2 Mikoka 15:2 - Tonga Bible 1986

² ndipo wanguruta kwa chikumana ndi Asa, ndipo wanguti kwaku iyo, “Mundivwe Asa ndi Yuda yose ndi Benjamini: Ambuya ŵe namwe penipo mweche nawo, Asani mutumpenja mumusaniyenge, kweni asani mutumjowo nayo wamjowoninga.

2 Mikoka 15:2 ပူးပေါင်းရင်းမြစ်များ

1 ŴaKaronga 11:25

Wenga wakupindikana wa ŵaYisraele mu mazuŵa ghose ghaku Solomoni, wachitanga vya mbanda nge ndimo wachitiyanga Hadadi; kweni wangutinkha Yisraele, wanguwusa mu Siriya.

1 ŴaKaronga 18:18

Ndipo wangwamuka, “Ine ndirivi kusuzga Yisraele, kweni iwe ndiwe wachita ichi, ndi nyumba ya ausu, chifukwa mukujowo malangulu gha Ambuya, mukurondo ŵa Bala.

2 ŴaKaronga 21:14

Ndipo ndikadikiskanga ŵakujapo wo ŵa ŵanthu ŵangu, ndi kuŵapereka mu janja la ŵakupindikana ŵawo, ŵakaŵanga nyama ndi vyakuskoŵa ku ŵakupindikana ŵawo wose,

1 Mikoka 28:9

“Ndipo iwe Solomoni mwana wangu umuziŵe Chiuta wa ausu, umutatariye ndi mtima wakufikapo, ndi umoyo wakuzomera; chifukwa Chiuta wapenjapenja mitima yose, ndipo waziŵa lunguluku le lose. Asani utumpenja umusaniyenge; kweni asani utumureka wakutayenge muyaya.

2 Mikoka 11:12

Ndipo mu mizi yose wanguŵikamo nguru ndi mikondo, wanguyikhozga ukongwa. Viyo wenga ndi Yuda ndi Benjamini ŵakumiya iyo.

2 Mikoka 12:5

Shemaya mchimi wanguza kwaku Rehoboamu ndi ku ŵana ŵa karonga ŵaku Yuda wo ŵanguwungana ku Yerusalemu chifukwa chaku Sheshaki, ndi wanguti kwaku wo, “Ambuya atiti, ‘Mwandijowo ine, nane so ndamrekani mu janja laku Sheshaki.’ ”

2 Mikoka 13:12

Wonani Chiuta wendi ifwe, ndiyo chirongozi widu, ndi ŵazukuru ŵake ndi mbata zakumba tichirwa nkhondo ndi imwe. Imwe mwa ŵana ŵaku Yisraele rekani kurwana ndi Ambuya Chiuta wa ambuyamwe; chifukwa mwanduwengepo kanthu cha.”

2 Mikoka 13:4

Ndipo Abija wanguma pa phiri Zemaraimu lo lemu phiri laku Efraimu, wanguti, “Iwe Yeroboamu, iwe ndi Yisraele yose, Mundivwe!

2 Mikoka 15:15

Ndipo ŵaYuda ŵangusekere pa rapu, chifukwa ŵangurapa ndi mtima wawo wose, ŵangumpenja ndi khumbo lawo lose ndipo ŵangumsaniya, ndipo Chiuta wanguŵapaska chipumulo kwakuzunguliya.

2 Mikoka 15:4

Kweni ŵati ŵang'anamukiya kwa Ambuya Chiuta waku Yisraele mu suzgu yawo ndikumpenja, ŵangumsaniya.

2 Mikoka 20:15

Iyo wanguti, “Avwani, imwe mose ŵaYuda ndi imwe muja mu Yerusalemu, ndi imwe karonga Yehosafati, viyo ndimo watumuneniyani Chiuta, wati, ‘Mungopanga cha chingana nkhutenthema chifukwa cha chimzinda ichi chikuru, chifukwa nkhondo njinu cha, njaku Chiuta.

2 Mikoka 20:17

Kuti nkhwinu kwachipota nkhondo cha, khwimani mtima, mwamkuma ŵaka jo, kuwona chipozomosko chaku Chiuta chakwaku imwe mwa ŵaYuda ndi Yerusalemu.’ Mungopanga chingana nkhutenthema, mawa rutaninge, chifukwa Chiuta waŵenge namwe.”

2 Mikoka 20:20

Ndipo ŵangucherera ndi chivivivi wanguruta ku bozwa laku Tekoa; ŵachiruta, Yehosafati wanguma wanguti, “Mundivwe, mwa ŵaYuda ndi Yerusalemu! Vwanani mwaku Chiuta widu, ndipo mukhozgekenge; gomezgani ŵamchimi ŵake ndipo mupundenge.”

2 Mikoka 24:20

Sono mzimu waku Chiuta ungusere mwaku Zekariya, mwana waku Yehoyada mzukuru; ndipo wanguma pachanya pa ŵanthu ndi wanguti kwaku wo, “Chiuta watiti, ‘Chifukwa nchine cho mujumphiya marangu gha Ambuya kuti mureke kutumbikaka? Chifukwa mwaŵasiya Ambuya, nawo so amsiyani.’ ”

2 Mikoka 26:5

Wangupenja Chiuta mu mazuŵa ghaku Zekariya yo wangumsambizga kopa Chiuta; ndipo nyengo yose yo wangupenje Ambuya, Chiuta wangumutumbika.

2 Mikoka 32:8

Kwaku iyo kwe janja la liŵavu la nyama; kweni kwaku ifwe kwe Ambuya Chiuta widu, kutovya ndi kurwa nkhondo zidu.” Ndipo ŵanthu ŵanguchinthiskika, kuyegeme pa mazu ghaku Hezekiya karonga waku Yuda.

2 Mikoka 33:11

Ndipo Ambuya pa chifukwa ichi, anguŵaziya ndi ŵachirongozgi ŵankhondo ŵa karonga wa Asiriya, ŵangumuko Manase ndi kumumanga ndi maunyoro, wanguruta nayo ku Babiloni.

2 Mikoka 33:12

Ndipo pakuŵa mu suzgu wanguŵeyere Ambuya Chiuta wake, ndi kujiyuyuwa ukongwa pa maso paku Chiuta wa ambuyake.

2 Mikoka 34:3

Chifukwa mu chirimika cha chinkhonde ndi chitatu cha muwusu wake weche muhurwa, wangwamba kupenja Chiuta waku Davidi mbuyake; ndipo mu chirimika cha chumi ndi viŵi wangwamba kutozga Yuda ndi Yerusalemu, kutuzgamo malo gha pachanya, ndi Ashera, ndi ŵangoza ŵakusongono.

Ezra 8:22

Chifukwa ndenga ndi soni kupempha kutipaska ŵankhondo ndi ŵapakavalo kutivikiriya ku ŵarwani mu nthowa, tingumunene karonga kuti, “Janja laku Chiuta widu le paku wose wo ŵatumwanja, kuŵachitiya umampha, ndipo ukuru wake we ndi nthazi kwananga wose wo ŵatumujowo.”

Sumu 34:4

Ndingupenja Ambuya, ndipo angundamuka, angundipozomoska mu mantha ghangu ghose.

Sumu 53:2

Chiuta kuchanya walereska pa ŵana ŵa ŵanthu, kuti wawone vinu wangaŵapo wazeru, wakupenja Chiuta.

Yesaya 45:19

Kuti ndingukamba mu ubendi cha, mu charu cha mdima; ndengavi kukamba ku mphapu yaku Yakobe, ‘Ndipenjeni mu soka linu.’ Ine Ambuya ndikamba uneneska, nditaula chenicho ncha kurunjika.

Yesaya 51:1

Tegherezgani kwangu, imwe mundondoloska utaski, imwe mupenja Ambuya; lereskani ku jarawe kwaku lo mungubanthukako, kuzenje lenilo mungukumbikako.

Yesaya 7:13

Ndipo wanguti, “Avwani iku, mwa nyumba yaku Davidi! Kumbi nkhanthu kamanavi kwaku imwe kuvuska ŵanthu, ndi kuti muvuska so Chiuta wangu?

Yeremiya 2:17

Asi ndimwe mwaŵeni mwajidaniya uheni uwo kuti ukuziyeni pakureka Ambuya Chiuta winu, penipo wangukurongozgani mu nthowa?

Amosi 5:14

Penjani umampha, uheni cha, kuti muŵe ŵamoyo; viyo Ambuya Chiuta wa maŵanja, wakaŵanga namwe, nge ndimo mwakambiya.

Zekariya 1:3

Chifukwa ichi uŵanene, viyo atiti Ambuya ŵa maŵanja, wereni kunu kwangu, atiti Ambuya ŵa maŵanja: ine nane ndiweliyenge kwinu, viyo atiti Ambuya ŵa maŵanja.

Maŵerengedu 14:42

Mungakweriyangako cha vinu mungapumika ndi ŵarwani ŵinu, pakuti Ambuya ŵalivi kwenda pamoza namwe.

Maŵerengedu 14:43

Pakuti Amaleke ndi ŵaKanani ŵekwenikuwa kuurongo kwinu, ndipo mwamubayika ndi nkhondo; chifukwa mwatuwako ku kulondo Ambuya, viyo Ambuya kuti akaŵanga namwe cha.”

Mateyu 13:9

Wakuŵa ndi makutu yo, wavwe.”

Marangu 20:1

“Muchiya ku nkhondo kwachimikana ndi ŵakupindikana ŵinu, ndi muchiwona ŵakavalo ndi magareta, ndi liŵanja la nkhondo likuru kwakuruska linu, mungaŵawopanga cha; pakuti Ambuya Chiuta winu we namwe pamoza, mweniyo wangukutoleni kuno kutuwa mu Egipiti.

Marangu 31:17

Sono ndazamukaripiya wo mu zuŵa lenilo, ndipo ndikaŵasiyanga ndikubisa chisku changu kwaku wo, ndipo ŵakaphwanyikanga, ndipo viheni vinandi ndi masuzgu vikazanga paku wo viyo ŵakakambanga mu zuŵa lo, ‘Ivi viheni pakutiziya ifwe, asi nchifukwa chakuti Chiuta widu mulivi mukati mwidu?’

Marangu 4:29

Kweni mwamupenja Ambuya Chiuta winu mweche kwenikuwa, ndipo mwakumusaniya asani mwakumupenja ndi mtima winu wose ndi umoyo winu wose.

ŴaHebere 10:38

Kweni murunji wangu yo mu chivwanu wajariyenge wamoyo: ndipo asani wawere vuli umoyo wangu kuti ukondwere mwake cha.”

ŴaHebere 12:25

Lereni vinu mungamkana mweniyo wakamba namwe. Chifukwa asani ŵa ŵengavi kupozomoka pakukana kuvwiya mweniyo wanguŵachenjezga panupasi, ukongwa viŵi kuti tikapozomokanga cha ifwe taŵakugaruka ku kwaku mweniyo wachenjezga kuchanya.

Yakobe 4:8

Ndereni kufupi kwaku Chiuta, ndipo wanderenge kufupi kwinu. Photoni manja, mwaŵalakwi; ndipo tozgani mitima, mwaŵamitimapaŵi.

Yoswa 22:31

Finehasi mwana waku Eleazara mzukuru wangunena ndi ŵina Rubene, Gadi ndi ŵina Manase, “Zuŵa lino tiziŵa kuti Ambuya ŵemukati mwidu, chifukwa mulivi kuchita chigaruka ku Ambuya; sono mwataska ŵaYisraele ku janja la Ambuya.”

Yoswa 24:20

Asani musiyenge Ambuya ndi kutataliya ŵachiuta ŵachilendo, po ndipo wakang'anamukanga ndi ku muchitiyani urwani, kukumarani, pavuli pakukuchitiyani umampha.”

Chivumbuzi 2:11

Mweniyo we ndi gutu, wavwenge cho Mzimu ukamba ku mipingu. Yo wapunda kuti wakapwetekekanga kose cha ndi nyifwa yo yachiŵi.’

Chivumbuzi 2:17

Yo we ndi gutu wavwenge cho Mzimu ukamba ku mipingu. Ku wakupunda yo nkhampaskangapo vya mana gho ghakubisika, ndipo nkhampaska nga mwa utuŵa, ndi pa mwa wo zina lifya lakulembekapo, lenilo palive yumoza watiliziŵa, kweni yo waronda pe ndiyo.’

Chivumbuzi 2:29

Mweniyo we ndi gutu, wavwenge cho Mzimu ukamba ku mipingu.’

Chivumbuzi 2:7

Mweniyo we ndi gutu, wavwenge cho Mzimu ukamba ku mipingu. Kwaku yo wapunda, nkhapaskanga kurghapo vyapa muti wa umoyo, wo wemu Paradiso waku Chiuta.’

Chivumbuzi 3:13

Mweniyo we ndi gutu, wavwenge cho Mzimu ukamba ku mipingu.’

Chivumbuzi 3:22

Mweniyo we ndi gutu, wavwenge cho Mzimu ukamba ku mipingu.’ ”

Chivumbuzi 3:6

Mweniyo we ndi gutu, wavwenge cho Mzimu ukamba ku mipingu.’

Ŵeruzgi 10:13

Kweni imwe mwandijowo ndi kutataliya ŵachiuta ŵanyake; chifukwa cho kuti ndikamupozomoskaninga so cha.

Ŵeruzgi 9:7

Ŵanguti ŵamunene ichi Yotamu, wanguruta ndi wanguma pachanya pa phiri Gerizimu, wangukambula ukongwa ndiwanguti kwaku wo, “Tegherezgani kwangu, mwa ŵanthu ŵamu Shekemu, kuti Chiuta wategherezge kwinu.

1 Samuele 12:14

Asani mopenge Ambuya, kuŵateŵete ndi kuvwiya mazu ghawo kwambura kupatukako ku marangu ghawo, asani mose imwe ndi karonga yo wausa paku imwe murongonge Ambuya Chiuta winu, kukaŵanga umampha;

1 Samuele 12:15

kweni asani murekenge kuvwiya mazu gha Ambuya, ndi kuthaŵako ku marangu gha Ambuya, janja la Ambuya liŵenge lakumikana namwe, imwe ndi karonga winu.