Fakaaliga 12:9 - Tokelauan New Testament

⁹ Oi togi ai te tālako ki fafo — te gata mai te kāloā e fakaigoa ko te Tiāpolo, pe ko Hātani, tē e fakahehēa ia tagata i te lalolagi kātoa. Na togi ifo ki lalo ki te lalolagi, fakatahi ma ana agelu uma.

Fakaaliga 12:9 ပူးပေါင်းရင်းမြစ်များ

Mataio 13:39

ko te fili na ia totōa nā vao kino, ko te Tiāpolo tēnā. Ko te helehelega ko te ikuga tēnā o te ōlaga nei, ka ko ki lātou e helehelea, ko te kau agelu.

Mataio 24:24

Auā ka ōmamai nā Keliho pepelo ma nā pelofeta pepelo; ka ki lātou faia ni vāvega uiga kehe ma ni mea ofoofogia ke fakahehē ai ia tagata, ke pa lava ki tagata kua filifilia e te Atua, pe kāfai e mafai.

Mataio 25:41

“Oi ka lea vē atu ai ki nā tino i tona itū tauagavale, ‘Olo kehe ma au, koutou nā tino kua fakamālaiagia e te Atua. Olo ki te afi e hē mate kua uma te hāunia mo Hātani ma ana agelu!

Mataio 4:1

Oi tataki ai ia Iehu e te Agaga ki te vao ke fakaohooho e te Tiāpolo.

Mataio 4:10

Oi tali mai ai ia Iehu, “Hātani, fano kehe! E lea mai te tuhituhiga paia, ‘Ifo atu ki te Aliki tō Atua ma kaukauna oioti ki a te ia!’ ”

Mataio 4:5

Oi kave ai ia Iehu e te Tiāpolo ki Ieluhalema te Kakai Paia, kua fakatū i luga o te mea pito maualuga o te Mālumalu,

Mataio 4:8

Oi toe kave ai e te Tiāpolo ia Iehu ki luga o he mauga maualuga, kua fakahino ki ei nā mālō uma o te lalolagi ma te tūkehe o nā mamalu o ki lātou.

Luka 10:18

Kua tali atu ia Iehu, “Na kō kitea te pakū ifoga o Hātani mai te lagi e vē ko te napa a te uila.

Luka 13:16

Ka ko te lāpuna tēnei o Apelaamo, kua kātoa te hefulu valu tauhaga e noanoatia e Hātani; e hē tatau nei ke tatala i te Hāpati?”

Luka 22:3

Oi ulufia ai e Hātani te loto o Iuta te Ihikaliota, he tino o te kau hoko e toka hefululua.

Luka 22:31

“Himona, Himona! Kikila, kua ia Hātani te fakatagaga mai te Atua ke ia tofotofoa ai koutou uma, ma tuku kehekehe nā tino lelei mai nā tino kino, e vē oi tuku kehekehe e te faifatoaga te haito mai te atigi haito.

Luka 8:12

Ko nā fatu haito na lūlū ki luga o te auala, e fakatuha ki nā tino e ki lātou lagona te fekau; kae e hau te Tiāpolo oi kave kehe te fekau mai o lātou loto, kae ke hē talitonu ai ki lātou ma hē fakaolagia ai.

Ioane 12:31

Ko tēnei te taimi e fakamahino ai te lalolagi; ko tēnei te taimi e fakatōkilalo ai te pule o tēnei lalolagi.

Ioane 14:30

Ka hē toe mafai ke fai atu ni aku tala ki a koutou, auā te pule o te lalolagi nei kua hau. E hē ia mafaia oi pule mai ki a te au,

Ioane 16:11

ma e hehē to lātou tāofi e uiga ki te fakamahinoga, auā ko te pule o te lalolagi kua uma te fakamahinogia e te Atua.

Ioane 8:44

Ko koutou ko nā fānau a te koutou tamana, te Tiāpolo, ma e fofou lava koutou ke fai te mea e fofou ia ki ei. Mai te kāmataga, ko ia ko he fahioti tagata ma nae hē fofou lele ki te meamoni, ona e hēai he meamoni e ia te ia. Kāfai e tautala i te pepelo, e fai lava e ia te mea kua māhani ai, auā ko ia ko he tino talapepelo, ma ko te tamana o talapepelo uma.

Gāluega 26:18

Ka fakapupula e koe o lātou mata ma liliu kehe ki lātou mai te pōuliuli ki te mālamalama, mai te pule a Hātani ki te pule a te Atua, kae ke kavea ai to lātou fakatuatua mai ki a te au ma mea ka fakamāgalo ai a lātou agahala, ma kavea ai ki lātou ma vāega o tagata kua filifilia e te Atua.’

Gāluega 5:3

Oi lea atu ai ia Petelu ki ei, “Anania, he ā te kua fakataga ai e koe ia Hātani ke pule ki a te koe ma kua pepelo ai koe ki te Agaga Paia, i te kua kē tāofia o he vāega o te tupe na maua mai i tō fenua?

Loma 16:18

Auā ko nā tino e faia nā mea iēnā, e hē gālulue mo Keliho to tātou Aliki, kae mo ki lātou lava. Ko a lātou kupu gali ma fakafāfia tino, e fakahehē ai nā loto o nā tino e hē lava to lātou iloa.

Loma 16:20

Ma ko te Atua, te puna o te fīlēmū, ka tuki pala e ia ia Hātani i lalo o outou vae, i he taimi pili mai. Ke ia te koutou te alofa tūnoa o to tātou Aliki ko Iehu.

2 Kolinito 11:14

Ma e hetioa, auā e pa foki lava ki a Hātani, e ia fakahehēa ia tagata ke vēakē ko ia ko he agelu huhulu pupula!

2 Kolinito 11:3

Ko au e popole nā ia koutou e fakavaleagia, e vē ko te fakavaleaga o Eva e te gata tau fakahehē, ma takitaki kehe ai koutou mai te koutou tāpuaki ki a Keliho, i te agaga kātoatoa ma te fakamāoni.

2 Kolinito 12:7

Kae ke tāofiofi ai au ke nahe hona mimita ona ko te lahi o nā mea mānanaia na kitea e au, na tuku mai ai ki toku tino he tauale tīgāina, ke galue e vē he kavefekau e a Hātani, ke fai ma fakahoehā ma ke nahe hona fiafia ai au.

2 Kolinito 2:11

kae ke nahe mafai ai ia Hātani ke manumālō ia te ki tātou; auā kua ki tātou iloa lelei ana fuafuaga.

2 Kolinito 4:4

Ko nā tino iēnei e hē talitonu, auā kua fakapoulitia o lātou māfaufau e Hātani, te atua kino o te lalolagi. E ia tāofiofia ki lātou ke nahe ki lātou kiteagia te mālamalama e huhulu ake ki a te ki lātou, te mālamalama e hau mai te Tala Lelei e uiga ki te mamalu o Keliho, tē e vē lava ko te Atua.

Efeho 4:14

Ka hē toe vē ki tātou ni tamaiti e fetolifaki e nā galu ma pūhia holo i matagi vale o nā akoakoga a nā tino faitogafiti kino, iē e ki lātou takitakia iētahi tino ki te mea hehē, e ala ia lātou togafiti popoto.

2 Tehalonia 2:3

Nahe fakatagagia lele e koutou he tino ke ia fakahehēa koutou i ho he mea. Auā ko te Aho ka hē pa mai heiloga kua taunuku te fou a tagata ki te Atua ma hula mai te Tino Kino, tē e iku lava ki heoli.

1 Timoteo 2:14

Ma e hē ko Atamu te na fakahehē e te gata, kae ko te fafine te fakahehē ma na ia holia ai te tūlāfono a te Atua.

2 Timoteo 3:13

ma ko nā tino āmio kino ma tau fakahehē, ka fakaatili te kino o a lātou mea e fai, i te fakahehēga o tagata ma te fakahehēga foki lava o ki lātou.

Epelu 2:14

Ona la ko nā fānau, e vē oi fakaigoa ai ki lātou e ia, ni tino e o te kanofi ma te toto, na ia faia ai ia ia lava, ke vē ko ki lātou. Na fai e ia te mea tēnei, kae ke kavea ai tona mate ma auala e fakatōkilalo ai te Tiāpolo, tē e pule ki te oti,

1 Petelu 5:8

Koutou ke mataala ma kikila fakalelei! Ko te fili o koutou, te Tiāpolo, e eva ma taukekē e vē he leona, oi hakili he tino ke ia kaia.

1 Ioane 5:19

E iloa e ki tātou ko ki tātou e o te Atua e ui lava ko te lalolagi kātoa e i lalo o te pule a te Tino Kino.

Iuta 1:9

Ke pa foki lava ki a Mikaele, ko hētahi ia o agelu hili a te Atua, e hēki ia mafaia oi fai ni kupu mātagā vēnei. I te la fetaliakiga ma te Tiāpolo e uiga ki te tino o Mohe, e hēki fakaaogā e ia ni kupu mātagā ke fakailoa ai ki te Tiāpolo tona hehē, kae na lea vē oioti, “Ko te Aliki e ia munaiagia koe.”

Fakaaliga 12:12

Ko te lagi la ma nā tino uma e nonofo ai e tatau ke fiafia! Kae hāloa la te lalolagi ma te tai! Auā ko te Tiāpolo kua fanaifo ki lalo ki a te koutou ma e tumu i te tōkahā lahi, auā e ia iloa e pukupuku lele tona taimi koi totoe.”

Fakaaliga 12:3

Kua toe kitea atu hētahi fakailoga uiga kehe i te lagi. Ko he mātuā tālako lanu kukula e fitu ona ulu ma hefulu ona nifo hua, ma e tofu te ulu ma te tamā palealiki.

Fakaaliga 12:7

Oi pa ai te taua i te lagi. Kua tau ia Mikaele ma ana agelu ma te tālako ma ana agelu;

Fakaaliga 12:8

kae na fakatōkilalo te tālako, ma e hēki toe fakatagagia ke nofo i te lagi ma ana agelu.

Fakaaliga 13:14

Ma na ia fakahehēa ia tagata uma e nonofo i te lalolagi i nā fakailoga na fakataga ke fai e ia i mua o te manu fekai muamua. Na fakatonu ki lātou e te manu fekai ke fau he fakatuha o te manu fekai tēia na manuka i te pelu, kae na ola lava.

Fakaaliga 16:14

Ko nā agaga iēnei o nā tēmoni e ki lātou faia nā vāvega. E olo ki tupu o mālō uma o te lalolagi, ke fakamāopoopo mai mo te taua i te Aho tāua lahi o te Atua Hilihilikehe te Mālohi.

Fakaaliga 18:2

Kua kalaga leo lahi vēia, “Ko te Kakai Takutakua ko Papelona kua fakatōkilalogia! I te taimi nei, kua fai ma nofoaga o tēmoni ma agaga kino, ma itūkāigā manulele palapalā ma te inohia.

Fakaaliga 18:23

Ka hē toe kitea lele i loto o koe te mumū o he mōlī; ka hē toe lagona nā leo o teine ma tama fakaipoipo i loto o koe. Ko nā tino fai pihinihi o koe te nae pito hili oi takutakua i te lalolagi, ma ko au mea fakataulaitu pepelo na fakahehē ai e koe ia tagata uma o te lalolagi.”

Fakaaliga 19:20

Kua puke fakapagotā te manu fekai fakatahi ma te kau pelofeta pepelo nae ki lātou faia ni vāvega mo te manu fekai. (Ko nā vāvega iēnei te na ia fakahehēa ai ki lātou kua i ei te fakailoga a te manu fekai, ma ki lātou nae ifo ki nā fakatuha o te manu fekai.) Ko te manu fekai ma te kau pelofeta pepelo kua togi ola ki loto o te vaitūloto o te afi mumū ma te teiō.

Fakaaliga 2:13

E iloa e au te mea e nonofo ai koutou i kinā i te mea e i ei ai te nofoāliki o Hātani. E tūmau pea lava te koutou fakamāoni ki a te au, ma e hēki uma te koutou fakatuatua mai ki a te au, ke pa lava ki te taimi na tāmate ai ia Anitipaha, tē nae molimau fakamāoni e uiga ki a te au, i kinā te mea e nofo ai ia Hātani.

Fakaaliga 2:24

“Kae ko te tokalahi o koutou i Tuateilo, e hēki mulimuli ki te akoakoga kino tēnei; ko hēki koutou iloa te mea e takua e iētahi tino ‘ko nā mea loloto hē mailoa a Hātani.’ E lea atu au ki a te koutou, ka hē kō fakauta atua hētahi kavega ki outou luga,

Fakaaliga 2:9

E iloa e au nā fakafītāuli o koutou; e iloa e au ko koutou e mātitiva — kae ko te meamoni lava, ko koutou e maukoloa! E iloa e au nā kupu kino nae fai ki a te koutou e nā tino e lea ko ki lātou ni Iutaia, kae e hē ni Iutaia; ni tino e o Hātani!

Fakaaliga 20:10

Oi togi ai te Tiāpolo, tē nae ia fakahehēa ki lātou, ki loto o te vaitūloto o te afi ma te teiō, te mea kua uma te togi ki loto te manu fekai ma nā pelofeta pepelo; ma ka fakatīgāina ai pea ki lātou i kinā i te pō ma te ao, ke pa lava ki te fakavavau fakavavau lava.

Fakaaliga 20:8

ma ka fano ai oi fakahehē ia tagata i tulimanu e fa o te lalolagi, ko Koko ma Makoko tēnā. Ka fakapotopoto uma ki lātou e Hātani mo te taua, ko te tokalahi o ki lātou e vē ko te lahi o nā fuāoneone i te matāfaga.

Fakaaliga 3:9

Kikila, ko nā tino o Hātani, nā tino talapepelo e lea ko ki lātou ni Iutaia kae e hē ni Iutaia; ka kō kaumaia ki lātou ke tōtutuli pūnonou ki mua o outou vae. Ka iloa uma e ki lātou ko au e alofa atu ki a te koutou.

Fakaaliga 9:1

Oi ili ai te pu a te agelu tona lima, ma na kō kitea atu ai he fetu kua pakū ifo ki lalo ki te lalolagi, ma kua fōki ki ei te kī ki te lua e hēai he gataga o tona loloto.

Fakaaliga 9:20

Ko nā tino na totoe, ki lātou e hēki feoti i nā mala, e hēki liliu kehe lele mai nā tupua na ki lātou gaohia. E hēki uma to lātou tāpuaki ki nā tēmoni, pe ko nā tupua e gaohia i te aulo, hiliva, apamemea, fatu ma nā lākau, nā mea e hē mafai ke kitea pe lagona he mea, pe mafai ke havavali.