3 Oi liligi ai te tānoa a te agelu tona lua ki luga o te tai. I te taimi lava tēnā, na liu toto ai te tai e vē he toto o he tino na tāmate, ma na mamate ai ia meaola uma i te tai.
Kua ia te ki lāua te pule ke tapuni ai te lagi kae ke nahe ua lele i te taimi e tālaki ai e ki lāua te fekau a te Atua. Kua ia te ki lāua foki te pule ke fakaliu ai nā vai ki te toto, ma ke fakatupu ai i te lalolagi ho he itūkāigā mala, i ho he taimi lava e fofou ki lāua ki ei.
Oi kō kitea atu ai he manu fekai e fanake mai te tai. E hefulu ona nifo hua ma fitu ona ulu; ko nā nifo hua takitahi e tofu ma te tamā palealiki, ma ko ona ulu takitahi e tūhia ai he igoa fāifāi ki te Atua.