Kalatia 2:4 - Tokelauan New Testament

⁴ e vē ona fofou ki ei ni tino. Ko nā tino iēnei na lea ko ki lātou kua talitonu e vē ko ki mātou, kae ni hipai na ōmamai kae ke ki lātou iloa ai e uiga ki te haolotoga kua ki mātou maua, e ala ia Keliho Iehu. Nae fofou ke fai ki mātou ke vē ni pologa,

Kalatia 2:4 ပူးပေါင်းရင်းမြစ်များ

Luka 5:38

Kae ko te uaina fou e tatau ke utu ki loto o ni fagu pakumanu uaina fou.

Gāluega 15:1

E i ei ni taulelea na ōifo mai Iutea ki Anitioka ma kāmata akoako vē atu ki nā tino kua talitonu, “E hē mafai koutou ke fakaola e te Atua, heiloga ko koutou kua pelitome e vē oi lea mai te Tūlāfono a Mohe.”

Gāluega 15:24

Kua fakalogo ki mātou e i ei ni tino na oatu ia te ki mātou, kua fai ma fakalavelave ki a te koutou ma ko koutou kua hē fiafia lahi ona ko a lātou kupu e tautatala ai. E hēki ki mātou fakatonua lele nā tino iēnā.

Gāluega 20:30

E hau te taimi e fai ai e ni tino o koutou ni fakamatalaga pepelo ke takitaki kehe ai nā tino Kelihiano ma mulimuli ake ai ki a te ki lātou.

Loma 8:15

Auā ko te Agaga tēia kua tuku atu e te Atua ki a te koutou, e hē ia faia koutou ma pologa, ma fai ma mea e mātataku ai koutou; kae ko te Agaga te kavea ai koutou ma fānau a te Atua, ma i te mana o te Agaga e kālalaga vē atu ai ki tātou ki te Atua, “Te Tamana, To mātou Tamana!”

2 Kolinito 11:13

Ko nā tino iēnā e hē ni apohitolo moni — ni apohitolo pepelo, e ki lātou pelogia ia tagata e uiga ki a lātou gāluega e fai, ma taumafai ke vē ki lātou ni apohitolo moni lava e a Keliho.

2 Kolinito 11:17

E ui lava ko taku lea atu vēnei e hē ko te mea ia e fofou te Aliki ke lea atu ai au; kae e tuha ai ma te matākupu tēnei ko te fāfia, ko au e vē moni lava he tino valea i aku tala e fai

2 Kolinito 11:20

E onohai koutou kāfai koutou e fakapologa e he tino, pe fakavalea, pe honafai, pe manatu fakatauva ki a te koutou, pe fai ni ona uiga hē māfaufau ki a te koutou.

2 Kolinito 11:26

I te lahi o aku malaga, nae lamatia toku ola i nā lolovai, nā tino fāomea, mai oku tagata tōtino ma tagata nukukehe; nae lamatia i nā kakai lalahi, i te vaomatua, i te moana, vēnā foki mai nā uō pepelo.

2 Kolinito 3:17

Ko te Aliki ko te Agaga, ma ko fea lava e i ei ai te Agaga, e i ei ai foki te haolotoga.

Kalatia 1:7

Ko te mea moni, e hēai hētahi Tala Lelei! Kae ko au kua lea vēnei atu ona e i ei nā tino e fakalavelave atu ki a te koutou ma taumafai ke liliu kehe koutou mai te Tala Lelei a Keliho.

Kalatia 4:25

Ko te igoa Hākā, e fakatuha ia ki te igoa o te Mauga ko Hinai i Alapi, ma e fakatuha i te taimi nei, ki te kakai ko Ieluhalema, e nofo pologa fakatahi ma ona tagata uma.

Kalatia 4:3

Nae vēnā foki lava ki tātou i nā aho nae tamaiti ai ki tātou. Ko ki tātou nae fai ma pologa a nā agaga e pule i te lalolagi ma te vāteatea kātoa,

Kalatia 5:1

Kua ia te ki tātou te haolotoga — Ko ki tātou kua fakahaoloto e Keliho! Fakamākeke la ma tūmau i te haolotoga, ma ke nahe toe kavea lele koutou ma pologa.

Kalatia 5:10

Kae e tūmau pea lava toku talitonu ki a te koutou. Ko to tātou ōlaga i te hokotaga ma te Aliki, e mautinoa ai e au ka hē koutou taliagia ni manatu e kehe mai i oku manatu, ma ko ai lava e taumafai ke fakahehē ki a te koutou, ka fakahalagia ia e te Atua.

2 Timoteo 3:6

Ko iētahi o ki lātou e olo ki loto o nā fale o iētahi tino, ma pule kātoa ai ki lātou ki nā fafine e vāivai nā loto ma tumu i te fakaatu ona ko a lātou agahala, ma e takitakia e te lahi o itūkāigā lagona,

Iakopo 1:25

Kae ko nā tino e kikila ki te tūlāfono e kātoatoa te lelei, tēia e fakahaoloto ai ia tagata, ma tūmau to lātou uhitaki ki ei kae hē nā ko te fakalogo oioti ki ei ma toe puli, kae fakatino — ka fakamanuia ki lātou e te Atua i nā mea e ki lātou faia.

1 Petelu 2:16

Ko koutou ni tino e ola haoloto, kae nahe fakaaogā te haolotoga kua ia te koutou ke mumuni ai ho he mea kino; kae ola ko koutou ni pologa e a te Atua.

2 Petelu 2:19

E folafola e ki lātou te haolotoga, kae ko ki lātou foki ni pologa a nā uiga kino e fakaumatia ai lava ki lātou — auā ko te tagata ko he pologa a ho he mea kua fakatōkilalogia ia.

1 Ioane 4:1

Te kau uho pele, koutou nahe talitonu ki nā tino uma e lea e ia te ki lātou te Agaga, kae hukehuke lelei ma hakili ke koutou iloa pe ko te agaga e ia te ki lātou e mai te Atua. Auā e tokalahi ia pelofeta pepelo kua olo ki itū kehekehe o te lalolagi.

Iuta 1:4

Auā e i ei nā tino hē mātataku i te Atua kua ōmamai munimuni ki te mea e i ei ki tātou; nā tino e fakahehē e ki lātou te fekau e uiga ki te alofa tūnoa o te Atua, kae ke fai ai pea o lātou tuinanauga mātagā ki te tino. E teteke foki ki lātou ki a Iehu Keliho to tātou Matai ma to tātou Aliki e fokotahi. Kua leva te vavalo e nā Tuhituhiga Paia te fakahalaga e ki lātou maua.