Yeremiya 5:6 - Tonga Bible 1986

⁶ Chifukwa chenichi nkharamu yakutuwa ku dondo yazakuŵabaya, mphumphi yakutuwa ku bozwa yazakuŵamara. Nyalubwe wakhazga mu mizi yawo, we yose wakutuwa mwaku yo wakaparurikanga tumanatumana; chifukwa vyakulakwa vinandi; kuwere vuli kwawo nkhukuru.

Yeremiya 5:6 ပူးပေါင်းရင်းမြစ်များ

2 Mikoka 36:14

Wose ŵara ŵa ŵazukuru, ndi ŵanthu ŵangunanga ukongwa kulingana ndi ukazuzi wa ŵamitundu, ndipo ŵangukazuzga nyumba yaku Chiuta yo iyo wanguyipatuwa mu Yerusalemu.

Ezra 10:10

Ndipo Ezra mzukuru wanguma wanguti, “Imwe mwananga pakujitore ŵanthukazi ŵachilendo, mwakuzga kunanga kwaku Yisraele.

Ezra 9:6

ndinguti, “Chiuta wangu nde ndi soni kuyunuskiya chisku changu kwaku imwe Chiuta wangu, chifukwa vyakulakwa vibizga mitu yidu, ndipo kunanga kwidu kwakuwa kufika kuchanya.

Jobu 10:16

Ndipo asani nditijikwezge pachanya, imwe mutindiŵinga nge ndi nkharamu ndi kuchita vyakuziziswa kumikana nani;

Sumu 104:20

Imwe mukwata usiku, ndipo mu mdima vinyama vyose vya mu dondo vituwa.

Sumu 80:13

Nguruŵi zamdondo zitiyiphwatiya pasi, ndipo nyama zose za mudondo zitiyirgha.

Yesaya 1:23

Ŵaraŵara ŵinu ŵaŵa vigaruka ndi mabwezi gha ŵankhungu. We yose watanja vinda ndipo ŵaunukiya vyaulera. Kuti ŵavikiriya ŵana ŵaranda cha, ndipo makani gha choko ŵatighaphwere cha.

Yesaya 59:12

Pakuti mautimbanizi ghidughandana pa maso pinu, mauheni ghidu ghatitipanikizga; inya mauheni ghidu ghe pamoza nafwe, ndipo tiziŵa maukazuzi ghidu:

Yeremiya 14:7

“Chingana mautimbanizi ghidu ghatitisimika, tovyeni, Ambuya, chifukwa cha zina linu; pakuti kutondeka kwidu kwaŵa kukuru, talakwiya imwe.

Yeremiya 2:15

Nkharamu zamuwurumiya, zamukorome kwakubangula. Zapopeska charu chake; mizi yake njakupasuka, mulivi wakujamo.

Yeremiya 2:17

Asi ndimwe mwaŵeni mwajidaniya uheni uwo kuti ukuziyeni pakureka Ambuya Chiuta winu, penipo wangukurongozgani mu nthowa?

Yeremiya 2:19

Uheni winu ukudikiskeninga, ndipo kureka kusopa kukakuchenyaninga. Ziŵani, ndi wonani, kuti imwe pakureka Ambuya Chiuta winu mbuheni ndi kuŵaŵa kwaku imwe; kundopa ine mulivi mwaku imwe, atiti Ambuya Chiuta wa maŵanja.

Yeremiya 2:31

Ndipo imwe mwa ŵale phwereni mazu gha Ambuya. Kumbi ine ndaŵa bozwa kwaku Yisraele, pamwenga charu cha mdima uzitu? Na chifukwa nchine ŵanthu ŵangu ŵatiti, ‘Te ŵanangwa tizengeko so cha kwinu’?

Yeremiya 25:38

Uli ndi nkharamu ŵasiya chivwati chawo, pakuti charu chawo chasanduka mapopa chifukwa cha lipanga la wakusuzga, ndi chifukwa cha ukari wake wakofya.”

Yeremiya 30:14

Ŵakwanjiwa ŵako wose ŵakuruwa; kuti ŵatikuphwere nanga nkhamana cha; pakuti ndakupuma iwe nge ngwakupindikana, kulanga kwa murwani wambura lisungu pakuti kulakwa kwako nkhukuru, inya mauheni ghako nganandi.

Yeremiya 30:15

Chifukwa chine uliya ndi kulasika kwako? Kuŵaŵa kwako nkhwambura mapozgeka. Ndachita vinthu ivi kwaku iwe, chifukwa kulakwa kwako nkhukuru, chifukwa mauheni ghako nganandi.

Yeremiya 30:24

Kukwiya kwakofya kwa Ambuya kuti kukarekanga cha, mpaka penipo wachita ndi kufiska vyenivyo arongoso kuvichita. Mu mazuŵa gho ghatuza mwazamuwamo ichi.

Yeremiya 4:7

Nkharamu yatuwa mu thundu lake, wakupasuwa mitundu wasoka; waruta kutuwa ku malo ghake kwachichita mapopa, charu chinu; mizi yinu yikaŵanga yakubwanganduka, yambura wakujamo.

Yeremiya 49:19

Ehe, nge ndi nkharamu yituwa mu lisuwa la Yordane kulimbana ndi khora la mberere lakukho, ruŵiruŵi ndikaŵachitanga kuŵa wakuthaŵa kwaku iyo; ndipo ndikamikanga paku iyo mweniyo ndingakhumba kusankha. Pakuti ndi yani wakulingana nane? Njani wangamikana nane ndimuliska nunju wangaziŵa kuma paurongo pangu?

Yeremiya 8:5

Na chifukwa chine ŵanthu yaŵa ŵapatukiya kunyake, ŵawere vuli kwambura kuweko? Ŵakoreska kupusika, ŵakana kuweko.

Yeremiya 8:7

Chingana ndi kakoŵa mu machanya waziŵa nyengo zake; ndipo njiŵa, kaŵeluwelu, ndi tofu, ŵasunga nyengo za kuza kwawo; kweni ŵanthu ŵangu kuti ŵaziŵa cha lamulu la Ambuya.

Chitenje 1:5

Ŵakupindikana ŵake ŵasanduka ŵarongozgi, ŵarwani ŵake ŵasakata, chifukwa Ambuya atumukomweska pa unandi wa mautimbanizi ghake; ŵana ŵake ŵakuruta, mbaŵanda paurongo pa ŵakupindikana ŵawo.

Ezekiele 16:25

pa mphambano ya gurwi we yose ukuzengapo malo gha pachanya ndi kufipiska utozi wako, kujisaska iwe wamweni kwaku yose yo wajumphapo, ndipo wandaniska ureŵi wako.

Ezekiele 22:27

Mafumu ghawo mukati mwake ghayana ndi mphumphi zakuparuwa nyama, kudiska ndopa, kuparghang'a ma umoyo chifukwa chakupenja chanduwu chakupusika.

Ezekiele 23:19

Kweni ndipuuli wangurutirizga ureŵi wake, wachikumbuka mo wanguchitiya ureŵi wake mu charu cha Egipiti, mu mazuŵa gha umwali wake.

Danyele 7:4

Chakudanga chingukozgana ndi nkharamu ndipo chenga ndi mapapa gha nombo. Ndichilereska ndinguwona mapapa ghake ghakunyuka, ndipo chingunyamulika muchanya ndi kumikika pa karundi ghaŵi nge ndi munthu, ndipo chingupaskika mtima wa munthu.

Danyele 7:6

Pavuli paku ichi, ndingulereska, ndipo ehe, chinyake chakukozgana ndi nyalubwe cho chenga ndi mapapa ghanayi gha chiyuni pa musana wake; ndipo chenga ndi mitu yinayi; muwusu ungupaskika kwake.

Hoseya 5:14

Chifukwa ndiŵenge kwaku Efraimu nge ndi nkharamu, ndi nge ndi nkharamu yimana ku nyumba yaku Yuda. Ine, nadi ine, ndiparuwenge ndi kutuwapo, ndikonge ndipo palivi yo wangataska.

Habakuku 1:8

Ŵakavalo ŵawo mbapusu kuruska ŵanyalubwe, mbakari kuruska mphumphi zamazulo; ŵapakavalo ŵawo ŵajituntha, ŵapakavalo ŵatuwiya kutali, ŵawuruka nge ndi nombo yakuchimbiriya kurgha.

Zefaniya 3:3

Nduna zake mukati mwake ze nge ndi nkharamu yakukoroma; ŵeruzgi ŵake ndi mphumphi za mazulo zo kuti zisiya kanthu cha mpaka ndi mlenji.

Maŵerengedu 32:14

Ndipo awonani imwe mwa yuka mu malo gha auskemwe, mphapo ya ŵanthu ŵalakwi, kukuzgiya pachanya ukari wakofya wa Ambuya paku Yisraele.

Chivumbuzi 13:2

Ndipo chikoku cho ndinguwona chingukozgana ndi nyalubwe ndi marundi ghake nge ndi chipembere, mlomo wake nge ndi mlomo wa nkharamu. Ndipo nchalinda yo wanguchipaska nthazi yake, ndi chitengu chake chaufumu ndi mtufu ukuru.