1 Corintios 14:6 - Triqui de San Juan Copala

⁶ Cuno̱ soj caꞌmi̱j, tinu̱j, nocoj, ne̱ dan me se sese cuchi̱ꞌ ꞌu̱nj rihaan soj, ne̱ cuno̱ soj sese ina̱nj xnaꞌánj naca̱ caꞌmi̱j rihaan soj, rá soj naꞌ. Taj maꞌ. Me nana̱ nari̱ꞌ soj, sese da̱nj qui̱ꞌyáj ga̱. Tza̱j ne̱ sese ti̱haán ꞌu̱nj ꞌo̱ nana̱ naca̱ nana̱ caꞌmii Yaꞌanj rihanj rihaan soj, ne̱ cuno̱ soj doj, ne̱ sese cavi̱i̱ ndoꞌo raá ꞌu̱nj do̱ꞌ, sese nata̱ꞌ ꞌu̱nj nana̱ rqué Yaꞌanj manj do̱ꞌ, sese tu̱cuꞌyonj rihaan soj do̱ꞌ, ne̱ cuno̱ sa̱ꞌ soj doj á.

1 Corintios 14:6 ပူးပေါင်းရင်းမြစ်များ

San Mateo 11:25

Dan me se güii yoꞌ cachíín niꞌya̱j Jesús rihaan Yaꞌanj, cataj soꞌ a: ―Síí ꞌNi̱j Raꞌa xta̱ꞌ do̱ꞌ, Síí ꞌNi̱j Raꞌa chumii̱ do̱ꞌ, mé so̱ꞌ, Ata̱j. Ne̱ sa̱ꞌ uxrá quiꞌyáá so̱ꞌ caráán so̱ꞌ rihaan nij síí avii raa̱ do̱ꞌ, rihaan nij síí acaj cuentá do̱ꞌ, se vaa se̱ cuno nij soꞌ snana̱j maꞌ. Ma̱an nij síí vaa nica̱ꞌ nimán roꞌ, veꞌé cuno nij soꞌ, quiꞌyáá so̱ꞌ ado̱nj.

San Mateo 16:17

Ga̱a ne̱ cataj Jesús rihaan Pedró a: ―Quiꞌyaj uxrá Yaꞌanj se lu̱j cheꞌé so̱ꞌ, Simón taꞌni̱j síí cuꞌna̱j Jonás ado̱nj. ꞌO̱ se né na̱na̱ cataj xnaꞌanj yuvii̱ rihaan so̱ꞌ me nana̱ caꞌmii so̱ꞌ cuano̱ maꞌ. ꞌO̱ se Réé ꞌu̱nj síí nicu̱nꞌ xta̱ꞌ me síí racuíj mán so̱ꞌ naríꞌ so̱ꞌ nana̱ yoꞌ na̱nj ado̱nj.

San Mateo 16:26

Ne̱ a̱ me se quiri̱ꞌ ꞌo̱ soꞌ sese quiꞌya̱j canaán soꞌ nu̱ꞌ rasu̱u̱n ma̱n rihaan chumii̱ nihánj ne̱ caꞌa̱nj niꞌya̱ nimán maꞌa̱n soꞌ, rá soj ga̱. Taj va̱j a̱ ꞌó rasu̱u̱n caꞌve̱e na̱ruꞌvee ꞌo̱ soꞌ cheꞌé nimán soꞌ a̱ maꞌ.

Hechos 2:42

Dan me se ꞌo̱ canocoꞌ xraan nij síí noco̱ꞌ man Jesús tucuáán tucuꞌyón nij síí ata̱ suun caꞌa̱nj nata̱ꞌ snana̱ Jesús rihaan yuvii̱ rihaan nij soꞌ, ne̱ ꞌo̱ guun tuvi̱ꞌ cunuda̱nj nij soꞌ a. Ne̱ ꞌo̱ cuxraꞌ taꞌa̱j nij soꞌ rachrúún chá nij soꞌ, ne̱ ꞌo̱ chre̱ꞌ cachíín niꞌya̱j nij soꞌ rihaan Yaꞌanj a.

Romanos 15:14

Veé dan me se uun ya̱ raj se vaa síí sa̱ꞌ me maꞌa̱n soj, tinu̱j, nocoj. Xcaj ndoꞌo soj cuentá, ne̱ neꞌen soj nago̱ꞌ soj chrej sa̱ꞌ man tinúú soj ado̱nj.

Romanos 16:17

Chrej nucua̱j me narque̱j rihaan soj nihánj, tinu̱j, nocoj. Dan me se vaa yuvii̱ me rá quixra̱ꞌ taꞌa̱j soj ga̱ tinúú soj cheꞌé tucuáán a̱j nariꞌ soj, ne̱ gu̱un naꞌa̱j soj cheꞌé stucua̱nj Yaꞌanj, quiꞌya̱j nij soꞌ, ne̱ cheꞌé dan gu̱un yaníj soj rihaan yuvii̱ ꞌyaj da̱nj á.

Romanos 6:17

Ga̱a rque̱ me se se‑mo̱zó cacunꞌ me soj, tza̱j ne̱ guun rá maꞌa̱n soj cuno̱ soj tucuáán tucuꞌyón núj rihaan soj cheꞌé Yaꞌanj, ne̱ cheꞌé dan taj ꞌu̱nj guun niꞌya̱j níꞌ rihaan Yaꞌanj ado̱nj.

1 Corintios 10:33

Ina̱nj da̱nj ꞌyaj ma̱ꞌanj, ne̱ nu̱ꞌ se vaa me rá ꞌo̱ ꞌo̱ taꞌa̱j yuvii̱ qui̱ꞌyáá ꞌu̱nj roꞌ, ꞌyáá ꞌu̱nj, ne̱ ne ꞌyáá ꞌu̱nj ina̱nj se me raj ma̱ꞌanj qui̱ꞌyáj maꞌ. ꞌO̱ se ꞌyáá ꞌu̱nj nda̱a vaa me rá nij yuvii̱ na̱nj ado̱nj. ꞌO̱ se nanóꞌ ꞌu̱nj chrej cavi̱i̱ sa̱ꞌ cunuda̱nj nij yuvii̱ doj, ga̱a ne̱ nani̱i̱ nij soꞌ rihaan sayuun cheꞌé se sa̱ꞌ yoꞌ ado̱nj. Ina̱nj da̱nj quiꞌya̱j soj á.

1 Corintios 14:1

Cheꞌé dan ꞌo̱ ga̱a̱ suun ꞌe̱e̱ rá man tuviꞌ nimán soj, ne̱ nano̱ꞌ soj da̱j quiꞌya̱j soj, ne̱ ni̱caj soj suun sa̱ꞌ, quiꞌya̱j Nimán Yaꞌanj á. Tza̱j ne̱ doj a̱ gu̱un rá soj nata̱ꞌ soj nana̱ rqué Yaꞌanj rihaan soj na̱nj ado̱nj.

1 Corintios 14:7

Dan me se neꞌen soj da̱j vaa yaꞌánj, ne̱ ne vaa iꞌna̱ꞌ yaꞌánj, tza̱j ne̱ vaa cheꞌé agüiin sca̱ꞌ yoꞌ, ne̱ sese ne ticaꞌmii sca̱ꞌ nii man yaꞌaâ nu̱u̱ rihaan yaꞌánj yoꞌ ga̱a anica̱j ꞌo̱ ꞌo̱ chraꞌ, ga̱a ne̱ asa̱ꞌ caꞌve̱e xca̱j yuvii̱ cuentá me chraꞌ me achráá nii rihaan yaꞌánj yoꞌ ga̱. Veé da̱nj vaa rihuu uún a.

2 Corintios 11:6

Nda̱ꞌ se ataa nari̱ꞌ sa̱ꞌ ꞌu̱nj caꞌmi̱i̱ natáj ꞌu̱nj, tza̱j ne̱ a̱j neꞌen soj se vaa si̱j avii raa̱ mej, ne̱ nu̱ꞌ se vaa quiꞌyaj núj veꞌé quiꞌyaj núj, queneꞌen cunuda̱nj soj na̱nj ado̱nj.

2 Corintios 12:1

Dan me se taj a̱ doj se quiri̱ꞌ níꞌ cheꞌé yan caꞌmi̱i̱ sa̱ꞌ níꞌ cheꞌé maꞌa̱n níꞌ, tza̱j ne̱ nihánj me caꞌmi̱i̱ ꞌu̱nj cheꞌé do̱j rasu̱u̱n naquiꞌyaa rihanj á. Ne̱ cata̱j xnaꞌanj ꞌu̱nj cheꞌé se vaa tihaa̱n Síí ꞌNi̱j Raꞌa man níꞌ rihanj a.

2 Corintios 12:7

cheꞌé cunuda̱nj nij nana̱ tihaa̱n naca̱ Yaꞌanj rihanj a̱ maꞌ. Dan me se ne caꞌve̱j rá Yaꞌanj caꞌmi̱i̱ xta̱ꞌ ꞌu̱nj maꞌ. Cheꞌé dan caꞌvej Yaꞌanj quiꞌya̱j Síí Chre̱e sayuun man nee̱ manj, cheꞌé rej se̱ guun xta̱ꞌ uxrá nimanj maꞌ.

Efesios 1:17

Dan me se Yaꞌanj me Taꞌanj Jesucristó Si̱j ꞌNi̱j Raꞌa man níꞌ, ne̱ Rej níꞌ síí nicu̱nꞌ xta̱ꞌ me uún Yaꞌanj, ne̱ síí uun chij sa̱ꞌ uxrá me soꞌ ado̱nj. Ne̱ cheꞌé dan achíín ni̱ꞌyáá ꞌu̱nj rihaan Yaꞌanj se vaa rque̱ ndoꞌo soꞌ nana̱ cu̱u sa̱ꞌ nimán soj, ne̱ achíín ni̱ꞌyáá ꞌu̱nj se vaa gu̱un nucua̱j soj nari̱ꞌ soj nu̱ꞌ nana̱ naca̱ tihaa̱n soꞌ man níꞌ, ga̱a ne̱ sa̱ꞌ doj xca̱j maꞌa̱n soj cuentá cheꞌé soꞌ á.

Efesios 3:4

Naya̱a̱ soj yanj cartá yoꞌ, ne̱ xca̱j soj cuentá cheꞌé nu̱ꞌ nana̱ naríꞌ ꞌu̱nj nana̱ sa̱ꞌ yuve̱ cheꞌé nu̱ꞌ se vaa quiꞌyaj Cristó cheꞌé yuvii̱ a.

Filipenses 3:15

Ne̱ sese a̱j cuchumán sa̱ꞌ rá níꞌ, ne̱ ina̱nj da̱nj ga̱a̱ rá ta̱ranꞌ níꞌ á. Tza̱j ne̱ sese ino̱ vaa rá nij soj, ne̱ Yaꞌanj me síí ti̱haa̱n rihaan soj me maꞌa̱n nana̱ cachi̱in rihaan soj a.

2 Timoteo 2:14

Dan me se cata̱j xnaꞌanj so̱ꞌ rihaan nij síí noco̱ꞌ man Yaꞌanj se vaa se̱ niꞌyón nij soꞌ nana̱ nihánj maꞌ. Ne̱ nago̱ꞌ so̱ꞌ chrej nucua̱j man nij soꞌ rihaan Yaꞌanj Si̱j ꞌNi̱j Raꞌa man níꞌ se vaa se̱ caꞌmii cano̱ tuviꞌ nij soꞌ cheꞌé nana̱ tucuꞌyón nij soꞌ maꞌ. ꞌO̱ se taj cheꞌé quiꞌya̱j nij soꞌ da̱nj maan ado̱nj. Ne̱ síí ataꞌ xre̱j snana̱ nij soꞌ roꞌ, quiri̱ꞌ rá nij soꞌ ado̱nj.

2 Timoteo 3:10

Ne̱ xa̱ꞌ ma̱ꞌán so̱ꞌ, tza̱j ne̱ xcaj ndoꞌo so̱ꞌ cuentá cheꞌé tucuáán tucuꞌyón ꞌu̱nj man yuvii̱ do̱ꞌ, cheꞌé da̱j nocóꞌ ꞌu̱nj tucuáán yoꞌ do̱ꞌ, cheꞌé se vaa guun raj qui̱ꞌyáj rej rihaan níꞌ do̱ꞌ á. Neꞌén so̱ꞌ se vaa nucua̱j ndoꞌo raj man Yaꞌanj do̱ꞌ, se vaa na̱j rá ꞌu̱nj caxri̱i̱ yuva̱a̱ ꞌu̱nj man yuvii̱ do̱ꞌ, se vaa ꞌe̱e̱ raj man tinúj do̱ꞌ, se vaa ꞌo̱ nucua̱j rá ꞌu̱nj rihaan sayuun do̱ꞌ ado̱nj.

2 Timoteo 3:16

ꞌO̱ se maꞌa̱n Yaꞌanj quiꞌyaj cachrón nii nu̱ꞌ nana̱ ma̱n rihaan Danj Yaꞌanj ado̱nj. Ne̱ cheꞌé dan vaa se gu̱un ndoꞌo man nana̱ yoꞌ rihaan níꞌ ado̱nj. ꞌO̱ se vaa ndoꞌo rasu̱u̱n nariꞌ níꞌ uno níꞌ nana̱ ma̱n rihaan yanj yoꞌ, ne̱ taj xnaꞌanj yoꞌ rihaan níꞌ cheꞌé cacunꞌ tumé níꞌ, ne̱ axríj yuva̱a̱ yoꞌ man níꞌ cheꞌé cacunꞌ ꞌyaj níꞌ, ne̱ tucuꞌyón yoꞌ man níꞌ da̱j quiꞌya̱j níꞌ veꞌé canoco̱ꞌ níꞌ man Yaꞌanj, ne̱ taj xnaꞌanj yoꞌ rihaan níꞌ da̱j ga̱a̱ sa̱ꞌ nimán níꞌ uún a.

2 Timoteo 4:2

se vaa caꞌmi̱i̱ natáj so̱ꞌ nana̱ sa̱ꞌ á. Taj se ꞌyaj sese vaa yaꞌnúj rihaan so̱ꞌ do̱ꞌ, sese ne vaa yaꞌnúj rihaan so̱ꞌ do̱ꞌ, taj se ꞌyaj maꞌ. Ma̱an se caꞌmi̱i̱ natáj yá so̱ꞌ á. Cata̱j xnaꞌanj so̱ꞌ rihaan yuvii̱ cheꞌé cacunꞌ tumé nij yuvii̱, ne̱ cata̱j so̱ꞌ se vaa nij ndoꞌo ꞌyaj nij soꞌ, ne̱ nago̱ꞌ so̱ꞌ chrej nucua̱j man nij soꞌ quiꞌya̱j nij soꞌ ina̱nj se sa̱ꞌ á. Tza̱j ne̱ se̱ gaa raꞌya̱nj rá so̱ꞌ caxri̱i̱ yuva̱a̱ so̱ꞌ man nij yuvii̱ maꞌ. Tana̱nj ꞌo̱ ga̱a̱ ina̱j nimán so̱ꞌ, ne̱ veꞌé tu̱cuꞌyón so̱ꞌ man nij soꞌ á.

Tito 3:8

Ya̱ uxrá vaa nu̱ꞌ nana̱ nihánj ado̱nj. Ne̱ me rá ꞌu̱nj sca̱ꞌ caꞌmi̱i̱ so̱ꞌ nu̱ꞌ nana̱ nihánj rihaan nij yuvii̱ amán rá niꞌya̱j man Yaꞌanj, cheꞌé rej xca̱j nij soꞌ cuentá se vaa no̱ xcúún nij soꞌ quiꞌya̱j nij soꞌ suun sa̱ꞌ ina̱nj á. Sese da̱nj quiꞌya̱j nij soꞌ, ne̱ si̱j vaa sa̱ꞌ me nij soꞌ, ne̱ cavi̱i̱ sa̱ꞌ doj yuvii̱, quiꞌya̱j nij soꞌ ado̱nj.

Hebreos 13:9

Se̱ caꞌvej soj tiha̱ꞌ yuꞌunj nii man soj ga̱ me maꞌa̱n ꞌó tucuáán naca̱ maꞌ. ꞌO̱ se a̱j sa̱ꞌ uxrá vaa sese nari̱ꞌ nucuaj nimán soj cheꞌé se lu̱j quiꞌyaj Cristó ga̱ níꞌ ado̱nj. Tza̱j ne̱ se̱ nariꞌ nucuaj nimán soj quiꞌya̱j tucuáán cheꞌé se chá maꞌ. ꞌO̱ se se̱ cavii sa̱ꞌ nij síí noco̱ꞌ tucuáán yoꞌ maꞌ.

2 Pedro 1:5

Ne̱ cheꞌé dan soj si̱j amán rá niꞌya̱j man Cristó me se ꞌo̱ naquiꞌya̱j cu̱u soj cheꞌé stucua̱nj Yaꞌanj, ne̱ naquiꞌya̱j sca̱ꞌ ndoꞌo soj nimán soj á. Ne̱ asa̱ꞌ guun sca̱ꞌ nimán soj, ga̱a ne̱ rquee̱ soj xca̱j soj cuentá sa̱ꞌ doj cheꞌé snana̱ Yaꞌanj á.

2 Pedro 3:18

Cheꞌé dan ꞌo̱ gu̱un rá soj ni̱ꞌyaj soj se lu̱j quiꞌyaj Yaꞌanj ga̱ soj, ne̱ ꞌo̱ gu̱un rá soj xca̱j soj cuentá sa̱ꞌ doj cheꞌé Jesucristó Si̱j ꞌNi̱j Raꞌa man níꞌ, Si̱j Tinanii man níꞌ rihaan Sayuun ado̱nj. Cata̱j níꞌ se vaa niꞌndaj ya̱ sa̱ꞌ veꞌé vaa soꞌ cuano̱ do̱ꞌ, nu̱ꞌ cavii nu̱ꞌ caꞌanj do̱ꞌ á. Veé da̱nj ga̱a̱ ya̱ ado̱nj.

2 Juan 1:9

Ne̱ me maꞌa̱n síí tanáj stucua̱nj Cristó roꞌ, nuviꞌ Yaꞌanj yáán ga̱ soꞌ maꞌ. Tza̱j ne̱ síí noco̱ꞌ xraan stucua̱nj Cristó me se soꞌ me síí ꞌo̱ yáán ro̱j Taꞌni̱j Yaꞌanj ga̱ soꞌ ado̱nj.