1 Corintios 14:16 - Triqui de San Juan Copala

¹⁶ Da̱nj quiꞌya̱j soj cheꞌé se asa̱ꞌ nuu chre̱ꞌ soj cachi̱nj niꞌya̱j soj rihaan Yaꞌanj, ne̱ ꞌnaꞌ nij síí ataa nari̱ꞌ sa̱ꞌ snana̱ Yaꞌanj a. Ne̱ sese ina̱nj nimán so̱ꞌ cata̱j so̱ꞌ guun niꞌya̱j níꞌ rihaan Yaꞌanj do̱ꞌ, sese ina̱nj nimán so̱ꞌ cata̱j se vaa sa̱ꞌ vaa Yaꞌanj do̱ꞌ, ne̱ asa̱ꞌ caꞌve̱e cuno̱ síí ꞌnaꞌ naca̱ nana̱ caꞌmi̱i̱ so̱ꞌ ga̱. Asa̱ꞌ caꞌve̱e cata̱j soꞌ “Ya̱ da̱nj vaa ado̱nj” cheꞌé nana̱ caꞌmii so̱ꞌ ga̱.

1 Corintios 14:16 ပူးပေါင်းရင်းမြစ်များ

San Mateo 15:36

Ga̱a ne̱ nica̱j soꞌ chi̱j rachrúún yoꞌ ga̱ do̱j xcuaj, ne̱ cataj soꞌ guun niꞌya̱j níꞌ rihaan Yaꞌanj, ga̱a ne̱ cuxraꞌ taꞌa̱j soꞌ man rachrúún yoꞌ do̱ꞌ, man nee̱ xcuaj yoꞌ do̱ꞌ, ne̱ caxríj soꞌ ston nij síí tucuꞌyón snana̱ soꞌ, ne̱ rqué nij soꞌ rihaan nij yuvii̱ a.

San Mateo 28:20

Ne̱ tu̱cuꞌyón soj rihaan nij yuvii̱ se vaa quiꞌya̱j nij yuvii̱ nu̱ꞌ suun caꞌnéꞌ ꞌu̱nj rihaan soj á. Veé dan yu̱u̱n cheꞌe̱ cache̱e̱ ꞌu̱nj ga̱ soj da̱j a̱ güii, nda̱a se navi̱j nu̱ꞌ chumii̱ nihánj na̱nj ado̱nj ―taj Jesús rihaan nij soꞌ a.

San Mateo 6:13

Ca̱ráán raꞌá so̱ꞌ xráá núj rihaan chrej chiꞌi̱i̱, ne̱ ti̱nanii so̱ꞌ man núj se̱ quiꞌyaj núj cacunꞌ, quiꞌya̱j Síí Chre̱e maꞌ. Ina̱nj da̱nj caꞌmi̱i̱ soj cachi̱nj niꞌya̱j soj rihaan Yaꞌanj ado̱nj.

San Marcos 16:20

Ga̱a ne̱ nij síí tucuꞌyón snana̱ soꞌ me se caꞌanj caꞌmi̱i̱ natáj nij soꞌ snana̱ soꞌ nu̱ꞌ nij chumanꞌ, ne̱ racuíj Síí ꞌNi̱j Raꞌa man níꞌ man nij soꞌ, ne̱ dan me se cheꞌé suun sa̱ꞌ noco̱o quiꞌyaj nij soꞌ me se xraan doj canocoꞌ nij yuvii̱ snana̱ Jesús a.

San Juan 21:25

Ne̱ vaa queꞌe̱e̱ doj rasu̱u̱n quiꞌyaj uún Jesús, tza̱j ne̱ sese cachrón nii nu̱ꞌ nana̱ cheꞌé ꞌo̱ ꞌo̱ nij rasu̱u̱n yoꞌ rihaan yanj nihánj, ne̱ se̱ quisíj chumii̱ nihánj cuma̱n cunuda̱nj nij yanj libró yoꞌ, rá ꞌu̱nj a̱ maꞌ.

San Juan 7:15

Cheꞌé dan caráyaꞌa̱nj nij síí uun chij rihaan nij yuvii̱ israelitá, ne̱ cataj nij soꞌ a: ―Né si̱j tucuꞌyón me síí nihánj maꞌ. Me rej nariꞌ soꞌ snana̱ Yaꞌanj ga̱ ―taj nij síí uun chij yoꞌ niꞌya̱j nij soꞌ man Jesús a.

Hechos 4:13

Dan me se queneꞌen nij soꞌ se vaa ne cuchuꞌvi̱ꞌ Pedró ga̱ Juan ne̱ sca̱ꞌ uxrá caꞌmii ro̱j soꞌ, ne̱ xcaj nij soꞌ cuentá se vaa né si̱j tucuꞌyón yanj me ro̱j soꞌ, tza̱j ne̱ sa̱ꞌ uxrá nariꞌ ro̱j soꞌ a. Cheꞌé dan caráyaꞌa̱nj nij soꞌ a. Ne̱ queneꞌen nij soꞌ se vaa ro̱j soꞌ me síí cachéé ga̱ Jesús a.

1 Corintios 11:24

ne̱ cataj soꞌ guun niꞌya̱j níꞌ rihaan Yaꞌanj cheꞌé rachrúún yoꞌ, ne̱ guun cheꞌe̱ soꞌ cuxraꞌ taꞌa̱j soꞌ man rachrúún yoꞌ, ga̱a ne̱ cataj soꞌ a: “Nihánj me nee̱ manj, ne̱ ina̱nj cheꞌé soj vaa nihánj ado̱nj. Cha̱ soj man nihánj, ga̱a ne̱ nanu̱j rá soj manj á”, taj Jesús rihaan nij síí noco̱ꞌ man soꞌ a.

1 Corintios 14:14

Tza̱j ne̱ sese caꞌmi̱i̱ ꞌu̱nj xnaꞌánj naca̱ cachi̱nj ni̱ꞌyáá ꞌu̱nj rihaan Yaꞌanj, ne̱ ina̱nj ma̱an nimán ꞌu̱nj me cachi̱nj niꞌya̱j rihaan Yaꞌanj, ne̱ cúú ya̱vej, tza̱j ne̱ se̱ cachíín niꞌya̱j yoꞌ rihaan Yaꞌanj a̱ maꞌ.

1 Corintios 14:2

Dan me se xa̱ꞌ síí aꞌmii xnaꞌánj naca̱, tza̱j ne̱ ne aꞌmii soꞌ rihaan yuvii̱ maꞌ. Rihaan Yaꞌanj aꞌmii soꞌ, ne̱ taj síí uno nana̱ aꞌmii soꞌ maꞌ. ꞌO̱ se racuíj Nimán Yaꞌanj man soꞌ aꞌmii soꞌ nana̱ sa̱ꞌ yuve̱ tihaa̱n naca̱ Yaꞌanj rihaan maꞌa̱n soꞌ ado̱nj.

1 Corintios 16:24

Ne̱ ꞌe̱e̱ rá ꞌu̱nj man ta̱ranꞌ soj si̱j noco̱ꞌ xraan man Cristó Jesús ado̱nj.

2 Corintios 1:20

Cunuda̱nj nij nana̱ cataꞌ tuꞌva Yaꞌanj cheꞌé níꞌ roꞌ, niꞌya̱j níꞌ man Cristó ne̱ xcaj níꞌ cuentá se vaa ya̱ vaa nu̱ꞌ nana̱ yoꞌ chugua̱nj. Ne̱ cheꞌé se si̱j noco̱ꞌ man Cristó me níꞌ, cheꞌé dan taj níꞌ “Ya̱ da̱nj vaa ado̱nj”, taj níꞌ rihaan Yaꞌanj, ne̱ sa̱ꞌ doj xcaj yuvii̱ cuentá se vaa veꞌé ndoꞌo ꞌyaj Yaꞌanj ado̱nj.

Apocalipsis 22:20

Dan me se Jesús si̱j nataꞌ ya̱ nana̱ nihánj me se taj soꞌ a: “Raꞌya̱nj cuchi̱j rihaan soj á”, taj soꞌ rihaan níꞌ a. Ne̱ cata̱j níꞌ á: “Veé da̱nj ga̱a̱ ya̱ ado̱nj. Caꞌna̱ꞌ so̱ꞌ Jesús Si̱j ꞌNi̱j Raꞌa man núj á”, cata̱j níꞌ rihaan Jesús ado̱nj.

Apocalipsis 5:14

Ga̱a ne̱ cataj caꞌa̱nj nij xcuu yoꞌ a: ―Veé da̱nj ga̱a̱ ya̱ ado̱nj ―taj nij xoꞌ a. Ga̱a ne̱ cayáán ru̱j nij síí uun chij, ne̱ caráj gue̱e̱ nij soꞌ a.

Apocalipsis 7:12

Ne̱ cataj nij soꞌ a: Veé da̱nj ga̱a̱ ya̱ ado̱nj. No̱ xcúún Taꞌanj níꞌ caꞌmi̱i̱ sa̱ꞌ ta̱ranꞌ níꞌ cheꞌé soꞌ do̱ꞌ, cata̱j níꞌ se vaa niꞌndaj ya̱ sa̱ꞌ veꞌé vaa soꞌ do̱ꞌ, ni̱caj ndoꞌo soꞌ cuentá do̱ꞌ, cata̱j níꞌ guun niꞌya̱j ndoꞌo níꞌ rihaan soꞌ do̱ꞌ, cara̱a̱ cochro̱j níꞌ rihaan soꞌ do̱ꞌ, gu̱un chij ndoꞌo soꞌ do̱ꞌ, gu̱un nucua̱j ndoꞌo soꞌ do̱ꞌ, nu̱ꞌ cavii nu̱ꞌ caꞌanj ado̱nj. Veé da̱nj ga̱a̱ ya̱ ado̱nj, taj nij soꞌ niꞌya̱j nij soꞌ Yaꞌanj a.