Mataio 12:46 - Tokelauan New Testament

⁴⁶ Koi tautala ia Iehu ki nā tino kae taunuku mai tona mātua ma ona uho. Kua tutū atu ki lātou i fafo kae kave te lātou faifekau ki a Iehu ko ki lātou e fia faitala ake ki a te ia.

Mataio 12:46 ပူးပေါင်းရင်းမြစ်များ

Mataio 1:18

Ko te tala tēnei ki te fānau maiga o Iehu Keliho. Ko tona mātua ko Malia, na fakamau ke nonofo ma Iohefa. Ka ko hēki nonofo ki lāua, kae kua iloa e Malia ko ia kua to i te mana o te Agaga Paia.

Mataio 12:47

Oi lea atu ai he tino nae i kinā ki a Iehu, “Kikila, ko tō mātua ma ō uho e tutū i fafo, e fia faitala atu ki a te koe.”

Mataio 13:55

E hē ko ia tēnei te ataliki o te kāmuta? E hē ko Malia nei tona mātua? E hē ni uho nei e o ia ia Iakopo, Iohefa, Himona ma Iuta?

Mataio 2:11

Kua ulu atu ki lātou ki loto o te fale, oi kitea ai e ki lātou te tamaiti ma tona mātua ko Malia. Na tōtutuli ai loa ki lātou ki lalo kua ifo ki ei. Kua tōake foki ki luga a lātou meaalofa ko te aulo, ko te pulu lipano ma te pulu mulo, kua tuku atu ki a te ia.

Mataio 2:20

kua lea vē ki ei, “Tū ki luga, kave te tamaiti ma tona mātua oi toe foki ki Ihalaelu, auā ko nā tino nae taumafai ke tāmate te tamaiti kua feoti.”

Maleko 2:21

“E hēai he tino e fakaaogā e ia he meakie fou ke fono ai he peleue tuai, auā ka mimigi te mea kie fou ma hahae kehe ai ni meakie tuai, ma ātili ai te lahi o te gahae.

Maleko 6:3

E hē ko ia tēnei te kāmuta, te tama a Malia, te uho o Iakopo, Iohefa, Iuta ma Himona? E hē ko nā tuafafine uma o ia e i kinei ma ki tātou?” Ko te mea ia na teteke ai e ki lātou ia Iehu.

Luka 1:43

Ko ai nei kita, kua āhiāhi mai ai te mātua o toku Aliki ki a au?

Luka 2:33

Na ofo lele te tamana ma te mātua, ki nā kupu kua tautala ai ia Himeona e uiga ki te lā pepe.

Luka 2:34

Oi fakamanuia ai ki lātou e Himeona, ma lea vē atu ki a Malia, te mātua o te pepe, “Kikila, ko te pepe tēnei kua filifilia e te Atua mo te fakaumatiaga ma te fakaolataga o tagata Ihalaelu. Ka fai ia ma fakailoga mai te Atua e teteke ki ei te tokalahi o tagata,

Luka 2:48

Na ofo lele foki ona mātua i te ki lā kiteaga o Iehu, oi lea vē atu ai tona mātua ki ei, “Taku tama, he ā te kua fai ai e koe te mea tēnei ki a te ki māua? Kikila, ko koe nae hakili e ki māua ma tō tamana, ma ko ki māua na popole lele.”

Luka 2:51

Oi olo fakatahi ai ia Iehu ma ona mātua ki Nahaleta, ma nae uhitaki lele ki a te ki lāua. Na teu i te loto o tona mātua nā mea uma iēnei.

Luka 8:10

oi tali vē atu ai, “Kua uma te fakailoa atu ki a te koutou nā mealilo e uiga ki te Mālō o te Atua; kae ko iētahi tino, e fakailoa ki ei e ala i nā talafakatuha, kae ke kikila o lātou mata kae hē ki lātou kitea, ma fakalogo o lātou taliga, kae hē mālamalama.

Ioane 19:25

Nae tutū tafapili ki te hātaulo o Iehu tona mātua, te uho o tona mātua, ma Malia te āvaga a Kolopa, vēnā ma Malia te Makatala.

Ioane 2:1

I tona tolu o aho, na fai ai he fakaipoipoga i Kana i Kalilaia. Nae i kinā te mātua o Iehu,

Ioane 2:12

Kua uma te mea tēnei, oi olo ai ia Iehu ma tona mātua, ona uho, ma ona hoko ki Kapenaumi, oi nonofo ai i kinā mo ni nai aho.

Ioane 2:5

Oi lea ai te mātua o Iehu ki nā kaukauna nae ki lātou fakahoahoa te uaina, kua vē atu, “Ho he mea lava e lea atu ia Iehu ke fai, oi fai.”

Ioane 7:10

Kua olo nā uho o Iehu ki te Kaiga Fakamanatu, oi fano ai foki ia Iehu ki ei, kae e hēki fakailoa lele ki he tino.

Ioane 7:3

oi lea atu ai nā uho o Iehu ki a te ia, “Tuku ia kinei, kae fano ki Iutea, kae ke kitea e nā tino e mulimuli atu ki a te koe, nā gāluega a koe e fai.

Ioane 7:5

Kae e pa foki lava ki ona uho, e hēki talitonu ki a te ia.)

Gāluega 1:14

Nae maopoopo ho ki lātou oi tatalo fakatahi, ma nae i ei ai ma nā fafine vēnā ma Malia te mātua o Iehu ma nā uho o Iehu.

1 Kolinito 9:5

E hē ia te au nei te aiātatau ke fakatakitaki ai ki nā mea nae fai e iētahi apohitolo ma nā uho o te Aliki ma Petelu, i toku fano ma kave haku āvaga Kelihiano i aku faigāmalaga?

Kalatia 1:19

Kae e hēki fetaui au ma hētahi apohitolo vaganā ai ia Iakopo, te taina o te Aliki.