Epelu 12:28 - Tokelauan New Testament

²⁸ Ko ki tātou la e tatau ke fakafetai, auā e maua e ki tātou he mālō e hē mafai ke lūlūgia. Tātou fakafetai ma tāpuaki ki te Atua i he auala e fiafia ai ia, ma e mamalu lahi ma i ei te mataku;

Epelu 12:28 ပူးပေါင်းရင်းမြစ်များ

Mataio 25:34

Oi ka lea atu ai te Tupu ki nā tino i tona itū taumatau, ‘Ōmamai, koutou iēnā kua fakamanuiagia e toku Tamana! Ōmamai oi fai mo koutou te tofi ki te mālō, kua uma te hāunia mo koutou, mai te kāmataga o te lalolagi.

Luka 1:33

ma ka kavea ia ma tupu o nā lāpuna o Iakopo, ke pa ki te fakavavau; ma ko tona mālō, ka hē mafai ke fakauma!”

Loma 11:20

E hako. Na tagau kehe ona e hēki talitonu, kae ko koe e tūmau pea ona ko koe e talitonu. Ia koe la nahe fāfia, kae ke lagona e koe te mataku.

Efeho 1:6

Tātou viviki atu ki te Atua ona ko tona alofa tūnoa ma te meaalofa fōki fua mai e ia mo ki tātou — ko tona Ataliki fakapelepele.

Efeho 5:10

Taumafai ke iloa e koutou te mea e fiafia ki ei te Aliki.

Filipi 4:18

Kua maua e au te totogi kātoatoa, ma e hili atu foki ki luga — ma kua hēai lele hētahi mea e kō manakomia, talu te hau o Epafolotito ma nā meaalofa mai ia te koutou. Ko autou meaalofa e vē ni tāulaga mea manogi e ofo atu ki te Atua, ma e talia ma fiafia ia ki ei.

Epelu 10:19

Kua ia te ki tātou la, te kau uho, te haolotoga ke olo ai ki loto o te Nofoaga e Hili te Paia, e ala i te mate o Iehu.

Epelu 13:15

E tatau ai la ke ofo ake pea lava e ki tātou he tāulaga ki te Atua e ala ia Iehu, he tāulaga e ofo ake i nā laugutu kāfai ki tātou e lea vē, “ko ia ko to tātou Aliki.”

Epelu 3:6

Ko Keliho te Ataliki o te Atua, e fakamāoni i tona tūlaga ko te takitaki o te fale o te Atua. Ko ki tātou ko te fale o te Atua kāfai e tūmau pea to tātou loto mākeke ma te talitonu, ki te mea e fakamoemoe ki tātou ki ei.

Epelu 4:16

Ke ia te ki tātou la te loto mākeke, ma fakatafapili atu ki te Atua i tona nofoāliki, e i ei ai te alofa tūnoa. Ka maua ai e ki tātou i kinā, te alofa fakahao ma te alofa tūnoa ke fehoahoani ki a te ki tātou, i nā taimi e manakomia ai e ki tātou.

Epelu 5:7

I te ōlaga o Iehu i te lalolagi nei, nae tatalo ma ole atu ma te leo lahi ma te maligi o loimata ki te Atua, tē e ia mafaia oi fakahao ia mai te mate. Ona ko Iehu e loto maulalo ma na ofo kātoatoa atu ia mo te Atua, na tali mai ai ki ei te Atua.

1 Petelu 1:17

E lea koutou ko te Atua ko te koutou Tamana, kae ko te Atua e hē fakapito ki he tino. E fakamahino e ia ia tagata uma fua ki nā mea a ki lātou kua fai. Ko te mea ia, i te taimi kātoa e aumau ai koutou i te lalolagi nei e vē ni tino kua fakaaunukua, e tatau koutou ke ola mātataku i te Atua.

1 Petelu 2:20

Auā he ā te aogā kāfai koutou e onohai i te kini e tatau mo koutou ona ko nā mea hehē a koutou nae fai? Kae kāfai koutou e onohai i nā puapuagā e tuha lava pe nae koutou faia nā mea e lelei, ka koutou mauagia te fakamanuiaga mai te Atua ona ko te mea tēnā.

1 Petelu 2:5

Ōmamai ko koutou foki ni fatu e ola pea lava, ke fakaaogā koutou i te fauga o te mālumalu fakateagaga, te mea ka tautua ai koutou e vē ni ohitāulaga paia, ke ofo atu nā tāulaga e fiafia ki ei te Atua e ala ia Iehu Keliho.

Fakaaliga 1:6

ma na ia faia ki tātou ma ohitāulaga i tona mālō ke tautua ki tona Atua ma tona Tamana. Ke ia Iehu Keliho te vīkiga ma te mana ke pa ki te fakavavau lava! Amene.

Fakaaliga 15:4

Te Aliki, ko ai nei te ka hē mataku ia te koe? Ko ai nei te ka hē vīkia e ia tō igoa? Ko koe lava oioti te paia. Ko mālō uma ka ōmamai ma ifo atu ki a te koe, auā kua kitea e tagata uma te tonu o tau fakamahinoga.”

Fakaaliga 5:10

Kua fakatū e koe ki lātou ma mālō o ohitāulaga, ke kaukauna ki to tātou Atua, ma ka pule ki lātou i te lalolagi.”