Fakaaliga 12:3 - Tokelauan New Testament

³ Kua toe kitea atu hētahi fakailoga uiga kehe i te lagi. Ko he mātuā tālako lanu kukula e fitu ona ulu ma hefulu ona nifo hua, ma e tofu te ulu ma te tamā palealiki.

Fakaaliga 12:3 ပူးပေါင်းရင်းမြစ်များ

Fakaaliga 12:1

Oi kitea atu ai he fakailoga uiga kehe i te lagi. Ko he fafine e kofu i te la ka ko te māhina e i lalo o ona vae, ma he palealiki e fai i ni fetu e hefululua e i tona ulu.

Fakaaliga 12:13

I te iloaga e te tālako ko ia kua togi ki lalo ki te lalolagi, oi kāmata ai oi tulituli e ia te fafine na fānau mai ai te tama.

Fakaaliga 12:17

Kua fekai lahi lele te tālako ki te fafine, ma na fano ai kua fakahaga tau ki nā lāpuna uma o te fafine, ki lātou uma kua uhitaki ki nā fakatonuga a te Atua ma tūmau i te meamoni na fakailoa mai e Iehu.

Fakaaliga 12:4

Kua toho ifo e ia mai te lagi i tona hikuhiku, te tahi vaetolu o nā fetu, ma togi ki lalo ki te lalolagi. Ma kua tū i mua o te fafine, kae ke ia kaia te pepe i te taimi lava e fānau mai ai.

Fakaaliga 12:7

Oi pa ai te taua i te lagi. Kua tau ia Mikaele ma ana agelu ma te tālako ma ana agelu;

Fakaaliga 12:9

Oi togi ai te tālako ki fafo — te gata mai te kāloā e fakaigoa ko te Tiāpolo, pe ko Hātani, tē e fakahehēa ia tagata i te lalolagi kātoa. Na togi ifo ki lalo ki te lalolagi, fakatahi ma ana agelu uma.

Fakaaliga 13:1

Oi kō kitea atu ai he manu fekai e fanake mai te tai. E hefulu ona nifo hua ma fitu ona ulu; ko nā nifo hua takitahi e tofu ma te tamā palealiki, ma ko ona ulu takitahi e tūhia ai he igoa fāifāi ki te Atua.

Fakaaliga 13:2

Ko te manu fekai e vē ko he leopate, ko ona vae e vē ni vae o he uloha ma tona gutu e vē he gutu o he leona. Kua tuku atu e te tālako tona mālohi ki te manu fekai, vēnā tona nofoāliki ma tana pule lahi fakatupu.

Fakaaliga 13:4

Kua ifo ia tagata uma ki te tālako ona na ia fōkia tana pule ki te manu fekai. Na ifo foki ki lātou ki te manu fekai, ma lea vē, “Ko ai nei te vē ko te manu fekai? Ko ai nei te ia mafai oi tau ki ei?”

Fakaaliga 15:1

Oi kō kitea atu ai ki te lagi hētahi fakaaliga uiga kehe ma te ofoofogia. Ni agelu e fitu e ia te ki lātou nā mala e fitu, ko nā toe mala iēnei, ma kāfai e uma nā mala iēnei oi kua uma ai foki ma te tōkahā o te Atua.

Fakaaliga 16:13

Oi kō kitea atu ai ni agaga kino e tolu e vē ni lane o lātou fōliga, e ōmamai mai loto o te gutu o te tālako, te gutu o te manu fekai ma te gutu o te pelofeta pepelo.

Fakaaliga 17:12

“Ko nā nifo hua e hefulu na kitea e koe, ko nā tupu e toka hefulu iēnā ko hēki kamatagia te lātou pule, kae ka fōki ki ei te pule ke pule ai mo he itūlā fakatahi ma te manu fekai.

Fakaaliga 17:16

Ko nā nifo hua e hefulu na kitea e koe, ma te manu fekai, ka feita ki te fafine talitāne; ka kave e ki lātou nā mea uma lele a ia ma tīaki vē e hēai ni ona kie; ka kai e ki lātou tona tino ma fakaumatia i te afi.

Fakaaliga 17:7

Kua fehili mai te agelu ki a te au, “He ā te ofo ai koe? Ka kō fakamālamalama atua la ki a te koe te uiga lilo o te fafine ma te manu fekai tēia e tiketike ai, te manu fekai e fitu ona ulu ma hefulu ona nifo hua.

Fakaaliga 19:12

Ko ona mata e vē ko te mumū o te afi, ma e lahi nā tamā palealiki i tona ulu. E tūhia i luga o tona tino tona igoa, kae e hēai he tino e mālamalama ai vaganā ai lava ia.

Fakaaliga 20:2

Kua puke e ia te tālako, te gata mai te kāloā — ko tētahi ona igoa ko te Tiāpolo pe ko Hātani — ma haihai i te filifili mo he afe tauhaga.