1 Corintios 3:13 - Triqui de San Juan Copala

¹³ Dan me se vaa güii queneꞌe̱n níꞌ da̱j vaa se‑su̱u̱n ꞌo̱ ꞌo̱ nij síí ꞌyaj se‑su̱u̱n Yaꞌanj, cheꞌé se caꞌna̱ꞌ uún Cristó rihaan chumii̱ nihánj, ne̱ naquiꞌya̱j cu̱u soꞌ cheꞌé suun quiꞌyaj ꞌo̱ ꞌo̱ núj, ne̱ da̱j se vaa yaꞌan ꞌyaj acaa veꞌ roꞌ, da̱nj quiꞌya̱j soꞌ, ne̱ queneꞌe̱n núj da̱j vaa suun quiꞌyaj ꞌo̱ ꞌo̱ núj na̱nj ado̱nj.

1 Corintios 3:13 ပူးပေါင်းရင်းမြစ်များ

San Mateo 10:15

Ya̱ ya̱ cata̱j xnaꞌanj ꞌu̱nj rihaan soj se vaa güii caꞌne̱ꞌ ꞌu̱nj cacunꞌ cheꞌé nij yuvii̱, ga̱a ne̱ quira̱nꞌ yuvii̱ ma̱n chumanꞌ yoꞌ doj sayuun rihaan nij síí chiꞌi̱i̱ cumán chumanꞌ Sodoma do̱ꞌ, rihaan yuvii̱ cumán chumanꞌ Gomorra do̱ꞌ ado̱nj.

San Mateo 16:27

’ꞌO̱ se ya̱ ya̱ caꞌna̱ꞌ ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱, ne̱ niꞌndaj ya̱ sa̱ꞌ veꞌé ga̱a̱ ꞌu̱nj, quiꞌya̱j Réé ꞌu̱nj, ne̱ caꞌna̱ꞌ nij se‑mo̱zó soꞌ ga̱ ꞌu̱nj na̱nj ado̱nj. Ga̱a ne̱ na̱ruꞌvee ꞌu̱nj rihaan ꞌo̱ ꞌo̱ soꞌ cheꞌé se vaa quiꞌyaj ꞌo̱ ꞌo̱ soꞌ na̱nj ado̱nj.

San Lucas 2:35

Ne̱ xa̱ꞌ so̱ꞌ, tza̱j ne̱ nano̱ ndoꞌo rá nimán ma̱ꞌán so̱ꞌ cheꞌé se vaa quira̱nꞌ soꞌ vaa güii na̱nj á. Dan me se caꞌve̱e xca̱j níꞌ cuentá da̱j vaa nimán queꞌe̱e̱ uxrá yuvii̱, quiꞌya̱j soꞌ ado̱nj ―taj Simeón rihaan Mariá a.

Romanos 2:16

Ne̱ da̱nj ga̱a̱ caꞌne̱ꞌ Yaꞌanj cacunꞌ cheꞌé nij soꞌ güii caꞌne̱ꞌ Yaꞌanj cacunꞌ cheꞌé nimán yuvii̱ á. Da̱nj taj nana̱ sa̱ꞌ cheꞌé Cristó aꞌmii natáj ꞌu̱nj rihaan yuvii̱ na̱nj á.

Romanos 2:5

Tza̱j ne̱ veé dan me se naꞌvej uxrá rá so̱ꞌ ta̱náj so̱ꞌ chrej noco̱ꞌ so̱ꞌ, ne̱ naꞌvej rá so̱ꞌ nuchra̱nꞌ nimán so̱ꞌ ca̱nocóꞌ so̱ꞌ man Yaꞌanj maꞌ. Ne̱ vaa güii caꞌne̱ꞌ Yaꞌanj cacunꞌ cheꞌé yuvii̱, ne̱ caꞌmi̱i̱ ya̱ Yaꞌanj, ne̱ cuya̱nj rá Yaꞌanj ni̱ꞌyaj Yaꞌanj man cunuda̱nj nij síí tumé cacunꞌ, ne̱ dan me se cuya̱nj rá Yaꞌanj ni̱ꞌyaj Yaꞌanj man ma̱ꞌán so̱ꞌ uún ado̱nj.

1 Corintios 1:8

Ne̱ soꞌ me síí ra̱cuíj ndoꞌo man soj, ne̱ gu̱un nucua̱j soj canoco̱ꞌ xraan soj man soꞌ nda̱a güii caꞌne̱ꞌ Jesucristó Si̱j ꞌNi̱j Raꞌa man níꞌ cacunꞌ cheꞌé yuvii̱, ne̱ se̱ tumé soj cacunꞌ, quiꞌya̱j soꞌ a̱ maꞌ.

1 Corintios 3:12

Dan me se ꞌó nij yuvii̱ ꞌyaj se‑su̱u̱n Yaꞌanj chiháán soj roꞌ, taꞌa̱j nij soꞌ veꞌé ꞌyaj suun nij soꞌ, ne̱ da̱j se vaa síí ꞌyaj veꞌ ne̱ rásuun nij soꞌ agaꞌ oró do̱ꞌ, agaꞌ platá do̱ꞌ, yuvej tuꞌve̱e̱ ndoꞌo do̱ꞌ, vaa nij soꞌ a. Ne̱ ꞌó taꞌa̱j nij síí ꞌyaj suun roꞌ, da̱j se vaa síí ꞌyaj veꞌ ne̱ rásuun nij soꞌ chruun do̱ꞌ, cuya̱ꞌ do̱ꞌ, rmíí do̱ꞌ, vaa nij soꞌ a.

1 Corintios 4:5

Cheꞌé dan se̱ guun naquiꞌya̱j cu̱u soj cheꞌé yuvii̱ maꞌ. Ma̱an se na̱ꞌvi̱j soj caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj na̱nj á. Cuano̱ nihánj me se ne neꞌen sa̱ꞌ níꞌ da̱j vaa ꞌyaj ꞌo̱ ꞌo̱ yuvii̱, tza̱j ne̱ asa̱ꞌ caꞌnaꞌ Síí ꞌNi̱j Raꞌa man níꞌ, ne̱ ti̱haa̱n soꞌ rihaan níꞌ da̱j vaa rá nimán ꞌo̱ ꞌo̱ yuvii̱ ma̱n rihaan chumii̱ nihánj, ne̱ sese sa̱ꞌ vaa rá nimán ꞌo̱ soꞌ, ne̱ maꞌa̱n Yaꞌanj cata̱j se vaa sa̱ꞌ quiꞌyaj soꞌ ado̱nj.

2 Timoteo 1:12

Ma̱an cheꞌé dan ránꞌ ꞌu̱nj sayuun nihánj cuano̱, tza̱j ne̱ ne naꞌa̱j ꞌu̱nj a̱ doj se vaa ránꞌ ꞌu̱nj maꞌ. ꞌO̱ se neꞌén ꞌu̱nj se vaa Yaꞌanj me síí cuchumán raj niꞌya̱j ꞌu̱nj man, ne̱ guun ya̱ raj se vaa uun nucua̱j soꞌ tu̱mé soꞌ manj qui̱ꞌyáj nu̱ꞌ suun caꞌneꞌ soꞌ rihanj a. Ne̱ da̱nj ina̱nj quiꞌya̱j soꞌ, ra̱cuíj soꞌ manj nda̱a güii caꞌna̱ꞌ uún Cristó ado̱nj.

2 Timoteo 1:18

Me ndoꞌo raj ga̱a̱ ꞌe̱e̱ rá Síí ꞌNi̱j Raꞌa man níꞌ man soꞌ güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj a. Ne̱ so̱ꞌ me síí neꞌen doj rihanj se vaa racuíj ndoꞌo síí cuꞌna̱j Onesíforo mán ꞌu̱nj ga̱a cayáán soꞌ chumanꞌ Éfeso a.

2 Timoteo 3:9

Tza̱j ne̱ se̱ quisíj nij soꞌ xnaꞌa̱nj nana̱ chiꞌi̱i̱ yoꞌ nda̱a ga̱nꞌ ndoꞌo quiꞌya̱j nij soꞌ maꞌ. ꞌO̱ se cunuda̱nj nij yuvii̱ xca̱j cuentá se vaa si̱j nij snúú rmaꞌa̱n me nij soꞌ, ne̱ a̱ doj se̱ cuchumán rá nij yuvii̱ caꞌmi̱i̱ nij soꞌ a̱ maꞌ. ꞌO̱ se nda̱ꞌ rá se vaa quiranꞌ ro̱j síí cuꞌna̱j Janes ga̱ síí cuꞌna̱j Jambres ga̱a ne cuchuma̱n rá yuvii̱ caꞌmii ro̱j soꞌ roꞌ, da̱nj quira̱nꞌ nij síí chiꞌi̱i̱ yoꞌ ado̱nj.

2 Timoteo 4:8

Ne̱ cuano̱ nihánj me se ma̱an se naꞌvi̱j ꞌu̱nj quisi̱j güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj, ne̱ rque̱ soꞌ ꞌo̱ cachriin yâj cu̱nuû raá ꞌu̱nj, ne̱ cata̱j soꞌ se vaa nuviꞌ cacunꞌ ta̱j xráj a. Dan me se cuese̱ nica̱ nimán ya̱ me Síí ꞌNi̱j Raꞌa man níꞌ, ne̱ né cheꞌe̱ ina̱nj ma̱ꞌán ꞌu̱nj me quiꞌya̱j soꞌ da̱nj maꞌ. Ne̱ veé da̱nj quiꞌya̱j soꞌ cheꞌé cunuda̱nj nij yuvii̱ me ndoꞌo rá caꞌna̱ꞌ uún soꞌ rihaan chumii̱ nihánj na̱nj ado̱nj.

Hebreos 10:25

Ne̱ se̱ tanáj níꞌ tucuáán nuu chre̱ꞌ níꞌ ga̱ tinúú níꞌ maꞌ. ꞌO̱ se vaa yuvii̱ ne nocoꞌ tucuáán yoꞌ, tza̱j ne̱ no̱ xcúún soj nago̱ꞌ soj chrej nucua̱j man tinúú soj ga̱a nuu chre̱ꞌ soj á. Ne̱ ya̱j roꞌ, doj a̱ cunu̱u chre̱ꞌ soj, cheꞌé se neꞌen soj se vaa nichrunꞌ quisi̱j güii caꞌna̱ꞌ uún Cristó rihaan chumii̱ nihánj na̱nj ado̱nj.

1 Pedro 1:7

Dan me se agaꞌ oró míí me se se ma̱n u̱u̱n rihaan chumii̱ nihánj me yoꞌ, ne̱ vaa güii caꞌa̱nj niꞌya̱ yoꞌ, tza̱j ne̱ axríj yaꞌan nii man agaꞌ oró míí yoꞌ, cheꞌé se me rá nii xca̱j nii cuentá sese agaꞌ sa̱ꞌ me yoꞌ niꞌ, ase agaꞌ nij me yoꞌ a. Ne̱ ase vaa yaꞌan rihaan agaꞌ oró míí yoꞌ roꞌ, da̱nj vaa sayuun rihaan soj, ne̱ cheꞌé sayuun ranꞌ soj roꞌ, cheꞌé dan acaj níꞌ cuentá sese ya̱ ya̱ amán rá soj niꞌya̱j soj man Yaꞌanj niꞌ, ase ꞌyaj rmaꞌa̱n soj a. Tza̱j ne̱ sa̱ꞌ doj vaa soj rihaan agaꞌ oró míí yoꞌ, ne̱ daj chiha̱a̱ míj se̱ caꞌanj niꞌya̱ soj, sese amán ya̱ rá soj niꞌya̱j soj man Yaꞌanj maꞌ. Dan me se cheꞌé se amán rá soj, ne̱ sa̱ꞌ uxrá caꞌmi̱i̱ nii do̱ꞌ, niꞌndaj ya̱ veꞌé caꞌmi̱i̱ nii do̱ꞌ, veꞌé caꞌmi̱i̱ cochro̱j nii do̱ꞌ, ni̱ꞌyaj nii man Yaꞌanj, asa̱ꞌ curuviꞌ uún Jesucristó chugua̱nj.

1 Pedro 4:12

Tinu̱j, nocoj, se̱ caꞌanj rá soj cheꞌé sayuun quira̱nꞌ soj maꞌ. Ya̱ quira̱nꞌ ndoꞌo soj sayuun, cheꞌé rej caꞌve̱e xca̱j soj cuentá sese si̱j amán ya̱ rá niꞌya̱j man Yaꞌanj me soj chugua̱nj. Ne̱ se̱ guun rá soj se vaa o̱rúnꞌ soj me síí ranꞌ sayuun maꞌ.

2 Pedro 3:10

Tza̱j ne̱ ta̱j niꞌyo̱n quisi̱j güii caꞌne̱ꞌ Yaꞌanj cacunꞌ cheꞌé yuvii̱ ado̱nj. Dan me se ca̱ri̱i̱n ndoꞌo caꞌa̱nj niꞌya̱ xta̱ꞌ, ne̱ navi̱j nu̱ꞌ nij se ma̱n rej xta̱ꞌ caca̱a̱, ne̱ caꞌa̱nj niꞌya̱ chumii̱ ga̱ nu̱ꞌ se ma̱n rihaan chumii̱ ado̱nj.

2 Pedro 3:7

Tza̱j ne̱ xta̱ꞌ ga̱ chumii̱ ma̱n níꞌ cuano̱ me se maꞌa̱n Yaꞌanj caꞌmii, ne̱ cataj Yaꞌanj se vaa quina̱j ro̱j yoꞌ nda̱a se quisi̱j güii caꞌne̱ꞌ Yaꞌanj cacunꞌ cheꞌé nij síí chiꞌi̱i̱, ga̱a ne̱ nu̱ꞌ cheꞌe̱ caca̱a̱ nij soꞌ chugua̱nj. Ne̱ güii yoꞌ me se caꞌne̱j Yaꞌanj yaꞌan, ne̱ caca̱a̱ nu̱ꞌ xta̱ꞌ ga̱ chumii̱ ma̱n níꞌ cuano̱, ne̱ caꞌa̱nj niꞌya̱ nu̱ꞌ yoꞌ ado̱nj.

Apocalipsis 20:12

Ga̱a ne̱ queneꞌén ꞌu̱nj man nij síí caviꞌ uún a. Dan me se síí sa̱ꞌ ata̱ suun do̱ꞌ, síí chéé maꞌa̱n do̱ꞌ, queneꞌén ꞌu̱nj, ne̱ nicunꞌ nij soꞌ rihaan síí ta̱j chruun xlá sa̱ꞌ xi̱j catzi̱i̱ yoꞌ a. Ga̱a ne̱ nuxraꞌ nii nij yanj libró a. Dan me se nuxraꞌ nij soꞌ man ꞌó yanj libró no̱ se‑chuvi̱i nij síí ga̱a̱ iꞌna̱ꞌ nu̱ꞌ cavii nu̱ꞌ caꞌanj ga̱ Yaꞌanj a. Dan me se caꞌneꞌ Yaꞌanj cacunꞌ cheꞌé nij síí caviꞌ yoꞌ, ne̱ niꞌya̱j soꞌ nana̱ no̱ rihaan nij yanj libró yoꞌ nana̱ taj xnaꞌanj nda̱a vaa quiꞌyaj nij soꞌ ga̱a vaa iꞌna̱ꞌ nij soꞌ rihaan chumii̱ a.