1 Corintios 13:12 - Triqui de San Juan Copala

¹² Vaa se neꞌen níꞌ cuano̱, rá níꞌ, tza̱j ne̱ ne neꞌen sa̱ꞌ níꞌ man yoꞌ maꞌ. Dan me se ase vaa yuvii̱ niꞌya̱j rihaan ꞌo̱ se niꞌya̱j rihaan roꞌ, da̱nj vaa níꞌ, ne̱ sese ne naruvi̱i̱ rihaan se niꞌya̱j rihaan, ne̱ se̱ queneꞌen sa̱ꞌ yuvii̱ rihaan yuvii̱ maꞌ. Ne̱ da̱nj vaa níꞌ uún, ne̱ ma̱n ndoꞌo rasu̱u̱n ne neꞌen sa̱ꞌ níꞌ maꞌ. Tza̱j ne̱ vaa güii canicu̱nꞌ níꞌ rihaan maꞌa̱n Yaꞌanj, ne̱ sa̱ꞌ uxrá queneꞌe̱n níꞌ man maꞌa̱n soꞌ a. Cuano̱ nihánj me se ne neꞌenj cunuda̱nj, tza̱j ne̱ vaa güii, ne̱ ase vaa neꞌen Yaꞌanj manj roꞌ, da̱nj ga̱a̱ que̱neꞌenj man cunuda̱nj ado̱nj.

1 Corintios 13:12 ပူးပေါင်းရင်းမြစ်များ

San Mateo 18:10

’Tu̱mé soj man soj se̱ cataj soj se vaa taj yuꞌvee nó ꞌo̱ tuviꞌ soj síí nica̱ꞌ nimán maꞌ. ꞌO̱ se cata̱j xnaꞌanj ꞌu̱nj rihaan soj cuano̱ se vaa vaa se‑mo̱zó Réé ꞌu̱nj síí nicu̱nꞌ xta̱ꞌ tumé man ꞌo̱ ꞌo̱ nij soꞌ na̱nj ado̱nj. Ne̱ niga̱nj nicunꞌ nij soꞌ rihaan Réj, ne̱ uno Réj nu̱ꞌ nana̱ nataꞌ nij soꞌ rihaan Réj a.

San Mateo 5:8

’Cavi̱i̱ sa̱ꞌ ta̱ranꞌ nij síí vaa sa̱ꞌ nimán ado̱nj. ꞌO̱ se queneꞌe̱n maꞌa̱n nij soꞌ man Yaꞌanj vaa güii ado̱nj.

San Juan 10:15

Dan me se neꞌen Réj Yaꞌanj manj, ne̱ neꞌenj man Réj, ne̱ ase vaa ꞌu̱nj ga̱ Réj roꞌ, da̱nj vaa daán ꞌu̱nj matzinj ga̱ ꞌu̱nj chugua̱nj. Ne̱ aꞌnéé nimanj cavi̱j cheꞌé nij xoꞌ ado̱nj.

Romanos 8:18

Veé dan me se ranꞌ xa̱ꞌ níꞌ sayuun cuano̱, tza̱j ne̱ vaa güii, ne̱ cavi̱i̱ sa̱ꞌ uxrá níꞌ doj rihaan sayuun ranꞌ níꞌ cuano̱ ado̱nj. ꞌO̱ se ataa ti̱haa̱n Yaꞌanj rihaan níꞌ se vaa niꞌndaj ya̱ veꞌé ga̱a̱ níꞌ, quiꞌya̱j Yaꞌanj na̱nj chugua̱nj. Da̱nj vaa raj na̱nj á.

1 Corintios 13:11

Ga̱a mej xnii me se aꞌmii xnií ꞌu̱nj, ne̱ da̱j se uun rá xnii, da̱nj uun raj, ne̱ da̱j se nuchruj ra̱a̱ xnii, da̱nj nuchruj ra̱a̱ ꞌu̱nj a. Tza̱j ne̱ ya̱j cachij ꞌu̱nj, guún ꞌu̱nj snóꞌo noco̱o, ne̱ tanáj xco̱ ꞌu̱nj nu̱ꞌ se vaa quiꞌyáj ga̱a mej xnii a.

1 Corintios 8:3

Tza̱j ne̱ sese ya̱ aráj cochro̱j ꞌo̱ soꞌ rihaan Yaꞌanj, ne̱ ya̱ neꞌen Yaꞌanj man soꞌ uún ado̱nj.

2 Corintios 3:18

Ne̱ taj se aráán rihaan ta̱ranꞌ níꞌ maꞌ. ꞌO̱ se uun nucua̱j níꞌ neꞌen níꞌ man Síí ꞌNi̱j Raꞌa man níꞌ, se vaa niꞌndaj ya̱ veꞌé vaa soꞌ, ne̱ ase vaa soꞌ roꞌ, da̱nj ga̱a̱ uún maꞌa̱n níꞌ, cheꞌé se niꞌya̱j níꞌ man soꞌ ado̱nj. Dan me se do̱ꞌ do̱ꞌ naquiꞌyaj sa̱ꞌ Nimán Yaꞌanj Si̱j ꞌNi̱j Raꞌa man níꞌ nimán níꞌ, ne̱ dan me se ne̱ soꞌ nimán níꞌ, ne̱ ase vaa maꞌa̱n soꞌ roꞌ, da̱nj ga̱a̱ ta̱ranꞌ níꞌ uún ado̱nj.

2 Corintios 5:7

ꞌO̱ se ataa queneꞌe̱n núj se vaa rque̱ Yaꞌanj man núj, tza̱j ne̱ amán rá núj niꞌya̱j núj man Yaꞌanj se vaa ya̱ vaa nana̱ cataꞌ tuꞌva soꞌ rihaan núj, ne̱ cheꞌé dan uno núj rihaan soꞌ na̱nj ado̱nj.

Filipenses 3:12

Né se a̱j quisíj ꞌu̱nj cunuu sa̱ꞌ ꞌu̱nj, taj ꞌu̱nj maꞌ. Ataa quisi̱j ꞌu̱nj se vaa me rá Yaꞌanj gunj, ne̱ cheꞌé dan me ꞌo̱ rqueé ꞌu̱nj, cheꞌé rej cunu̱u sa̱ꞌ ꞌu̱nj vaa güii a. Cristó Jesús me síí quiꞌyaj canocóꞌ ꞌu̱nj man soꞌ, cheꞌé se me rá maꞌa̱n soꞌ cunu̱u sa̱ꞌ ꞌu̱nj ado̱nj.

Santiago 1:23

ꞌO̱ se síí atúj rmaꞌa̱n snana̱ Yaꞌanj xréé roꞌ, ase vaa síí niꞌya̱j rihaan espejó roꞌ, da̱nj vaa soꞌ,

1 Juan 3:2

Tinu̱j, nocoj, cuano̱ nihánj me se taꞌni̱j Yaꞌanj me níꞌ, ne̱ ataa xca̱j níꞌ cuentá da̱j si̱j ga̱a̱ níꞌ quiꞌya̱j Yaꞌanj vaa güii ado̱nj. Ma̱an se neꞌen níꞌ se vaa asa̱ꞌ caꞌnaꞌ Cristó, ne̱ ase vaa soꞌ roꞌ, da̱nj ga̱a̱ maꞌa̱n níꞌ uún ado̱nj. ꞌO̱ se queneꞌe̱n níꞌ man soꞌ, ne̱ xca̱j ya̱ níꞌ cuentá da̱j vaa xa̱ꞌ soꞌ na̱nj ado̱nj.

Apocalipsis 22:4

Ne̱ riha̱a̱n ya̱ queneꞌe̱n nij soꞌ rihaan maꞌa̱n ya̱ Yaꞌanj, ne̱ quino̱ se‑chuvi̱i Yaꞌanj caan rihaan nij soꞌ,