Luka 11:42 - Tokelauan New Testament

⁴² “Kae hāloa la koutou te kau Falehaio! E fōki e koutou mo te Atua te tahi vaehefulu o nā mea fakamanogi meakai e vē ko te mineti, te pekanona ma iētahi lākau vēnā, kae e hē fakatutuha e koutou ia tagata uma i te Tūlāfono, ma e hē alolofa koutou ki te Atua. Ko nā mea iēnei e tatau ke fai e koutou, kae hē tiakia ai iētahi mea.

Luka 11:42 ပူးပေါင်းရင်းမြစ်များ

Mataio 23:13

“Kae hāloa la koutou nā faiakoga o te Tūlāfono ma te kau Falehaio! Ko koutou ni tino fakagutugutulua. E koutou tapunia te faitotoka ki te Mālō o te lagi ki tagata, ka ko koutou e hē mafai ke olo ki loto, ma e hē koutou fakataga foki nā tino e taumafai ke olo ki loto.

Mataio 23:23

“Kae hāloa la koutou nā faiakoga o te Tūlāfono ma te kau Falehaio. Ko koutou ni tagata fakagutugutulua. E fōki e koutou mo te Atua te tahi vaehefulu o nā mea fakamanogi meakai e vē ko te mineti, te tili ma te kumini, kae kua hē mulimuli koutou ki nā akoakoga tāua o te Tūlāfono, vē ko te fakatutuha o tagata uma i te tūlāfono, te agalelei ma te fakamāoni. Ko nā mea iēnei e tatau ke fai e koutou, kae hē tiakia ai iētahi mea.

Mataio 23:27

“Kae hāloa la koutou nā faiakoga o te Tūlāfono ma te kau Falehaio! Ko koutou ni tagata fakagutugutulua! Ko koutou e vēia ko nā tugamau kua vali paepae, e manaia mai ia fafo ka ko loto e tumu i te pogāivi ma nā tino oti kua pala.

Luka 18:12

E lua ia aho o te vaiaho e fakalāina ai au, ma e kavatu e au mo koe te tahi vaehefulu o aku tupe uma e maua.’

Ioane 5:42

Kae e iloa e au te itūkāigā tino e i ei koutou, ma e iloa e au e hē i outou loto, he alofa ki te Atua.

1 Ioane 4:20

Kāfai ki tātou e lea ko ki tātou e alolofa ki te Atua kae inoino ki o tātou uho ma o tātou tuafafine, ko ki tātou ni tino tala pepelo. Auā e hē mafai ki tātou ke alolofa ki te Atua e hē ki tātou kiteagia, kāfai ki tātou e hē alolofa ki o tātou uho ma o tātou tuafafine e kitea e ki tātou.