1 Corintios 16:13 - Triqui de San Juan Copala

¹³ ꞌO̱ tu̱mé soj man soj á. Raan canoco̱ꞌ soj man Jesucristó á. Ga̱a̱ nucua̱j nimán soj, ne̱ ꞌo̱ caꞌne̱j nimán soj quiꞌya̱j soj se‑su̱u̱n Yaꞌanj á.

1 Corintios 16:13 ပူးပေါင်းရင်းမြစ်များ

San Mateo 25:13

’Cheꞌé dan tu̱mé uxrá nij soj man soj á. ꞌO̱ se ne neꞌen soj me güii caꞌna̱ꞌ ꞌu̱nj ne neꞌen soj me orá caꞌna̱ꞌ ꞌu̱nj ne neꞌen soj maꞌ.

San Mateo 26:41

Ma̱an se ni̱ꞌyaj soj, ne̱ cachi̱nj niꞌya̱j soj rihaan Yaꞌanj se vaa ca̱ráán Yaꞌanj rihaan Síí Chre̱e se̱ caxríj Síí Chre̱e chrej chiꞌi̱i̱ rque soj á. ꞌO̱ se niha̱ꞌ rá soj quiꞌya̱j soj se sa̱ꞌ, tza̱j ne̱ ne gu̱un nucua̱j soj maꞌ ―taj Jesús rihaan nij soꞌ a.

San Lucas 21:36

Cheꞌé dan ꞌo̱ ni̱ꞌyaj soj, ne̱ xca̱j soj cuentá da̱j a̱ güii, ne̱ ina̱nj cachi̱nj niꞌya̱j soj rihaan Yaꞌanj se vaa caꞌve̱e nani̱i̱ soj rihaan nu̱ꞌ sayuun nihánj asa̱ꞌ gu̱un da̱nj rihaan chumii̱ nihánj a. Ga̱a ne̱ caꞌve̱e canicu̱nꞌ soj rihaan ꞌu̱nj Si̱j Caꞌnéé Yaꞌanj Ni̱caj Yuꞌunj man Yuvii̱ á ―taj Jesús a.

1 Corintios 14:20

Ga̱a̱ sca̱ꞌ raa̱ nij soj, tinu̱j, nocoj. Se̱ gaa raa̱ soj ase vaa raa̱ ꞌo̱ xnii maꞌ. Dan me se ase vaa neꞌej ataa nari̱ꞌ quiꞌya̱j cacunꞌ roꞌ, da̱nj ga̱a̱ soj, tza̱j ne̱ ga̱a̱ sca̱ꞌ raa̱ soj á.

1 Corintios 15:58

Neꞌen soj se vaa ꞌe̱e̱ raj man soj, tinu̱j, nocoj. Cheꞌé se vaa cataj ꞌu̱nj rihaan soj roꞌ, cheꞌé dan xraan canoco̱ꞌ soj man Cristó á. Se̱ caꞌneꞌ rá soj maꞌ. ꞌO̱ se niga̱nj quiꞌya̱j ndoꞌo soj se‑su̱u̱n Síí ꞌNi̱j Raꞌa man níꞌ á. Neꞌen soj se vaa suun ꞌyaj soj cheꞌé Síí ꞌNi̱j Raꞌa man níꞌ roꞌ, né su̱u̱n snúú rmaꞌa̱n me yoꞌ maꞌ.

2 Corintios 1:24

ꞌO̱ se ne me rá núj quiri̱i̱ taꞌngaꞌ núj rihaan soj da̱j quiꞌya̱j soj canoco̱ꞌ soj man Cristó maꞌ. ꞌO̱ se síí ꞌyaj se‑su̱u̱n Yaꞌanj rcuaꞌa̱a̱n ga̱ soj yan cavi̱i̱ sa̱ꞌ soj ne̱ gu̱un niha̱ꞌ rá soj me núj, ne̱ a̱j nariꞌ sa̱ꞌ soj canoco̱ꞌ maꞌa̱n soj man Cristó na̱nj ado̱nj.

Gálatas 5:1

ꞌO̱ se a̱j caꞌnéj Cristó nu̱ꞌ suun ta̱j xráá níꞌ, ne̱ cheꞌé dan vaa yaꞌnúj rihaan níꞌ canoco̱ꞌ níꞌ man Yaꞌanj cuano̱ ado̱nj. Cheꞌé dan me caꞌne̱j nucuaj soj nimán soj, ne̱ se̱ caꞌvej uún soj quiꞌya̱j soj suun uun mozó a̱ maꞌ. Se̱ guun rá soj canoco̱ꞌ soj nu̱ꞌ stucua̱nj Moisés a̱ maꞌ.

Efesios 3:16

ne̱ achíín ni̱ꞌyáj rihaan soꞌ cheꞌé soj se vaa, cheꞌé se niꞌndaj ya̱ sa̱ꞌ veꞌé vaa soꞌ ne̱ taj a̱ ꞌó se achiin man soꞌ, nari̱ꞌ nucuaj nimán soj quiꞌya̱j Nimán soꞌ ado̱nj.

Efesios 6:10

Da̱j ꞌó nana̱ cata̱j xnaꞌanj ꞌu̱nj rihaan soj a. ꞌO̱ ga̱a̱ chre̱ꞌ soj ga̱ Yaꞌanj Si̱j ꞌNi̱j Raꞌa man níꞌ á. Caꞌve̱j soj caꞌne̱j Síí ꞌNi̱j Raꞌa man níꞌ se nucua̱j nimán soj, ne̱ da̱j se vaa se nucua̱j nica̱j maꞌa̱n soꞌ roꞌ, da̱nj ga̱a̱ se nucua̱j ni̱caj maꞌa̱n soj, quiꞌya̱j soꞌ chugua̱nj.

Filipenses 1:27

Veꞌé quiꞌya̱j soj ca̱yáán soj ga̱ tinúú soj, da̱j se vaa no̱ xcúún níꞌ si̱j noco̱ꞌ nana̱ sa̱ꞌ cheꞌé Cristó quiꞌya̱j níꞌ á. Da̱nj quiꞌya̱j soꞌ cheꞌé yan, caꞌve̱e se cuchi̱ꞌ ꞌu̱nj chiháán soj do̱ꞌ, caꞌve̱e se se̱ cuchíꞌ ꞌu̱nj ne̱ ina̱nj cu̱noj nana̱ cheꞌé soj do̱ꞌ, cu̱nó ꞌu̱nj se vaa xraan uxrá vaa nimán soj ꞌo̱ rcuaꞌa̱a̱n aꞌmii nacaj soj cheꞌé nana̱ sa̱ꞌ noco̱ꞌ níꞌ á.

Filipenses 4:1

Dan me se ꞌe̱e̱ ndoꞌo raj man soj, ne̱ me uxrá raj ni̱ꞌyaj ꞌu̱nj man soj, tinu̱j, nocoj. Niha̱ꞌ ndoꞌo raj, ꞌyaj soj, ne̱ vaa güii cata̱j Yaꞌanj se vaa sa̱ꞌ uxrá quiꞌyáj, tucuꞌyón ꞌu̱nj man soj, ne̱ cheꞌé dan vaa cheꞌé cuno̱ soj nu̱ꞌ nana̱ nihánj, ne̱ xraan canoco̱ꞌ soj man Síí ꞌNi̱j Raꞌa man níꞌ, tinu̱j, nocoj.

Filipenses 4:13

Cheꞌé se rqué ndoꞌo Cristó se nucua̱j manj roꞌ, cheꞌé dan uun nu̱cuáj rihaan me maꞌa̱n rasu̱u̱n ado̱nj.

Colosenses 1:23

Dan me se cavi̱i̱ sa̱ꞌ soj, sese ꞌo̱ canoco̱ꞌ soj stucua̱nj Cristó na̱nj ado̱nj. Raan canoco̱ꞌ soj man soꞌ á. A̱j cuno soj nana̱ sa̱ꞌ cheꞌé Cristó, ne̱ cheꞌé dan uun ya̱ rá soj se vaa cavi̱i̱ sa̱ꞌ soj, ne̱ se̱ guun cata̱j soj se vaa ne ya̱ vaa nana̱ sa̱ꞌ cuno soj maꞌ. ꞌO̱ se nana̱ caꞌmii natáj nii rihaan cunuda̱nj nij yuvii̱ ma̱n rihaan chumii̱ me nana̱ sa̱ꞌ yoꞌ, ne̱ ꞌu̱nj nihánj guun ꞌo̱ síí aꞌmii natáj snana̱ Yaꞌanj nana̱ sa̱ꞌ yoꞌ rihaan yuvii̱ na̱nj ado̱nj.

Colosenses 4:12

Ne̱ veꞌé cuma̱n soj, rá síí cuꞌna̱j Epafras uún a. Síí cavii chiháán soj me soꞌ, ne̱ ꞌyaj uxrá soꞌ se‑su̱u̱n Cristó a. Ne̱ nu̱ꞌ güii achíín niꞌya̱j uxrá ya̱ soꞌ rihaan Yaꞌanj cheꞌé soj, ne̱ me rá soꞌ ga̱a̱ chij rá soj, ne̱ gu̱un ya̱ rá soj se vaa neꞌen soj da̱j me rá Yaꞌanj quiꞌya̱j soj a.

Colosenses 4:2

Dan me se se̱ caꞌneꞌ rá soj ga̱ suun cachi̱nj niꞌya̱j rihaan Yaꞌanj maꞌ. Ne̱ ta̱dó soj cuma̱n soj, ne̱ niga̱nj cata̱j soj guun niꞌya̱j níꞌ rihaan Yaꞌanj á.

1 Tesalonicenses 3:8

Dan me se cheꞌé se xraan nocoꞌ soj man Síí ꞌNi̱j Raꞌa man níꞌ, cheꞌé dan nariꞌ nucuaj rá núj ca̱yáán núj rihaan chumii̱ nihánj ado̱nj.

1 Tesalonicenses 5:6

Cheꞌé dan se̱ guun gu̱un níꞌ síí otoj nda̱ꞌ rá se vaa ꞌyaj taꞌa̱j nii maꞌ. ꞌO̱ se vaa cheꞌé ni̱ꞌyaj ranga̱ꞌ rlij rihaan níꞌ á. Se̱ canocoꞌ níꞌ tucuáán noco̱ꞌ ꞌó nij yuvii̱ maꞌ. Tana̱nj ꞌo̱ ga̱a̱ yuꞌve̱ níꞌ, ne̱ se̱ gaa xno̱ níꞌ maꞌ.

2 Tesalonicenses 2:15

Cheꞌé dan canoco̱ꞌ xraan soj tucuáán cuchruj núj rihaan soj ga̱a caꞌmii núj ga̱ soj do̱ꞌ, ga̱a quiꞌyaj núj yanj cartá caꞌnéé núj rihaan soj do̱ꞌ ado̱nj.

1 Timoteo 6:12

Quiꞌya̱j uxrá so̱ꞌ suun sca̱ꞌ sa̱ꞌ caꞌneꞌ Yaꞌanj rihaan níꞌ si̱j noco̱ꞌ man soꞌ, ga̱a ne̱ ca̱yáán so̱ꞌ ga̱ Yaꞌanj nu̱ꞌ cavii nu̱ꞌ caꞌanj a. Cheꞌé dan cuneꞌ Yaꞌanj mán so̱ꞌ qui̱ꞌyáá so̱ꞌ se‑su̱u̱n soꞌ, ne̱ cataj yá so̱ꞌ cuno queꞌe̱e̱ tinúú níꞌ se vaa ya̱ qui̱ꞌyáá so̱ꞌ se‑su̱u̱n Yaꞌanj ca̱nocóꞌ so̱ꞌ man soꞌ á.

2 Timoteo 2:1

Ase vaa ꞌo̱ taꞌníj, da̱nj vaa so̱ꞌ rihanj, tinu̱j. Ne̱ me rá ꞌu̱nj caꞌve̱j rá so̱ꞌ nari̱ꞌ nucuaj nimán so̱ꞌ, quiꞌya̱j Cristó Jesús síí ꞌyaj ndoꞌo se lu̱j cheꞌé níꞌ a.

2 Timoteo 4:5

Tza̱j ne̱ so̱ꞌ me se caꞌne̱j sa̱ꞌ ina̱nj so̱ꞌ tucuáán sa̱ꞌ, ne̱ ga̱a̱ ina̱j nimán so̱ꞌ ga̱a ránꞌ so̱ꞌ sayuun, ne̱ ꞌo̱ qui̱ꞌyáá so̱ꞌ suun caꞌmi̱i̱ natáj so̱ꞌ nana̱ sa̱ꞌ cheꞌé Cristó rihaan nij síí ataa cuchuma̱n rá na̱nj á. Dan me se quiꞌyáá so̱ꞌ nu̱ꞌ suun caꞌneꞌ Yaꞌanj rihaan so̱ꞌ á.

2 Timoteo 4:7

ꞌU̱nj me se quisíj quiꞌyaj uxrá yá ꞌu̱nj suun caꞌneꞌ Yaꞌanj rihanj, ne̱ ꞌo̱ canocóꞌ ꞌu̱nj stucua̱nj Cristó a.

1 Pedro 4:7

Nichrunꞌ nu̱ꞌ caꞌa̱nj niꞌya̱ chumii̱ na̱nj á. Cheꞌé dan ga̱a̱ chij ina̱nj rá soj, ne̱ ꞌo̱ xca̱j soj cuentá, ga̱a ne̱ caꞌve̱e cachi̱nj niꞌya̱j soj rihaan Yaꞌanj chugua̱nj.

1 Pedro 5:8

Ga̱a̱ sca̱ꞌ rá soj, ne̱ tu̱mé soj man soj da̱j quiꞌya̱j soj á. ꞌO̱ se vaa síí ta̱j riꞌyunj niꞌya̱j man soj, ne̱ Síí Chre̱e me soꞌ, ne̱ ase ꞌyaj chuvaa̱ aguáj chéé nanoꞌ xcuu cha̱ roꞌ, da̱nj ꞌyaj Síí Chre̱e, chéé soꞌ nanoꞌ soꞌ man síí caꞌve̱e tiri̱ꞌ soꞌ man chugua̱nj.

Apocalipsis 16:15

Ne̱ nihánj me snana̱ Síí ꞌNi̱j Raꞌa man níꞌ a: “Dan me se ase vaa ꞌnaꞌ yuve̱ síí itu̱u̱ roꞌ, da̱nj ga̱a̱ cuchi̱ꞌ ꞌu̱nj rihaan soj ado̱nj. Ne̱ cavi̱i̱ sa̱ꞌ síí ne otoj, ne̱ niꞌya̱j ranga̱ꞌ nij soꞌ, ne̱ tumé sa̱ꞌ nij soꞌ saga̱nꞌ nij soꞌ yatzéj catzi̱i̱ ado̱nj. Dan me se se̱ gaa ca̱nj nij soꞌ cache̱e̱ nij soꞌ, ne̱ se̱ cunó chrej naꞌa̱j rihaan nij soꞌ ni̱ꞌyaj yuvii̱ man nij soꞌ maꞌ.” Da̱nj taj Síí ꞌNi̱j Raꞌa man níꞌ niꞌya̱j soꞌ man nij síí ne tumé cacunꞌ a.