1 Corintios 14:26 - Triqui de San Juan Copala

²⁶ Cheꞌé dan nihánj me cata̱j xnaꞌanj ꞌu̱nj rihaan soj da̱j quiꞌya̱j soj, tinu̱j, nocoj. Ga̱a nuu chre̱ꞌ soj, ne̱ ino̱ ga̱a̱ se quiꞌya̱j ꞌo̱ ꞌo̱ soj na̱nj á. ꞌO̱ tinúú soj cachra̱a̱ ꞌo̱ chraꞌ, ne̱ tu̱cuꞌyón ꞌó tinúú soj snana̱ Yaꞌanj rihaan soj, ne̱ nata̱ꞌ ꞌó tinúú soj nana̱ rqué Yaꞌanj rihaan soꞌ, ne̱ caꞌmi̱i̱ ꞌó tinúú soj xnaꞌánj naca̱, ne̱ cata̱j xnaꞌanj ꞌó tinúú soj me se me raj cata̱a nana̱ caꞌmii tinúú soj síí caꞌmii xnaꞌánj naca̱, ne̱ ina̱nj da̱nj quiꞌya̱j soj, ra̱cuíj ta̱ranꞌ soj man tinúú soj, ga̱a ne̱ veꞌé doj nari̱ꞌ soj canoco̱ꞌ soj man Jesucristó a.

1 Corintios 14:26 ပူးပေါင်းရင်းမြစ်များ

Romanos 1:13

Ne̱ me raj queneꞌe̱n soj se vaa guun queꞌe̱e̱ güii cachronj cuchi̱j chiháán soj, tinu̱j, nocoj. Tza̱j ne̱ ne caꞌve̱e cuchi̱j, cheꞌé se vaa chru̱j rihanj, tza̱j ne̱ ase vaa natáꞌ ꞌu̱nj rihaan ꞌó nij yuvii̱ yaníj roꞌ, da̱nj ga̱a̱ gue̱e̱ nata̱ꞌ ꞌu̱nj rihaan soj a. Nda̱a síj, ga̱a ne̱ cunu̱u ri̱i̱ doj tuviꞌ níꞌ, quiꞌya̱j níꞌ ado̱nj.

Romanos 12:7

Sese caꞌneꞌ Yaꞌanj suun rihaan ꞌó níꞌ suun racuíj níꞌ man yuvii̱, ne̱ da̱nj quiꞌya̱j níꞌ cheꞌé tuviꞌ níꞌ uún á. Sese vaa suun rihaan ꞌó níꞌ suun tihaa̱n níꞌ snana̱ Yaꞌanj, ne̱ da̱nj quiꞌya̱j uún níꞌ, ti̱haa̱n níꞌ snana̱ Yaꞌanj á.

Romanos 14:19

Cheꞌé dan da̱nj ina̱nj quiꞌya̱j níꞌ, ga̱a ne̱ ga̱a̱ dínj cuma̱n níꞌ, ne̱ ra̱cuíj níꞌ tinúú níꞌ, ga̱a ne̱ sa̱ꞌ doj cuma̱n níꞌ, ne̱ sa̱ꞌ doj canoco̱ꞌ níꞌ man Cristó ado̱nj.

Romanos 15:2

Tza̱j ne̱ ra̱cuíj ꞌo̱ ꞌo̱ níꞌ tinúú níꞌ, cheꞌé yan gu̱un niha̱ꞌ rá tinúú níꞌ, ne̱ sa̱ꞌ doj ga̱a̱ tinúú níꞌ, ne̱ sa̱ꞌ doj queneꞌe̱n tinúú níꞌ canoco̱ꞌ tinúú níꞌ Yaꞌanj a.

1 Corintios 14:15

ꞌO̱ se me se no̱ xcúún ꞌu̱nj qui̱ꞌyáj ga̱. ꞌO̱ se no̱ xcúún ꞌu̱nj asino ya̱a̱n cachi̱nj ni̱ꞌyáj rihaan Yaꞌanj ga̱ nimanj, ga̱a ne̱ cachi̱nj niꞌya̱j cúú ya̱vej uún rihaan Yaꞌanj, ne̱ asino ya̱a̱n cachra̱a̱ ꞌu̱nj chraꞌ rihaan Yaꞌanj ga̱ nimanj, ga̱a ne̱ nu̱ꞌ cúú ya̱vej cachra̱a̱ chraꞌ uún rihaan Yaꞌanj ado̱nj.

1 Corintios 14:2

Dan me se xa̱ꞌ síí aꞌmii xnaꞌánj naca̱, tza̱j ne̱ ne aꞌmii soꞌ rihaan yuvii̱ maꞌ. Rihaan Yaꞌanj aꞌmii soꞌ, ne̱ taj síí uno nana̱ aꞌmii soꞌ maꞌ. ꞌO̱ se racuíj Nimán Yaꞌanj man soꞌ aꞌmii soꞌ nana̱ sa̱ꞌ yuve̱ tihaa̱n naca̱ Yaꞌanj rihaan maꞌa̱n soꞌ ado̱nj.

1 Corintios 14:27

Sese vaa vi̱j vaꞌnu̱j soj me rá caꞌmi̱i̱ xnaꞌánj naca̱, ne̱ caꞌve̱e caꞌmi̱i̱ nij soꞌ, tza̱j ne̱ sese queꞌe̱e̱ soj doj me rá caꞌmi̱i̱, ga̱a ne̱ se̱ caꞌvee maꞌ. ꞌO̱ se dínj tuꞌva taꞌa̱j soj, ga̱a ne̱ canicu̱nꞌ ꞌó tuviꞌ soj nata̱ꞌ soꞌ me se me raj cata̱a nana̱ caꞌmii nij síí caꞌmii xnaꞌánj naca̱ yoꞌ á.

1 Corintios 14:40

Tza̱j ne̱ veꞌé ina̱nj quiꞌya̱j soj nu̱ꞌ se vaa ꞌyaj soj, ne̱ chij ina̱nj quiꞌya̱j soj nu̱ꞌ se‑su̱u̱n Yaꞌanj á.

2 Corintios 12:19

Dan me se cheꞌé se chuꞌviꞌ ndoꞌo núj se vaa cuta̱ꞌ soj cacunꞌ xráá núj me se caꞌmii ndoꞌo núj nu̱ꞌ nana̱ nihánj, rá soj naꞌ. Taj maꞌ. ꞌO̱ se neꞌen Yaꞌanj da̱j aꞌmii núj, ne̱ cheꞌé se si̱j noco̱ꞌ man Cristó me núj, ne̱ caꞌmii núj nu̱ꞌ nana̱ nihánj cheꞌé se ꞌe̱e̱ rá núj man soj, ne̱ me rá núj nari̱ꞌ sa̱ꞌ soj canoco̱ꞌ soj man Yaꞌanj, tinu̱j, nocoj.

2 Corintios 13:10

Cheꞌé dan cuano̱ nihánj me se cachrón ꞌu̱nj nana̱ nihánj rihaan yanj cartá naya̱a̱ soj a. Dan me se nda̱ꞌ se nuvíꞌ ꞌu̱nj yáán ga̱ soj cuano̱, tza̱j ne̱ cachrón ꞌu̱nj nana̱ nihánj, ga̱a ne̱ güii cuchi̱ꞌ ꞌu̱nj rihaan soj me se se̱ gaa suun rihanj quiꞌya̱j ndoꞌoj sayuun man soj a̱ maꞌ. Dan me se caꞌneꞌ Síí ꞌNi̱j Raꞌa man níꞌ suun rihanj cu̱tumej man soj, ne̱ dan me se naꞌvej rá soꞌ quiri̱ꞌ soj qui̱ꞌyáj a̱ maꞌ. ꞌO̱ se me rá soꞌ ra̱cuíj ꞌu̱nj man soj yan canoco̱ꞌ sa̱ꞌ soj man soꞌ ado̱nj.

Efesios 4:12

Dan me se da̱nj quiꞌyaj Cristó, cheꞌé se me rá Cristó gu̱un nucua̱j níꞌ si̱j noco̱ꞌ man Cristó quiꞌya̱j níꞌ suun ra̱cuíj níꞌ man tinúú níꞌ, ga̱a ne̱ veꞌé doj cuma̱n ta̱ranꞌ níꞌ si̱j noco̱ꞌ man Cristó, ne̱ sa̱ꞌ doj quiꞌya̱j níꞌ se‑su̱u̱n soꞌ na̱nj ado̱nj.

Efesios 4:16

Ne̱ ma̱an cheꞌé soꞌ roꞌ, me ase vaa oro̱ꞌ tuviꞌ nu̱ꞌ cúú man ꞌo̱ yuvii̱ roꞌ, da̱nj vaa nocoꞌ tuviꞌ níꞌ ga̱ tinúú níꞌ a. Ne̱ narqué Cristó se nucua̱j achiin rihaan nu̱ꞌ nij tinu̱j níꞌ, ne̱ cheꞌé dan veꞌé doj cuma̱n ta̱ranꞌ níꞌ, ne̱ veꞌé doj cunu̱u ꞌe̱e̱ rá níꞌ tinúú níꞌ ado̱nj.

Efesios 4:29

Se̱ caꞌvej soj caꞌmi̱i̱ soj nana̱ qui̱j maꞌ. Tana̱nj gu̱un rá soj veꞌé caꞌmi̱i̱ soj, ne̱ nana̱ sa̱ꞌ nana̱ achiin man tinúú soj roꞌ, yoꞌ me nago̱ꞌ soj rihaan tinúú soj á. Ne̱ cavi̱i̱ sa̱ꞌ doj ta̱ranꞌ nij síí cuno̱ nana̱ caꞌmi̱i̱ soj, sese sa̱ꞌ caꞌmi̱i̱ soj ado̱nj.

Efesios 5:19

Ase vaa chraꞌ no̱ rihaan Danj Yaꞌanj do̱ꞌ, chraꞌ aꞌmii cheꞌé Yaꞌanj do̱ꞌ, chraꞌ rqué Nimán Yaꞌanj man soj do̱ꞌ roꞌ, da̱nj ga̱a̱ nana̱ caꞌmi̱i̱ soj ga̱ tinúú soj á. Ne̱ cachra̱a̱ nimán soj chraꞌ rihaan Síí ꞌNi̱j Raꞌa man níꞌ á.

1 Tesalonicenses 5:11

Cheꞌé dan ase vaa ꞌyaj soj cuano̱ roꞌ, da̱nj na̱nj nago̱ꞌ soj nana̱ sa̱ꞌ man tinúú soj, cheꞌé rej nari̱ꞌ nucuaj nimán tinúú soj, ne̱ ra̱cuíj soj man tinúú soj yan sa̱ꞌ doj canoco̱ꞌ nij tinu̱j nij soj man Yaꞌanj á.