1 Corintios 15:54 - Triqui de San Juan Copala

⁵⁴ Dan me se asa̱ꞌ nanó nee̱ se̱ caviꞌ uún xráá níꞌ, ga̱a ne̱ daj chiha̱a̱ míj se̱ caviꞌ nee̱ man níꞌ a̱ maꞌ. ꞌO̱ se güii yoꞌ roꞌ, quisi̱j ya̱ nu̱ꞌ nana̱ nihánj nana̱ no̱ rihaan Danj Yaꞌanj nana̱ taj a: “Sa̱ꞌ uxrá quiꞌyaj canaán níꞌ, ne̱ daj chiha̱a̱ míj se̱ caviꞌ níꞌ a̱ maꞌ. ꞌO̱ se quisíj níꞌ quiꞌyaj canaán níꞌ rihaan se ꞌyaj aviꞌ yuvii̱ ado̱nj.

1 Corintios 15:54 ပူးပေါင်းရင်းမြစ်များ

San Lucas 20:36

ꞌO̱ se da̱nj na̱nj uún, ne̱ taj yan va̱j síí cavi̱ꞌ uún rej yoꞌ maꞌ. ꞌO̱ se ase vaa nij se‑mo̱zó Yaꞌanj roꞌ, da̱nj ga̱a̱ nij soꞌ, ese taꞌni̱j Yaꞌanj me nij soꞌ, ne̱ si̱j a̱j caviꞌ ne̱ cunuu iꞌna̱ꞌ uún me nij soꞌ ado̱nj.

Romanos 1:23

Yaꞌanj me síí niꞌndaj ya̱ sa̱ꞌ veꞌé vaa, ne̱ daj chiha̱a̱ míj ne aviꞌ soꞌ, ne̱ cheꞌé dan no̱ xcúún yuvii̱ canoco̱ꞌ yuvii̱ man soꞌ ado̱nj. Tza̱j ne̱ naꞌvej rá nij yuvii̱ canoco̱ꞌ nij yuvii̱ Yaꞌanj ya̱ maꞌ. Tana̱nj quiꞌyaj nij yuvii̱ rasu̱u̱n ase vaa yuvii̱ do̱ꞌ, xtâj do̱ꞌ, xcuu do̱ꞌ, xcuáá do̱ꞌ, ne̱ ꞌó rasu̱u̱n ꞌanj niꞌya̱ u̱u̱n rihaan yoꞌóó nihánj quiꞌyaj nij soꞌ, ne̱ taj nij soꞌ se vaa yaꞌanj me rasu̱u̱n quiꞌyaj nij soꞌ na̱nj ado̱nj.

Romanos 2:7

Dan me se taꞌa̱j yuvii̱ racuíj man tuviꞌ nij soꞌ, ne̱ ina̱nj ꞌyaj nij soꞌ se sa̱ꞌ cheꞌé tuviꞌ nij soꞌ, cheꞌé rej niꞌndaj ya̱ sa̱ꞌ quiꞌya̱j Yaꞌanj ga̱ nij soꞌ ne̱ caꞌmi̱i̱ cochro̱j Yaꞌanj cheꞌé nij soꞌ a. Me rá nij soꞌ ca̱yáán nij soꞌ ga̱ Yaꞌanj nu̱ꞌ cavii nu̱ꞌ caꞌanj, ne̱ ya̱ uxrá da̱nj ga̱a̱ quiꞌya̱j Yaꞌanj á.

Romanos 6:12

Cheꞌé dan se̱ caꞌvej rá soj gu̱un chij cacunꞌ rihaan nee̱ man soj maꞌ. Neꞌen soj se vaa vaa güii cavi̱ꞌ nee̱ man soj, ne̱ cheꞌé dan se̱ guun caꞌve̱j rá soj quiꞌya̱j nee̱ man soj náá guun se nij maꞌ. Dan me se ase vaa síí caviꞌ vaa soj ga̱a rque̱, tza̱j ne̱ racuíj Yaꞌanj man soj, ne̱ cheꞌé dan ase vaa síí cunuu iꞌna̱ꞌ uún vaa soj, ne̱ cheꞌé dan nu̱ꞌ nee̱ man soj quiꞌya̱j se‑su̱u̱n Yaꞌanj, quiꞌya̱j soj, ne̱ ina̱nj suun sa̱ꞌ quiꞌya̱j soj cheꞌé Yaꞌanj á.

Romanos 8:11

Ne̱ neꞌen soj se vaa cunuu iꞌna̱ꞌ uún Jesús ga̱a caviꞌ soꞌ, quiꞌyaj Yaꞌanj, ne̱ maꞌa̱n Nimán Yaꞌanj nuû nimán soj, ne̱ cheꞌé dan asa̱ꞌ caviꞌ soj, ne̱ cunu̱u naca̱ nee̱ man soj vaa güii, quiꞌya̱j uún Yaꞌanj a.

2 Corintios 4:11

Dan me se vaa iꞌna̱ꞌ núj rihaan chumii̱ nihánj, tza̱j ne̱ niga̱nj neꞌen núj se vaa caꞌve̱e cavi̱ꞌ núj cheꞌé se noco̱ꞌ núj man Jesús, ne̱ neꞌen yuvii̱ se vaa caꞌve̱e cavi̱ꞌ núj, tza̱j ne̱ xcaj nij yuvii̱ cuentá se vaa vaa iꞌna̱ꞌ núj cheꞌé se ya̱nj Jesús nimán núj ne̱ racuíj ndoꞌo soꞌ man núj ado̱nj.

2 Corintios 5:4

Dan me se nuû núj nee̱ nga̱ nihánj cuano̱, ne̱ cheꞌé dan nanó rá núj, ne̱ aguáj rnúj núj, cheꞌé se naꞌvej rá núj ta̱náj núj nee̱ nu̱u̱ núj cuano̱ a. Tza̱j ne̱ me ndoꞌo rá núj cu̱nuû núj nee̱ naca̱ yoꞌ, ne̱ veé dan me se nee̱ man núj nee̱ da̱j doj cavi̱ꞌ nihánj roꞌ, cunu̱u naca̱ uún yoꞌ, ne̱ ga̱a̱ iꞌna̱ꞌ yoꞌ nu̱ꞌ cavii nu̱ꞌ caꞌanj na̱nj ado̱nj.

2 Tesalonicenses 1:10

ꞌO̱ se güii caꞌna̱ꞌ uún Síí ꞌNi̱j Raꞌa man níꞌ rihaan chumii̱ nihánj me se cata̱j nij síí noco̱ꞌ man soꞌ se vaa niꞌndaj ya̱ veꞌé vaa soꞌ, ne̱ sa̱ꞌ uxrá vaa nu̱ꞌ se vaa quiꞌyaj soꞌ a. ꞌO̱ se nda̱a soj qui̱ꞌnij scaꞌnúj nij soꞌ cheꞌé se cuchumán ya̱ rá soj cuno soj nana̱ nataꞌ núj rihaan soj ado̱nj.

Apocalipsis 20:14

Dan me se maꞌa̱n se ꞌyaj aviꞌ yuvii̱ do̱ꞌ, rej ma̱n nij síí caviꞌ do̱ꞌ, quiriꞌíj Yaꞌanj man ro̱j yoꞌ rque na laguaná rej acaa ndoꞌo caca̱a̱ ro̱j yoꞌ a. Ne̱ rque na laguaná yoꞌ roꞌ, me se quisi̱j vi̱j ꞌo̱ cavi̱ꞌ ya̱ nii nu̱ꞌ cavii nu̱ꞌ caꞌanj a.

Apocalipsis 21:4

Ne̱ maꞌa̱n Yaꞌanj roꞌ, naꞌve̱ nu̱ꞌ na ayanj rihaan nij soꞌ, ne̱ se̱ caviꞌ uún nij soꞌ a̱ maꞌ. Ne̱ se̱ nanó rá nij soꞌ do̱ꞌ, se̱ taꞌvee nij soꞌ a̱ doj do̱ꞌ, se̱ quiranꞌ nij soꞌ a̱ doj sayuun do̱ꞌ, a̱ maꞌ. ꞌO̱ se a̱j cachén nu̱ꞌ rasu̱u̱n nga̱ yoꞌ na̱nj ado̱nj ―taj síí ta̱j rihaan chruun xlá sa̱ꞌ yoꞌ a.