1 Corintios 16:12 - Triqui de San Juan Copala

¹² Ne̱ tinúú níꞌ síí cuꞌna̱j Apolos me se rquee̱ ndoꞌo ꞌu̱nj man soꞌ se vaa cuchi̱ꞌ soꞌ ga̱ ꞌó nij tinúú níꞌ rihaan soj, tza̱j ne̱ a̱ doj ne caꞌve̱j soꞌ cuchi̱ꞌ soꞌ cuano̱ maꞌ. Tza̱j ne̱ nda̱a güii xꞌnúj rihaan soꞌ asuun, ga̱a ne̱ cuchi̱ꞌ soꞌ rihaan soj a.

1 Corintios 16:12 ပူးပေါင်းရင်းမြစ်များ

San Marcos 6:21

Dan me se quisíj ꞌo̱ güii caꞌve̱e quiꞌya̱j canaán Herodías, ne̱ dan me se se‑chaꞌa̱nj Herodes me yoꞌ, ne̱ caꞌneꞌ soꞌ suun se vaa ca̱nuû se‑chaꞌa̱nj soꞌ, ne̱ canacúún soꞌ caꞌna̱ꞌ nij síí ꞌyaj suun ga̱ maꞌa̱n soꞌ do̱ꞌ, nij tanuu uun chij doj do̱ꞌ, nij síí uun chij rihaan estadó Galilea do̱ꞌ, caꞌna̱ꞌ cha̱ niꞌyánj nij soꞌ ga̱ soꞌ a.

Hechos 15:34

Tza̱j ne̱ guun rá Silas quina̱j soꞌ chumanꞌ Antioquía a.

Hechos 18:24

Dan me se vaa ꞌo̱ síí israelitá cuꞌna̱j Apolos, ne̱ si̱j cavii chumanꞌ Alejandría me soꞌ, ne̱ si̱j veꞌé ndoꞌo aꞌmii me soꞌ, ne̱ sa̱ꞌ uxrá nariꞌ soꞌ Danj Yaꞌanj a. Dan me se cuchiꞌ soꞌ nda̱a chumanꞌ Éfeso a.

Hechos 19:1

Dan me se ga̱a cayáán síí cuꞌna̱j Apolos chumanꞌ Corinto, ne̱ cachén Pabló rej xra̱j doj cuchiꞌ soꞌ nda̱a chumanꞌ Éfeso, ne̱ nariꞌ soꞌ do̱j síí tucuꞌyón snana̱ Jesucristó a.

Hechos 24:25

Dan me se cataj xnaꞌanj Pabló rihaan Félix se vaa no̱ xcúún níꞌ cunu̱u sa̱ꞌ níꞌ rihaan Yaꞌanj ne̱ no̱ xcúún níꞌ tu̱mé níꞌ man maꞌa̱n níꞌ se vaa veꞌé ina̱nj quiꞌya̱j níꞌ a. Ne̱ caꞌmii soꞌ cheꞌé güii caꞌne̱ꞌ Yaꞌanj cacunꞌ cheꞌé yuvii̱ a. Ga̱a ne̱ cuchuꞌviꞌ ndoꞌo Félix, ne̱ cataj soꞌ a: ―Cuano̱ nihánj me se caꞌa̱nj so̱ꞌ ya̱j, tza̱j ne̱ asa̱ꞌ vaa yaꞌnúj rihanj, ne̱ canacu̱nj uún ꞌu̱nj mán so̱ꞌ á ―taj soꞌ rihaan Pabló a.

1 Corintios 1:12

Dan me se taꞌa̱j nij soj taj a: “ꞌU̱nj me síí noco̱ꞌ man síí cuꞌna̱j Pabló a.” ꞌÓ taꞌa̱j nij soj taj a: “ꞌU̱nj me síí noco̱ꞌ man síí cuꞌna̱j Apolos a.” ꞌÓ taꞌa̱j nij soj taj a: “ꞌU̱nj me síí noco̱ꞌ man síí cuꞌna̱j Cefas a.” ꞌÓ taꞌa̱j nij soj taj a: “ꞌU̱nj me síí noco̱ꞌ man Cristó a.” Dan me se da̱nj vaa ꞌo̱ ꞌo̱ taꞌa̱j soj a.

1 Corintios 3:22

Dan me se nana̱ aꞌmij do̱ꞌ, nana̱ aꞌmii Apolos do̱ꞌ, nana̱ aꞌmii Cefas do̱ꞌ, vaa yuꞌvee nó nana̱ yoꞌ rihaan soj, ne̱ rasu̱u̱n ma̱n rihaan chumii̱ nihánj roꞌ, vaa yuꞌvee nó yoꞌ rihaan soj á. Ne̱ sese vaa iꞌna̱ꞌ soj, ne̱ cavi̱i̱ sa̱ꞌ soj, cheꞌé se vaa iꞌna̱ꞌ soj a. Sese cavi̱ꞌ soj, ne̱ caꞌve̱e cavi̱i̱ sa̱ꞌ soj uún a. Ne̱ sese ranꞌ soj cuano̱ nihánj do̱ꞌ, sese quira̱nꞌ soj rej rihaan níꞌ do̱ꞌ, ne̱ nu̱ꞌ nij rasu̱u̱n yoꞌ me se vaa yuꞌvee nó rihaan soj á.

1 Corintios 3:5

Da̱j si̱j me síí cuꞌna̱j Apolos, ne̱ da̱j si̱j mej, rá soj ga̱. Ma̱an se síí ꞌyaj u̱u̱n se‑su̱u̱n Síí ꞌNi̱j Raꞌa man níꞌ me rój, ne̱ ino̱ vaa suun ata̱ ꞌo̱ ꞌo̱ rój, quiꞌyaj soꞌ, ne̱ cheꞌé suun quiꞌyaj rój roꞌ, cheꞌé dan amán rá soj niꞌya̱j soj man Síí ꞌNi̱j Raꞌa man níꞌ a.

Tito 3:13

Ra̱cuíj so̱ꞌ man síí cuꞌna̱j Zenas licenciadó síí aꞌmii cheꞌé yuvii̱ rihaan cuese̱ do̱ꞌ, man síí cuꞌna̱j Apolos do̱ꞌ, quiꞌya̱j chuvi̱i ro̱j soꞌ caꞌa̱nj ro̱j soꞌ á. Taj se cachi̱in man ro̱j soꞌ, qui̱ꞌyáá so̱ꞌ maꞌ. ꞌO̱ se me maꞌa̱n rasu̱u̱n achiin man ro̱j soꞌ, ne̱ rque̱ so̱ꞌ na̱nj á.

Tito 3:4

Tza̱j ne̱ ga̱a xcaj níꞌ cuentá cheꞌé Yaꞌanj Si̱j Tinanii man níꞌ rihaan Sayuun, se vaa soꞌ me síí me rá ra̱cuíj man níꞌ, ga̱a ne̱ queneꞌen níꞌ se vaa cunuu ꞌe̱e̱ rá soꞌ man níꞌ a.