Fakaaliga 1:8 - Tokelauan New Testament

⁸ “Ko au ko te Alefa ma te Ōmeka,” kua vāgana ai te Aliki te Atua Hilihilikehe te Mālohi, tē e ola nei, nae ola pea lava, ma ka haele mai.

Fakaaliga 1:8 ပူးပေါင်းရင်းမြစ်များ

2 Kolinito 6:18

Ka fai au ma outou tamana, ma ko koutou ni ataliki ma ni afafine e ōku, kua vāgana ai te Aliki Hilihilikehe.”

Fakaaliga 1:11

E lea vē mai, “Tuhi ki lalo nā mea e kitea e koe ki he tuhi, ma kave ai te tuhi ki nā Ekalehia i nā kakai iēnei e fitu: ko Efeho, ko Himuna, ko Pekamoni, ko Tuateilo, ko Hateihi, ko Filatelefeia, ma Laotikeia.”

Fakaaliga 1:17

I te kō kiteaga o ia, oi fakapakū ai au ki tafa o ona vae e vē he tino kua oti. Kae kua tuku mai tona lima taumatau ki oku luga ma lea vē mai, “Ia koe nahe mataku! Ko au ko te muamua ma te mulimuli.

Fakaaliga 1:4

Mai ia Ioane, ki nā Ekalehia e fitu i Ahia. Ke ia te koutou te alofa tūnoa ma te fīlēmū mai te Atua, tē e ola nei, nae ola pea lava, ma ka haele mai, vēnā foki mai nā agaga e fitu kua i mua o tona nofoāliki;

Fakaaliga 11:17

ma lea vē, “Te Aliki te Atua Hilihilikehe te Mālohi, tē e ola nei ma nae ola pea lava! Ko ki mātou e fakafetai atu auā kua kē fakaalia tō mālohi lahi ma ko tau pule kua kāmata!

Fakaaliga 15:3

ma pepehe i te pehe a Mohe, te kaukauna a te Atua, ma te pehe a te Punuamāmoe: “Te Aliki te Atua Hilihilikehe te Mālohi, kai te uiga kehe ma te gali o au gāluega! Te Tupu o mālō, kai te hako ma te tonu o nā mea e kē faia!

Fakaaliga 16:14

Ko nā agaga iēnei o nā tēmoni e ki lātou faia nā vāvega. E olo ki tupu o mālō uma o te lalolagi, ke fakamāopoopo mai mo te taua i te Aho tāua lahi o te Atua Hilihilikehe te Mālohi.

Fakaaliga 16:7

Oi lagona ai e au he leo mai te fata faitāulaga e lea vē, “Io, te Aliki te Atua Hilihilikehe te Mālohi, te moni ma te tonu ko o au fakamahinoga!”

Fakaaliga 19:15

E hau i loto o tona gutu he pelu kakaha, ka fakatōkilalo ai e ia nā mālō. Ka pūlea e ia ki lātou ma te fakahāuā, ma ka holi e ia i ona vae nā fuāvine i loto o te tanoa tatau vine o te tōkahā o te Atua Hilihilikehe te Mālohi.

Fakaaliga 19:6

Oi kō lagona ai he leo o he kaifenua, e vē ko te gugulu o he tai galu lahi, e vē ko te gāpāpā o nā tāgulu. Na lagona atu e au ki lātou e lea vē, “Ke vīkia te Atua! Auā ko te Aliki to tātou Atua Hilihilikehe te Mālohi, ko ia ko te Tupu!

Fakaaliga 2:8

“Tuhi vēnei ki te agelu o te Ekalehia i Himuna: “Ko te fekau tēnei mai tē e takua ko te muamua ma te mulimuli, na mate kae na toe ola mai.

Fakaaliga 21:22

E hēki kitea e au he mālumalu i te kakai, auā ko tona mālumalu ko te Aliki te Atua Hilihilikehe te Mālohi, ma te Punuamāmoe.

Fakaaliga 21:6

Ma na lea vē, “Kua taunuku nā mea uma iēnei! Ko au ko te Alefa ma te Ōmeka, te kāmataga ma te fakaikuga. Ko ai lava e fia inu, ka fōki e au ki ei e aunoa ma he totogi, te vai mai te vaipuna e maua ai te vai o te ola.

Fakaaliga 22:13

Ko au ko te Alefa ma te Ōmeka, te muamua ma te mulimuli, te kāmataga ma te fakaikuga.”

Fakaaliga 4:8

Ko nā meaola takitahi e taki ono o lātou kapahau, ma e tumu o lātou tino i nā pukāmata e fakatāmilo ke pa ki lalo o nā kapahau. I te pō ma te ao, e hē uma lele a lātou pēhega: “E paia, e paia, e paia, te Aliki te Atua Hilihilikehe te Mālohi, tē e ola nei, nae ola pea lava, ma ka haele mai.”