1 Corintios 14:3 - Triqui de San Juan Copala

³ Tza̱j ne̱ síí nataꞌ nana̱ rqué Yaꞌanj rihaan, tza̱j ne̱ rihaan yuvii̱ aꞌmii soꞌ, ne̱ sa̱ꞌ doj xca̱j nij yuvii̱ cuentá da̱j quiꞌya̱j nij yuvii̱ canoco̱ꞌ nij yuvii̱ man Yaꞌanj, ne̱ nari̱ꞌ nucuaj nimán nij yuvii̱, quiꞌya̱j soꞌ, ne̱ se̱ nanó rá nij yuvii̱ maꞌ. ꞌO̱ se gu̱un niha̱ꞌ doj rá nij soꞌ ado̱nj.

1 Corintios 14:3 ပူးပေါင်းရင်းမြစ်များ

San Lucas 3:18

Ne̱ vaa uxrá doj chrej sa̱ꞌ nagoꞌ soꞌ man nij yuvii̱, ne̱ veꞌé nataꞌ soꞌ snana̱ Yaꞌanj nana̱ sa̱ꞌ rihaan nij soꞌ a.

Hechos 13:15

Ne̱ quisíj nayaa nii stucua̱nj Moisés do̱ꞌ, snana̱ nij síí nataꞌ snana̱ Yaꞌanj ga̱a naá do̱ꞌ, ne̱ caꞌnéé nij síí ꞌni̱j raꞌa veꞌ yoꞌ nana̱ nihánj rihaan ro̱j soꞌ a: ―Sese vaa chrej nucua̱j me rá ro̱j so̱j nago̱ꞌ ro̱j so̱j rihaan nij yuvii̱ nuu chre̱ꞌ nihánj, ne̱ caꞌmi̱i̱ ro̱j so̱j, tinu̱j ―taj síí ꞌni̱j raꞌa veꞌ yoꞌ rihaan Pabló ga̱ Bernabé a.

Hechos 14:22

Ne̱ nariꞌ nucuaj nimán cunuda̱nj nij síí tucuꞌyón snana̱ Jesucristó, quiꞌyaj ro̱j soꞌ a. Ne̱ narqué ro̱j soꞌ chrej nucua̱j man nij síí tucuꞌyón snana̱ Jesucristó se vaa daj chiha̱a̱ míj se̱ caꞌneꞌ rá nij soꞌ ga̱ suun noco̱ꞌ stucua̱nj Jesucristó a. Ne̱ cataj ro̱j soꞌ se vaa asino quira̱nꞌ ndoꞌo níꞌ sayuun, ga̱a ne̱ caꞌve̱e catu̱u̱ níꞌ ca̱yáán níꞌ ga̱ Yaꞌanj asa̱ꞌ guun chij Yaꞌanj, taj ro̱j soꞌ a.

Hechos 15:32

Ne̱ Judas do̱ꞌ, Silas do̱ꞌ roꞌ, síí nataꞌ snana̱ Yaꞌanj me ro̱j soꞌ, ne̱ aꞌmii aꞌmii ro̱j soꞌ nagoꞌ ro̱j soꞌ chrej man nij síí ma̱n Antioquía yoꞌ, ne̱ nariꞌ nucuaj nimán nij soꞌ, quiꞌyaj ro̱j soꞌ a.

Hechos 4:36

Ne̱ ꞌo̱ soꞌ roꞌ, me síí cuꞌna̱j José, ne̱ nij síí ata̱ suun caꞌa̱nj nata̱ꞌ snana̱ Jesús me se tucuꞌnáj nij soꞌ Bernabé man soꞌ a. Ne̱ nana̱ Bernabé me raj cata̱a síí ꞌyaj nariꞌ nucuaj yuvii̱ a. Ne̱ ꞌo̱ taꞌníí taꞌnij siꞌno̱ síí cuꞌna̱j Leví síí cayáán ga̱a naá me soꞌ, ne̱ cavii soꞌ rej cuꞌna̱j Chipre a.

Hechos 9:31

Veé dan me se dínj yáán cunuda̱nj nij xꞌneꞌ nij síí noco̱ꞌ man Jesús ya̱nj nu̱ꞌ estadó Judea do̱ꞌ, Galilea do̱ꞌ, Samaria do̱ꞌ a. Dan me se caráj cochro̱j ndoꞌo nij soꞌ rihaan Yaꞌanj Si̱j ꞌNi̱j Raꞌa man níꞌ, ne̱ cheꞌé dan nariꞌ nucuaj nij soꞌ, ne̱ guun ri̱i̱ ndoꞌo nij soꞌ doj, quiꞌyaj Nimán Yaꞌanj a.

Romanos 12:8

Sese vaa suun rihaan ꞌó níꞌ nago̱ꞌ níꞌ chrej nucua̱j, ne̱ da̱nj quiꞌya̱j níꞌ á. Sese vaa suun rihaan ꞌó níꞌ rque̱ níꞌ rasu̱u̱n rihaan nij síí nique̱, ne̱ gu̱un niha̱ꞌ rá níꞌ quiꞌya̱j níꞌ da̱nj á. Sese vaa suun rihaan ꞌó níꞌ gu̱un chij níꞌ rihaan tuviꞌ níꞌ, ne̱ quiꞌya̱j uxrá níꞌ suun ni̱caj yuꞌunj níꞌ man tuviꞌ níꞌ á. Sese vaa suun rihaan níꞌ cunu̱u ꞌe̱e̱ rá níꞌ tuviꞌ níꞌ do̱ꞌ, ra̱cuíj níꞌ tuviꞌ níꞌ do̱ꞌ, ne̱ ga̱a̱ niha̱ꞌ rá níꞌ quiꞌya̱j níꞌ da̱nj á.

Romanos 14:19

Cheꞌé dan da̱nj ina̱nj quiꞌya̱j níꞌ, ga̱a ne̱ ga̱a̱ dínj cuma̱n níꞌ, ne̱ ra̱cuíj níꞌ tinúú níꞌ, ga̱a ne̱ sa̱ꞌ doj cuma̱n níꞌ, ne̱ sa̱ꞌ doj canoco̱ꞌ níꞌ man Cristó ado̱nj.

Romanos 15:2

Tza̱j ne̱ ra̱cuíj ꞌo̱ ꞌo̱ níꞌ tinúú níꞌ, cheꞌé yan gu̱un niha̱ꞌ rá tinúú níꞌ, ne̱ sa̱ꞌ doj ga̱a̱ tinúú níꞌ, ne̱ sa̱ꞌ doj queneꞌe̱n tinúú níꞌ canoco̱ꞌ tinúú níꞌ Yaꞌanj a.

1 Corintios 10:23

“Caꞌve̱e qui̱ꞌyáj na̱j guun se me raj á”, taj taꞌa̱j yuvii̱, ne̱ ya̱ vaa nana̱ aꞌmii nij soꞌ, tza̱j ne̱ se̱ cavii sa̱ꞌ níꞌ a̱ doj, quiꞌya̱j taꞌa̱j se ꞌyaj níꞌ maꞌ. Se̱ cunuu sa̱ꞌ níꞌ, quiꞌya̱j taꞌa̱j se ꞌyaj níꞌ maan chugua̱nj.

1 Corintios 14:12

Cheꞌé dan me xca̱j soj cuentá da̱j quiꞌya̱j maꞌa̱n soj uún, ne̱ dan me se gu̱un rá soj ni̱caj soj suun sa̱ꞌ, quiꞌya̱j Nimán Yaꞌanj, tza̱j ne̱ nano̱ꞌ soj da̱j quiꞌya̱j soj, ne̱ caꞌve̱e ni̱caj soj suun sa̱ꞌ doj suun ra̱cuíj man nu̱ꞌ xꞌneꞌ nij síí noco̱ꞌ man Cristó cavi̱i̱ sa̱ꞌ nij soꞌ doj, quiꞌya̱j Nimán Yaꞌanj a.

1 Corintios 14:17

Caꞌve̱e se veꞌé uxrá ga̱a̱ nana̱ cachi̱nj ni̱ꞌyáá so̱ꞌ rihaan Yaꞌanj, tza̱j ne̱ se̱ caꞌvee ra̱cuíj nana̱ yoꞌ man ꞌó soꞌ maꞌ.

1 Corintios 14:26

Cheꞌé dan nihánj me cata̱j xnaꞌanj ꞌu̱nj rihaan soj da̱j quiꞌya̱j soj, tinu̱j, nocoj. Ga̱a nuu chre̱ꞌ soj, ne̱ ino̱ ga̱a̱ se quiꞌya̱j ꞌo̱ ꞌo̱ soj na̱nj á. ꞌO̱ tinúú soj cachra̱a̱ ꞌo̱ chraꞌ, ne̱ tu̱cuꞌyón ꞌó tinúú soj snana̱ Yaꞌanj rihaan soj, ne̱ nata̱ꞌ ꞌó tinúú soj nana̱ rqué Yaꞌanj rihaan soꞌ, ne̱ caꞌmi̱i̱ ꞌó tinúú soj xnaꞌánj naca̱, ne̱ cata̱j xnaꞌanj ꞌó tinúú soj me se me raj cata̱a nana̱ caꞌmii tinúú soj síí caꞌmii xnaꞌánj naca̱, ne̱ ina̱nj da̱nj quiꞌya̱j soj, ra̱cuíj ta̱ranꞌ soj man tinúú soj, ga̱a ne̱ veꞌé doj nari̱ꞌ soj canoco̱ꞌ soj man Jesucristó a.

1 Corintios 14:31

Veé dan me se ga̱a̱ yaꞌnúj rihaan ta̱ranꞌ soj, ne̱ nda̱a ꞌo̱ ꞌo̱ soj nata̱ꞌ nana̱ rqué Yaꞌanj rihaan soj, ne̱ nari̱ꞌ cunuda̱nj soj nana̱ achiin man soj, ga̱a ne̱ nari̱ꞌ nucuaj nimán ta̱ranꞌ soj a.

1 Corintios 8:1

Ne̱ cata̱j xnaꞌanj ꞌu̱nj rihaan soj cheꞌé nee̱ a̱j cutaꞌ nii rihaan yaꞌanj quiꞌyaj maꞌa̱n yuvii̱ a. Neꞌen níꞌ se vaa síí acaj cuentá me cunuda̱nj níꞌ, ne̱ né se yaꞌa̱nj tihaꞌ me neꞌen níꞌ, ne̱ caꞌmi̱i̱ xta̱ꞌ níꞌ maꞌ. ꞌO̱ se nij ndoꞌo vaa sese da̱nj quiꞌya̱j níꞌ ado̱nj. Tza̱j ne̱ sese ꞌe̱e̱ rá níꞌ man tinúú níꞌ, ne̱ ra̱cuíj níꞌ man tinúú níꞌ, ga̱a ne̱ doj a̱ cavi̱i̱ sa̱ꞌ níꞌ á.

2 Corintios 1:4

Caꞌve̱e se me maꞌa̱n sayuun ranꞌ núj, tza̱j ne̱ Yaꞌanj roꞌ, me síí narqué ndoꞌo chrej nucua̱j man núj, ne̱ cheꞌé dan gu̱un nucua̱j núj nago̱ꞌ núj chrej nucua̱j man tinúú núj güii quira̱nꞌ tinúú núj sayuun uún chugua̱nj. Cheꞌé dan asa̱ꞌ ranꞌ tinúú núj sayuun, ne̱ caꞌve̱e nago̱ꞌ núj chrej nucua̱j man tinúú núj chrej narqué maꞌa̱n Yaꞌanj man núj chugua̱nj.

2 Corintios 2:7

Ma̱an se cara̱a̱ xꞌnaa soj rihaan soꞌ, ne̱ veé dan quisíj quiꞌyaj soj sayuun man soꞌ na̱nj á. Ta̱dó soj se̱ nanó ndoꞌo rá soꞌ, quiꞌya̱j soj, ne̱ quiri̱ꞌ nimán soꞌ, quiꞌya̱j soj ado̱nj.

Efesios 4:29

Se̱ caꞌvej soj caꞌmi̱i̱ soj nana̱ qui̱j maꞌ. Tana̱nj gu̱un rá soj veꞌé caꞌmi̱i̱ soj, ne̱ nana̱ sa̱ꞌ nana̱ achiin man tinúú soj roꞌ, yoꞌ me nago̱ꞌ soj rihaan tinúú soj á. Ne̱ cavi̱i̱ sa̱ꞌ doj ta̱ranꞌ nij síí cuno̱ nana̱ caꞌmi̱i̱ soj, sese sa̱ꞌ caꞌmi̱i̱ soj ado̱nj.

Efesios 6:22

Ne̱ me rá ꞌu̱nj queneꞌe̱n soj nu̱ꞌ se vaa quiranꞌ núj, ne̱ me rá ꞌu̱nj nari̱ꞌ nucuaj nimán soj, ne̱ cheꞌé dan caꞌne̱j ꞌu̱nj man soꞌ cuchi̱ꞌ soꞌ rihaan soj á.

Colosenses 4:8

Ne̱ me rá ꞌu̱nj cata̱j xnaꞌanj soꞌ rihaan soj da̱j quiranꞌ núj, ga̱a ne̱ gu̱un ya̱ rá soj, ne̱ nari̱ꞌ nucuaj nimán soj na̱nj á.

1 Tesalonicenses 2:11

Neꞌen soj se vaa ase vaa ꞌyaj snóꞌo ga̱ taꞌníí snóꞌo roꞌ, da̱nj vaa quiꞌyaj núj ga̱ ꞌo̱ ꞌo̱ nij soj a. Ne̱ dan me se guun nucua̱j nimán soj, quiꞌyaj núj, ne̱ narqué núj chrej nucua̱j man soj

1 Tesalonicenses 2:3

Vaa cheꞌé caꞌmii natáj núj snana̱ Yaꞌanj rihaan soj, ne̱ dan me se né si̱j noco̱ꞌ tucuáán ne̱ me núj maꞌ. Ne qui̱j vaa nimán núj maꞌ. Né si̱j tihaꞌ yuꞌunj man yuvii̱ me núj maꞌ.

1 Tesalonicenses 3:2

ne̱ dan me se caꞌnéé núj man tinúꞌ Timoteo cuchi̱ꞌ soꞌ rej ma̱n soj a. Dan me se soꞌ me síí ꞌyaj se‑su̱u̱n Yaꞌanj ga̱ núj suun nataꞌ nana̱ sa̱ꞌ cheꞌé Cristó a. Me rá núj ra̱cuíj soꞌ man soj, narque̱ soꞌ chrej nucua̱j man soj, ne̱ xraan doj canoco̱ꞌ soj man Cristó, quiꞌya̱j soꞌ a.

1 Tesalonicenses 4:1

Ya̱j me se cheꞌé se si̱j a̱j noco̱ꞌ man Jesús Si̱j ꞌNi̱j Raꞌa man níꞌ me nu̱ꞌ níꞌ roꞌ, cheꞌé dan cuano̱ nihánj me cata̱j xnaꞌanj núj rihaan soj se vaa doj a̱ doj a̱ canoco̱ꞌ soj nu̱ꞌ tucuáán cuchruj núj rihaan soj ga̱a cataj núj da̱j quiꞌya̱j soj ga̱a mán soj rihaan chumii̱ nihánj ga̱a ne̱ cara̱nꞌ rá Yaꞌanj ni̱ꞌyaj Yaꞌanj man soj, tinu̱j, nocoj.

1 Tesalonicenses 4:18

Nihánj me nana̱ cata̱j xnaꞌanj soj rihaan tinúú soj, ne̱ nari̱ꞌ nucuaj nimán ꞌo̱ ꞌo̱ soj, quiꞌya̱j nana̱ nihánj ado̱nj.

2 Tesalonicenses 3:12

Cheꞌé Jesucristó Si̱j ꞌNi̱j Raꞌa man níꞌ aꞌneꞌ núj suun cuano̱ rihaan yuvii̱ ꞌyaj da̱nj, se vaa dínj ga̱a̱ tuꞌva nij soꞌ, ne̱ quiꞌya̱j suun nij soꞌ, ne̱ quira̱a̱n maꞌa̱n nij soꞌ se chá cha̱ nij soꞌ á.

1 Timoteo 1:4

Dan me se cata̱j so̱ꞌ rihaan nij tinúú níꞌ, ne̱ a̱ se̱ nanó xre̱j nij soꞌ cuentó ma̱n ga̱a naá do̱ꞌ, cuentó cheꞌé da̱j vaa da̱j a̱ xi̱i nij soꞌ síí ma̱n ga̱a naá do̱ꞌ maꞌ. ꞌO̱ se aꞌmii unuꞌ uxrá yuvii̱ cheꞌé nana̱ yoꞌ, tza̱j ne̱ ne racuíj nana̱ yoꞌ man níꞌ sa̱ꞌ doj canoco̱ꞌ níꞌ man Yaꞌanj maꞌ. ꞌO̱ se me rá Yaꞌanj ga̱a̱ nucua̱j rá níꞌ man maꞌa̱n Yaꞌanj ado̱nj.

1 Timoteo 4:13

Nda̱a güii cuchi̱ꞌ ꞌu̱nj rej tiꞌyaj roꞌ, ꞌo̱ naya̱a̱ so̱ꞌ snana̱ Yaꞌanj cuno̱ nij soꞌ do̱ꞌ, ꞌo̱ narque̱ so̱ꞌ chrej nucua̱j man nij soꞌ do̱ꞌ, ꞌo̱ tu̱cuꞌyón so̱ꞌ man nij soꞌ do̱ꞌ á.

1 Timoteo 6:2

Ne̱ sese síí noco̱ꞌ man Yaꞌanj me ruꞌvee, ne̱ se̱ guun cata̱j mozó a: “Tinúú ꞌu̱nj me se‑ruꞌve̱e̱ ꞌu̱nj, ne̱ taj cheꞌé quiꞌya̱j suun nu̱cuáá ꞌu̱nj rihaan soꞌ maꞌ.” Se̱ guun caꞌmi̱i̱ mozó da̱nj maꞌ. Tana̱nj veꞌé quiꞌya̱j suun soꞌ rihaan se‑ruꞌve̱e̱ soꞌ, ne̱ ga̱a̱ ꞌe̱e̱ rá soꞌ se‑ruꞌve̱e̱ soꞌ á. ꞌO̱ se neꞌen mozó se vaa si̱j noco̱ꞌ man Yaꞌanj me se‑ruꞌve̱e̱ mozó, ne̱ gu̱un niha̱ꞌ rá mozó se vaa doj a̱ cavi̱i̱ sa̱ꞌ ꞌo̱ tinúú soꞌ cheꞌé suun ꞌyaj suun soꞌ ado̱nj. Nana̱ nihánj me chrej nucua̱j nago̱ꞌ so̱ꞌ man nij yuvii̱ a.

2 Timoteo 4:2

se vaa caꞌmi̱i̱ natáj so̱ꞌ nana̱ sa̱ꞌ á. Taj se ꞌyaj sese vaa yaꞌnúj rihaan so̱ꞌ do̱ꞌ, sese ne vaa yaꞌnúj rihaan so̱ꞌ do̱ꞌ, taj se ꞌyaj maꞌ. Ma̱an se caꞌmi̱i̱ natáj yá so̱ꞌ á. Cata̱j xnaꞌanj so̱ꞌ rihaan yuvii̱ cheꞌé cacunꞌ tumé nij yuvii̱, ne̱ cata̱j so̱ꞌ se vaa nij ndoꞌo ꞌyaj nij soꞌ, ne̱ nago̱ꞌ so̱ꞌ chrej nucua̱j man nij soꞌ quiꞌya̱j nij soꞌ ina̱nj se sa̱ꞌ á. Tza̱j ne̱ se̱ gaa raꞌya̱nj rá so̱ꞌ caxri̱i̱ yuva̱a̱ so̱ꞌ man nij yuvii̱ maꞌ. Tana̱nj ꞌo̱ ga̱a̱ ina̱j nimán so̱ꞌ, ne̱ veꞌé tu̱cuꞌyón so̱ꞌ man nij soꞌ á.

Tito 1:9

Raan canoco̱ꞌ nij soꞌ snana̱ Yaꞌanj nana̱ tucuꞌyón núj rihaan nij yuvii̱ a. Da̱nj quiꞌya̱j nij soꞌ, ga̱a ne̱ gu̱un nucua̱j nij soꞌ nago̱ꞌ nij soꞌ stucua̱nj Yaꞌanj tucuáán sa̱ꞌ man ꞌó nij yuvii̱, ne̱ gu̱un nucua̱j nij soꞌ quiꞌya̱j nij soꞌ se vaa ca̱nica̱j nimán nij síí tucuꞌyón tucuáán ne̱ na̱nj ado̱nj.

Tito 2:15

Nana̱ nihánj me chrej sa̱ꞌ ya̱ nago̱ꞌ so̱ꞌ rihaan nij tinúú níꞌ, ne̱ sca̱ꞌ ndoꞌo caꞌmi̱i̱ so̱ꞌ, caꞌne̱ꞌ so̱ꞌ suun rihaan nij soꞌ, ga̱a ne̱ caꞌne̱ꞌ rá nij soꞌ ga̱ se chiꞌi̱i̱ á. Ne̱ da̱nj qui̱ꞌyáá so̱ꞌ do̱ꞌ, da̱nj caꞌmi̱i̱ so̱ꞌ do̱ꞌ, ga̱a ne̱ daj chiha̱a̱ míj se̱ guun cata̱j yuvii̱ se vaa taj yuꞌvee nó so̱ꞌ do̱ꞌ, nana̱ aꞌmii so̱ꞌ do̱ꞌ a̱ maꞌ.

Tito 2:6

Ne̱ nago̱ꞌ so̱ꞌ chrej nucua̱j man nij síí tachru̱u̱ uún se vaa xca̱j nij soꞌ cuentá da̱j ga̱a̱ quiꞌya̱j nij soꞌ á.

Tito 2:9

Ne̱ narque̱ so̱ꞌ chrej nucua̱j man nij mozó se vaa veꞌé cuno̱ nij mozó rihaan se‑ruꞌve̱e̱ mozó, ne̱ quiꞌya̱j suun nij mozó nu̱ꞌ suun caꞌne̱ꞌ nij ruꞌvee rihaan nij soꞌ á. Ne̱ quiꞌya̱j mozó cara̱nꞌ rá se‑ruꞌve̱e̱ mozó ni̱ꞌyaj soꞌ man mozó yoꞌ á. Se̱ caꞌmii tuꞌva̱ mozó rihaan se‑ruꞌve̱e̱ mozó maꞌ.

Hebreos 10:25

Ne̱ se̱ tanáj níꞌ tucuáán nuu chre̱ꞌ níꞌ ga̱ tinúú níꞌ maꞌ. ꞌO̱ se vaa yuvii̱ ne nocoꞌ tucuáán yoꞌ, tza̱j ne̱ no̱ xcúún soj nago̱ꞌ soj chrej nucua̱j man tinúú soj ga̱a nuu chre̱ꞌ soj á. Ne̱ ya̱j roꞌ, doj a̱ cunu̱u chre̱ꞌ soj, cheꞌé se neꞌen soj se vaa nichrunꞌ quisi̱j güii caꞌna̱ꞌ uún Cristó rihaan chumii̱ nihánj na̱nj ado̱nj.

Hebreos 13:22

Cuano̱ nihánj me se rqueé ꞌu̱nj man soj se vaa veꞌé cuno̱ soj nana̱ nihánj, tinu̱j, nocoj. ꞌO̱ se chrej nucua̱j narqué ꞌu̱nj man soj me nana̱ nihánj, ne̱ do̱j vaa nana̱ nihánj nana̱ cachrón ꞌu̱nj rihaan yanj cartá nihánj naya̱a̱ soj á.

Hebreos 3:13

Tana̱nj a̱ nago̱ꞌ soj chrej nucua̱j man tinúú soj da̱j a̱ güii ga̱a vaa yaꞌnúj rihaan soj á. Da̱nj quiꞌya̱j soj, se̱ gaa na̱nj gu̱un nichra̱j rá tinúú soj quiꞌya̱j nana̱ ne̱ chiꞌi̱i̱ a.

1 Pedro 5:12

Veé da̱nj síj natáꞌ ꞌu̱nj do̱j nij nana̱ no̱ rihaan yanj nihánj, ne̱ tinúꞌ Silvano me síí cachrón snana̱j rihaan yanj nihánj, ne̱ dan me se tinúú níꞌ síí nucua̱j rá níꞌ man me soꞌ a. Dan me se nana̱ nihánj me se narquej chrej nucua̱j rihaan soj, ne̱ cataj xnaꞌanj ꞌu̱nj rihaan soj se vaa tucuáán noco̱ꞌ níꞌ roꞌ, maꞌa̱n ya̱ tucuáán yoꞌ me rej ꞌyaj Yaꞌanj se lu̱j cheꞌé níꞌ chugua̱nj. Raan canoco̱ꞌ soj tucuáán yoꞌ á.

Judas 1:20

Tza̱j ne̱ soj roꞌ, ꞌo̱ xraan canoco̱ꞌ soj stucua̱nj Yaꞌanj tucuáán gue̱e̱, tinu̱j, nocoj. Ne̱ caꞌve̱j rá soj ra̱cuíj Nimán Yaꞌanj man soj cachi̱nj niꞌya̱j soj rihaan Yaꞌanj á.