Iakopo 2:21 - Tokelauan New Testament

²¹ Na vēhea ona fakaleleia te va o to tātou tupuna ko Apelaamo ma te Atua? Na mafai ona ko ana gāluega nae fai, e vē ko te ofo atuga o tona ataliki ko Ihaako ma tāulaga ki te Atua, i luga o te fata faitāulaga.

Iakopo 2:21 ပူးပေါင်းရင်းမြစ်များ

Mataio 12:37

Ko au kupu na tautala ai koe ka toe fakamahino ai lava koe — ka iloa ai pe hala koe pe hēai.”

Mataio 3:9

Ma ia koutou lele nahe kāmata oi lea vē tētahi ki tētahi, ‘ko Apelaamo he tupuna e o ki mātou’; auā e lea atu au ki a te koutou, e mafai e te Atua oi fakaliu tino nā fatu iēnei ke fai ma lāpuna o Apelaamo.

Luka 1:73

I tana tautōga na fai ki to tātou tupuna ko Apelaamo, na folafola e ia e ia laveakia ki tātou mai o tātou fili, ma fakataga ki tātou ke tautua ki a te ia e aunoa ma he mataku,

Luka 16:24

Oi kalaga atu ai vē, ‘Toku tamana e, Apelaamo! Alofa mai ko. Uga mai ko ia Lahalo ke lolō tona muamuālima ki ni vai, ma fakamālū ake ai toku laulaufaiva, auā ko au nei kua tīgāina i te mumū o te afi tēnei!’

Luka 16:30

Kua tali mai te maukoloa, ‘Apelaamo te tamana, e hē lava ai! Kae kāfai he tino kua toe fakatū mai i te oti e fano ki ei, oi ka mafai ai ki lātou ke halamō.’

Ioane 8:39

Kua tali mai ki lātou, “Ko te tamana o ki mātou ko Apelaamo.” Kua tali atu ia Iehu, “Anei ake koutou ni fānau moni e a Apelaamo, e koutou faia te mea na fai e Apelaamo.

Ioane 8:53

Ka maualuga la koe i lo to mātou tamana ko Apelaamo na oti? Ko nā pelofeta foki na oti. Ko ai lava koe?”

Gāluega 7:2

Kua tali atu ia Hetefano, “Oku uho ma oku tamana, fakalogo mai ake! Ka ko hēki fano to tātou tupuna ko Apelaamo oi nofo i Halana, na fakailoa ki a te ia te Atua o vīkiga, i Mehopotamia

Loma 3:20

Auā e hēai he tino e mafai ke fakalelei tona va ma te Atua, ona e mulimuli ki nā mea e lea mai ai te Tūlāfono; auā ko te Tūlāfono e maua ai e ki tātou te mālamalama e uiga ki te agahala.

Loma 4:1

Ka vēhea ake nei la he tātou tala e fai e uiga ki a Apelaamo, te tupuna o ki tātou tagata Iutaia? Ni a te na mafai ke fai e ia lava tautahi?

Loma 4:12

Ko ia foki ko te tamana o ki lātou kua uma te pelitome, ko tona uiga, ko nā tino e hē gata i te kua uma o te pelitome, ka nae ola foki i he ōlaga fakatuatua e vē ko te ōlaga nae ola ai ia Apelaamo, ka ko hēki pelitome ai.

Loma 4:16

Ma ko te folafolaga la na fakavae i te fakatuatua, kae ke fakamautū ai te folafolaga, ko he meaalofa fōki fua e a te Atua ki lāpuna uma o Apelaamo — e hē nā mo ki lātou e uhitaki ki te Tūlāfono, kae vēnā foki ki lātou e talitonu e vē ko Apelaamo. Auā ko Apelaamo, ko te tamana fakateagaga ia o ki tātou uma lele;

Epelu 11:17

Ko te fakatuatua te na ofo atu ai e Apelaamo tona ataliki ko Ihaako ke fai ma tāulaga, i te tofotofoga o ia e te Atua. Ko Apelaamo te tino na fai ki ei e te Atua te folafolaga, kae na malie lava ke ofo atu tona Ataliki ke fai ma tāulaga.

Iakopo 2:18

Kae ka lea vē he tino, “E mafai ke fakatuatua tētahi tino kae fai ni gāluega e tētahi.” Ko taku tali ki ei, “Fakahino mai pe vēhea ona i ei he fakatuatua i he tino kae hē faia ni ana gāluega? Ka fakahino atu e au toku fakatuatua e ala ai aku gāluega.”

Iakopo 2:24

Kua koutou kitea la, ko nā gāluega a ki tātou te fakalelei ai to tātou va ma te Atua, kae e hē nā ko te fakatuatua oioti.