Efeho 4:13 - Tokelauan New Testament

¹³ Oi ko ki tātou la ka fuhia fakatahi ke fai ma tino e tahi i to tātou talitonuga ma to tātou iloa o te Ataliki o te Atua; ka kavea ki tātou ma tagata kua kātoatoa te mātutua i to tātou talitonu ki te Atua, e vē foki lava ko Keliho.

Efeho 4:13 ပူးပေါင်းရင်းမြစ်များ

Mataio 11:27

“Kua fōki mai e toku Tamana ki a te au nā mea uma lele. E hēai he tino e ia iloa te Ataliki vaganā te Tamana, ma e hēai foki he tino e ia iloa te Tamana vaganā te Ataliki ma ki lātou kua filifilia e te Ataliki ke fakailoa ki ei.

Ioane 1:16

Ona ko te lahi o tona alofa tūnoa, kua fakamanuia ai ki tātou uma e ia, ma maua ai e ki tātou nā fakamanuiaga hautualahi.

Ioane 16:3

Ka fai e nā tino nā mea iēnei ki a te koutou, auā ko hēki ki lātou iloa te Tamana pe ko au.

Ioane 17:21

Ko au e tatalo ke mafai ki lātou uma ke tahi. Te Tamana, ke tahi ko ki lātou ke vē he tino e tahi, ma ke tahi ki lātou ma ki mātou e vē oi tahi koe ma au ma tahi au ma koe. Ke tahi ki lātou kae ke talitonu ai te lalolagi ko au na uga mai e koe.

Ioane 17:3

Ma ko te uiga o te ola fakavavau, ko te iloa o koe, te Atua moni e tokatahi, ma te iloa o Iehu Keliho, tē na uga mai e koe.

Ioane 6:69

Ko ki mātou kua talitonu ki a te koe, ma kua ki mātou iloa ko koe ko te Tokatahi Paia na hau mai te Atua.”

Gāluega 4:32

Kua gātahitahi ia loto ma māfaufau o te vāega kua talitonu ki a Iehu. E hēai lele he tino o ki lātou na lea ko ana meatōtino e a ia lava, kae na ki lātou fakaaogā fakatahi nā mea uma lele a ki lātou tau tokatahi.

1 Kolinito 1:10

I te igoa o to tātou Aliki ko Iehu Keliho, e lea atu ai au ki a te koutou oku uho, ma toku loto naunau, ko koutou ke tahi i nā mea e tautatala ai koutou, kae ke nahe i ei ai ni fevaevaeakiga ia te koutou. Ke tahi kātoatoa koutou, tahi te manatu ma tahi te fakamoemoe.

1 Kolinito 14:20

Te kau uho, koutou nahe vē ni tamaiti i outou manatunatuga; koutou ke vē ni pepe e tuha ai ma nā mea e kino, kae ke vē ni tino mātutua e tuha ai ma nā manatunatuga o koutou.

1 Kolinito 2:6

Kae e folafola e au he fekau e uiga ki te poto, ki nā tino kua mautū i te fakateagaga. E hē ko te poto o te lalolagi nei, pe o nā mālohiaga e pūleagia te lalolagi — nā mālohiaga e fano e uma te lātou pule.

2 Kolinito 4:6

E lea mai nā Tuhituhiga paia, “Na fakatonu e te Atua te mālamalama ke huhulu i loto o te pōuliuli.” Nei kua fakahuhulu e te Atua tona mālamalama i loto o nā loto o ki tātou, ke iloa ai e ki tātou tona huhulu pupula i fōliga o Keliho.

Kalatia 4:19

Taku fānau pele! E vē o na lagona nā tīgā e he mātua kāfai ka fānau, e vēnā foki oi lagona e au nā tīgā, ke pa lava ki te taimi e kavea ai koutou ke vē ko Keliho.

Efeho 1:17

ma ko au e fakatoga ki te Atua o to tātou Aliki ko Iehu Keliho, te Tamana e uiga kehe tona mamalu, ke fōki atu ki a te koutou te Agaga, tē ka maua ai e koutou te mālamalama, ma fakailoa atua ki a te koutou te Atua, kae ke koutou iloa ai ia.

Efeho 1:23

Ko te Ekalehia ko te tino ia o Keliho, ko te kātoatoaga ia o tē e ia fakakātoatoagia ia mea uma lele i ho he mea.

Efeho 2:15

Na fakahēai e ia te Tūlāfono Iutaia vēnā ma ona fakatonuga ma poloakiga, kae ke mafai ai ke tuku fakatahi ia tagata Iutaia ma tagata nukukehe ke vē he tino e tahi i te māfutaga ma ia, ma maua ai te fīlēmū.

Efeho 4:12

Na fai e ia te mea tēnei ke hāunia ai ia tagata uma o te Atua mo nā gāluega faka-Kelihiano, kae ke ati ake ai te tino o Keliho.

Efeho 4:3

Ko te Aliki te kua maua ai e koutou te tahi. Taumafai la ki te mea e gata ai te koutou mafai, ke tūmau pea te tahi o koutou. Ko te auala e mafai ai te mea tēnei, ko te fuhia fakatahi o koutou i te fīlēmū.

Efeho 4:5

E tahi te Aliki, tahi te talitonuga, tahi te papatihoga;

Filipi 3:10

Oioti lava la te mea e fofou au ki ei, ke iloa e au ia Keliho ma te mana o tona toetū, ke puapuagā au e vē ko ia, ma ke oti foki au e vē ko ia

Filipi 3:8

E hē nā ko nā mea iēnā oioti. Ia te au, e hēai lele he mea e hili atu te tāua i lo te iloa e au o Keliho Iehu toku Aliki. Kua tīaki e au nā mea uma lele, auā ia te au, ni otaota uma nā mea iēnā. Oioti lava te mea e fofou au ke kō maua ko Keliho,

Kolohe 1:28

Oi e folafola la e ki mātou te fekau e uiga ki a Keliho, ki tagata uma. E lapataki ma akoako e ki mātou e ala i te poto kua ki mātou mauagia, kae ke mafai ai ke kaumai ki lātou tau tokatahi ki mua o te Atua, kua āmio fakatagata matua i te māfutaga ma Keliho.

Kolohe 2:2

E fai e au te mea tēnei kae ke fakatumulia ai ki lātou i te loto mākeke ma fuhia fakatahi i te alofa, ma lahi ai te mautinoa o ki lātou e ala i to lātou mālamalama e uiga ki te mealilo a te Atua, ko Keliho tēnā.

Epelu 5:14

Kae ko nā meakai mamafa e mo nā tino kua mātutua, kua i ei te poto māhani ma ki lātou iloa ai oi fakavahega te mea e hako ma te mea e kino.

2 Petelu 1:4

E ala i nā mea uma iēnei, kua ia fōki maia ai ki a te ki tātou nā meaalofa tāua lahi na ia folafola maia, kae ke fai tēnā ma auala ke hao ai koutou mai nā tuinanauga kino o te lalolagi e fakatāugā ai ia tagata, ma mafai ai koutou ke kavea ma tagata e faia te finagalo o te Atua.

2 Petelu 3:18

Kae ke tupu olaola pea koutou i te alofa tūnoa ma te mālamalama mai to tātou Aliki ma to tātou Fakaola ko Iehu Keliho. Ke ia te ia nā vīkiga, nei ma ke pa lava ki te fakavavau! Amene.

1 Ioane 5:20

E iloa e ki tātou ko te Ataliki o te Atua kua hau ma kua ia fakailoa maia te Atua moni. Ko ki tātou e ola i te māfutaga ma te Atua moni — i te māfutaga ma tona Ataliki ko Iehu Keliho. Ko tēnei te Atua moni, ma ko tēnei te ola e hē gata.