ yuꞌunj nii man soj, ne̱ chéé soj rihaan yaꞌanj yaꞌmi̱i quiꞌyaj maꞌa̱n yuvii̱ na̱nj á.

Gálatas 2:16

Tza̱j ne̱ neꞌen níꞌ se vaa nda̱ꞌ se veꞌé nocoꞌ ꞌo̱ soꞌ stucua̱nj Moisés, tza̱j ne̱ se̱ cunuu sa̱ꞌ maꞌa̱n soꞌ rihaan Yaꞌanj maꞌ. ꞌO̱ se cunu̱u sa̱ꞌ ya̱ soꞌ rihaan Yaꞌanj sese cuchuma̱n rá soꞌ ni̱ꞌyaj soꞌ man Cristó ado̱nj. Dan me se cuchumán rá maꞌa̱n níꞌ niꞌya̱j níꞌ man Cristó Jesús, yan cunu̱u sa̱ꞌ níꞌ rihaan Yaꞌanj, tza̱j ne̱ se̱ cunuu sa̱ꞌ níꞌ, quiꞌya̱j stucua̱nj Moisés maꞌ. Ina̱nj da̱nj taj Danj Yaꞌanj á. A̱ ꞌó yuvii̱ se̱ cunuu sa̱ꞌ rihaan Yaꞌanj quiꞌya̱j stucua̱nj Moisés maꞌ, taj uún Danj Yaꞌanj ado̱nj.

Gálatas 3:11

Tza̱j ne̱ taj Danj Yaꞌanj a: “Síí a̱j cunuu sa̱ꞌ nimán rihaan Yaꞌanj roꞌ, ꞌo̱ amán rá soꞌ niꞌya̱j soꞌ Yaꞌanj ga̱a vaa iꞌna̱ꞌ soꞌ ado̱nj”, taj Danj Yaꞌanj uún a. Ne̱ cheꞌé dan me neꞌen níꞌ se vaa ina̱nj nij yuvii̱ amán rá niꞌya̱j man Yaꞌanj me yuvii̱ cunu̱u sa̱ꞌ rihaan Yaꞌanj á. Se̱ cunuu sa̱ꞌ nij yuvii̱ nucua̱j rá man stucua̱nj Moisés maꞌ.

Gálatas 3:24

Dan me se ase vaa síí tumé man xnii da̱j quiꞌya̱j xnii roꞌ, taꞌngaꞌ da̱nj vaa stucua̱nj Moisés rihaan níꞌ ga̱a rque̱, tumé yoꞌ man níꞌ nda̱a se caꞌnaꞌ Cristó ado̱nj. Nda̱a síj, ga̱a ne̱ no̱ xcúún níꞌ cuchuma̱n rá níꞌ ni̱ꞌyaj níꞌ man soꞌ, ne̱ caꞌve̱e cunu̱u sa̱ꞌ níꞌ rihaan Yaꞌanj ado̱nj.

Gálatas 3:8

Dan me se ga̱a naá neꞌen Yaꞌanj se vaa cuchuma̱n rá nij yuvii̱ yaníj ni̱ꞌyaj nij soꞌ man Yaꞌanj, ne̱ neꞌen Yaꞌanj se vaa cunu̱u sa̱ꞌ nij soꞌ rihaan Yaꞌanj, quiꞌya̱j maꞌa̱n Yaꞌanj, ne̱ cheꞌé dan me nataꞌ Yaꞌanj snana̱ Yaꞌanj nana̱ sa̱ꞌ rihaan Abraham, cataj Yaꞌanj a: “Cheꞌé se vaa quiꞌyáá so̱ꞌ roꞌ, cheꞌé dan me qui̱ꞌyáá ꞌu̱nj se lu̱j cheꞌé ta̱ranꞌ nij xꞌneꞌ yuvii̱ ino̱ vaa stucua̱nj ma̱n rihaan chumii̱ ado̱nj”, taj Yaꞌanj rihaan Abraham asi̱j taj va̱j a̱ ꞌó yuvii̱ neꞌen snana̱ Yaꞌanj nana̱ sa̱ꞌ, ne̱ nu̱ꞌ nana̱ yoꞌ nana̱ caꞌmii Yaꞌanj rihaan Abraham roꞌ, canó nana̱ yoꞌ rihaan Danj Yaꞌanj a.

Efesios 5:26

cheꞌé se me rá soꞌ naquiꞌya̱j sa̱ꞌ soꞌ nimán ta̱ranꞌ níꞌ si̱j noco̱ꞌ man soꞌ ado̱nj. Da̱j se vaa naruvii man níꞌ ꞌyaj na roꞌ, da̱nj naꞌnuꞌ snana̱ Yaꞌanj nimán níꞌ ne̱ xꞌnéj cacunꞌ ta̱j xráá níꞌ a.

Efesios 5:8

Asi̱j rque̱ roꞌ, ase vaa nij síí chéé rej rmi̱ꞌ roꞌ, da̱nj vaa maꞌa̱n soj, ne̱ nuviꞌ cuentá nica̱j soj maꞌ. Tza̱j ne̱ ya̱j roꞌ, canocoꞌ soj man Síí ꞌNi̱j Raꞌa man níꞌ, ne̱ cheꞌé dan ase vaa síí chéé rej ranga̱ꞌ roꞌ, da̱nj vaa soj, nica̱j ndoꞌo soj cuentá, ne̱ cheꞌé dan veꞌé quiꞌya̱j soj ga̱a chéé soj rihaan chumii̱ nihánj na̱nj á.

2 Tesalonicenses 2:13

Tza̱j ne̱ no̱ xcúún núj niga̱nj cata̱j núj guun niꞌya̱j níꞌ rihaan Yaꞌanj cheꞌé soj si̱j ꞌe̱e̱ rá Síí ꞌNi̱j Raꞌa man níꞌ man, tinu̱j, nocoj. ꞌO̱ se asi̱j tacoo narii Yaꞌanj man soj cunu̱u sa̱ꞌ nimán soj rihaan soꞌ quiꞌya̱j Nimán Yaꞌanj, ne̱ cuchuma̱n rá soj cuno̱ soj nana̱ ya̱ ado̱nj.

Hebreos 10:22

Cheꞌé dan vaa yaꞌnúj rihaan níꞌ cuchi̱ꞌ níꞌ rihaan Yaꞌanj, ne̱ cheꞌé se amán rá níꞌ niꞌya̱j níꞌ man Cristó, cheꞌé dan gu̱un ya̱ uxrá rá níꞌ se vaa caꞌve̱e canoco̱ꞌ sa̱ꞌ níꞌ man Yaꞌanj a. Cheꞌé se quisíj nanó rá níꞌ cheꞌé cacunꞌ tumé níꞌ, ne̱ cunuu sa̱ꞌ ya̱ nimán níꞌ, ga̱a canocoꞌ níꞌ man Cristó na̱nj chugua̱nj. Ne̱ síí naruvii rihaan Yaꞌanj me níꞌ, da̱j se vaa yuvii̱ naruvii nu̱ꞌ nee̱ man rque na sa̱ꞌ na̱nj ado̱nj.

Hebreos 10:29

Ne̱ nij uxrá doj ga̱a̱ sayuun quira̱nꞌ síí ta̱j riꞌyunj man maꞌa̱n Taꞌníí Yaꞌanj ado̱nj. ꞌO̱ se ton man Cristó roꞌ, quiꞌyaj cunuu sa̱ꞌ nimán níꞌ rihaan Yaꞌanj ne̱ ꞌo̱ canocoꞌ níꞌ chrej sa̱ꞌ cuchruj Yaꞌanj cheꞌé níꞌ ado̱nj. Tza̱j ne̱ taj yuꞌvee nó ton yoꞌ, rá nij síí tanáj xco̱ snana̱ Cristó a̱ maꞌ. Ne̱ qui̱j aꞌmii nij soꞌ rihaan Nimán Yaꞌanj síí quiꞌyaj ndoꞌo se lu̱j cheꞌé níꞌ ado̱nj.

Hebreos 2:11

Dan me se Taꞌni̱j Yaꞌanj me Jesús si̱j naquiꞌyaj sa̱ꞌ nimán yuvii̱, ne̱ taꞌni̱j Yaꞌanj me níꞌ yuvi̱i̱ cunuu sa̱ꞌ nimán rihaan Yaꞌanj cheꞌé Jesús, ne̱ cheꞌé dan ne gu̱un naꞌa̱j Jesús cata̱j soꞌ se vaa tinúú soꞌ do̱ꞌ, raꞌvij soꞌ do̱ꞌ, me níꞌ maꞌ.

1 Pedro 1:2

Asi̱j naá queneꞌen Rej níꞌ Yaꞌanj se vaa canoco̱ꞌ soj man soꞌ, ne̱ cheꞌé dan narii soꞌ man soj, ga̱a ne̱ guun cheꞌe̱ soj canocoꞌ soj man o̱rúnꞌ Yaꞌanj, quiꞌyaj Nimán Yaꞌanj, cheꞌé se me rá soꞌ cuno̱ soj rihaan soꞌ, ne̱ me rá soꞌ cunu̱u sa̱ꞌ nimán soj quiꞌya̱j ton cayanj man Jesucristó ga̱a caviꞌ soꞌ cheꞌé níꞌ a. Me rá ꞌu̱nj quiꞌya̱j ndoꞌo Yaꞌanj se lu̱j cheꞌé soj, ne̱ ga̱a̱ xe̱j ndoꞌo nimán soj quiꞌya̱j Yaꞌanj a.

1 Pedro 1:22

Dan me se uno soj snana̱ Yaꞌanj nana̱ ya̱, ne̱ cheꞌé dan cunuu sa̱ꞌ nimán soj, ne̱ cheꞌé dan no̱ xcúún soj ga̱a̱ ꞌe̱e̱ rá soj man tuviꞌ soj ado̱nj. Se̱ cataj rmaꞌa̱n soj se vaa ꞌe̱e̱ rá soj man tuviꞌ soj maꞌ. Ya̱ ga̱a̱ ꞌe̱e̱ ndoꞌo rá soj man tuviꞌ soj á.

1 Pedro 3:21

Ne̱ veé na me se ꞌyaj nanii níꞌ rihaan sayuun yoꞌ ya̱j ado̱nj. Na ataꞌ ne níꞌ me yoꞌ chugua̱nj. Né cheꞌe̱ rej güe̱j nacaj xráá níꞌ cataꞌ ne níꞌ maꞌ. Cheꞌé se cataj níꞌ rihaan Yaꞌanj se vaa guun rá níꞌ se vaa navi̱j chrej chiꞌi̱i̱ uun chij nimán níꞌ ne̱ ina̱nj se sa̱ꞌ guun rá níꞌ quiꞌya̱j níꞌ rej rihaan níꞌ me se cheꞌé dan cataꞌ ne níꞌ ado̱nj. Ne̱ ina̱nj cheꞌé se cunuu iꞌna̱ꞌ uún Jesucristó ga̱a caviꞌ soꞌ roꞌ, cheꞌé dan caꞌve̱e nani̱i̱ níꞌ si̱j cataꞌ ne rihaan sayuun ne̱ cavi̱i̱ sa̱ꞌ níꞌ chugua̱nj.

1 Juan 2:12

Dan me se achrón ꞌu̱nj nu̱ꞌ nana̱ nihánj naya̱a̱ soj xni̱i, cheꞌé se navij cacunꞌ tumé soj rihaan Yaꞌanj cheꞌé se noco̱ꞌ soj man Cristó ado̱nj.

Apocalipsis 7:14

Ga̱a ne̱ cataj ꞌu̱nj rihaan soꞌ a: ―Ne neꞌén ꞌu̱nj me síí me nij soꞌ, maan señor. Tza̱j ne̱ so̱ꞌ me síí neꞌen, raj a ―taj ꞌu̱nj rihaan soꞌ a. Ga̱a ne̱ cataj soꞌ rihanj a: ―Nij síí nihánj roꞌ, me nij síí cachén rihaan queꞌe̱e̱ ndoꞌo sayuun, ga̱a guun sayuun noco̱o rihaan chumii̱ ado̱nj. Ne̱ quináán nij soꞌ saga̱nꞌ nij soꞌ, ne̱ cunuu catzi̱i̱ saga̱nꞌ nij soꞌ, quiꞌyaj ton cayanj man Matzinj Leꞌe̱j ga̱a caviꞌ soꞌ cheꞌé nij soꞌ ado̱nj.