1 Corintios 1:21 - Triqui de San Juan Copala

²¹ ꞌO̱ se nij síí ma̱n rihaan chumii̱ nihánj roꞌ, ne cavi̱i̱ raa̱ nij soꞌ da̱j vaa Yaꞌanj maꞌ. Tza̱j ne̱ síí cu̱u raa̱ me Yaꞌanj, ne̱ maꞌa̱n Yaꞌanj caráán chrej rihaan nij soꞌ se̱ gaa na̱nj xca̱j nij soꞌ cuentá cheꞌé soꞌ ado̱nj. ꞌO̱ se me rá Yaꞌanj cuno̱ nij yuvii̱ nana̱ aꞌmii natáj núj, ne̱ sese cuno̱ nij yuvii̱, ne̱ ti̱nanii Yaꞌanj man nij yuvii̱ rihaan sayuun, ne̱ dan me se nda̱ꞌ se nana̱ snúú rmaꞌa̱n me nana̱ aꞌmii núj, rá taꞌa̱j nij yuvii̱, tza̱j ne̱ o̱rúnꞌ nana̱ yoꞌ me nana̱ ti̱nanii man yuvii̱ rihaan sayuun na̱nj ado̱nj.

1 Corintios 1:21 ပူးပေါင်းရင်းမြစ်များ

San Mateo 11:25

Dan me se güii yoꞌ cachíín niꞌya̱j Jesús rihaan Yaꞌanj, cataj soꞌ a: ―Síí ꞌNi̱j Raꞌa xta̱ꞌ do̱ꞌ, Síí ꞌNi̱j Raꞌa chumii̱ do̱ꞌ, mé so̱ꞌ, Ata̱j. Ne̱ sa̱ꞌ uxrá quiꞌyáá so̱ꞌ caráán so̱ꞌ rihaan nij síí avii raa̱ do̱ꞌ, rihaan nij síí acaj cuentá do̱ꞌ, se vaa se̱ cuno nij soꞌ snana̱j maꞌ. Ma̱an nij síí vaa nica̱ꞌ nimán roꞌ, veꞌé cuno nij soꞌ, quiꞌyáá so̱ꞌ ado̱nj.

San Lucas 10:21

Ma̱an güii yoꞌ roꞌ, guun niha̱ꞌ ya̱ rá nimán Jesús, quiꞌyaj Nimán Yaꞌanj, ne̱ cataj Jesús rihaan Yaꞌanj a: ―Síí ꞌNi̱j Raꞌa chumii̱ do̱ꞌ, Síí ꞌNi̱j Raꞌa xta̱ꞌ do̱ꞌ, mé so̱ꞌ, Ata̱j. Ne̱ sa̱ꞌ uxrá quiꞌyáá so̱ꞌ caráán so̱ꞌ rihaan nij síí avii raa̱ do̱ꞌ, rihaan nij síí acaj cuentá do̱ꞌ, se vaa se̱ cuno nij soꞌ snana̱j maꞌ. Ma̱an nij síí vaa nica̱ꞌ nimán roꞌ, veꞌé cuno nij soꞌ, quiꞌyáá so̱ꞌ a. Da̱nj ina̱nj quiꞌyáá so̱ꞌ, cheꞌé yan da̱nj me rá so̱ꞌ qui̱ꞌyáá so̱ꞌ, Ata̱j ―taj Jesús rihaan Rej soꞌ Yaꞌanj a.

San Lucas 12:32

’Se̱ cuchuꞌviꞌ soj maꞌ. Ase vaa daán Yaꞌanj matzinj vaa soj, ne̱ Yaꞌanj tumé man soj, ne̱ a̱j guun rá Rej soj Yaꞌanj se vaa gu̱un chij soj ga̱ soꞌ vaa güii a.

San Juan 12:31

Cheꞌé se vaa qui̱ranj cuano̱ caꞌne̱ꞌ Yaꞌanj cacunꞌ cheꞌé nij yuvii̱ ma̱n rihaan chumii̱ nihánj, ne̱ quiri̱i̱ yaníj Yaꞌanj man Síí Chre̱e síí uun chij rihaan chumii̱ nihánj chugua̱nj.

Romanos 1:28

Ne caꞌve̱j rá nij yuvii̱ queneꞌe̱n nij yuvii̱ da̱j vaa Yaꞌanj a̱ maꞌ. Cheꞌé dan caꞌneꞌ rá Yaꞌanj ga̱ nij yuvii̱, ne̱ navij raa̱ nij yuvii̱ quiriꞌ na̱nj á. Nda̱a síj, ga̱a ne̱ ina̱nj se nij ꞌyaj nij yuvii̱, ne̱ dan me se ꞌyaj nij soꞌ ina̱nj se naꞌvej rá Yaꞌanj quiꞌya̱j nij soꞌ na̱nj ado̱nj.

Romanos 11:33

Ina̱nj sa̱ꞌ uxrá avii raa̱ Yaꞌanj na̱nj á. Sa̱ꞌ uxrá neꞌen soꞌ, ne̱ se̱ guun nucua̱j yuvii̱ naquiꞌya̱j cu̱u yuvii̱ nu̱ꞌ se vaa ꞌyaj Yaꞌanj maꞌ. Veé da̱nj caꞌmii ꞌo̱ síí nataꞌ snana̱ Yaꞌanj ga̱a naá, cataj soꞌ a:

1 Corintios 1:18

Dan me se vaa yuvii̱ va̱j chrej caꞌa̱nj niꞌya̱, ne̱ nataꞌ nii nana̱ se vaa caviꞌ Cristó rihaan rcutze̱ uno nij yuvii̱ yoꞌ, tza̱j ne̱ taj se ꞌyáꞌ cuchuma̱n rá nij yuvii̱ maꞌ. Nana̱ snúú rmaꞌa̱n me nana̱ yoꞌ rihaan nij soꞌ na̱nj ado̱nj. Tza̱j ne̱ ino̱ vaa rá níꞌ si̱j va̱j chrej cavi̱i̱ sa̱ꞌ, ne̱ neꞌen níꞌ se vaa cheꞌé nana̱ yoꞌ roꞌ, gu̱un nucua̱j Yaꞌanj ti̱nanii Yaꞌanj man níꞌ rihaan sayuun ado̱nj.

1 Corintios 1:23

Tza̱j ne̱ aꞌmii natáj núj nana̱ se vaa caviꞌ Cristó rihaan rcutze̱ cheꞌé yuvii̱, ne̱ naꞌa̱j nij yuvii̱ israelitá cuno̱ nij soꞌ nana̱ yoꞌ, ne̱ nij yuvii̱ yaníj taj se vaa nana̱ snúú rmaꞌa̱n me nana̱ yoꞌ ado̱nj.

1 Corintios 1:24

Tza̱j ne̱ a̱j canacúún Yaꞌanj man taꞌa̱j nij yuvii̱ israelitá do̱ꞌ, man taꞌa̱j nij yuvii̱ yaníj do̱ꞌ, se vaa canoco̱ꞌ nij soꞌ man soꞌ, ne̱ ga̱a uno nij soꞌ nana̱ aꞌmii natáj núj, ne̱ uun ya̱ rá nij soꞌ se vaa síí caꞌnéé Yaꞌanj ti̱nanii man yuvii̱ rihaan sayuun me Cristó, ne̱ xcaj nij soꞌ cuentá se vaa ya̱ nucua̱j ndoꞌo Yaꞌanj ne̱ ya̱ avii ndoꞌo raa̱ Yaꞌanj, cheꞌé se caꞌnéé Yaꞌanj man Cristó rihaan chumii̱ nihánj ado̱nj.

1 Corintios 1:25

Dan me se nda̱ꞌ se nana̱ snúú rmaꞌa̱n me nana̱ rqué Yaꞌanj, rá taꞌa̱j nij yuvii̱, tza̱j ne̱ né na̱na̱ snúú rmaꞌa̱n me nana̱ yoꞌ maꞌ. ꞌO̱ se avii doj raa̱ Yaꞌanj rihaan nij yuvii̱ na̱nj ado̱nj. Ne̱ nda̱ꞌ se ninaj ndoꞌo Yaꞌanj, rá taꞌa̱j nij yuvii̱, tza̱j ne̱ ne ninaj Yaꞌanj maꞌ. ꞌO̱ se Yaꞌanj roꞌ, me síí nucua̱j ndoꞌo doj rihaan nij yuvii̱ nucua̱j ndoꞌo ado̱nj.

1 Corintios 1:27

Ma̱an se ina̱nj síí niꞌyo̱n ma̱n rihaan chumii̱ narii Yaꞌanj, ne̱ dan me se nacaj Yaꞌanj man nij síí niꞌyo̱n, cheꞌé rej gu̱un naꞌa̱j nij síí avii ndoꞌo raa̱ ma̱n rihaan chumii̱ na̱nj á. Ne̱ síí taj snucua̱j ma̱n rihaan chumii̱ narii Yaꞌanj, ne̱ dan me se nacaj Yaꞌanj man nij soꞌ, cheꞌé se me rá Yaꞌanj gu̱un naꞌa̱j nij síí vaa snucua̱j rihaan chumii̱ nihánj na̱nj ado̱nj.

1 Corintios 11:32

Tza̱j ne̱ ma̱an cheꞌé se nij ꞌyaj níꞌ, rá Síí ꞌNi̱j Raꞌa man níꞌ, ne̱ cheꞌé dan ꞌyaj soꞌ sayuun man níꞌ, cheꞌé rej nari̱ꞌ níꞌ da̱j quiꞌya̱j níꞌ cavi̱i̱ sa̱ꞌ níꞌ ado̱nj. Sese nari̱ꞌ sa̱ꞌ níꞌ chrej sa̱ꞌ, ga̱a ne̱ se̱ quiranꞌ níꞌ sayuun quiꞌya̱j Yaꞌanj, asa̱ꞌ quiꞌyaj soꞌ sayuun man cunuda̱nj yuvii̱ ma̱n rihaan chumii̱ nihánj maꞌ.

1 Corintios 2:14

ꞌO̱ se naꞌvej rá yuvii̱ ma̱n rihaan chumii̱ nihánj cuno̱ nij soꞌ nana̱ aꞌmii Nimán Yaꞌanj maꞌ. ꞌO̱ se snúú rmaꞌa̱n nana̱ aꞌmii Nimán Yaꞌanj, rá nij soꞌ, ne̱ ne racuíj Nimán Yaꞌanj man nij soꞌ naquiꞌya̱j cu̱u nij soꞌ nana̱ yoꞌ a̱ maan ado̱nj. Cheꞌé dan taj se ꞌyáꞌ cuno̱ nij soꞌ maꞌ.

1 Corintios 4:10

Dan me se ase vaa síí niꞌyo̱n vaa núj rihaan chumii̱ nihánj, cheꞌé Cristó, tza̱j ne̱ síí cu̱u raa̱ me soj cheꞌé Cristó, rá soj a. Ne̱ síí nucua̱j ndoꞌo me soj, rá soj, tza̱j ne̱ núj me se síí ninaj me núj a. Ne̱ veꞌé ndoꞌo aráj cochro̱j yuvii̱ rihaan soj, tza̱j ne̱ xa̱ꞌ maꞌa̱n núj, tza̱j ne̱ tana̱nj a̱ nachriꞌ yuvii̱ niꞌya̱j yuvii̱ man núj a.

1 Corintios 6:2

Ne̱ ne neꞌen soj se vaa vaa güii, ne̱ caꞌne̱ꞌ níꞌ si̱j noco̱ꞌ man Cristó cunuda̱nj cacunꞌ cheꞌé cunuda̱nj nij yuvii̱ ma̱n rihaan chumii̱ nihánj a̱ naꞌ. Sese caꞌne̱ꞌ soj cacunꞌ cheꞌé cunuda̱nj chumii̱ vaa güii, ga̱a ne̱ me cheꞌé se̱ guun nucua̱j soj caꞌne̱ꞌ soj cacunꞌ cheꞌé cacunꞌ leꞌe̱j nii cuano̱ ga̱.

Gálatas 1:15

Tza̱j ne̱ asi̱j ataa caꞌnga̱a̱ ꞌu̱nj, ne̱ guun rá Yaꞌanj se vaa qui̱ꞌyáj se‑su̱u̱n soꞌ a. Dan me se quiꞌyaj ndoꞌo Yaꞌanj se lu̱j cheꞌej se vaa canacúún soꞌ manj,

Gálatas 4:8

Ga̱a rque̱ me se ne neꞌen ya̱ soj da̱j vaa Yaꞌanj maꞌ. Cheꞌé dan me soj mozó rihaan nij yaꞌanj uun chij rihaan rasu̱u̱n ma̱n rihaan chumii̱ nihánj, tza̱j ne̱ né yaꞌa̱nj ya̱ me nij yaꞌanj yoꞌ maꞌ.

Efesios 1:9

ꞌO̱ se soꞌ me síí quiꞌyaj xcaj níꞌ cuentá cheꞌé nana̱ sa̱ꞌ yuve̱ aꞌmii cheꞌé da̱j me rá maꞌa̱n soꞌ quiꞌya̱j soꞌ cheꞌé níꞌ si̱j noco̱ꞌ man Cristó

Efesios 3:10

Tza̱j ne̱ da̱j a̱ nij síí uun chij rej xta̱ꞌ do̱ꞌ, da̱j a̱ nij síí nica̱j suun rej xta̱ꞌ do̱ꞌ roꞌ, me rá Yaꞌanj xca̱j nij soꞌ cuentá cuano̱ se vaa ina̱nj nana̱ cu̱u sa̱ꞌ ndoꞌo avii raa̱ Yaꞌanj, ne̱ queneꞌe̱n nij soꞌ man xꞌneꞌ ta̱ranꞌ níꞌ si̱j noco̱ꞌ man Cristó, ne̱ xca̱j nij soꞌ cuentá se vaa avii ndoꞌo raa̱ Yaꞌanj ado̱nj.

Colosenses 1:19

Ase vaa maꞌa̱n Yaꞌanj roꞌ, da̱nj vaa Cristó, quiꞌyaj Yaꞌanj, ne̱ soꞌ me síí nica̱j cunuda̱nj snucua̱j Yaꞌanj ado̱nj.

Hebreos 1:14

Dan me se xa̱ꞌ nij se‑mo̱zó Yaꞌanj, tza̱j ne̱ nana̱ u̱u̱n me nij soꞌ a. Síí nu̱u̱ rihaan Yaꞌanj me nij soꞌ, ne̱ aꞌnéé Yaꞌanj man nij soꞌ ra̱cuíj nij soꞌ man níꞌ si̱j nani̱i̱ rihaan sayuun ne̱ cavi̱i̱ sa̱ꞌ na̱nj ado̱nj.

Hebreos 2:3

Cheꞌé dan, asa̱ꞌ caꞌve̱e nani̱i̱ maꞌa̱n níꞌ rihaan sayuun ne̱ cavi̱i̱ sa̱ꞌ níꞌ, sese se̱ xcaj sa̱ꞌ níꞌ cuentá cheꞌé chrej sa̱ꞌ chrej quiꞌyaj naca̱ Yaꞌanj nani̱i̱ níꞌ rihaan sayuun, rá soj ga̱. Dan me se asino maꞌa̱n Síí ꞌNi̱j Raꞌa man níꞌ me síí cuchruj chrej sa̱ꞌ yoꞌ, ga̱a ne̱ nij síí cuno nana̱ caꞌmii soꞌ roꞌ, cataj xnaꞌanj nij soꞌ snana̱ soꞌ nana̱ sa̱ꞌ yoꞌ rihaan níꞌ, ne̱ nariꞌ sa̱ꞌ níꞌ nana̱ yoꞌ, quiꞌyaj nij soꞌ ado̱nj.

Hebreos 7:25

Dan me se ꞌo̱ vaa iꞌna̱ꞌ Jesús, ne̱ uun nucua̱j soꞌ ti̱nanii soꞌ rihaan sayuun nu̱ꞌ cavii nu̱ꞌ caꞌanj man nij síí uchiꞌ rihaan Yaꞌanj cheꞌé soꞌ ado̱nj. Da̱nj quiꞌya̱j soꞌ cheꞌé se ꞌo̱ vaa iꞌna̱ꞌ soꞌ, ne̱ achíín niꞌya̱j soꞌ rihaan Yaꞌanj cheꞌé nij soꞌ nu̱ꞌ cavii nu̱ꞌ caꞌanj ado̱nj.

Santiago 4:4

Ne̱ ase vaa chana̱ otoj ga̱ ꞌó snóꞌo roꞌ, da̱nj vaa soj, ne̱ ne nocoꞌ ya̱ nimán soj man Yaꞌanj a̱ maꞌ. Xca̱j soj cuentá se vaa síí me rá cavi̱i̱ sa̱ꞌ ina̱nj rihaan chumii̱ nihánj roꞌ, soꞌ me síí ta̱j riꞌyunj man Yaꞌanj ado̱nj. Ya̱ uxrá á.

Santiago 5:15

Sese ya̱ amán rá nij síí achíín niꞌya̱j rihaan Yaꞌanj se vaa ra̱cuíj Yaꞌanj man síí ranꞌ, ne̱ nahu̱un síí ranꞌ yoꞌ, quiꞌya̱j Síí ꞌNi̱j Raꞌa man níꞌ, ne̱ sese tumé síí ranꞌ yoꞌ cacunꞌ, ne̱ navi̱j cacunꞌ xráá soꞌ a.

Santiago 5:20

ne̱ dan me se síí quiꞌya̱j canaán man tuviꞌ caꞌanj yaníj me se gu̱un nucua̱j soꞌ ti̱nanii soꞌ man nimán tuviꞌ soꞌ rihaan sayuun ado̱nj. Dan me se caꞌne̱e̱ noco̱o ndoꞌo soꞌ cacunꞌ xráá tuviꞌ soꞌ ado̱nj.